Yohane 7:37 - AHYERƐLƐ KRONGRON

³⁷ Na kyẽa bɔ ɔpɛ ye bo, bɔ ɔte aluolue ne anu kyẽa piri ne, Yesu dwɔso gyinane, na ɔteane nu hane kyɛ, “Sɛ nzuhɔen ku ebie a, ɔbra me berɛ ɔɔno nzue oo.

Yohane 7:37 Iomraidhean Croise

Nehemia 8:18

Na daa biala, ofi kyẽa bɔ oli moa ne kɔpem kyẽa bɔ ɔpɛ ye bo ne, ɔkengale Nyameɛ mmeraa nwomaa ne. Belili aluolue ne ɛlɛsoo. Na ɛlɛbɔtwɛ ne aso, bɛyɔle nyianu krongron kyɛbɔ nhyehyɛleɛ ne te ne.

Edwein 143:6

Metrɛ me sa nu mekyire wɔ; wɔ nwo nzuhɔen ku me kra kyɛ aseɛ bɔ wayɛ wosee ɔ. Sela

Edwein 42:2

Me kra wora dɔ Nyameɛ, ye wora dɔ Nyameɛ teasefoɛ ne. Kyinzu yeɛ ngɔwa ngoodwu Nyameɛ nyunu ɔ?

Edwein 63:1

Ao Nyameɛ, wɔ yeɛ ɛte me Nyameɛ ɔ, mepena wɔ serɛserɛ; me kra wora adɔ wɔ, me nwonaen ayɛ hodwoo ɔpena wɔ kyɛ aseɛ wosee katerepee bɔ ɔpena nzue ɔ.

Anyandera 1:20

Nworɛ tea nu serɛserɛ wɔ mmorɔnoɛ mɔ so, wama ye komvi so wɔ dwaa nemɔ aso.

Anyandera 8:1

Aso nworɛ ɔndea nu mvrɛ? Aso ndeaseɛ ɔmma ye komvi so ndwudwo?

Anyandera 8:17

Bɛ bɔ bekuro me dwirɛ ne, mekuro bɛ dwirɛ, na bɛ bɔ bɛ nye boro bɛpena me ne, benwu me.

Anyandera 8:3

wɔ kuro berɛ pambim ne anwo, ɔtea nu wɔ tiwaa berɛ pambim ne anu kyɛ,

Anyandera 9:3

Wasoma ye afaneɛ nemɔ, ɔɔteane nu wɔ kuro berɛ mmokaa nemɔ aso kyɛ,

Edwein Nu Dwein 5:1

Nniɛma brasua, m’atɔmvorɛ braa, mawa me turo ne anu, méboaboa me korobo ne m’ayirefona ne noa, médi me woɛ bɔ ɔwɔ ye nzasameɛ nu ɔne me woɛ ne, méno me nzaa ne me nyɔfonesue ne. Me mmango mɔ, ɛ́mɔdidi ná ɛ́mɔno, adɔfo mɔ, ɛ́mɔno ma ɛmɔ ko yi.

Yesaya 12:3

Ɛmɔkɔfa anigye yeɛ bɛkɔto nzue bekofi ngoalelɛ abura mɔ nu ɔ.

Yesaya 40:2

Kã aworakyekyerɛ dwirɛ kyire Yerusalem, ná bɔ ye dawure kyire ye, kyɛ ye ngoaasolɛ mmerɛ ne wawa ayieleɛ, kyɛ mafa ye amumuyɛɛ ne mahyɛ ye; ofikyɛ ye bɔne ne, wanya ye mukoraa nwo akatuaa mmɔhoɛ nyɔ wafi AWURADE berɛ.”

Yesaya 40:6

Komviɛ bie nwa, “Tea nu kã!” Na mmisale kyɛ, “Nzikyɛ yeɛ ndea nu nga ɔ?” Anwoɔnaen biala te ndire, na ye anwonyemene amukoraa te kyɛ nyerɛen bɔ ɔwɔ eburo ɔ.

Yesaya 44:3

Ofikyɛ ngohwie nzue ngogua aseɛ bɔ nzuhɔen ku ye ne aso, yeɛ ngɔma asue mmaa mmaa kɔwa aseɛ wosee ne aso; ngohwie me Sunzum ngogua wɔ boso ama so, ná mahwie me saleɛ magua wɔ mma so.

Yesaya 55:1

“Huuu, ɛmɔ bɔ nzuhɔen ku ɛmɔ ee, ɛmɔbra nzue ne anwo oo; ɛmɔ bɔ ɛmɔlle sikaa po ne, ɛmɔbra bɛɛtɔ ná beli oo! Ɛmɔbra bɛɛtɔ nzaa ne nyɔfonesue bɔ ɛmɔngɔfa sikaa yeɛ bɛkɔtɔ ɔ, bɔ nyɔboɛ biala ɔlla so ɔ.

Yesaya 55:3

Ɛ́mɔyɛ asoɛ bétie, ná ɛmɔbra me berɛ; ɛ́mɔtie, amaa ɔnate so ɛmɔ kra anya ngoa. Me ne ɛmɔ yɛkɔyɛ apam afebɔɔ, bɔ ɔte me ɔdɔ bɔ onni ngasi bɔ nne ye ma Dawide ne.

Yesaya 58:1

“Tea nu serɛserɛ, nnɛkã wɔ komvi ase, ma wɔ komvi so kyɛ totorobɛndo, kã me maen ye mmeraatolɛ kyire ye, ɔne Yakob bosofoɛ bɛ bɔne kyire bɛ.

Yeremia 16:19

Ao AWURADE, m’anwoserɛ ne m’anwoserɛ afealeɛ, me nwo adwaabɔlɛ nekaa wɔ amaneɛnwunɛ kyẽa nu, wɔ berɛ yeɛ amaen maen bekofi aseɛ noa kɔkã ye noa bɛkɔwa bɛkɔɔhã kyɛ, “Amba, ngondombo yeɛ ɔte anwonyadeɛ bɔ yɛ nana mɔ benyane ye ɔ: ɔne nningyein mbaen mbaen bɔ mvasoɛ nne so ɔ.

Yeremia 2:2

“Kɔ ná kɔbɔ ye dawure kyire Yerusalem kyɛ, AWURADE nwa nyoo: Mekaye wɔ ndaluwa nu anwofama ne, w’atɔmvorɛ mmerɛ nu ehurolɛ ne, mmerɛ bɔ elili me si wɔ ɛserɛ so, wɔ aseɛ bɔ né belluale so hwee ne aso ne.

Hesekiel 47:9

Na ɔkɔwa kyɛ, nekaa biala bɔ asue ne kɔtengyɛ kɔfa ne, abɔdeɛ biala bɔ ngoa wɔ ye nu bɔ ɔkekã ye nwo ne, okonya ngoa. Asue nemɔ nu naen kɔsone pee, ofikyɛ sɔ asue he kɔtengyɛ kɔhɔ dɔ, na ɔkɔsa ɛpo nzue ne anwonyerɛ. Yiti nekaa biala bɔ asue ne tengyɛ kɔ ne, nikyee biala nya ngoa.

Lewitikɔso 23:36

Ɛlɛsoo yeɛ ɛ́mɔbɔ see so afɔleɛ bɛ́ma AWURADE ɔ; na ye ɛlɛbɔtwɛ ne aso, ɛ́mɔyɛ nyianu krongron ná ɛ́mɔbɔ see so afɔleɛ bɛma AWURADE; ɔte nyianu krongron; nnɛma ɛmɔyɔ adwuma biala.

Lewitikɔso 23:39

“Afei, bosome nzoo ne, ye kyẽa bɔ ɔtɔ so buru ne nnu ne, mmerɛ bɔ ɛmɔafa aseɛ ne aso aleɛ bayie ne, ɛ́mɔli AWURADE aluolue ne ɛlɛsoo. Kyẽa bɔ oli moa ne, ɔne ɛlɛbɔtwɛ ne, ɛ́mɔli afofi bele bɛ nwome bɔkɔɔ.

Mika 6:9

AWURADE komvi tea nu frɛ kuro ne, na bɛ bɔ besuro wɔ dumaa ne yeɛ bɛte nworɛfoɛ ɔ. Ɛ́mɔtie asohwenɛ ne, ɔne ye bɔ wahyehyɛ wato berɛ ne.

Sakaria 9:15

Asafo AWURADE kɔbɔ bɛ nwo waen, bekoli ngonim, bekohwi bɛkɔfa taya nyɔboɛ so, bɛkɔno, na bɛkɔbɔ ese kyɛ ebiaa babobo ne, bɛ ko koyi kyɛ talie, kyɛ afɔleɛ bokyea ndweasoɛ nemɔ.

Numeri 29:35

Ye ɛlɛbɔtwɛ ne aso, odi kyɛ ɛmɔyɛ nyianu krongron; nnɛma ɛmɔyɔ adwuma biala.

Mateo 11:28

“Ɛmɔ amukoraa bɔ ɛmɔayɔ adwuma bafɛ ná bafa adesoa nonɛnonɛ basoa ɛmɔ ne, ɛmɔbra me berɛ, na ngɔmaa ɛmɔkole ɛmɔ nwome.

Mateo 3:3

Ye yeɛ ngɔmhyɛlɛniɛ Yesaya hane ye nwo dwirɛ kyɛ, “Ebie tea nu wɔ ɛserɛ so kyɛ, Ɛ́mɔsiesie Awurade atee, ná ɛ́mɔma ye atimbire tengyɛ.”

Mateo 5:6

“Bɛ bɔ tenenee nwo hɔen ne nzuhɔen ku bɛ ne banya saleɛ, ofikyɛ bɛ yeɛ Nyameɛ kɔma bɛ ko koyi ɔ.

Yohane 1:23

Na obuale kyɛ, “Me ole komviɛ bie bɔ ɔtea nu wɔ ɛserɛ so kyɛ, ‘Ɛ́mɔtengyɛ Awurade atee,’ kyɛbɔ ngɔmhyɛlɛniɛ Yesaya hane ne.”

Yohane 14:6

Na Yesu buale ye kyɛ; “Me ole atee ne, nahorɛ ne, ɔne ngoa ne; ebiala mma Baba ne berɛ, sana ɔnate me so.

Yohane 4:10

Na Yesu buale ye kyɛ, “Sɛ ɛse Nyameɛ akyɛdeɛ ne, ɔne bɔ ɔkã kyire wɔ kyɛ, ‘Ma me nzue ne bie ma nno’ a, ahaa asrɛ ye, ná wama wɔ ngoa nzue.”

Yohane 4:11

Na braa ne sele ye kyɛ, “Yɛ mene, elle nikyee bɔ bɛfa bɛto nzue ɔ, yeɛ abura ne anu koso wale; yiti nisua yeɛ ekonya sɔ ngoa nzue ne kofi ɔ?

Yohane 4:14

Nakoso ebiala bɔ ɔkɔno nzue bɔ ngɔma ye bie ne de, nzuhɔen ngohũ ye le. Na nzue bɔ ngɔfa ngɔma ye ne, ɔkɔyɛ nzue abura wɔ ye nu bɔ opu kɔ daa ngoa nu ɔ.”

Yohane 5:40

Nakoso ɛmɔnguro kyɛ ɛmɔkɔwa me berɛ, ná ɛmɔanya ngoa.

Yohane 6:35

Na Yesu sele bɛ kyɛ, “Me ole ngoa paanoo ne; ebiala bɔ ɔba me berɛ nen, ɛhɔen ngohũ ye le; yeɛ ebiala bɔ ode me di ne, nzuhɔen ngohũ ye le.

Yohane 6:37

Bɛ bɔ Baba ne ɔfa bɛ ma me ne, bɛ mukoraa bɛkɔwa me berɛ; na ebiala bɔ ɔba me berɛ ne, mengɔto ye ngɔye le.

Yohane 6:55

Ɔnate kyɛ me nwonaen te aleɛ amba, yeɛ me mogya te anonneɛ amba.

Yohane 7:28

Na Yesu gu so bɔ ɔyɛ ngyerɛkyerɛ wɔ asɔneyɛɛ sua ne anu nen, ɔteane nu hane kyɛ, “Ɛmɔse me, yeɛ ɛmɔse nekaa bɔ mvi ɔ. Nakoso nna me bɔbɔ me tumi so yeɛ mva mmale ɔ; na bɔ ɔsomane me ne te nahorɛniɛ, na ɛmɔnze ye.

1 Korintofoɛ 10:21

Ɛmɔngɔhora bɛngɔno Awurade kulie noa, ná ɛmɔano sunzummɔne mɔ koso bɛ kulie noa. Ɛmɔngɔhora bengodidi Awurade poen so, ná ɛmɔasa badidi sunzummɔne mɔ bɛ poen so.

1 Korintofoɛ 10:4

na bɛ mukoraa bɛnone sunzum nu anonneɛ komapɛ ne ala. Ofikyɛ, sunzum nu Nyɔbotaen bɔ né oli bɛ si ne, nu nzue yeɛ bɛnone ɔ, na sɔ Nyɔbotaen ne ole Kristo.

1 Korintofoɛ 11:25

Sɔ ala yeɛ bedidi beyiele nen, ɔfale kulie ne, na ɔhane kyɛ, “Kulie he te apam foforɛ me mogya nu; mmerɛ biala bɔ ɛmɔkɔno ne, ɛ́mɔyɔ he bɛ́fa bɛ́kaye me.”

1 Korintofoɛ 12:13

Ofikyɛ yɛ mukoraa: Yudafoɛ oo, Helafoɛ oo, ngoaa oo, nnehyeɛ oo, Sunzum komapɛ ne ala yeɛ bɛfa bɛbɔle yɛ asu maa yɛɛyɛle nipadua ko ɔ, na Sunzum komapɛ ne ala yeɛ wahwie wagua yɛ mukoraa yɛ so ɔ.

Ɛfesofoɛ 5:18

Nnɛma ɛmɔbo nzaa, ofikyɛ ɔne basabasayɔlɛ yeɛ bɛnate ɔ; na mmom ɛ́mɔma Sunzum ne oyi ɛmɔ tɛkyɛ.

Nyekyire 21:6

Na osele me kyɛ, “Wayie! Me ole Alfa ne Omega, Ahyɛaseɛ ne Ayieleɛ. Ebiala bɔ nzuhɔen ku ye ne, ngɔfa ngoa asue ti nu nzue ngɔma ye kyɛkyɛ.

Nyekyire 22:1

Afei ohyirele me ngoa nzue asue bɔ ye nye te kaenn kyɛ neanu, bɔ ɔtengyɛ fi Nyameɛ ne Boaen Ba n’ahennie bia ne anu

Nyekyire 22:17

Na Sunzum ne ne atɔmvorɛ braa ne nwa, “Bra!” Ma ebiala bɔ ɔte ne ɔhã kyɛ, “Bra!” Ma ebiala bɔ nzuhɔen ku ye ne ɔbra. Ma ebiala bɔ okuro ne oole ngoa nzue ne mbaen.