Yakobo 1:12 - AHYERƐLƐ KRONGRON

¹² Sona bɔ omia ye nye fa nzɔhwɛ nu ne, onya saleɛ; ofikyɛ sɛ ɔkora gyina nzɔhwɛ ne noa a, okonya ngoa abotire bɔ Awurade afa ahyɛ bɛ bɔ bekuro ye dwirɛ bɔ ne.

Yakobo 1:12 Iomraidhean Croise

Gyenesise 22:1

Ɛhemɔ asi ne, Nyameɛ sole Abraham neane. Ɔfrɛle ye kyɛ, “Abraham!” Na Abraham surole kyɛ, “Me ɛhe.”

Nehemia 1:5

Na ngane kyɛ, “Ao AWURADE, nyameɛso Nyameɛ, Nyameɛ piri bɔ wɔ nwo yɛ suro bɔ edi apam so ná ɛye ɔdɔ bɔ onni ngasi ali kyire bɛ bɔ bekuro wɔ dwirɛ ná bedi wɔ mmeraa dwirɛ ne aso ne,

YOB NWOMAA NE 2:10

Nakoso obuale ye kyɛ, “Edwudwo kyɛbɔ brasua kwaseaa biala odwudwo ɔ. Nzu ɔ? Nyameɛ ma yɛ nikye paa a, yɛde; nzu ati yeɛ sɛ ɔma yɛ bɔ ɔtte mayee a, ɔnzɛ kyɛ yɛde ɔ?” Na ɛhemɔ amukoraa nu ne, Yob amma ye noa andia Nyameɛ.

YOB NWOMAA NE 5:17

“Sona bɔ Nyameɛ twi ye nyunu ne, onya saleɛ, yiti wɔ so bɔ Ɛdangama Nyameɛ ɔtwe ne, nnɛkã kyɛ ɛmbene so.

Edwein 11:5

AWURADE so teneneefoɛ ne bɔnefoɛ nea, nakoso ye kra kyi sona bɔ okuro basabasayɔlɛ ɔ.

Edwein 119:67

Anzana ɛbaahwe me so ne, né mali makyebu, nakoso afei de, medi wɔ dwirɛ so.

Edwein 119:71

Ɔte paa ma me kyɛ ɛhwene me so ɔ, amaa ɔnate so masua w’ahyɛdeɛ ne.

Edwein 119:75

Ao AWURADE, mese kyɛ wɔ ndɛenbualɛ te turoloo, na ɛnate nahorɛlilɛ so ahwe me so.

Edwein 5:11

Nakoso ebiala bɔ ɔbafea wɔ nu ne de, ma ye nye gye; maa bɛfa anigye bɛto dwein daa. Bɔ bɛ nwo waen, amaa ɔnate so bɛ bɔ bɛ nye gye wɔ dumaa nwo ne, banya wɔ nu anigye.

Edwein 94:12

Ao AWURADE, sona bɔ ɛtwe ye so, ɔne bɔ ekyirekyire ye wɔ mmeraa ne, onya saleɛ.

Ɛksadɔso 20:6

Nakoso bɛ bɔ bekuro me dwirɛ, ná bedi me mmeraa dwirɛ so ne de, mekuro bɛ dwirɛ maa okodwu aworɛ ndoatoasoɛ apee apee so.

Anyandera 17:3

Bɛfa bokyea bɛpɔ ɛdwetɛ nwo, yeɛ bɛfa afaa bɛpɔ sikaa kɔkorɛ nwo, nakoso AWURADE yeɛ oso adwene nea ɔ.

Yesaya 64:4

Ofi tetetete yeɛ mmenia bennya bɛttele, anaa ɔppɛle bɛ so anu ɔ, yeɛ anyeɛ biala koso onnwuni Nyameɛ bɔ ɔte kyɛ wɔ bɔ ɔko ma bɛ bɔ bɛ wora wura ye nu kyɛ wɔ ɔ.

Sakaria 13:9

Na ngyɛmuɛ nza nu ko ne, ngɔfa bɛ ngɔfa see nu, ngɔpɔ bɛ nwo kyɛbɔ bɛpɔ ɛdwetɛ nwo ɔ, na ngohwi bɛ nwo kyɛbɔ betwi sikaa kɔkorɛ nwo ɔ. Bekosu bɛkɔfrɛ me dumaa, na me wora ngotie bɛ. Ngɔhã kyɛ, ‘Bɛte me maen’ na bɛ wora bɛkɔhã kyɛ, ‘AWURADE yeɛ ɔte me Nyameɛ ɔ.’ ”

Mateo 10:22

Ɔnate me dumaa ti, mmenia mukoraa kɔpɔ ɛmɔ; nakoso bɔ okotindim koodwu ayieleɛ nen, ye yeɛ bekole ye ngoa ɔ.

Mateo 25:34

Na afei Ɛhene ne kose bɛ bɔ bɛwɔ ye famaa so ne kyɛ, ‘Ɛmɔ bɔ me Baba ayira ɛmɔ ɔ, ɛmɔbra bɛɛfa ahennie bɔ basiesie bama ɛmɔ fi ewiase ahyɛaseɛ ne bɛyɛ ɛmɔ deɛ.

Luka 6:22

“Ɛmɔanya saleɛ, wɔ mmerɛ bɔ mmenia bɛpɔ ɛmɔ, bɛyɛ ɛmɔ nyeyemuɛ, bɛbɔ ɛmɔ alapaa, ná bɛpo ɛmɔ dumaa kyɛ ɔte musue nikye, ɔnate Sona Awa ne ati.

Romanfoɛ 5:4

na animia ma suahunu, yeɛ suahunu koso ma anyelasoɛ.

Romanfoɛ 8:28

Yɛse kyɛ bɛ bɔ bekuro Nyameɛ dwirɛ ne, bɔ okosi biala ɔboka bɛ, bɛ bɔ ɔnate ye nhyehyɛleɛ so wafrɛ bɛ ne.

1 Korintofoɛ 2:9

Nakoso bahyerɛ kyɛ, “Bɔ anyeɛ nnwuni ye, anaa bɔ asoɛ ɔttele ye le, anaa bɔ ebiala ɔddwenene ye nwo le ne, yeɛ ɔte nikyee bɔ Nyameɛ asiesie ama bɛ bɔ bekuro ye dwirɛ ɔ.”

1 Korintofoɛ 8:3

Na sona bɔ okuro Nyameɛ dwirɛ nen, ye yeɛ Nyameɛ se ye ɔ.

1 Korintofoɛ 9:25

Ebiala bɔ otu amirika pere ngonim ne, ɔhyɛ ye nwo so wɔ nikyee biala nu. Bɛyɔ sɔ ná banya abotire abasobɔdeɛ bɔ ɔsɛkye ɔ, nakoso yɛ de, yɛnya abotire abasobɔdeɛ bɔ ɔnzɛkye ɔ.

Deuteronomi 13:3

ye de nnɛtie sɔ ngɔmhyɛlɛniɛ anaa sɔ sona bɔ ɔnate laleɛ so hyɛ ngɔm ne dwirɛ. Ofikyɛ AWURADE ɛmɔ Nyameɛ óso ɛmɔ nea onwu ye kyɛ, aso ɛmɔ ahone mukoraati ne ɛmɔ kra mukoraati yeɛ ɛmɔfa bekuro AWURADE ɛmɔ Nyameɛ dwirɛ ne a.

Deuteronomi 7:9

Yiti ɔsɛ kyɛ enwu ye kyɛ, AWURADE wɔ Nyameɛ ne, ye ole Nyameɛ; Nyameɛ nahorɛlilɛniɛ bɔ odi ye adɔeɛ apam so ma mmenia bɔ bekuro ye dwirɛ ná bedi ye mmeraa dwirɛ so ɔ, kodwu aworɛ ndoatoasoɛ apee so.

Deuteronomi 8:2

Kaye atee amukoraa bɔ AWURADE wɔ Nyameɛ maa ɛfale so wɔ ɛserɛ so sɔ afoɛ aburanna ye anu, kyɛ ɔbrɛ wɔ ase, ná oso wɔ nea onwu w’ahone nu dwirɛ, sɛ aso ekoli ye mmeraa dwirɛ so anaakyɛ engoli so.

2 Timoteo 2:15

Bɔ mmɔden paa kyɛ ɛkɔsɔ Nyameɛ nye, kyɛ adwumayɔlɛniɛ bɔ ye adwuma nwo nyɛ ye nya ɔ, kyɛ sona bɔ okyirekyire nahorɛ dwirɛ ne pɛpɛɛpɛ ɔ.

2 Timoteo 4:8

Na bɔ waha bɔ ɔla berɛ ma me ole tenenee abotire bɔ Awurade, ndɛenbualɛniɛ tenenee ne ɔkɔfa kɔbɔ m’aba so sɔ Kyẽa ne ɔ; bɔ nna me ngome, na mmom bɛ bɔ bekuro ye nwo aliyelɛ ne amukoraa koso ɔkɔbɔ b’aba so bie.

Hebrifoɛ 10:32

Ɛ́mɔkaye mmerɛ bie bɔ wapɛ nu ɔ, bɔ ɛmɔɔyɛle agyidifoɛ nen, ɛmɔmiane bɛ nye bɛfale amaneɛ pee nu ne.

Hebrifoɛ 11:17

Ɔnate gyidie so yeɛ Abraham, bɔ né Nyameɛ ahyɛ ye bɔ ne, ɔfale ɔwa bienzua Yisake komapɛ twe ne kyɛ ɔfa ye bɔ afɔleɛ wɔ mmerɛ bɔ Nyameɛ sole ye neane ne.

Hebrifoɛ 12:5

Anaakyɛ ɛmɔ wora afi nguraenhyɛlɛ dwirɛ bɔ Nyameɛ kã kyire ɛmɔ kyɛ ɛmɔte ye mma ne hɔ ɔ? Ɔnwa yoo: “Mma, sɛ Awurade tea wɔ a, ɔyɛ a nnɛfa di angorɛ, yeɛ sɛ otwi wɔ nyunu koso a, ɔyɛ a nnɛma w’aba nu bu.

Hebrifoɛ 6:15

Abraham nyane aboterɛ nwondɛle, na ye sa hane bɔhyɛ ne.

Yakobo 2:5

Nniɛma mɔ bɔ ɛmɔla m’ahone nwo ɔ, ɛ́mɔtie! Aso Nyameɛ ɔnneneane nu ɔyyele wiase ahiafoɛ kyɛ bɛyɛ gyidie nu anwonyafoɛ, ná benya agyapadeɛ wɔ ahennie ne anu, ahennie bɔ wafa wahyɛ bɛ bɔ bekuro ye dwirɛ ne bɔ ne?

Yakobo 5:11

Ɛ́mɔtie, bɛ bɔ bemiane bɛ nye bɛfale amaneɛ nu ne, yɛbu bɛ kyɛ banya saleɛ. Yeɛ ɛmɔate Yob amaneɛnwunɛ nu animia ne, na ɛmɔanwu kyɛbɔ Awurade maa osi yiele ye ɔ, kyɛbɔ Awurade anwumvoinnwunɛ sone, ná osa le tema maa ɔbo so ɔ.

1 Petro 3:14

Nakoso sɛ tenenee ti ɛmɔnwu amaneɛ a, ɔte saleɛ ma ɛmɔ. Nnɛmɔma bɛ nwo suronyi tɔ ɛmɔ so, yeɛ nnɛmɔma ɛmɔ kunu tete ɛmɔ;

1 Petro 4:13

Na mmom, ɛ́mɔma ɔyɛ ɛmɔ fɛ kyɛ ɛmɔnwu Kristo amaneɛ ne bie ɔ, amaa sɛ bɛye ye animnyam ne ali a, ɛmɔ koso ɛmɔali ahurusi ná ɛmɔ nye agye.

1 Petro 4:14

Na sɛ ɔnate Kristo dumaa ti bɛbɔ ɛmɔ alapaa a, ɔte saleɛ ma ɛmɔ; ofikyɛ animnyam sunzum, Nyameɛ sunzum ne, ɔwɔ ɛmɔ so.

1 Petro 5:10

Na sɛ ɛmɔnwu amaneɛ wɔ mmerɛ kãa bie beyie a, adom mukoraa Nyameɛ, bɔ wafrɛ yɛ wawa ye animnyam afebɔɔ nu wɔ Kristu Yesu nu ne, okosiesie ɛmɔ maa ɛmɔkoli mu, ɔkɔma ɛmɔkogyina pindinn, ɔkɔma ɛmɔ anwoserɛ ná wama ɛmɔagyina pirim.

1 Petro 5:4

Na sɛ Mmoaenneafoɛ panyi ne ɔye ye nwo ali a, ɛmɔkonya animnyam abotire bɔ ɔnzɛkye koraa ne.

1 Yohane 4:19

Yɛkuro ye dwirɛ, ofikyɛ ye yeɛ olili moa hurole yɛ dwirɛ ɔ.

Nyekyire 2:10

Nnɛsuro amaneɛ biala bɔ ɛbaanwu ye ɔ. Tie, abɔnzam kɔfa ɛmɔ nu biemɔ kogua kuku nu, kyɛ ɔfa so ɛmɔ nea, na ɛmɔkonwu amaneɛ eleburu. Di nahorɛ kodwu ewue nu, na ngɔma wɔ ngoa abotire.

Nyekyire 3:19

Bɛ bɔ mekuro bɛ dwirɛ ne, metwi bɛ nyunu, yeɛ metwe bɛ so; yiti ma wɔ nye boro ná sakyera w’adwene.

Nyekyire 3:21

Na bɔ odi ngonim ne, ngɔmaa ɔne me kɔtena m’ahennie bia so, kyɛbɔ me koso mali ngonim ná me ne me Baba yatena ye ahennie bia so ne.