Yoel 2:26 - AHYERƐLƐ KRONGRON

²⁶ Na ɛmɔkodidi paa kɔma ɛmɔ ko koyi, ná ɛmɔaye AWURADE ɛmɔ Nyameɛ dumaa ayɛ, ofikyɛ wayɔ anwanwadeɛ wama ɛmɔ, na me maen nyunu ngogua ase le ko.

Yoel 2:26 Iomraidhean Croise

Gyenesise 33:11

Mesrɛ wɔ, sɔ m’akyɛdeɛ bɔ mafa mabrɛ wɔ ye anu, ofikyɛ Nyameɛ alo me paa, na hwee nhia me. Yiti ɔsrɛle ye maa olele.

Nehemia 9:25

Na bɛho bɛfale nguro bɔ bato bɛ nwo fasue ne aseɛ bɔ ɔkye aleɛ ɔ. Na bɛfale awuro mɔ bɔ nningyein paa ayi bɛ tɛkyɛ ɔ, abura mɔ bɔ batutu ɔ, bobe boo mɔ, olive boo mɔ ne mmakaa bɔ basu biribiraa ɔ bɛyɛle bɛ deɛ. Yiti bedidili ma bɛ ko yili na bɛyɛle mbiri, na wɔ paa kandinga bɔ ɛyɛle bɛ ne ati bɛgyele bɛ nye.

Edwein 103:5

ye yeɛ ɔmaa enya nningyein paa wɔ mmerɛ bɔ ɛte ase ɔ, amaa ɔnate so wɔ mmerandeɛ nu osa kakyi foforɛ kyɛ kɔleɛ deɛ.

Edwein 116:7

Ao me kra, sa kɔ nekaa bɔ ede wɔ nwome ne, ofikyɛ AWURADE alo wɔ paa.

Edwein 13:6

Ngɔto dwein ngɔye AWURADE ayɛ, ofikyɛ walo me paa.

Edwein 22:26

Anwobrɛaseɛfoɛ bekodidi bɛkɔma bɛ ko koyi; bɛ bɔ bɛpena AWURADE si atee ne, bɛ yeɛ bɛkɔye ye ayɛ ɔ. Nyameɛ ɔ́ma ɛ́mɔnya anika afebɔɔ!

Edwein 37:19

Mmerɛ bɔ ɔtte mayee nu, bɛ nyunu ngogua ase, na ɛhɔen piri ba a, aleɛ kobu bɛ so.

Edwein 67:5

Ao Nyameɛ, odi kyɛ maen maen mɔ bɛye wɔ ayɛ, amba, odi kyɛ maen amukoraa bɛye wɔ ayɛ.

Edwein 72:18

Animnyam hã AWURADE Yisrael Nyameɛ, bɔ ye ngome yeɛ ɔyɔ anwanwadeɛ ne.

Anyandera 13:25

Teneneeniɛ didi ma ye kra ko yi, nakoso bɔnefoɛ de, ye kunu too.

Edwein Nu Dwein 5:1

Nniɛma brasua, m’atɔmvorɛ braa, mawa me turo ne anu, méboaboa me korobo ne m’ayirefona ne noa, médi me woɛ bɔ ɔwɔ ye nzasameɛ nu ɔne me woɛ ne, méno me nzaa ne me nyɔfonesue ne. Me mmango mɔ, ɛ́mɔdidi ná ɛ́mɔno, adɔfo mɔ, ɛ́mɔno ma ɛmɔ ko yi.

Yesaya 25:1

O AWURADE, wɔ yeɛ ɛte me Nyameɛ ɔ, ngɔkamvo wɔ, ngɔye wɔ dumaa ayɛ, ofikyɛ ayɔ anwanwadeɛ nningyein, ofi tetetetetete yeɛ ɛyɔle sɔ nhyehyɛleɛ ne ɔ, na ali so nahorɛ nu.

Yesaya 29:22

Yiti AWURADE bɔ olele Abraham ne, bɔ ɔkã fa Yakob boso ama nwo ɛhe: “Yakob nyunu ngogua ase ko, ye nyunu ngɔyɛ anwumvoin anwumvoin ko.

Yesaya 45:17

Nakoso Yisrael de, AWURADE fa ngoalelɛ afebɔɔ ode ye. Ɛfɛrelɛ ngɔhã ɛmɔ, yeɛ ɛmɔ nyunu ngogua ase le afebɔɔ.

Yesaya 49:23

Ahemvo mɔ, bɛkɔyɛ wɔ baba mɔ bɔ bɛtete wɔ ɔ, yeɛ bɛ hemmaa mɔ kɔyɛ wɔ maame mɔ bɔ bɛma wɔ nyɔfone ɔ. Bɛkɔfa bɛ nyunu bekobutu ase bekobu ndwerɛ wɔ wɔ nyunu, ná batafe wɔ gya bo mvuture. Na afei ekonwu kyɛ me ole AWURADE, na bɛ bɔ bɛfa bɛ nye bɛto me so ne, bɛ nyunu ngogua ase.”

Yesaya 54:4

“Nnɛsuro, ofikyɛ wɔ nyunu ngogua ase, nnɛmaa ɔyɛ wɔ nya, ofikyɛ animguaseɛ ngɔhã wɔ, ofikyɛ wɔ wora kofi wɔ ndaluwa nu nyanzoen ne, yeɛ wɔ kunalilɛ nu animguaseɛ ne, ɛngɔkaye ye ko.

Yesaya 55:2

Nzu ati yeɛ ɛmɔfa sikaa bɛtɔ nikyee bɔ nna aleɛ ahɔ ɔ, ɔne kyɛ ɛmɔsɛkye ɛmɔ anwoserɛ wɔ nikyee bɔ ɔmma ɛmɔ ko nyi nwo ɔ? Ɛ́mɔtie me yé, ná ɛ́mɔli bɔ ɔte paa ɔ, ná ɛ́mɔma ɛmɔ kra nye gye aleɛ sɔkyee nwo.

Lewitikɔso 25:19

Aseɛ ne kɔhye aleɛ, na ɛmɔkoli ma ɛmɔ ko koyi, ná ɛmɔatena aseɛ ne aso asomdwee nu.

Lewitikɔso 26:26

Ngɔma ɛhɔen kɔwa ɛmɔ aseɛ so; mmrasua buru yeɛ bɛkɔto ɛmɔ aleɛ wɔ bokyea komapɛ aso ɔ. Mmrasua nemɔ kosusu aleɛ ne mmaa mmaa bie yeɛ bɛkɔma ɛmɔ ɔ, yiti sɛ ɛmɔdi a, ɛmɔ ko ngoyi.

Lewitikɔso 26:5

Ɛmɔkɔhɔ so bɛkɔboro aburoo alaa maa okoodwu mmerɛ bɔ ɛmɔte bobe ɔ, na ɛmɔkɔhɔ so bɛkɔte bobe alaa maa okoodwu mmerɛ bɔ ɛmɔdua aburoo ɔ. Ɛmɔkodidi maa ɛmɔ ko koyi, ná ɛmɔatena aseɛ ne aso asomdwee nu.

Mika 6:14

Ekodidi, nakoso wɔ ko ngoyi; ɛhɔen kandinga kɔwa wɔ wɔ nu, ɛkɔfa nningyein kosie, nakoso ɛngɔhora ngɔbɔ ye nwo waen; nakoso bɔ ɛkɔbɔ ye nwo waen ne, ngɔmaa okofi wɔ sa wɔ koɛ nu.

Sefania 3:11

“Sɔ mmerɛ ne, w’animguaseɛ yɔleɛ amukoraa bɔ ɛfa tole me mmeraa ne, ngɔye ngofi berɛ, na bɛ bɔ bedi anwomasoɛ nu ahurusi ne, ngotu bɛ bo ngofi wɔ nu, na ɛngɔyɛ ahandaen ko wɔ me bokaa krongron ne aso.

Sakaria 9:15

Asafo AWURADE kɔbɔ bɛ nwo waen, bekoli ngonim, bekohwi bɛkɔfa taya nyɔboɛ so, bɛkɔno, na bɛkɔbɔ ese kyɛ ebiaa babobo ne, bɛ ko koyi kyɛ talie, kyɛ afɔleɛ bokyea ndweasoɛ nemɔ.

Sakaria 9:17

Ah, kyɛbɔ osi te paa ɔ, kyɛbɔ ye nwo si yɛ nyemene ɔ! Aburoo kɔma mmerandeɛ mɔ kɔyɛ tukutukuu, na nzaa monɛ koso kɔma ndaluwa kɔyɛ sɔ ala.

Romanfoɛ 10:11

Na Ahyerɛlɛ ne kã kyɛ, “Ebiala bɔ ode ye di ne, ye nyunu ngogua ase.”

Romanfoɛ 5:5

Na anyelasoɛ nni ngasi, ofikyɛ Nyameɛ nate ye Sunzum Krongron bɔ ɔfa mane yɛ ne aso wafa ye ɔdɔ somaa ne wawura yɛ ahone nu.

Romanfoɛ 9:33

kyɛbɔ bahyerɛ kyɛ, “Tie, méfa nyɔboɛ bie méto Sion bɔ ɔkɔyɛ sundiboɔ kɔma mmenia ɔ, nyɔbotaen bɔ ɔkɔmaa bekofi ase ɔ; nakoso ebiala bɔ okole ye koli ne, ye nyunu ngogua ase.”

Deuteronomi 11:15

Ɔkɔma ɛserɛ kofifi w’aseɛ so kɔma wɔ nyɛmmoa, na ekodidi kɔma wɔ ko koyi.

Deuteronomi 12:12

Na ɛmɔkoli ahurusi wɔ AWURADE ɛmɔ Nyameɛ nyunu, ɛmɔ ne ɛmɔ mma mmienzua ne mmrasua, ɛmɔ ngoaa ne afaneɛ mɔ, ɔne Lewifoɛ bɔ bɛte ɛmɔ kuro, ofikyɛ bɛ de belle kyɛfa anaa agyapadeɛ biala kyɛbɔ ɛmɔ de ɛmɔanya ye ne.

Deuteronomi 12:18

Na mmom, di ye AWURADE wɔ Nyameɛ nyunu, nekaa bɔ AWURADE wɔ Nyameɛ kɔneanea nu kɔye kosie berɛ ne: ɛne wɔ mma mmienzua ne mmrasua, wɔ ngoaa ne w’afaneɛ mɔ, ɔne Lewifoɛ bɔ bɛte wɔ kuro ɔ. Na ɔsɛ kyɛ edi ahurusi wɔ AWURADE wɔ Nyameɛ nyunu wɔ w’adwuma biala bɔ ɛkɔyɔ ɔ nu.

Deuteronomi 12:7

Ɛmɔ ne ɛmɔ awuro ama bekodidi berɛ wɔ AWURADE ɛmɔ Nyameɛ nyunu, na ɔnate ɛmɔ adwuma mukoraati bɔ AWURADE ɛmɔ Nyameɛ wayira ɛmɔ ye nwo ne ati, ɛmɔkoli ahurusi.

Deuteronomi 8:10

Na sɛ edidi ma wɔ ko yi a, ye AWURADE wɔ Nyameɛ ayɛ, ɔnate aseɛ paa bɔ wafa wama wɔ ne ati.

1 Timoteo 6:17

Dwudwo kyire sikafoɛ bɔ bɛwɔ wiase, kyɛ nnɛmaa bɛmoma bɛ nwo so, anaakyɛ nnɛmaa bɛfa bɛ nye bɛto anwonyadeɛ bɔ ɔpɛ nu kɔ ɔ so; na mmom ɔsɛ kyɛ bɛfa bɛ nye bɛto Nyameɛ bɔ ɔma yɛ nningyein amukoraa mmorosoɛ ma yɛ nye gye ne aso.

1 Yohane 2:28

Na afei me ngwadaa mɔ, ɛmɔhɔ so bɛtena ye nu, amaa sɛ ye walɛ ne dwu ná ɔye ye nwo ali a, yahora yasi y’ahone, na yamvɛre wɔ ye nyunu.