Yohane 10:28 - AHYERƐLƐ KRONGRON

²⁸ Mema bɛ daa ngoa, na bengomini le; na ebiala ngofoti bɛ ngofi me sa nu.

Yohane 10:28 Iomraidhean Croise

YOB NWOMAA NE 17:9

Nakoso sona bɔ ɔtengyɛ de, ye atee so yeɛ ɔnate ɔ, yeɛ bɛ bɔ bɛ bra te sannwuu ne, bɛkɔ so benya anwoserɛ.

Edwein 31:5

Wɔ sa nu yeɛ mefa me sunzum mewura ɔ; ao AWURADE, nahorɛniɛ Nyameɛ, apepɛ ale me.

Edwein 37:28

Ofikyɛ AWURADE kuro ndɛenbualɛ turoloo, na ɔngɔpo ye anwoteefoɛ. Ɔkɔbɔ anwoteefoɛ nwo waen afebɔɔ, nakoso bɔnefoɛ boso ama de, bɛ boso konua.

Anyandera 24:16

ofikyɛ, teneneeniɛ kɔhora kofĩ ase pɛen nzoo, nakoso osa dwɔso, nakoso bɔnefoɛ de, musue to ye ma ye ayieleɛ yie ye.

Anyandera 4:18

Nakoso teneneefoɛ de, b’atee te kyɛ ngyerɛmɔ yia bɔ wapukye ɔ, na ɔbɔ toonn kodwu eyia ketee.

Yesaya 27:3

Me, AWURADE, me yeɛ menea so ɔ, mmerɛ biala meguagua so nzue, mebɔ ye nwo waen kɔngɔen ne eyia, kyɛbɔ ebiala ngɔɔsɛkye ye ɔ.

Yesaya 45:17

Nakoso Yisrael de, AWURADE fa ngoalelɛ afebɔɔ ode ye. Ɛfɛrelɛ ngɔhã ɛmɔ, yeɛ ɛmɔ nyunu ngogua ase le afebɔɔ.

Yesaya 54:17

Akodeɛ biala bɔ babɔ bafa batia wɔ ne, ɔngɔyɛ adwuma, yeɛ noa biala bɔ okodwɔso kotia wɔ wɔ ndɛenbualɛ nu ne, ɛkɔsa wɔ nwo maa okoli fɔ. AWURADE somvoɛ mɔ, b’agyapadeɛ ne bɛ tenenee bɔ ofi me berɛ hɔ ɛne, AWURADE noa dwirɛ ɛne.”

Yesaya 55:3

Ɛ́mɔyɛ asoɛ bétie, ná ɛmɔbra me berɛ; ɛ́mɔtie, amaa ɔnate so ɛmɔ kra anya ngoa. Me ne ɛmɔ yɛkɔyɛ apam afebɔɔ, bɔ ɔte me ɔdɔ bɔ onni ngasi bɔ nne ye ma Dawide ne.

Yeremia 23:4

Ngɔye mmoaenneafoɛ bɔ bɛkɔnea bɛ so ɔ, na bengosuro ko, bɛ kunu ngɔtete bɛ, yeɛ bɛ nu biala ngomini, AWURADE noa dwirɛ ɛne.

Yeremia 31:3

AWURADE yele ye nwo ali hyirele me fili dedeede kyɛ, amba, ɔdɔ bɔ ɔwɔ berɛ afebɔɔ yeɛ mafa mahuro wɔ dwirɛ ɔ, maye m’ahone nu yeɛ mahwe wɔ mapingye ɔ.

Yeremia 31:34

Na ebiala ngohyirehyire obiɛngo ko, yeɛ ebiala ngose oliɛma kyɛ, ‘Nwu AWURADE,’ ofikyɛ ofi bɛ nu kwahweabaa so bɔ ɔkwaadwu bɛ nu titire paa so, bɛ mukoraa bekonwu me, AWURADE noa dwirɛ ɛne. Ofikyɛ ngɔfa b’amumuyɛɛ ngɔhyɛ bɛ, na mengɔkaye bɛ bɔne ko.”

Yeremia 32:40

Me ne bɛ yɛkɔyɛ apam afebɔɔ, na mengɔyakyi kyɛ ngɔyɛ bɛ paa ɔ; na mmom ngɔfa me nwo suronyi ngowura b’ahone nu, amaa bangakyi bɛ si bamma me.

Marko 13:22

Ɔnate kyɛ, kristo ngondombofoɛ ne ngɔmhyɛlɛfoɛ ngondombofoɛ kodwɔso, na bɛkɔyɔ nzɛngyerɛnneɛ ne anwanwadeɛ mɔ, na sɛ ɔkɔyɛ yee a, bɛkɔlakalaka bɛ bɔ Nyameɛ aneanea nu waye bɛ ne po.

Luka 23:46

Afei Yesu teane nu serɛserɛ kyɛ, “Baba, wɔ sa nu yeɛ mefa me sunzum mewura ɔ!” Na ɔhane ɛhe ne, ɔhale nu.

Yohane 10:29

Me Baba bɔ ɔfale bɛ mane me ne, ɔte piri tra ebiala; na ebiala ngɔhora ngofoti bɛ ngofi me Baba sa nu.

Yohane 11:25

Na Yesu sele ye kyɛ, “Me ole ewutingyelɛ ne ɔne ngoa ne; ebiala bɔ ode me di ne, sɛ owu po a, okonya ngoa.

Yohane 14:19

Waha kãa bie né wiase nnwu me ko, nakoso ɛmɔ de, ɛmɔkonwu me; ɔnate kyɛ nde ase, na ɛmɔ koso ɛmɔkɔtena ase.

Yohane 17:2

kyɛbɔ ama ye tumi wɔ anwoɔnaen amukoraa so, kyɛ ɔma ebiala bɔ afa ama ye ne daa ngoa ne.

Yohane 18:9

Na ɛhe mane edwirɛ bɔ ɔhane ye kyɛ, “Bɛ bɔ afa bɛ ama me ne, mamma bɛ nu biala wammini ne” wale nu.

Yohane 3:36

Na ebiala bɔ ode Baa ne di ne, ole daa ngoa; yeɛ bɔ ɔnyɛ sotie mma Baa nen, ongonya ngoa, na Nyameɛ ahonehulɛ ba ye so.

Yohane 4:14

Nakoso ebiala bɔ ɔkɔno nzue bɔ ngɔma ye bie ne de, nzuhɔen ngohũ ye le. Na nzue bɔ ngɔfa ngɔma ye ne, ɔkɔyɛ nzue abura wɔ ye nu bɔ opu kɔ daa ngoa nu ɔ.”

Yohane 5:24

“Nahorɛ nu paa, mekã mekyire ɛmɔ kyɛ, ebiala bɔ ɔte me dwirɛ, ná ode bɔ ɔsomane me ne di nen, ole daa ngoa; bengobua ye foɛ, na mmom wapɛ nu wafi ewue nu wahɔ ngoa nu.

Yohane 6:27

Nnɛma ɛmɔyɔ aleɛ bɔ ɔsɛkye ɔ nwo adwuma, na mmom ɛ́mɔyɔ aleɛ bɔ ɔtena berɛ kɔ daa ngoa nu, bɔ Sona Awa ne kɔfa kɔma ɛmɔ ne nwo adwuma; ofikyɛ ye yeɛ Baba Nyameɛ wale ye wato nu wama ye tumi ɔ.”

Yohane 6:37

Bɛ bɔ Baba ne ɔfa bɛ ma me ne, bɛ mukoraa bɛkɔwa me berɛ; na ebiala bɔ ɔba me berɛ ne, mengɔto ye ngɔye le.

Yohane 6:47

Nahorɛ nu paa, mekã mekyire ɛmɔ kyɛ, ebiala bɔ ode di ne, ole daa ngoa.

Yohane 6:68

Na Simɔn Petro buale ye kyɛ, “Awurade, nwa berɛ yeɛ yɛkɔhɔ ɔ? Wɔ yeɛ ele daa ngoa dwirɛ ɔ;

Asomafoɛ 7:59

Na bɛwɔ so bɔ bɛboro Setefano nyɔboɛ ne, ɔhɔle so bɔle mbaeɛ kyɛ, “Awurade Yesu, de me sunzum!”

Romanfoɛ 5:17

Na sɛ ɔnate sona ko bɔne so ewue nyane tumi wɔ sona ko ne so a, ye de bɛ bɔ banya adom mmorosoɛ ne tenenee akyɛdeɛ ne, bɛnate sona ko bɔ ye ole Yesu Kristo ne so bekoli ngonim.

Romanfoɛ 5:2

Ɔnate ye so yeɛ yafa gyidie so yanya adom he bɔ yɛgyi so ye; na yɛhoahoa yɛ nwo Nyameɛ animnyam nwo anyelasoɛ nu.

Romanfoɛ 5:21

Na kyɛbɔ bɔne nate ewue nu lili hene nen, sɔ ala yeɛ Nyameɛ adom koso kɔnate tenenee nu koli hene ɔ, na ɔkɔfa y’Awurade Yesu Kristo so kɔfa yɛ kɔhɔ daa ngoa nu.

Romanfoɛ 5:9

Yiti sɛ ɔnate ye mogya so wabua yɛ be de a, né nzaade ɔkɔfa Kristo so kole yɛ kofi ye ahonehulɛ ne anu maa ɔkɔbo so.

Romanfoɛ 6:23

Ofikyɛ bɔne akatuaa ole ewue; na Nyameɛ adom akyɛdeɛ ole daa ngoa wɔ y’Awurade Yesu Kristo nu.

Romanfoɛ 8:1

Afei de, foɛbualɛ biala nne berɛ mma bɛ bɔ bɛte Kristo Yesu nu ne.

Romanfoɛ 8:29

Bɛ bɔ onwuni bɛ siele ne, osa tuli bɛ siele berɛ, kyɛ benya Ɔwa ne sue ne bie, amaa ɔnate so wayɛ aliɛmaa mɔ pee nu bamuɛbaa.

Deuteronomi 33:3

Yoo, ohurole ye mmenia dwirɛ, ye anwoteefoɛ amukoraati bewura ye sa; bebutubutu wɔ wɔ gya bo, na bedi wɔ dwirɛ so.

Filipifoɛ 1:6

na mede medi kyɛ, ye bɔ ɔhyɛle adwuma paa bo wɔ ɛmɔ nu ne, ɔkɔhɔ so kɔyɔ koyie maa okoodwu Yesu Kristo kyẽa ne.

2 Tɛsalonika 2:13

Aliɛmaa mɔ bɔ Awurade kuro ɛmɔ dwirɛ ɔ, ɔte yɛ asɛdeɛ kyɛ ɔnate ɛmɔ ti daa yɛda Nyameɛ ase ɔ. Ofikyɛ Nyameɛ fi ahyɛaseɛ ne yeɛ waneanea nu waye ɛmɔ kyɛ ɛ́mɔnya daa ngoa, bɔ ɔnate Sunzum nu anwotelɛ ne nahorɛ gyidie nu ɔ.

1 Timoteo 1:16

Nakoso ɛhe ati yeɛ onwuni me anwunvoin ɔ, kyɛ me bɔ nni moa ne anu, Yesu Kristo kɔla ye aboterɛ amukoraa ali maa ɔkɔyɛ nhwɛsoɛ kɔma bɛ bɔ bekole ye bekoli bɛkɔhɔ daa ngoa nu ne.

2 Timoteo 1:12

Na ɔnate ɛhe ati yeɛ menwu amaneɛ hemɔ ye, nakoso ɔnyɛ me nya; ofikyɛ mese bɔ male ye mali ne, na mede medi kyɛ ɔkora ɔbɔ bɔ mafa mawura ye sa ne nwo waen maa okoodwu Kyẽa ne.

Hebrifoɛ 7:25

Yiti ɔkora de bɛ bɔ bɛfa ye so bɛba Nyameɛ berɛ ne ngoa bɔkɔɔ; ofikyɛ ɔte ase afebɔɔ, na odi bɛ ti dwirɛ ma bɛ.

1 Petro 1:5

bɔ bɛnate gyidie so bɛbɔ ɛmɔ nwo waen wɔ Nyameɛ tumi nu, bɔ ɔkɔ ngoalelɛ bɔ basiesie kyɛ bɛbaala ye ali wɔ mmerɛ bɔ oli nziɛ ne anu ne.

1 Yohane 1:2

sɔ ngoa ne yele ye nwo ali, na yanwu ye, yɛdi ye nwo adanzeɛ, na daa ngoa bɔ né ɔne Baba ne wɔ berɛ na afei bɛyele ye ali behyirele yɛ ne yeɛ yɛbɔ ye nwo dawure yɛkyire ɛmɔ ye.

1 Yohane 2:19

Befi yɛ nu yeɛ bɛhɔle ɔ, nakoso né bɛmmɔ yɛ fekue ne bie. Ofikyɛ sɛ bɛbɔ yɛ fekue ne bie a, ahaa bɛ ne yɛ hɔle so tenane. Na bafi yɛ nu maa wala ali kyɛ bɛ mukoraa bɛmmɔ yɛ fekue ne bie.

1 Yohane 2:25

Na bɔ wafa wahyɛ yɛ bɔ ole daa ngoa.

1 Yohane 5:11

Adanzeɛ ne ɛhe: Nyameɛ ama yɛ daa ngoa, na sɔ ngoa ne wɔ Ɔwa ne anu.

Yuda 1:1

Yuda bɔ nde Yesu Kristo akoaa ne Yakobo aliɛma, mefa mebrɛ bɛ bɔ bafrɛ bɛ, bɔ bɛla Baba Nyameɛ ahone nwo, bɔ wafa bɛ wasie wɔ Yesu Kristo nu ɔ.

Yuda 1:21

Ɛmɔhɔ so bɛtena Nyameɛ ɔdɔ nu, ná ɛ́mɔnwondɛ y’Awurade Yesu Kristo anwumvoinnwunɛ ne bɛhɔ daa ngoa nu.

Yuda 1:24

Na ye bɔ ɔkora sɔ ɛmɔ nu ma ɛmɔmvi ase, ná ɔfa ɛmɔ gyina ye animnyam ne nyunu bɔ ngekalewa biala nne ɛmɔ nwo, wɔ anigye nu ne,

1 Samuel 2:9

Ɔbɔ ye anwoteefoɛ nwo waen wɔ atee biala so, nakoso amumuyɛɛfoɛ de, bewuwu aworabɔlɛ wue; ofikyɛ nna anwoserɛ yeɛ sona fa di ngonim ɔ.