Yoel 1:14 - AHYERƐLƐ KRONGRON

¹⁴ Ɛ́mɔyɛ akɔngyere krongron, ɛ́mɔyɛ nyianu krongron. Ɛ́mɔboaboa mbanyi ne aseɛ ne aso mma amukoraa bɛ noa wɔ AWURADE ɛmɔ Nyameɛ awuro, ná ɛ́mɔsu bɛfrɛ AWURADE.

Yoel 1:14 Iomraidhean Croise

2 Ahemvo 10:20

Yehu hyɛle kyɛ, “Ɛ́mɔyia nyianu krongron bɛma Baal.” Yiti bɛbɔle dwaa ne.

2 Aberɛso Dwirɛ 20:13

Sɔ mmerɛ ne, Yuda amukoraa begyinane AWURADE nyunu; bɛ ne bɛ ngwadaa ne bɛ ye mɔ ne bɛ mma mɔ.

Nehemia 8:18

Na daa biala, ofi kyẽa bɔ oli moa ne kɔpem kyẽa bɔ ɔpɛ ye bo ne, ɔkengale Nyameɛ mmeraa nwomaa ne. Belili aluolue ne ɛlɛsoo. Na ɛlɛbɔtwɛ ne aso, bɛyɔle nyianu krongron kyɛbɔ nhyehyɛleɛ ne te ne.

Ɛseta 4:16

“Kɔboaboa Yudafoɛ bɔ bɛwɔ Susa mukoraa noa, ná ɛ́mɔgyina me gya nu bɛyɛ akɔngyere. Nnɛma ɛmɔdidi, yeɛ nnɛma ɛmɔno hwee, eyia ne kɔngɔen sɔ alaa ɛlɛsa. Me koso, me ne m’abaawa nemɔ yɛkɔyɔ sɔ ala. Ye si ye, ngɔhɔ Nana nyunu, ɔwɔ nu kyɛ otia mmeraa de, na sɛ ɔba kyɛ nwu a, maa nwu.”

Yeremia 14:2

Yuda di aworabɔlɛ, ye pambim mɔ ayɛ hodwoo; bɛlela ase aworabɔlɛ nu, na Yerusalem sufrɛ afo ahɔ anwuro.

Yeremia 36:9

Na ɔwale kyɛ, Yuda hene Yehoakim bɔ ye baba ole Yosia ne, ye ahennie afoɛ bɔ ɔtɔ so nnu ne, bosome ngona ne anu, Yerusalemfoɛ amukoraa ne mmenia amukoraa bɔ befili Yuda nguro nemɔ aso bɛwale Yerusalem ne, bɛyɛle akɔngyere wɔ AWURADE nyunu.

Yoel 1:2

Ɛmɔ, mbanyi mɔ, ɛ́mɔtie ɛhe, ɛmɔ, aseɛ ne aso ama amukoraa, ɛ́mɔyɛ asoɛ betie! Aso sɔ dwirɛ he, wasi ɛmɔ aberɛ so le, anaa ɛmɔ nana mɔ b’aberɛ so po le?

Lewitikɔso 23:36

Ɛlɛsoo yeɛ ɛ́mɔbɔ see so afɔleɛ bɛ́ma AWURADE ɔ; na ye ɛlɛbɔtwɛ ne aso, ɛ́mɔyɛ nyianu krongron ná ɛ́mɔbɔ see so afɔleɛ bɛma AWURADE; ɔte nyianu krongron; nnɛma ɛmɔyɔ adwuma biala.

Yona 3:5

Yeɛ Ninewefoɛ belele Nyameɛ dwirɛ ne belili. Bɛfa bɛtole dwaa kyɛ odi kyɛ ebiala obua da, na bɛherale ɛsɛen tena, ofi atitirefoɛ mɔ so bɔ ɔkwaadwu kwahweabaa mɔ so.

Yona 3:8

Ɔsɛ kyɛ mmenia ne ngaka bɛkera ɛsɛen tena, ná bɛyere bɛ nwo besu bɛfrɛ Nyameɛ. Ɔsɛ kyɛ ebiala yakyi ye bɔne yɔleɛ ɔne ye aminɛlilɛ bɔ ɔwɔ ye so ne.

Sefania 2:1

Ɛmɔ, nyanzoen maen, ɛ́mɔhã ɛmɔ nwo bɛ́bɔ nu, ɛ́mɔboaboa ɛmɔ noa!