Yohane 3:3 - AHYERƐLƐ KRONGRON

³ Na Yesu buale ye kyɛ, “Nahorɛ nu paa, mekã mekyire wɔ kyɛ: Ebiala ngɔhora ngonwu Nyameɛ ahennie ne, sana bawo ye foforɛ.”

Yohane 3:3 Iomraidhean Croise

Yeremia 5:21

“Ɛ́mɔtie ɛhe, mmenia ngwaseafoɛ bɔ ɛmɔlle adwene ɔ, mmenia bɔ bele anyeɛ, nakoso bennwu nikye ɔ, bɔ bele asoɛ, nakoso bɛnde dwirɛ ɔ.

Hesekiel 36:26

Ngɔma ɛmɔ ahone foforɛ, ngɔfa sunzum foforɛ ngowura ɛmɔ nu; ngɔye nyɔboɛ ahone bɔ ɔwɔ ɛmɔ nu ne, na ngɔma ɛmɔ anwoɔnaen ahone.

Mateo 16:17

Na Yesu buale kyɛ, “Anya saleɛ, Yona awa, Simɔn! Ofikyɛ nna anwoɔnaen ne mogya yeɛ baye he bahyire wɔ ɔ, na mmom me Baba bɔ ɔwɔ nyameɛso ne ɔ.

Mateo 19:24

Mekã mekyire ɛmɔ bieku kyɛ, ɔyɛ mmerɛ ma afupɔngɔ kyɛ okowura drɔwaa bɔen nu tra kyɛ esikaniɛ kɔhɔ Nyameɛ ahennie ne anu ɔ.”

Mateo 21:31

Bɛ munyɔ ne, bɛ nu beni yeɛ ɔyɔle ye baba apɛdeɛ ɔ?” Na bebuale kyɛ, “Bɔ oli moa ne ɔ.” Yeɛ Yesu sele bɛ kyɛ, “Nahorɛ nu, mekã mekyire ɛmɔ kyɛ, ɛtoɔdidelɛfoɛ ne adwamanbɔlɛfoɛ bédi ɛmɔ nyunu moa bɛkɔ Nyameɛ ahennie ne anu.

Mateo 5:18

Nahorɛ nu, mekã mekyire ɛmɔ kyɛ, kɔpem kyɛ anwuro ne aseɛ kɔpɛ nu ɔ, mmeraa ne anu kaaba ko anaa kaaba pɔtrepɔɔ ko po ngofi nu, sana ye mukoraa awa nu koraka.

Marko 10:14

Na Yesu nwuni ye sɔ nen, wanyɛ ye fɛ, na osele bɛ kyɛ, “Ɛ́mɔma ngwadaa nemɔ ate ma bɛbra me berɛ, na nnɛma ɛmɔsi bɛ ate; ofikyɛ ɛhemɔ sɔa ye yeɛ Nyameɛ ahennie ne ɔte bɛ deɛ ɔ.

Marko 9:47

Sɛ wɔ nye to wɔ sundidua a, tu to. Ɔte paa ma wɔ kyɛ ɛkɔfa anyeɛ ko kɔhɔ Nyameɛ ahennie nu tra kyɛ wɔ nye te nyɔ, ná bekogyi wɔ bɛkɔto amaneɛnwunɛ see nu ɔ,

Yohane 1:13

bɔ bamva mogya so, anaakyɛ anwoɔnaen apɛdeɛ so, anaakyɛ sona apɛdeɛ so, na mmom Nyameɛ nu yeɛ bɛwole bɛ ɔ.

Yohane 1:5

Na kanea ne ta awosii nu, na awosii ne angora angye kanea ne.

Yohane 1:51

Na Yesu sele ye kyɛ, “Nahorɛ nu paa, mekã mekyire ɛmɔ kyɛ, ɛmɔkonwu kyɛ nyameɛso abukye, ná Nyameɛ abɔfo mɔ bɛ́fo na bédwu Sona Awa ne so ɔ.”

Yohane 12:40

“Wasi bɛ nye, na wama b’adwene ala, ná bamva bɛ nye bannwu nikye, ná bamva b’adwene bande ye bo, na banza bamma ma manza bɛ anwonyerɛ.”

Yohane 3:4

Nikodemo buale ye kyɛ, “Ɔkɔyɛ sɛɛ né sona bɔ wanyi wayie ne, bahora bawo ye? Ɔkɔhora koowura ye maame kunu bieku maa bɛkɔwɔ ye anaa?”

2 Korintofoɛ 4:4

Bɛ yeɛ ewiase wa nyameɛ ama bɛ bɔ benne benni ne, b’adwene ali naakye, amaa Kristo bɔ ole Nyameɛ sue n’animnyam nzɛmba kanea ne, wanda bɛ so.

2 Korintofoɛ 5:17

Yiti sɛ ebie fa ye nwo bɔ Kristo a, né wayɛ abɔdeɛ foforɛ, nningyein daa ne apɛ nu; amba nningyein mukoraa ayɛ foforɛ.

Galatiafoɛ 6:15

Sɛ ebie pɛ ye bienzua oo, wambɛ ye bienzua oo, nu biala nwo nhia; kyɛ bɛkɔwo wɔ foforɛ yeɛ ohia ɔ.

Ɛfesofoɛ 2:1

Na ɛmɔ de, ahaa ɛmɔte awufoɛ wɔ mvomsoɛ ne bɔne nu,

Deuteronomi 29:4

Nakoso ɛnɛ ne ɛnɛ ye po, AWURADE nnya mmane ɛmɔ adwene bɔ ɔte edwirɛ (hemɔ) bo ɔ, anaa anyeɛ bɔ onwu nikye ɔ, anaa asoɛ bɔ ɔte dwirɛ ɔ.

Tito 3:5

bɔ nna kyɛ tenenee nnwumaa bie bɔ yayɔ ti ɔ; na mmom ye bɔbɔ ye anwumvoinnwunɛ ti ɔ, na ɔfale aworɛ foforɛ ebialɛ nu ne foforɛyɛlɛ wɔ Sunzum Krongron so olele yɛ ngoa.

Yakobo 3:17

Nakoso nworɛ bɔ ofi anwuro ne de, bɔ oli moa ɔ, ye nwo te, okuro asomdwee, ye nwo dwo, ye so yɛ mmerɛ, anwumvoinnwunɛ ne bra paa ayi ye tɛkyɛ, na nyeyemuɛ anaa nyaatwom nne nu.

1 Petro 1:3

Animnyam hã Nyameɛ, y’Awurade Yesu Kristo Baba ne, bɔ ɔnate ye anwumvoinnwunɛ mmorosoɛ ti wafa Yesu Kristo awufoɛ nu ewutingyelɛ ne aso wawo yɛ foforɛ maa yanya anyelasoɛ bɔ ngoa wɔ nu,

1 Yohane 2:29

Na sɛ ɛmɔse kyɛ ɔte teneneeniɛ a, nzaade ɛmɔse kyɛ ebiala bɔ ɔyɔ bɔ ɔtengyɛ ne te Nyameɛ awa.

1 Yohane 3:9

Ebiala bɔ Nyameɛ awo ye ne, ɔnyɔ bɔne, ofikyɛ ye sue ne te ye nu, na ɔngora nyɔ bɔne, ofikyɛ Nyameɛ yeɛ wawo ye ɔ.

1 Yohane 5:1

Ebiala bɔ ode di kyɛ Yesu ole Kristo ne te Nyameɛ awa. Na ebiala bɔ okuro Baba ne dwirɛ ne, okuro Baa ne koso dwirɛ.

1 Yohane 5:18

Yɛse kyɛ ebiala bɔ Nyameɛ awo ye ne, ɔnyɔ bɔne; na mmom bɔ Nyameɛ awo ye ne, ɔnea ye nwo so, na bɔnefoɛ ne mva ye sa nga ye.

1 Yohane 5:4

Ofikyɛ nikyee biala bɔ Nyameɛ awo ye ne, odi wiase so ngonim, na yɛ gyidie yeɛ ole ngonim bɔ yɛfa yɛdi wiase so ne.

Nyekyire 3:14

“Kyerɛ kɔma Laodikea asɔre ne anu abɔfo ne kyɛ: Amen, nahorɛniɛ ne nahorɛ danzeniɛ ne, Nyameɛ abɔdeɛ farebae ne, ye noa dwirɛ ɛhe: