Yohane 15:16 - AHYERƐLƐ KRONGRON

¹⁶ Nna ɛmɔ yeɛ ɛmɔaneanea nu baye me ɔ, na mmom me yeɛ maneanea nu maye ɛmɔ ɔ. Na matu ɛmɔ masie berɛ kyɛ ɛmɔhɔ beesu mmaa, ná ɛmɔ mmaa ne bɛhɔ so bɛtena berɛ; na nikyee biala bɔ ɛmɔkobisa Baba ne wɔ me dumaa nu nen, ɔkɔfa kɔma ɛmɔ.

Yohane 15:16 Iomraidhean Croise

Gyenesise 18:18

Susu amba kyɛ, Abraham boso ama kɔyɛ maen pirikua bɔ ole tumi, na ɔnate ye so yeɛ ewiase maen mukoraa bekonya saleɛ ɔ.

Edwein 145:4

Aworɛ ndoatoasoɛ ko kɔkamvo wɔ nnwumaa kohyire aworɛ ndoatoasoɛ foforɛ, ná wabɔ wɔ nnwumaa mbiri mbiri ne anwo dawure.

Edwein 71:18

Yiti menyi meyɛ aworowaa ma me ti anu yɛ gyein a, ao Nyameɛ, nnɛpo me, kɔpem kyɛ ngɔbɔ w’anwoserɛ nwo dawure ngohyire aworɛ ndoatoasoɛ he, ɔne wɔ tumi nwo dawure ngohyire ebiala bɔ ɔbaawa ɔ.

Anyandera 11:30

Teneneeniɛ ye mma bɔ osu te ngoa bakaa, na sona bɔ ɔtwetwe akra ne, ɔte nworɛniɛ.

Yesaya 27:6

Mmerɛ bie baawa, Yakob kotira ndii, Yisrael kɔfefɛ kɔbɔ nyerɛen, na ɔkɔma ye mma koyi ewiase amukoraa tɛkyɛ.

Mika 5:7

Na Yakob boso ama ngaa ne, bɛkɔyɛ kyɛ bosue bɔ ofi AWURADE berɛ ɔ wɔ maen maen pee bɛ nu, kyɛ nyenyenzue bɔ ogua ndire so ɔ, bɔ ɔmva ye nwo ndo sona so, anaa ɔnnwondɛ adasa mmaa ɔ.

Mateo 21:22

Na nikyee biala bɔ ɛmɔkobisa ye wɔ mbaeɛbɔlɛ nu, ná ɛmɔde bedi nen, ɛmɔ sa kɔhã ye.”

Mateo 7:7

“Ɛ́mɔbisa, na ɛmɔ sa kɔha ye; ɛmɔpena, na ɛmɔkonwu ye; ɛ́mɔbɔ nu, na bekobukye ɛmɔ.

Luka 6:13

Aleɛ hyene ne, ɔfrɛle ye asuafoɛ nemɔ maa bɛwale, na ɔyele bɛ nu buru ne nyɔ, bɔ ɔfrɛle bɛ asomafoɛ ɔ:

Yohane 13:18

“Nna ɛmɔ amukoraa bɛ nwo dwirɛ yeɛ mekã ɔ, na me de, mese bɛ bɔ maneanea nu maye bɛ ɔ. Na ɛhe yeɛ ɔkɔma Ahyerɛlɛ ne kɔwa nu kyɛ, ‘Sona bɔ ɔne me to asaa didi ne, ye yeɛ waye me wama ɔ.’

Yohane 15:19

Sɛ ɛmɔfi wiase a, ahaa wiase kohuro ɛmɔ dwirɛ kyɛ ye bɔbɔ ye deɛ. Na ɔnate kyɛ nna wiase yeɛ ɛmɔfi ɔ, na mmom me yeɛ maneanea nu maye ɛmɔ mafi wiase ne ati, yiti yeɛ ɔma wiase pɔ ɛmɔ ne.

Yohane 15:5

“Me ole bobe ne, na ɛmɔ ole mmaen nemɔ. Ebiala bɔ ɔtena me nu, ná me koso metena ye nu ne, ye yeɛ osu mmaa pee ɔ; ɔnate kyɛ ɛmɔkwati me a, ɛmɔngɔhora nikye fee yɔ.

Yohane 6:70

Na Yesu buale bɛ kyɛ, “Aso nna me yeɛ maneanea nu maye ɛmɔ, mmenia buru ne nyɔ ye ɔ? Nakoso, aso ɛmɔ nu ko ɔtte abɔnzam?”

Asomafoɛ 1:24

Na bɛbɔle mbaeɛ kyɛ, “Awurade, wɔ yeɛ ɛse ebiala ti anu dwirɛ ɔ, yiti mmenia nyɔ he, kyire yɛ bɛ nu ko bɔ aye ye

Asomafoɛ 1:8

Na sɛ Sunzum Krongron ne ba ɛmɔ so a, ɛmɔkonya tumi ná ɛmɔayɛ m’adanzefoɛ wɔ Yerusalem, ne Yudea amukoraa ne Samaria maa waadwu aseɛ so nekaa biala.”

Asomafoɛ 10:41

Wanye ye nwo ali wangyire mmenia mukoraa, sana yɛ bɔ yɛte adanzefoɛ bɔ Nyameɛ aye yɛ dada nen; bɔ ye wutingyelɛ asi ne, yɛne ye didili na yɛnone ne.

Asomafoɛ 22:14

Na ɔhane kyɛ, ‘Yɛ nana mɔ Nyameɛ ne, waneanea nu waye wɔ kyɛ enwu ye apɛdeɛ, ná enwu ye Teneneeniɛ ne, na ɛte ye bɔbɔ ye noa nu dwirɛ,

Asomafoɛ 9:15

Na Awurade sele ye kyɛ, “Wɔ de, kɔ, ofikyɛ maye ye kyɛ ɔso me, ná ɔbɔ me dumaa nwo dawure hyire Amaenmaensofoɛ ne ahemvo ne Yisrael mma.

Romanfoɛ 1:13

Aliɛmaa mɔ, mekuro kyɛ ɛmɔnwu ye kyɛ, mmerɛ pee yeɛ mayɛ m’adwene kyɛ ngɔɔpasa ɛmɔ nwo ɔ, amaa me nzɛmbahanɛ ne asakyera ɛmɔ nu bie, kyɛbɔ wayɛ wama Amaenmaensofoɛ ngaa nen, nakoso ɔyɛ a né nikyee foforɛ bie asi m’ate.

Romanfoɛ 1:5

bɔ ɔnate ye so yeɛ yanya adom ne asomafoɛ adwuma bɔ yɛfa yɛma amaen maen mukoraa bɛyɛ sotie wɔ gyidie ne dumaa ne anwo,

Romanfoɛ 15:4

Na nikyee biala bɔ bɛhyerɛ bɛtole berɛ tetetete ne, bɛhyerɛle maa ɔyɛle ngyerɛkyerɛ mane yɛ, kyɛ yɛfa aboterɛ ne Ahyerɛlɛ ne anu aworakyekyerɛ so yɛnya anyelasoɛ.

Romanfoɛ 9:21

Ngukuenwonɛniɛ ne, aso olle ɛfaa so tumi, kyɛ ɔfa ɛfaa torɛ komapɛ ne ala ɔnwo bua ko maa ɔyɛ nyemenenyemene ná ɔnwo ko koso maa ɔyɛ bibirikyii ɔ?

1 Korintofoɛ 10:11

Ɛhe amukoraa tole bɛ maa ɔyɛle kɔkɔbɔlɛ, na bɛhyerɛ bɛtole berɛ bɛfa betuli yɛ foɛ, yɛ bɔ wiase ayieleɛ mmerɛ ne wato yɛ ne.

Galatiafoɛ 1:15

Nakoso Nyameɛ bɔ ɔneaneane nu yele me koraka yeɛ bɛbaawo me, na ɔlole me frɛle me ne, mmerɛ bɔ ɔsɔle ye nye

Ɛfesofoɛ 2:10

Ofikyɛ yɛte ye adwiililɛ bɔ wali ɔ, bɔ ɔbɔle yɛ Kristo Yesu nu mane nnwumaa paa bɔ Nyameɛ asiesie ato berɛ kyɛ yɛfa yɛbɔ yɛ bra ɔ.

Kolosefoɛ 1:23

Nakoso ɔsɛ kyɛ ɛmɔsɔ gyidie ne anu serɛ na ɛmɔahora bagyina pindinn. Na afei ɔnzɛ kyɛ ɛmɔtwe bɛ nwo befi nzɛmba ne anu anyelasoɛ nwo, na ɛhe yeɛ ɛmɔtele, bɔ babɔ ye nwo dawure bahyire abɔdeɛ mukoraa wɔ wiase, bɔ me Pɔɔlo nde ye nwo somvoɛ ye.

Kolosefoɛ 1:6

bɔ bɛfa bɛbrɛle ɛmɔ ne anu. Na onyi, yeɛ osu mmaa wɔ wiase amukoraa, kyɛbɔ wasu mmaa wɔ ɛmɔ nu fi kyẽa bɔ ɛmɔtele ná ɛmɔnwuni Nyameɛ adom wɔ nahorɛ nu ne,

1 Timoteo 2:7

Na ɛhe ati yeɛ batu me basie berɛ bayɛ me nzɛmbahanɛniɛ ne somafoɛ ɔ, (mekã nahorɛ [wɔ Kristo nu], na membɛ ngondombo), nde Amaenmaensofoɛ nu kyerɛkyerɛniɛ wɔ gyidie ne nahorɛ nu.

2 Timoteo 1:11

Na nzɛmba he ati yeɛ babɔ me dumaa bayɛ me nzɛmbahanɛniɛ ne somafoɛ ne kyerɛkyerɛniɛ ɔ.

2 Timoteo 2:2

Na bɔ ɛte fili me berɛ wɔ adanzefoɛ pee bɛ nyunu ne, fa wura mmenia bɔ bedi nahorɛ bɔ bɛkɔhora bekohyirehyire ebiemɔ koso ɔ bɛ sa.

Tito 1:5

Na ɛhe ati yeɛ nyakyili wɔ wɔ Krete ɔ, kyɛ ɛ́nea toto nningyein bɔ waha ne pɛpɛɛpɛ, ná ɛyeye mbanyi mɔ wɔ kuro biala so, kyɛbɔ ngane kyɛ ɛyɔ ne:

Hebrifoɛ 11:4

Ɔnate gyidie so yeɛ Abel bɔle afɔleɛ paa bɔ ɔtra Kein deɛ ne, ná ɔsɔle Nyameɛ nye ɔ. Ɔnate ye gyidie so Nyameɛ buli ye kyɛ ɔtengyɛ, ofikyɛ Nyameɛ lili y’ayɛyɛdeɛ ne nwo adanzeɛ. Na ɔwɔ nu kyɛ Abel awu de, nakoso ɔnate ye gyidie so ɔtɛ dwudwo.

Yakobo 3:18

Na bɛ bɔ bɛpena asomdwee si atee, bɔ bedua ye asomdwee nu ne, bɛte tenenee mmaa.

1 Petro 3:15

na mmom ɛ́mɔma Awurade Kristo ɔyɛ krongron wɔ ɛmɔ ahone nu. Na mmerɛ biala, ɛ́mɔboaboa ɛmɔ nwo bésie, amaa sɛ ebie bisa ɛmɔ dwirɛ fa anyelasoɛ bɔ ɔwɔ ɛmɔ nu ne nwo a, ɛmɔahora baye ye noa bahyire ye wɔ anwobrɛaseɛ ne anidie nu.

1 Petro 3:2

sɛ benwu ɛmɔ brabɔlɛ sannwuu bɔ esurolɛ wɔ nu ne a.

1 Yohane 4:10

Bɔ okyire ɔdɔ ɛhe: nna kyɛ yɛ yeɛ yɛhurole Nyameɛ dwirɛ ɔ, na mmom ye yeɛ ohurole yɛ dwirɛ ná ɔsomane Ɔwa ne maa ɔɔyɛle yɛ bɔne nwo mbata ɔ.

1 Yohane 4:19

Yɛkuro ye dwirɛ, ofikyɛ ye yeɛ olili moa hurole yɛ dwirɛ ɔ.