Yohane 13:34 - AHYERƐLƐ KRONGRON

³⁴ Ahyɛdeɛ foforɛ yeɛ mefa mema ɛmɔ ɔ, kyɛ ɛmɔhurohuro ɛmɔ nwo dwirɛ; na kyɛbɔ mahuro ɛmɔ dwirɛ nen, sɔ ala yeɛ ɛmɔ koso ɛmɔhurohuro ɛmɔ nwo dwirɛ ɔ!

Yohane 13:34 Iomraidhean Croise

Edwein 119:63

Bɛ bɔ besuro wɔ ne, yeɛ bɛ bɔ bedi w’ahyɛdeɛ so ne, nde bɛ mukoraa bɛ biɛngo.

Edwein 16:3

Krongronfoɛ bɔ bɛwɔ aseɛ ne aso ne, bɛ yeɛ bele animnyam ɔ, ná bɛ nu yeɛ m’anigye amukoraa wɔ ɔ.

Lewitikɔso 19:18

Nnɛtɔ wɔ mmenia ne anu biala so wereɛ, yeɛ nnɛfa ebiala nwo dwirɛ sie wɔ ti anu, na mmom kuro ebiɛngo dwirɛ kyɛ wɔ bɔbɔ wɔ nwo: me ole AWURADE.

Lewitikɔso 19:34

Ɛwɔfoɛ bɔ waatena ɛmɔ nu ne, ɛ́mɔfa ye kyɛ ɔte kuromani; ná kuro ɛwɔfoɛ ne dwirɛ kyɛ wɔ bɔbɔ wɔ nwo, ofikyɛ né ɛmɔte ɛwɔfoɛ wɔ Misraim aseɛ so: Me ole AWURADE wɔ Nyameɛ.

Mateo 5:44

Nakoso me de, mekã mekyire ɛmɔ kyɛ, ɛ́mɔhuro ɛmɔ pɔfoɛ mɔ dwirɛ, ná ɛ́mɔbɔ mbaeɛ bɛ́ma bɛ bɔ bɛtane ɛmɔ nye ɔ;

Yohane 15:17

Ahyɛdeɛ he yeɛ mefa mema ɛmɔ ɔ, kyɛ ɛmɔhurohuro ɛmɔ nwo dwirɛ.

Yohane 17:21

amaa ɔnate so bɛ mukoraa bayɛ ko; kyɛbɔ wɔ, Baba, ɛwɔ me nu, ná me koso nwɔ wɔ nu ne, ná bɛ koso bayɛ ko wɔ yɛ nu, ná wiase ole li kyɛ wɔ yeɛ ɛsomane me ɔ.

Romanfoɛ 12:10

Ɛmɔhurohuro ɛmɔ nwo dwirɛ kyɛ aliɛmaa mɔ, ná ɛ́mɔli moa bɛ́fa anidie bɛ́moma bɛ nwo bɛ nwo.

Romanfoɛ 13:10

Sɛ ekuro ebiɛngo dwirɛ a, ɛnyɛ ye bɔne; yiti ɔdɔ yeɛ mmeraa ne gyi so ɔ.

Romanfoɛ 13:8

Nnɛmɔma ebiala kerɛ, sana ɔdɔ bɔ ɛmɔfa bekurokuro ɛmɔ nwo dwirɛ ɔ; ofikyɛ ebiala bɔ okuro obiɛngo dwirɛ nen, né wali mmeraa ne aso.

Galatiafoɛ 5:22

Nakoso Sunzum ne de, ɔma ɔdɔ, anigye, asomdwee, aboterɛ, adɔeɛyɛlɛ, paayɛlɛ, gyidie,

Galatiafoɛ 5:6

Ofikyɛ sɛ yɛne Kristo Yesu yɛ ko de a, bienzuapɛlɛ oo, nna bienzuapɛlɛ oo, ye nwo nhia, na mmom gyidie bɔ ɔnate ɔdɔ so yɔ adwuma yeɛ ohia ɔ.

Galatiafoɛ 6:10

Yiti mmerɛ bɔ atee wɔ berɛ ma yɛ ye de, ɛ́mɔma yɛyɔ mmenia amukoraa paa, nganga bɛ bɔ bɛwɔ agyidifoɛ abusua fekue ne anu ne.

Galatiafoɛ 6:2

Ɛ́mɔbokaboka bɛ nwo, na sɔ yeɛ ɔmaa ɛmɔdi Kristo mmeraa ne aso pɛpɛɛpɛ ɔ.

Ɛfesofoɛ 5:2

Ɛ́mɔfa ɔdɔ bɛbɔ ɛmɔ bra, kyɛbɔ Kristo koso hurole yɛ dwirɛ ná ɔfale ye ngoa tole berɛ mane yɛ kyɛ ayɛyɛdeɛ ne afɔleɛ fonafona mane Nyameɛ ne.

Kolosefoɛ 1:4

Ofikyɛ yate ɛmɔ gyidie bɔ ɔwɔ Kristo Yesu nu ne, ɔne ehurolɛ bɔ ɛmɔkuro anwoteefoɛ amukoraa bɛ dwirɛ ne nga;

1 Tɛsalonikafoɛ 3:12

Yɛsrɛ kyɛ Awurade ɔma ehurolɛ bɔ ɛmɔkurokuro ɛmɔ nwo dwirɛ, ɔne mmenia mukoraa nwo dɔ ne onyi mmorosoɛ so, kyɛbɔ yɛ koso yɛkuro ɛmɔ dwirɛ ne ala,

2 Tɛsalonika 1:3

Aliɛmaa mɔ, ɔsɛ kyɛ ɛmɔ ti daa yɛda Nyameɛ ase kyɛbɔ ɔfata ɔ, ofikyɛ ɛmɔ gyidie kɔ so nyi mmorosoɛ, na ɔdɔ bɔ ɛmɔle ma bɛ nwo bɛ nwo ne ɔte piri.

Hebrifoɛ 13:1

Ɛmɔhɔ so behurohuro bɛ nwo dwirɛ kyɛ aliɛmaa.

Yakobo 2:8

Yiti sɛ ɛmɔdi dehyeɛ mmeraa ne aso nahorɛ nu, kyɛbɔ Ahyerɛlɛ ne kã kyɛ, “Kuro ebiɛngo dwirɛ kyɛ wɔ bɔbɔ wɔ nwo” ne a, ye de né ɛmɔayɛ nikye.

1 Petro 1:22

Asoɛmmerɛlɛ bɔ ɛmɔayɛ bama nahorɛ ne ne ati, wamaa ɛmɔate ɛmɔ kra nwo, na ɛhe amaa ɛmɔahurohuro ɛmɔ nwo dwirɛ wɔ nahorɛ nu, yiti ɔsɛ kyɛ ɛmɔfi ɛmɔ ahone nu bekurokuro ɛmɔ nwo dwirɛ.

2 Petro 1:7

ɛ́mɔfa aliɛmaa nwo dɔ bɛ́foa nyamesom paa so, ná ɛ́mɔfa ɔdɔ bɛ́foa aliɛmaa nwo dɔ so.

1 Yohane 3:11

Edwirɛ bɔ ɛmɔate fi ahyɛaseɛ ne ɛhe: kyɛ yɛhurohuro yɛ nwo dwirɛ.

1 Yohane 3:23

Na ye ahyɛdeɛ ne kyire kyɛ yɛle ɔwa Yesu Kristo dumaa ne yɛli, ná yɛhurohuro yɛ nwo dwirɛ kyɛbɔ wafa ahyɛdeɛ wama yɛ ne.

1 Yohane 4:21

Na ahyɛdeɛ bɔ wafa wama yɛ ɛhe: ebiala bɔ okuro Nyameɛ dwirɛ ne, odi kyɛ okuro oliɛma koso dwirɛ.

2 Yohane 1:5

Yiti afei, bra panyi, mesrɛ wɔ kyɛ ɛ́mɔma yɛhurohuro yɛ nwo dwirɛ; nna kyɛ mmeraa foforɛ yeɛ mekyerɛ mebrɛ ɛmɔ ɔ, na mmom mmeraa bɔ yɛnyane ye fili ahyɛaseɛ ne ala ɔ.