Yona 4:5 - AHYERƐLƐ KRONGRON

⁵ Yiti Yona fili kuro ne anu, na ɔɔtenane kuro ne eyia afiteleɛ so. Ɔbɔle asese wɔ berɛ, na ɔtenane ye bo fɔnwoo ne abo, kyɛ ɔnea bɔ ɔkɔto kuro ne ɔ.

Yona 4:5 Iomraidhean Croise

1 Ahemvo 19:13

Elia tele komviɛ ne nen, ɔfale ye ataadeɛ aguasoɛ kyekyele ye nyunu, na ofitele oogyinane nyɔboɛ bɔ wasi sua ne anoa. Berɛ, komviɛ bie bisale ye kyɛ, “Elia, w’amaneɛ wɔ wa?”

1 Ahemvo 19:9

Oodwuli nyɔboɛ bɔ wasi sua bie anu wɔ berɛ, na ɔlale berɛ sɔ kɔngɔen ne. Yeɛ AWURADE lale ye dwirɛ ali hyirele Elia, na obisale ye kyɛ, “Elia, w’amaneɛ wɔ wa?”

Yesaya 57:17

Ye adifuu amumuyɛɛ ti yeɛ m’ahone huli ɔ, mburale ye, mvale me nyunu mveale ye, na mvɛle yaa, nakoso ɔhɔle so lili makyebu fale ye bɔbɔ ye atee so.

Yeremia 20:9

Sɛ mekã kyɛ, “Mengɔkaye ye ko, anaa mengodwudwo wɔ ye dumaa nu ko” a, né ye dwirɛ ne ayɛ m’ahone nu kyɛ see bɔ ogye wɔ me mmowue nu ɔ. Mahyɛ me nwo so mafɛ, nakoso mengora.

Yona 1:5

Afei né ɛlɛenhanɛfoɛ nemɔ besuro. Yiti bɛ nu biala sũ frɛle ye nyameɛ, na befindini ɛlɛen ne anu nningyein beguale ɛpo ne anu, kyɛbɔ ɔkɔmaa ɛlɛen ne anu kɔyɛ nyera ɔ. Nakoso Yona de, né wadwu wahɔ ɛlɛen ne akunu dɔ paa waala hatee.

Yona 4:4

Yeɛ AWURADE buale kyɛ, “Aso ɔte paa kyɛ ɛfɛ yaa ɔ?”

Yona 4:6

Na AWURADE Nyameɛ siesiele ngomvo bakaa bie maa onyi katale Yona so, kyɛ ɔyɛ fɔnwoo ɔkata ye ti so, ná ɔye ye ofi ye amaneɛ ne anu. Yiti Yona nye gyele ngomvo bakaa ne anwo paa.