Yohane 19:30 - AHYERƐLƐ KRONGRON

³⁰ Na Yesu lele nzaa kekarekekare ne nen, ɔhane kyɛ, “Mayie.” Na osili ye ti ase, na ɔhale nu.

Yohane 19:30 Iomraidhean Croise

Gyenesise 3:15

Ngɔfa ɛpɔen ngɔto wɔ ne braa n’afia, yeɛ wɔ boso ama ne ye boso ama b’afia; ɔkɔgyerɛgyerɛ wɔ ti, na wɔ wora aha ye gya si.”

Edwein 22:15

Me komvi ayɛ wosee kyɛ nyangaa bue, na me temverema amata me nnaalɔ; afa me ato ewue kumaa nu.

Yesaya 53:10

Nakoso né AWURADE kuro kyɛ odwiridwiri ye nwo ɔ, na ɔfale ye fale yealɛ nu. Na ɔnate kyɛ ɔfale ye kra bɔle bɔne nwo afɔleɛ ne ati, okonwu ye bosofoɛ, okonya ngoa tendenn, na ɔnate ye so yeɛ bɔ AWURADE kuro ne, ɔkɔwa nu ɔ.

Yesaya 53:12

Yiti ngɔfa ye kyɛfa ngɔma ye wɔ atitirefoɛ nu, na ɔne anwoserɛfoɛ bɛkɔhyɛ koɛ nu nzesadeɛ ne, ofikyɛ ɔfale ye kra tole berɛ mane ewue, bɛhale ye bɛfrale mmeraatolɛfoɛ; nakoso ɔfale menni pee bɛ bɔne tole ye nwo so, na olili mmeraatolɛfoɛ bɛ ti dwirɛ mane bɛ.

Daniel 9:24

“Bahyɛ afoɛ aburasoo sɔ alaa nzoo bafa wɔ maen ne wɔ kuro krongron ne anwo, kyɛ bɛ́ma mmeraatolɛ ne ɔbra ayieleɛ, ná bétu bɔne bo, kyɛ bɛ́yɛ amumuyɛɛ nwo mbata, ná bɛ́ma tenenee afebɔɔ ɔbra ɔ, ná bɛ́ma nyekyire ne ne ngɔmhyɛlɛ ne ɔbra nu, ná bɛ́popa nekaa krongron paa ne ngoo.

Daniel 9:26

Na afoɛ nzoo sɔ alaa aburasia ne nyɔ ne asi ne, bekohã bɔ bapopa ye ngoo ne, bɔ ebiala ngɔpepɛ ngole ye ɔ. Na afei katakyie bie bɔ ɔbaawa ne, ye lɔen ne kɔsɛkye kuro ne ne nekaa krongron ne. Ye ayieleɛ kɔwa ye so ndɛndɛ so, koɛ kɔhɔ so koodwu sɔ mmerɛ n’ayieleɛ, mmerɛ bɔ bahyehyɛ amaneɛ wɔ nu ne.

Sakaria 13:7

O ngrandɛ, dwɔso tia me mmoaenneafoɛ ne, ɔne sona bɔ ɔte me nwoniɛ ne,” Asafo AWURADE noa dwirɛ ɛne. “Pura mmoaenneafoɛ ne, na mmoaen ne kɔbɔ aya, na ngɔkakyi me sa ngɔhɔ mmaa mmaa nemɔ aso.

Mateo 20:28

kyɛbɔ Sona Awa ne wamma kyɛ bɛso ye, na mmom kyɛ ɔbaaso, ná ɔfa ye ngoa ɔto berɛ ode mmenia pee ngoa ne.”

Mateo 27:50

Na Yesu teane nu serɛserɛ bieku, na ɔyakyili ye sunzum nu.

Mateo 3:15

Yeɛ Yesu buale ye kyɛ, “Ma ate maa yɛyɔ ye sɔ kekesaala ye, na yɛyɔ bɔ Nyameɛ ahyehyɛ ne.” Yiti Yohane penene so.

Marko 15:37

Afei Yesu teane nu serɛserɛ, na ɔhale nu.

Luka 22:37

Na mekã mekyire ɛmɔ kyɛ, sɔ dwirɛ he bɔ Ahyerɛlɛ ne ɔkã ne, ɔsɛ kyɛ ɔba nu wɔ me nwo kyɛ, ‘Bɛhale ye bɛfrale mmeraatolɛfoɛ.’ Ofikyɛ bɔ ɔfa me nwo ne, ye mmerɛ bɔ ɔsɛ kyɛ ɔba nu ne wadwu.”

Luka 23:46

Afei Yesu teane nu serɛserɛ kyɛ, “Baba, wɔ sa nu yeɛ mefa me sunzum mewura ɔ!” Na ɔhane ɛhe ne, ɔhale nu.

Yohane 10:11

“Me ole mmoaenneafoɛ paa ne. Mmoaenneafoɛ paa ne, ɔfa ye ngoa to berɛ ma mmoaen ne.

Yohane 10:18

Ebie nne mvi me sa nu, na mmom me bɔbɔ yeɛ mefa meto berɛ ɔ. Ye nwo tumi wura me sa kyɛ mefa meto berɛ ɔ, yeɛ ye nwo tumi wura me sa kyɛ mesa mefa ye bieku ɔ; na ahyɛdeɛ he yeɛ nya mvili me Baba berɛ ɔ.”

Yohane 17:4

Mahyɛ wɔ animnyam wɔ aseɛ so; mayie adwuma bɔ ɛfa mane me kyɛ nyɔ ne.

Yohane 19:28

Na ɛhe asi ne, bɔ Yesu nwuni kyɛ wanya wayie nikyee biala nen, (kyɛbɔ ɔkɔyɛ bɔ Ahyerɛlɛ ne kɔwa nu ne ati), ɔhane kyɛ, “Nzuhɔen ku me.”

Yohane 4:34

Na Yesu sele bɛ kyɛ, “M’aleɛ ole kyɛ ngɔyɔ bɔ ɔsomane me n’apɛdeɛ, na ngoyie ye adwuma ne ɔ.

Romanfoɛ 10:4

Na ɔnate kyɛ Kristo di mu tra mmeraa ne ati, amaa ɔnate so ebiala bɔ ode di ne babua ye be.

Romanfoɛ 3:25

Ye yeɛ Nyameɛ afa ye wasie berɛ kyɛ mbata nikye bɔ ɔnate ye mogya nu gyidie so, bɔ wafa wahyire ye tenenee kyɛ bɔne bɔ bayɔ ye daa ne, wakyikyi wafi berɛ wɔ Nyameɛ aboterɛ nu;

1 Korintofoɛ 5:7

Yiti ɛ́mɔye mɔle harewaa daa ne befi ɛmɔ nu amaa ɛmɔayɛ mɔle torɛ foforɛ, kyɛbɔ ɛmɔte kabrɛdi ne ala. Ofikyɛ bafa Kristo bɔ ɔte y’Abɔtra boaen ne babɔ afɔleɛ bama yɛ.

Filipifoɛ 2:8

Benwuni ye kyɛbɔ kuro sona osi soma ɔ, ɔbrɛle ye nwo ase, na ɔyɛle asoɛmmerɛlɛ fa hɔle ewue nu, mmeamudua ne aso wue nu po.

Hebrifoɛ 12:2

Ɛ́mɔma yɛnea Yesu bɔ ɔte yɛ gyidie ahyɛaseɛ ne ayieleɛ ne. Na ɔnate anigye bɔ né ɔla ye nyunu ne ati, omiane ye nye fale amaneɛ ne animguaseɛ wue nu wɔ mmeamudua ne aso, na waatena Nyameɛ ahennie bia ne famaa so.

Hebrifoɛ 9:22

Na kyɛbɔ mmeraa ne kyire ne, ɔpena yɛ kyɛ mogya yeɛ bɛfa bɛte nningyein amukoraa nwo ɔ, na sɛ mogya angua a, bɔnefakyɛ nne berɛ.