Yoel 2:17 - AHYERƐLƐ KRONGRON

¹⁷ Asɔfo nemɔ, bɔ bɛ yeɛ bɛte AWURADE somvoɛ mɔ ne, odi kyɛ besu wɔ abrannaa ne, ɔne afɔleɛ bokyea ne b’afia, ná bɛkã kyɛ, “Ao AWURADE, nwu wɔ maen anwumvoin, nnɛma w’agyapadeɛ yɛ nikyee bɔ bebu ye animtia, maen maen mɔ noa nu ngorohoɛ dwirɛ. Nzu ati yeɛ bɛkekã ye wɔ maen maen mɔ nu kyɛ, ‘Bɛ Nyameɛ ne, ɔwɔ nisua?’ ɔ.”

Yoel 2:17 Iomraidhean Croise

1 Ahemvo 6:3

Sua ne nyunu abrannaa ne, ye tendenn nu te agyirɛ aburanyɔ, fi ye ti kɔka ye ti, na ye piri nu te agyirɛ buru.

1 Ahemvo 9:7

ye de ngɔpɛ Yisraelfoɛ asue ngofi aseɛ bɔ mafa mama bɛ ne aso, na sua bɔ mate ye nwo mafa me dumaa mato so ne, ngɔye me nye ngofi so. Na Yisrael kɔkakyi maen amukoraa bɛ noa nu anyandera ne ngorohoɛ dwirɛ.

2 Aberɛso Dwirɛ 7:20

ye de ngɔpɛ ɛmɔ asue ngofi aseɛ bɔ mafa mama ɛmɔ ne aso, na awuro he bɔ mate ye nwo mafa me dumaa mato so ne, ngɔye me nye ngofi so, na mamaa wakakyi mmenia amukoraati bɛ noa nu anyandera ne ngorohoɛ dwirɛ.

2 Aberɛso Dwirɛ 8:12

Yeɛ AWURADE afɔleɛ bokyea bɔ Solomon wasi ye wɔ awuro ne nyunu abrannaa ne aso ne, Solomon bɔle naen yeralɛ afɔleɛ wɔ so mane AWURADE.

Nehemia 9:36

Bɔ wato yɛ ɛhe oo! Ɛne de yayɛ nganga. Aseɛ bɔ ɛfa mane yɛ nana mɔ kyɛ bɛfa so aleɛ ne so nningyein paa ne, yayɛ nganga wɔ so.

Edwein 115:2

Nzu ati yeɛ odi kyɛ maen maen bɛkã kyɛ, “Bɛ Nyameɛ ne, ɔwɔ nisua?” ɔ.

Edwein 42:10

Me pɔfoɛ mɔ b’anyinga bɔ bɛkã me ne, ɔte kyɛ kena wɔ me wereɛ nu, na daa bebisa me kyɛ, “Wɔ Nyameɛ ne, ɔwɔ nisua?”

Edwein 42:11

Ao me kra, nzu ati yeɛ aboto sɔaa ye, nzu ati yeɛ wɔ wora abɔ wɔ me nu ye? Fa wɔ wora wura Nyameɛ nu, ofikyɛ ngosa ngɔye ye ayɛ. Ɔte me bokafoɛ ne me Nyameɛ.

Edwein 42:3

Me nye moen yeɛ wakakyi m’aleɛ eyia ne kɔngɔen ɔ; daa biala mmenia bisa me kyɛ, “Wɔ Nyameɛ ne, ɔwɔ nisua?”

Edwein 42:4

Mekaye sɔ dwirɛ hemɔ a, né me kra wora abɔ: kyɛbɔ me ne ɛlɔen ne yɛhɔle, ɛlɔen kandinga bɔ bedi aluolue ne, bɔ nne esebɔlɛ ne asennaa dwein, nnili folii ne nyunu ngɔle Nyameɛ awuro ne.

Edwein 74:10

Ao Nyameɛ, bɛ bɔ bekyi wɔ ne, kyinzu koraa yeɛ bɛ ngorohoɛ ne okoodwu ɔ? Pɔfoɛ ne, aso ɔkɔsɛkye wɔ dumaa afebɔɔ anaa?

Edwein 79:10

Nzu ati yeɛ odi kyɛ maen maen mɔ bebisa kyɛ, “Bɛ Nyameɛ ne, ɔwɔ nisua” ɔ? Wɔ somvoɛ mɔ bɛ mogya so wereɛtɔlɛ ne, ma maen maen mɔ benwu ye bɔ yɛ koso yɛ nye tua ɔ.

Edwein 79:4

Yayɛ ngorohoɛ nikyee wɔ yɛ mmango mɔ nye so, bɛ bɔ bapɛ yɛ nwo bayia ne, bɛsere yɛ bɛkã yɛ anyinga.

Edwein 89:41

Bɛ bɔ bɛpɛ nu berɛ bɛkɔ ne, bɛfẽ ye nningyein; wayɛ ngorohoɛ dwirɛ wɔ ye mmango nu.

Edwein 89:51

Ao AWURADE, nea anyinga bɔ wɔ pɔfoɛ mɔ bɛkã ɔ, kyɛ bɛsere wɔ sona bɔ apopa ye ngoo ne, ye agyirɛ bɔ otu ɔ.

Ɛksadɔso 34:9

Na ɔhane kyɛ, “O AWURADE, sɛ alo me a, nzaade AWURADE, mesrɛ wɔ, boka yɛ so ɛne yɛ hɔ. Ɔwɔ nu kyɛ mmenia hemɔ bɛ so yɛ se de, nakoso fa yɛ amumuyɛɛ ne yɛ bɔne kyɛ yɛ, ná fa yɛ wura wɔ kunu.”

Yesaya 22:12

Sɔ kyẽa ne, Asafo AWURADE Nyameɛ frɛfrɛle mmenia kyɛ besu bɛbɔ awuye, kyɛ bɛbɔ tikwa ná bɛhera ɛsɛen tena.

Yesaya 37:20

Yiti afei, ao AWURADE yɛ Nyameɛ, mesrɛ wɔ, pepɛ de yɛ fi ye sa nu, amaa ɔnate so aseɛ ye aso ahennie amukoraa banwu ye kyɛ wɔ ngome twe yeɛ ɛte AWURADE ɔ.”

Hesekiel 20:9

Nakoso ɔnate me dumaa ti, ndwe nzale, amaa ɔnate so me dumaa nwo angua fiɛ wɔ maen maen bɔ bɛte so nemɔ anyunu; maen maen bɔ so ama bɛ nye tua kyɛbɔ nyele me nwo ali ngyirele bɛ, ná nyele bɛ mvili Misraim aseɛ so ne.

Hesekiel 8:16

Afei ɔfale me wale AWURADE awuro ne akunu dɔ. Na AWURADE asɔneyɛɛ sua anoa nu berɛ, abrannaa ne ne afɔleɛ bokyea ne b’afia berɛ, na nwuni mmienzua kɔyɛ aburanyɔ ne nnu wɔ berɛ. Né bɛ si kyire AWURADE asɔneyɛɛ sua ne; yeɛ né bɛ nyunu kyire eyia afiteleɛ bɔ bɛsɔne eyia, bɔ bɛ nye kyire eyia afiteleɛ ɔ.

Hosea 14:2

Ɛ́mɔpena edwirɛ mɔ bɔ ɛmɔkɔhã ɔ, ná ɛ́mɔsa bɛbra AWURADE berɛ; ɛmɔhã behyire ye kyɛ, “Kyikyi amumuyɛɛ amukoraa; nwu yɛ anwumvoin de yɛ, na yɛkɔfa yɛ noa dwirɛ yɛkɔyɛ nandwie nyii yɛkɔbɔ afɔleɛ yɛkɔma wɔ.”

Yoel 1:13

Ɛmɔ, asɔfo mɔ, ɛ́mɔhera ɛsɛen tena ná ɛ́mɔbɔ awuye; ɛmɔ, afɔleɛ bokyea nwo somvoɛ mɔ, ɛ́mɔsu. Ɛmɔ, me Nyameɛ somvoɛ mɔ, ɛmɔbra nu, ɛ́mɔhera ɛsɛen tena kɔngɔen ne amukoraa, ofikyɛ bayakyi aleɛ afɔleɛ ne anonneɛ afɔleɛ bɔlɛ wɔ ɛmɔ Nyameɛ awuro.

Yoel 1:9

Bayakyi aleɛ afɔleɛ ne anonneɛ afɔleɛ bɔlɛ wɔ AWURADE awuro. Asɔfo bɔ bɛ yeɛ bɛte AWURADE somvoɛ mɔ ne, bedi aworabɔlɛ.

Amose 7:2

Na belili aseɛ ne aso ndire amukoraa beyiele nen yeɛ ngane kyɛ, “Ao AWURADE Nyameɛ, mesrɛ wɔ, fa kyɛ! Ɔkɔyɛ sɛɛ né Yakob wahora wagyina ye noa? Ofikyɛ ɔte kãa paa.”

Amose 7:5

Yeɛ ngane kyɛ, “Ao AWURADE Nyameɛ, mesrɛ wɔ, nnɛma ɛhe ba nu! Ɔkɔyɛ sɛɛ né Yakob wahora wagyina ye noa? Ofikyɛ ɔte kãa paa.”

Mika 7:10

Afei, me pɔfoɛ ne konwu ye, na animguaseɛ kɔhã ye, ye bɔ obisa me kyɛ, “AWURADE wɔ Nyameɛ ne, ɔwɔ ni?” ne. Ngɔfa me nye ngɔnea ye, na afei bekotiatia ye so kyɛ dwaaso asaa.

Malaki 1:9

Nzaade, mesrɛ ɛmɔ, ɛ́mɔsrɛ Nyameɛ ma ɔlo yɛ e! Na sɛ akyɛdeɛ bɔ otira ɛmɔ sa nu hɔ ɛne a, ye de ɔkɔyɛ sɛɛ né walo ɛmɔ? Asafo AWURADE noa dwirɛ ɛne.

Numeri 25:6

Berɛ ne ala, bɔ begu so besu wɔ ɛtena sua atenaleɛ anoa nu berɛ ne, Yisraelniɛ bienzua bie ɔɔfale Midianniɛ braa bie oowurale ye ɛtena sua nu. Né Mose ne Yisrael maen ne amukoraa bɛ nye tua ye.

Mateo 23:35

Ye sɔ ne ati, mogya tenenee amukoraa bɔ bahwie bagua aseɛ so, ofi teneneeniɛ Abel mogya so kodwu Barakia awa Sakaria, bɔ ɛmɔhuni ye wɔ nekaa krongron berɛ ne afɔleɛ bokyea ne b’afia ne, bɛ mogya ne nwo asotwe kɔwa ɛmɔ so.

Mateo 27:43

Ɔfale ye nwo tole Nyameɛ so; sɛ okuro ye dwirɛ a, maa ɔpepɛ ole ye e; ofikyɛ ɔhane kyɛ, ‘Me ole Nyameɛ Awa ne!’ ”

Deuteronomi 28:37

Maen maen mukoraati bɔ AWURADE kɔfa wɔ kɔhɔ so ne, bɔ ɔkɔto wɔ ne kɔyɛ bɛ nwanwa, na ɛmɔkɔkakyi berɛ ama mɔ bɛ noa nu anyandera ne ngorohoɛ dwirɛ.

Deuteronomi 32:27

Nakoso né mesuro kyɛ pɔfoɛ ne kɔfa kɔhoahoa ye nwo, ofikyɛ ebiaa né bɛ pɔfoɛ mɔ ande bɔ meyɔ ne abo, na bɛkɔhã kyɛ, ‘Yali ngonim; nna AWURADE yeɛ ɔyɔle sɔ nningyein he amukoraati ɔ.’

Yosua 7:9

Kanaanfoɛ ne aseɛ ye asofoɛ mukoraati bɛkɔte sɔ dwirɛ ye, bɛkɔpɛ yɛ nwo bekoyia, na bɛkɔma yɛ boso konua. Nzikyɛ yeɛ ɛkɔyɔ kɔfa wɔ dumaa bɔ odi mu ne anwo ɔ?