Yohane 7:28 - AHYERƐLƐ KRONGRON

²⁸ Na Yesu gu so bɔ ɔyɛ ngyerɛkyerɛ wɔ asɔneyɛɛ sua ne anu nen, ɔteane nu hane kyɛ, “Ɛmɔse me, yeɛ ɛmɔse nekaa bɔ mvi ɔ. Nakoso nna me bɔbɔ me tumi so yeɛ mva mmale ɔ; na bɔ ɔsomane me ne te nahorɛniɛ, na ɛmɔnze ye.

Yohane 7:28 Iomraidhean Croise

Edwein 9:10

Na bɛ bɔ bɛse wɔ dumaa ne, bɛfa bɛ wora bewura wɔ nu, ofikyɛ wɔ, ao AWURADE, bɛ bɔ bɛpena wɔ si atee ne, anye wɔ sa amvi bɛ bo.

Yeremia 31:34

Na ebiala ngohyirehyire obiɛngo ko, yeɛ ebiala ngose oliɛma kyɛ, ‘Nwu AWURADE,’ ofikyɛ ofi bɛ nu kwahweabaa so bɔ ɔkwaadwu bɛ nu titire paa so, bɛ mukoraa bekonwu me, AWURADE noa dwirɛ ɛne. Ofikyɛ ngɔfa b’amumuyɛɛ ngɔhyɛ bɛ, na mengɔkaye bɛ bɔne ko.”

Yeremia 9:6

Nnakannaka nu yeɛ ɔte w’atenaleɛ ɔ! Nnakannaka ti benguro kyɛ bekonwu me ɔ, AWURADE noa dwirɛ ɛne.

Hosea 4:1

Yisraelfoɛ, ɛ́mɔtie AWURADE noa dwirɛ; ofikyɛ AWURADE ne aseɛ ne aso ama banya dwirɛ, ɔnate kyɛ nahorɛlilɛ, anwumvoinnwunɛ, ɔne Nyameɛ nwo nimdeɛ biala nne aseɛ ne aso.

Hosea 5:4

Bɛ yɔleɛ mma bɛ ate mma benza bɛmma bɛ Nyameɛ berɛ; ofikyɛ gyanderabɔlɛ sunzum wɔ bɛ nu, na bɛnze AWURADE.

Mateo 11:27

Me Baba afa nningyein amukoraa awura me sa; na ebiala nze Baa ne, sana Baba ne; yeɛ ebiala nze Baba ne, sana Baa ne ne ebiala bɔ Baa ne kuro kyɛ ɔda ye adi kyire ye ɔ.

Mateo 2:23

Na ɔhɔle kuro bie bɔ bɛfrɛ ye Nasarɛte so ɔɔtenane berɛ. Na ɛhe mane bɔ ngɔmhyɛlɛfoɛ nemɔ hane ne wale nu kyɛ, “Bɛkɔfrɛ ye Nasarɛteniɛ.”

Mateo 26:55

Na sɔ mmerɛ ne anu ala, Yesu sele ɛlɔen ne kyɛ, “Yiti ngrandɛ ne mmopura yeɛ ɛmɔfa bɛbakye me ɔ, kyɛ awerɔm awueniɛ bɔ ɛmɔba ye so ɔ? Ndenane asɔneyɛɛ sua ne anu nyɛle ngyerɛkyerɛ daa biala, nakoso ɛmɔangye me.

Luka 10:22

“Me Baba afa nningyein amukoraa awura me sa; na ebiala nze kyɛbɔ Baa ne te ɔ, sana Baba ne. Yeɛ ebiala nze kyɛbɔ Baba ne te ɔ, sana Baa ne ne ebiala bɔ Baa ne kuro kyɛ ɔda ye adi kyire ye ɔ.”

Luka 2:11

ofikyɛ ɛnɛ kyẽa ye, bawo Ngoadefoɛ bɔ ye ole Kristo, Awurade ne, bama ɛmɔ wɔ Dawide kuro.

Luka 2:39

Na beyiele nikyee biala kyɛbɔ Awurade mmeraa ne ɔte ne, besa bɛhɔle bɛ kuro Nasarɛte bɔ ɔwɔ Galilea.

Luka 2:4

Na Yosef koso, ofili Nasarɛte bɔ ɔwɔ Galilea sili nu hɔle Dawide kuro Betlehem bɔ ɔwɔ Yudea, ɔnate kyɛ né ofi Dawide awuro ne ye abusua nu.

Luka 2:51

Na ɔne bɛ besa bɛhɔle Nasarɛte, na ɔbrɛle ye nwo ase mane bɛ. Na ye maame fale edwirɛ hemɔ amukoraa siele ye ti anu.

Yohane 1:46

Na Nataneɛl bisale ye kyɛ, “Aso nikyee paa bie kɔhora kofi Nasarɛte kɔwa?” Yeɛ Filipo buale ye kyɛ, “Bra baanea.”

Yohane 10:36

né nzu ati yeɛ bɔ Baba ne ayɛ ye krongron, ná wasoma ye maa wawa wiase ne, ɛmɔkã ye nwo dwirɛ kyɛ, ‘Ahã musue dwirɛ,’ ofikyɛ ngane kyɛ, ‘Nyameɛ Awa ne ole me?’

Yohane 12:49

Ofikyɛ nna me bɔbɔ me tumi so yeɛ mefa medwudwo ɔ; na mmom Baba ne bɔ ɔsomane me ne, ye yeɛ wafa bɔ nga ɔne kyɛbɔ nzi nga ye ɔ nwo ahyɛdeɛ wama me ɔ.

Yohane 14:10

Aso enne nni kyɛ nwɔ Baba ne nu, ná Baba ne koso ɔwɔ me nu ɔ? Edwirɛ mɔ bɔ mekã mekyire ɛmɔ ne, nna me bɔbɔ me tumi yeɛ mefa mekã ɔ; na mmom Baba ne bɔ ɔte me nu ne, ye yeɛ ɔyɔ ye nnwumaa ne ɔ.

Yohane 14:31

Nakoso kyɛbɔ Baba ne fale ahyɛdeɛ mane me ne, sɔ ala yeɛ meyɔ ɔ, amaa ɔnate so ewiase anwu kyɛ mekuro Baba ne dwirɛ. Ɛ́mɔdwɔso, ɛ́mɔma yɛfi wa yɛhɔ!”

Yohane 16:3

Na bɛkɔfa sɔ dwirɛ nemɔ bekoli ɛmɔ, ofikyɛ bennya bennwuni Baba ne anaa me.

Yohane 17:25

O Baba Teneneeniɛ, wiase annwu wɔ, na me de, manwu wɔ; na ɛhemɔ banwu kyɛ wɔ yeɛ ɛsomane me ɔ.

Yohane 17:3

Na daa ngoa ne ɛhe: kyɛ bekonwu wɔ, nahorɛ Nyameɛ komapɛ ne, ɔne bɔ asoma ye ne, Yesu Kristo ne.

Yohane 3:2

Sɔ biaa ne wale Yesu berɛ kɔngɔen oosele ye kyɛ, “Rabi, yɛse kyɛ ɛte kyerɛkyerɛniɛ bɔ efi Nyameɛ berɛ ɔ; ofikyɛ ebiala ngɔhora ngɔyɔ nzɛngyerɛnneɛ hemɔ bɔ ɛyɔ ye, sana Nyameɛ boka ye so.”

Yohane 3:33

Ebiala bɔ ode ye adanzeɛ ne to nu ne, osi ye pi kyɛ Nyameɛ te nahorɛniɛ.

Yohane 5:32

Ebie wɔ berɛ bɔ odi me nwo adanzeɛ ɔ, na mese kyɛ adanzeɛ bɔ odi fa me nwo ne ɔte nahorɛ.

Yohane 5:43

Me Baba dumaa nu yeɛ mmale ɔ, nakoso ɛmɔnne me bɛndo nu; na sɛ ebie ba ye bɔbɔ ye dumaa nu a, ye de ɛmɔkole ye bɛkɔto nu.

Yohane 6:42

Na bɛhane kyɛ, “Aso nna ɛhe ole Yesu, Yosef awa ne, bɔ yɛse ye baba ne ye maame ɔ? Ɔyɛle sɛɛ bɔ afei ɔkã kyɛ, ‘Mvi nyameɛso yeɛ mmale ase ɔ?’ ”

Yohane 7:14

Na bedwuli aluoluelilɛ n’afia nen, Yesu hɔle asɔneyɛɛ sua ne anu ɔɔyɛle ngyerɛkyerɛ.

Yohane 8:14

Na Yesu buale bɛ kyɛ, “Sɛ medi me bɔbɔ me nwo adanzeɛ po a, m’adanzeɛ ne te nahorɛ; ofikyɛ mese nekaa bɔ mvi mmale ɔ, ɔne nekaa bɔ mékɔ ɔ. Nakoso ɛmɔ de, ɛmɔnze nekaa bɔ mvi mmale ɔ anaa nekaa bɔ mékɔ ɔ.

Yohane 8:16

Sɛ ye po mebua ndɛen a, me ndɛenbualɛ te nahorɛ, ofikyɛ nna me ngome yeɛ mebua ndɛen ɔ, na mmom me ne Baba ne bɔ ɔsomane me ne.

Yohane 8:19

Yeɛ bebisale ye kyɛ, “Nisua yeɛ wɔ Baba wɔ ɔ?” Na Yesu buale kyɛ, “Ɛmɔnze me, yeɛ ɛmɔnze me Baba ne koso; na sɛ ɛmɔse me a, ahaa ɛmɔkonwu me Baba koso.”

Yohane 8:26

Na nne ɛmɔ nwo dwirɛ pee mekã, ɔne ɛmɔ nwo ndɛen mebua; na bɔ ɔsomane me ne te nahorɛniɛ. Na bɔ nde mvili ye berɛ ne ala yeɛ mekã mekyire wiase ɔ.”

Yohane 8:42

Yeɛ Yesu buale bɛ kyɛ, “Sɛ ɛmɔ Baba ole Nyameɛ a, ahaa ɛmɔkohuro me dwirɛ, ofikyɛ Nyameɛ nu yeɛ mvi mmale ɔ. Mamva me bɔbɔ me tumi so yeɛ mmale ɔ, na ye yeɛ ɔsomane me ɔ.

Yohane 9:29

Yɛse kyɛ Nyameɛ dwudwo hyirele Mose, nakoso sɔ biaa he de, yɛnze nekaa bɔ ofi ɔ!”

Asomafoɛ 17:23

Ofikyɛ manate kuro ye anu, na manwu nningyein ahoroɔ bɔ ɛmɔsɔne bɛ ɔ. Manwu afɔleɛ bokyea ko bɔ bahyerɛ so kyɛ, ‘Ɛhe te nyameɛ bɔ yɛnze ye ne deɛ.’ Na bɔ ɛmɔsɔne ye nakoso ɛmɔnze ye ne, ye nwo dwirɛ yeɛ mekã mekyire ɛmɔ ye.

Romanfoɛ 1:28

Bɛpole kyɛ bekonwu Nyameɛ nwo nimdeɛ, yiti Nyameɛ pole bɛ bɔbɔ b’adwene fiɛ ne mane bɛ, maa bɛyɔle nningyein bɔ ɔmvata ɔ.

Romanfoɛ 3:4

Dabida! Ɔwɔ nu kyɛ kuro sona biala te ngondomboniɛ de, nakoso Nyameɛ de ɔtte sɔ, odi nahorɛ, kyɛbɔ bahyerɛ kyɛ, “Kyɛbɔ bekonwu kyɛ wɔ noa dwirɛ te nahorɛ, na sɛ bebua wɔ ndɛen a, ali be ɔ.”

2 Korintofoɛ 1:18

Na kyɛbɔ Nyameɛ di nahorɛ ngome ye de, yɛnga “Yoo” na yasa yahã “Daabi” yahyire ɛmɔ.

2 Korintofoɛ 4:6

Ofikyɛ Nyameɛ bɔ ɔmane kanea fili awosii nu tale ne, wata hyireinn wɔ y’ahone nu, kyɛ Nyameɛ animnyam nwo nimdeɛ kanea bɔ ɔwɔ Yesu Kristo nyunu ne.

Tito 1:2

daa ngoa nwo anyelasoɛ nu, ngoa bɔ Ɛdangama Nyameɛ bɔ ɔmbɛ ngondombo ne ɔfa hyɛle bɔ koraka yeɛ ɔbɔ aleɛ ɔ;

Hebrifoɛ 6:18

Yiti ɔnate nningyein nyɔ bɔ ɔnzesã, bɔ okyire kyɛ Nyameɛ ngɔhora ngɔpɛ ngondombo ne wamaa yɛ bɔ yanwati yaafea ye nu ne yanya nguraenhyɛlɛ mmorosoɛ, na yasɔ anyelasoɛ bɔ ɔla yɛ nyunu ne anu yé.

1 Yohane 5:10

Yiti ebiala bɔ ode Nyameɛ Awa ne di ne, ole sɔ adanzeɛ ne wɔ ye ahone nu. Nakoso ebiala bɔ onne Nyameɛ nni ne, ɔma Nyameɛ yɛ ngondomboniɛ, ofikyɛ onne adanzeɛ bɔ Nyameɛ wali wafa Ɔwa ne nwo nni.

1 Samuel 2:12

Eli mma nemɔ, né bɛte busuefoɛ mmenia. Né bɛmva AWURADE bɛnyɛ huu;