Yoel 3:12 - AHYERƐLƐ KRONGRON

¹² Odi kyɛ maen maen mɔ bɛkanyane bɛ nwo bɛba Yehosafate bɔnza ne anu, ofikyɛ berɛ yeɛ ngɔtena ngobua maen maen amukoraa bɔ bapɛ ye nwo bayia ne ndɛen ɔ.

Yoel 3:12 Iomraidhean Croise

2 Aberɛso Dwirɛ 20:26

Ye ɛlɛnna ne aso, bɛbɔle dwaa wɔ Beraka bɔnza ne anu, ofikyɛ berɛ yeɛ bɛyele AWURADE ayɛ ɔ. Yiti bafrɛ berɛ Beraka bɔnza maa waadwu ɛnɛ.

Edwein 7:6

Ao AWURADE, fɛ yaa ná dwɔso e; kekã wɔ nwo dwɔso tia me pɔfoɛ mɔ b’ɛyaafɛlɛ; ao me Nyameɛ, dwɔso gyina me si, wɔ bɔ ahyehyɛ ndɛenbualɛ ato berɛ ɔ’.

Edwein 96:13

wɔ AWURADE nyunu, ofikyɛ ɔ́ba, ɔbaabua aseɛ so ama ndɛen. Ɔkɔfa tenenee yeɛ okobua wiase ndɛen ɔ, na ɔkɔfa ye nahorɛlilɛ yeɛ okobua maen maen mɔ ndɛen ɔ.

Edwein 98:9

wɔ AWURADE nyunu, ofikyɛ ɔ́ba, ɔbaabua aseɛ so ama ndɛen. Ɔkɔfa tenenee yeɛ okobua wiase ndɛen ɔ, yeɛ ɔkɔfa ye pɛpɛɛpɛyɛlɛ yeɛ okobua maen maen mɔ ndɛen ɔ.

Yesaya 2:4

Okoli maen maen mɔ so, okosiesie mmenia pee b’afia, bɛkɔboro bɛ ngrandɛ bɛkɔfa bɛkɔbɔ kona, ná baboro bɛ pealɛɛ bafa babɔ asɔsɔaa. Maen bie ngɔhwe obiɛngo maen so ngrandɛ, na bengosua koɛhonɛ ko.

Yesaya 22:1

Edwirɛ bɔ ɔfa Bɔnza nyekyire ne nwo. Nzikyɛ dwirɛ yeɛ wato wɔ ɔ bɔ wɔ nu ama mukoraa bafo bahɔ sua ti afia ye?

Yesaya 3:13

AWURADE adwɔso bɔ ɔbɔ kwaadu, wagyina berɛ obua maen ne ndɛen.

Hesekiel 30:3

Ofikyɛ kyẽa ne apingye, AWURADE kyẽa ne apingye, ɔkɔyɛ munungum kyẽa, ɔkɔyɛ maen maen mɔ b’amaneɛnwunɛ mmerɛ.

Hesekiel 39:11

“Na ɔkɔwa kyɛ, sɔ kyẽa ne, ngɔma Gɔgo aseɛ bɔ bekosie ye so ɔ wɔ Yisrael, wɔ Akwandufoɛ Bɔnza bɔ ɔwɔ ɛpo eyia afiteleɛ ne anu, bɔnza bɔ osi akwandufoɛ atee ne. Berɛ yeɛ bekosie Gɔgo ne ye lɔen worawora ne amukoraa ɔ, na bɛkɔfrɛ berɛ Hamon Gɔgo Bɔnza.

Yoel 3:14

Ɛlɔen, ɛlɔen wɔ ndɛenbualɛ bɔnza ne anu; ofikyɛ AWURADE kyẽa ne apingye wɔ ndɛenbualɛ bɔnza ne anu.

Yoel 3:2

ngɔboaboa maen maen amukoraa bɛ noa, ngɔfa bɛ ngɔwa Yehosafate bɔnza ne anu, na berɛ yeɛ ngɔbɔ bɛ kwaadu ɔ, ɔnate me maen ne m’agyapadeɛ Yisrael bɔ babɔ bɛ basande maen maen mɔ so, ɔne m’aseɛ bɔ bahyɛ ne ati.

Mika 4:3

Okoli maen maen pee b’afia dwirɛ, na okohwi maen maen anwoserɛfoɛ bɔ bɛwɔ dedeede ɔ bɛ nyunu. Bɛkɔboro bɛ ngrandɛ bɛkɔfa bɛkɔbɔ kona, ná baboro bɛ pealɛɛ bafa babɔ asɔsɔaa. Maen bie ngɔhwe obiɛngo maen so ngrandɛ, yeɛ bengosua koɛhonɛ ko.

Sakaria 14:4

Sɔ kyẽa ne, ye gya kogyinagyina Olive bokaa bɔ ɔwɔ Yerusalem ndendeneɛ so wɔ eyia afiteleɛ ne aso. Olive bokaa ne anu kodwa nyɔ kofi eyia afiteleɛ koodwu eyia atɔleɛ maa ɔkɔyɛ bɔnza kandinga paa, maa ɔnate so bokaa ne bue kɔhwe kɔhɔ sorɔ dɔ, ná ye bue koso wahwe wahɔ ngwaen dɔ.

Nyekyire 19:11

Na nwuni kyɛ nyameɛso abukye, na yieee, pɔngɔ fufue bie yele ye ti. Na bɔ ɔte ye so ne, bɛfrɛ ye Kanayɔ ne Nahorɛniɛ, na tenenee nu yeɛ obua ndɛen ná ɔko koɛ ɔ.