Yohane 9:22 - AHYERƐLƐ KRONGRON

²² Ye awofoɛ hane sɔ, ofikyɛ né besuro Yudafoɛ nemɔ; ɔnate kyɛ né Yudafoɛ nemɔ bayɛ adwene kyɛ, sɛ ebie kã ye pefee kyɛ ye ole Kristo ne a, bekotu ye bekofi nyianu sua nu berɛ.

Yohane 9:22 Iomraidhean Croise

Anyandera 29:25

Esuro sona a, né asua wɔ nwo ngaen, nakoso ebiala bɔ ɔfa ye wora wura AWURADE nu ne de, ye nwo sonn.

Yesaya 51:12

“Me, me yeɛ mekyekye ɛmɔ wora ɔ, na wɔ, nzikyɛ sona ole wɔ, bɔ esuro kuro sona bɔ owu ɔ, ɔne sona awa bɔ bɛyɔle ye kyɛ ndire ɔ;

Yesaya 51:7

“Ɛ́mɔtie me, ɛmɔ bɔ ɛmɔse tenenee ɔ, maen bɔ me mmeraa wɔ b’ahone nu ɔ; nnɛma ɛmɔsuro mmenia animguaseɛ bɔ begua ɛmɔ ɔ, yeɛ nnɛmɔma bɛ nzoaapepɛlɛ ne obu ɛmɔ abasa nu.

Yesaya 57:11

Nwa yeɛ ye nwo yɛ suro bɔ esuro ye ɔ, bɔ yiti anga nahorɛ ɔ, bɔ yiti angaye me ɔ, bɔ yiti andwene me nwo ɔ? Aso nna konn yeɛ mayɛ fi tetetete ɔ, bɔ ɔnate sɔ ati enzuro me ɔ?

Luka 6:22

“Ɛmɔanya saleɛ, wɔ mmerɛ bɔ mmenia bɛpɔ ɛmɔ, bɛyɛ ɛmɔ nyeyemuɛ, bɛbɔ ɛmɔ alapaa, ná bɛpo ɛmɔ dumaa kyɛ ɔte musue nikye, ɔnate Sona Awa ne ati.

Yohane 1:19

Na adanzeɛ he yeɛ Yohane lili ɔ, mmerɛ bɔ Yudafoɛ bɛsomane asɔfo mɔ ne Lewifoɛ befili Yerusalem maa beebisale ye kyɛ, “Nwa ole wɔ?”

Yohane 16:2

Bekotu ɛmɔ bekofi nyianu sua mɔ nu. Ye po mmerɛ bie ɔ́ba, bɔ ebiala bɔ okohũ ɛmɔ ne, ɔkɔdwene kyɛ ɔyɔ sɔ fa so Nyameɛ.

Yohane 19:38

Na nziɛ ye, Yosef bɔ ofi Arimatea, bɔ ɔte Yesu suaniɛ, bɔ Yudafoɛ nwo suronyi ti ɔfeafea ye nwo ɔyɔ sɔ ɔ, ɔɔsrɛle Pilato kyɛ ɔma ye ate ma ɔye Yesu fuin ne, na Pilato mane ye ate. Yiti ɔwale ɔɔyele ye fuin ne.

Yohane 20:19

Na sɔ kyẽa ne ala nɔsoa, bɔ ɔte dapɛn ne anu kyẽa bɔ oli moa ne, Yudafoɛ nemɔ nwo suronyi ti, asuafoɛ nemɔ totole anoa nemɔ anu wɔ nekaa bɔ bɛboale bɛ noa ne, na Yesu wale oogyinane b’afia berɛ, na osele bɛ kyɛ, “Asomdwee hã ɛmɔ oo!”

Yohane 7:13

Nakoso né besuro Yudafoɛ nemɔ, yiti ebiala anye ye nyunu wanga ye nwo dwirɛ.

Yohane 9:18

Nakoso Yudafoɛ nemɔ de, banne ye nwo dwirɛ ne banni, kyɛ né ye nye asi, na afei de onwu nikye ɔ, kɔpem kyɛ bɛfrɛle biaa bɔ onwu nikyee n’awofoɛ,

Yohane 9:21

nakoso kyɛbɔ osi yɛle bɔ afei onwu nikyee ye de, yɛnze; yeɛ yɛnze bɔ ɔtele ye nye ne ɔ. Ɛ́mɔbisa ye, wanyi, na ye bɔbɔ okodwudwo kɔma ye nwo!”

Yohane 9:34

Na bebuale ye kyɛ, “Bɛwole wɔ bɛtole bɔne nu buroburoburo, na afei wɔ yeɛ ekyirekyire yɛ ɔ?” Na bɛfoane ye befili nyianu sua ne anu.

Yohane 9:35

Na Yesu tele kyɛ bafoa ye bafi nyianu sua ne anu, na onwuni ye nen, obisale ye kyɛ, “Ede Sona Awa ne di anaa?”

Asomafoɛ 4:18

Yiti bɛfrɛle bɛ maa besa bɛwale dwaa ne anu, na bɛberale bɛ kitii kyɛ atee biala nne berɛ kyɛ bekodwudwo anaakyɛ bɛkɔyɛ ngyerɛkyerɛ wɔ Yesu dumaa nu ɔ.

Asomafoɛ 5:13

Na bɛ bɔ né bɛnne agyidifoɛ fekue ne anu ne, ebiala anzi ye adwene pi kyɛ ɔkɔboka bɛ so ɔ, ɔwɔ nu kyɛ né mmenia ka bɛ nwo dwirɛ paa de.

Asomafoɛ 5:40

Yiti bɛfale ye foɛtulɛ ne. Na bɛfale asomafoɛ nemɔ besa bɛwale badwa nu berɛ nen, befini bɛ mbire, na bɛkanzole bɛ kitii kyɛ nnɛma bedwudwo wɔ Yesu dumaa nu, na bɛyakyili bɛ maa bɛhɔle.

Nyekyire 21:8

Na bɛ bɔ bɛte serɛ, bɛ bɔ benne benni, akyiwadeɛyɔlɛfoɛ, awudifoɛ, adwamanbɔlɛfoɛ, ngonyaayelɛfoɛ, bosoensolɛfoɛ ne ngondombofoɛ amukoraa de, abura bɔ see ne sɔfe begye wɔ nu ne anu yeɛ ɔkɔyɛ bɛ bue deɛ ɔ, na ewue bɔ ɔtɔ so nyɔ ne ɛhe.”