Yakobo 4:6 - AHYERƐLƐ KRONGRON

⁶ Nakoso adom bɔ ɔfa ma ne, ɔsone pee. Na ye sɔ ati yeɛ Ahyerɛlɛ ne kã kyɛ, “Nyameɛ nye sa anwomasoɛfoɛ, na ɔdo anwobrɛaseɛfoɛ.”

Yakobo 4:6 Iomraidhean Croise

2 Aberɛso Dwirɛ 32:26

Na afei Hesekia brɛle ye nwo ase nuni ye nwo fili ye anwomasoɛ ne anwo, ɔne Yerusalemfoɛ yeɛ benuni bɛ nwo ɔ. Yiti AWURADE ɛyaa piri bɔ wafɛ ye wɔ bɛ so ne, ɔhwe sale wɔ mmerɛ bɔ né Hesekia te ngoa nu ɔ.

2 Aberɛso Dwirɛ 33:12

Na mmerɛ bɔ ɔwɔ amaneɛ nu ne, ɔsrɛle AWURADE ye Nyameɛ kyɛ onwu ye anwumvoin, na ɔbrɛle ye nwo ase paa wɔ ye nana mɔ bɛ Nyameɛ nyunu.

2 Aberɛso Dwirɛ 33:19

Ye mbaeɛ bɔ ɔbɔle, kyɛbɔ Nyameɛ tiele ye sufrɛ, ye bɔne amukoraa, ye nahorɛlilɛ, nekaa bɔ osisili asɔneyɛɛ mɔ gyinagyinane Asera dosii mɔ ne amoen mɔ, koraka yeɛ ɔsakyera ne, bahyerɛ ye wɔ mmenia bɔ bɛse ase ne b’abakɔsɛm nwomaa ne anu.

2 Aberɛso Dwirɛ 33:23

Wammrɛ ye nwo ase wamma AWURADE kyɛbɔ ye baba Manase de ɔbrɛle ye nwo ase ne, na mmom Amon yɔle bɔne pee.

2 Aberɛso Dwirɛ 34:27

mmerɛ bɔ ɛtele ye dwirɛ bɔ ɔhã fale maen he ɔne nu ama nwo ne, ɔnate kyɛ enuni wɔ nwo ná ɛbrɛle wɔ nwo ase wɔ Nyameɛ nyunu, ná abrɛ wɔ nwo ase wɔ me nyunu, asunzua wɔ ndaadeɛ nu, ná asu wɔ me nyunu ne ati, me koso mate bɔ ahã ne; AWURADE noa dwirɛ ɛne.

YOB NWOMAA NE 22:29

Sɛ ɔbrɛ ebiemɔ ase a, ɛnwa anwomasoɛ ti ɔ, ofikyɛ ɔpepɛ de anwobrɛaseɛniɛ.

Edwein 138:6

Ofikyɛ ɔwɔ nu kyɛ AWURADE wɔ anwuro anwuro de, nakoso ɔdo anwobrɛaseɛfoɛ; na anwomasoɛfoɛ de, ɔbrɛ bɛ ase fi dedeede.

Edwein 9:12

Ofikyɛ ye bɔ ɔtɔ mogya so wereɛ ne, ɔkaye bɛ bɔ bɛwɔ amaneɛ nu ɔ, na ɔmma ye wora mvi bɛ sufrɛ.

Ɛksadɔso 18:11

Na afei de, manwu ye kyɛ AWURADE te piri tra bosoen biala, ofikyɛ olele mmenia ne fili Misraimfoɛ sa nu, mmerɛ bɔ né bɛ́hyɛ bɛ anyeborolɛ ne.”

Anyandera 15:33

AWURADE surolɛ te nworɛ bɔ ɔtengyɛtengyɛ sona ɔ, na anwobrɛaseɛ ne animnyam yeɛ bɛnate ɔ.

Anyandera 18:12

Anwomasoɛ mma onyie sona yé, na anwobrɛaseɛ ne animnyam yeɛ bɛnate ɔ.

Anyandera 22:4

Anwobrɛaseɛ ne AWURADE surolɛ nwo akatuaa yeɛ ɔfa anwonya, animnyam ne ngoa ba ɔ.

Anyandera 29:23

Sona ye anwomasoɛ brɛ ye ase, nakoso bɔ ɔte sunzum nu awiɛmvoɛ ne de, okonya animnyam.

Anyandera 3:34

Nahorɛ nu, ɔgoro ngorohoɛfoɛ nwo, nakoso anwobrɛaseɛfoɛ de, ɔdo bɛ.

Yesaya 2:17

Bɛkɔbrɛ sona ye ahandaen ase, yeɛ bekogua mmenia b’anwomasoɛ nyunu ase, na AWURADE angome yeɛ bɛkɔma ye so sɔ kyẽa ne ɔ.

Yesaya 54:7

Mbole wɔ mmerɛ kãa bie, nakoso ngogyina anwumvoinnwunɛ piri so ngɔfa wɔ ngɔbata me nwo.

Yesaya 57:15

Ofikyɛ Anwuro Anwuroniɛ ne, bɔ ɔwɔ berɛ afebɔɔ, bɔ ye dumaa ole Krongron ne, ɔnwa nyoo: “Anwuro ne nekaa krongron berɛ yeɛ nde ɔ, na sona bɔ wanya nnuhoɛ ne anwobrɛaseɛ ne, me ne ye yeɛ yɛte ɔ, amaa ɔnate so mama anwobrɛaseɛfoɛ bɛ sunzum anya ngoa, ná mama bɛ bɔ banya nnuhoɛ ne b’ahone anya ngoa.

Daniel 4:37

Na afei de, me Nebukadenesa, mefa ayɛyelɛ, ɛkamvolɛ ne anidie mema nyameɛso Hene ne, ofikyɛ bɔ ɔyɔ amukoraa te turoloo, na ye atee tengyɛ, na bɛ bɔ bɛbɔ anwomasoɛ bra ne, ɔkora brɛ bɛ ase.

Mateo 13:12

Na ebiala bɔ ole bie ne, bɛkɔfa ebieku bɛkɔboka ye so, ná wanya ye mmorosoɛ; nakoso ebiala bɔ olle bie ne de, bɔ ole ye ne po, bekole bekofi ye sa nu.

Mateo 23:12

Na ebiala bɔ ɔmoma ye nwo so ne, bɛkɔbrɛ ye ase; yeɛ ebiala bɔ ɔbrɛ ye nwo ase ne, bɛkɔma ye so.

Luka 1:52

Watu tumifoɛ mɔ wafi b’ahennie bia so, na wapagya awiɛmvoɛ mɔ so.

Luka 14:11

Ofikyɛ ebiala bɔ ɔma ye nwo so ne, bɛkɔbrɛ ye ase; na bɔ ɔbrɛ ye nwo ase ne, bɛkɔma ye so.”

Luka 18:14

Na Mekã mekyire ɛmɔ kyɛ, sɔ sona he mmom yeɛ Nyameɛ buale be maa ɔhɔle ye awuro ɔ, na nna ko ne ɔ; ofikyɛ ebiala bɔ ɔma ye nwo so ne, bɛkɔbrɛ ye ase, nakoso bɔ ɔbrɛ ye nwo ase ne de, bɛkɔma ye so.”

Yakobo 4:10

Ɛ́mɔbrɛ ɛmɔ nwo ase wɔ Awurade nyunu, na ɔkɔma ɛmɔ so.

1 Petro 5:5

Sɔ ala yeɛ ɛmɔ bɔ ɛmɔte mmabunu ne koso, ɔsɛ kyɛ ɛmɔbrɛ ɛmɔ nwo ase bewura mbanyi mɔ bo ɔ. Ɛmɔ amukoraa, ɛ́mɔfa anwobrɛaseɛ bɛ́hera, ná ɛ́mɔfa bɛ́so ɛmɔ nwo ngoko ngoko, ofikyɛ Nyameɛ nye sa anwomasoɛfoɛ, na ɔdo anwobrɛaseɛfoɛ.

1 Samuel 2:3

Nnɛma ɛmɔka nduhoɛ dwirɛ mbiri mbiri ko, nnɛmɔma anwomasoɛ dwirɛ fi ɛmɔ noa nu ba; ofikyɛ AWURADE te Nyameɛ bɔ onwu nikyee biala ɔ, na ye yeɛ obua ebiala yɔleɛ nwo ndɛen ɔ.