Tito 2:14 - AHYERƐLƐ KRONGRON

¹⁴ Ye yeɛ ɔfale ye ngoa tole berɛ mane yɛ ɔ, kyɛbɔ okole yɛ kofi amumuyɛɛ amukoraa nu, ná wate yɛ nwo wafa yɛ wayɛ ye bɔbɔ ye mmenia sonongo bɔ bɛbɔ nnwumaa paa nwo mmɔden ɔ.

Tito 2:14 Iomraidhean Croise

Gyenesise 48:16

abɔfo bɔ aye me afi musue mukoraa nu ɔ, yira mmɛɛmaa ye; maa ɔnate bɛ so, me dumaa, ɔne me mbanyi mɔ Abraham ne Yisake dumaa otira ndii; ma bɛ boso ama bɛsone na bɛyɛ pee wɔ aseɛ ye aso.”

Edwein 130:8

Ye yeɛ ɔkɔpepɛ kole Yisrael kofi ye amumuyɛɛ amukoraa nu ɔ.

Edwein 135:4

Ofikyɛ AWURADE aneanea nu waye Yakob wama ye nwo, wafa Yisrael wayɛ ye bɔbɔ ye agyapadeɛ.

Ɛksadɔso 15:16

Ahunundetelɛ ne ɛserɛ atɔ bɛ so; ɔnate wɔ tumi asaa ne ati, bayɛ dinn kyɛ nyɔboɛ, kɔpem kyɛ, O AWURADE, wɔ mmenia kɔpɛ nu kɔhɔ ɔ, kɔpem kyɛ mmenia bɔ ale bɛ ne kɔpɛ nu kɔhɔ ɔ.

Hesekiel 36:25

Ngɔfa nzue gyengɔgyengɔ ngɔpete ɛmɔ nwo, na ɛmɔ nwo kɔte kofi ɛmɔ nwo bɔ ɔnde ne amukoraa nwo, na ngɔte ɛmɔ nwo ngofi ɛmɔ mmosoen amukoraa nwo.

Hesekiel 37:23

Bɛngɔfa bɛ mmosoen ne b’akyiwadeɛ nningyein anaa bɛ mmeraatolɛ biala bengogua bɛ nwo fiɛ ko. Na mmom ngɔpepɛ ngole bɛ ngofi bɛ makyebu amukoraa bɔ bali bafa bayɛ bɔne ne anwo; ngɔte bɛ nwo, na bɛkɔyɛ me maen, ná me wora mayɛ bɛ Nyameɛ.

Lewitikɔso 25:41

Na ɛhe asi ye, ɔne ye mma mɔ bekofi wɔ bo, bekosa bɛkɔhɔ b’abusua nu ná basa baafa bɛ nana mɔ agyapadeɛ.

Malaki 3:3

ɔkɔtena ase kyɛ dwumvoɛ bɔ ohuro ɛdwetɛ ɔye ye nwo fiɛ ɔ: ɔkɔte Lewi boso ama mɔ bɛ nwo, okohwi bɛ nwo kyɛ sikaa kɔkorɛ ne ɛdwetɛ, amaa ɔnate so bafa tenenee afɔleɛ babrɛ AWURADE.

Numeri 25:13

Na ɛhe kɔyɛ daa sɔfolilɛ nwo apam kɔma ye ne ye boso ama, ofikyɛ wagyina ye gya nu pindinn wama ye Nyameɛ, na wapata wama Yisraelfoɛ.”

Numeri 7:15

nandwie nyii akrɔngrɔma ko, boaen nyii ko, yeɛ boaen nyii akrɔngrɔma ko bɔ wali afoɛ ko bɔ bɛfa bɛbɔ naen yeralɛ afɔleɛ ɔ;

Mateo 1:21

Ɔkɔwo baa bienzua, né ato ye dumaa Yesu, ɔnate kyɛ ye yeɛ okole ye mmenia kofi bɛ bɔne nu ɔ.”

Mateo 20:28

kyɛbɔ Sona Awa ne wamma kyɛ bɛso ye, na mmom kyɛ ɔbaaso, ná ɔfa ye ngoa ɔto berɛ ode mmenia pee ngoa ne.”

Mateo 3:12

Otira ye huhuamoa nu; ɔkɔprapra ye nekaa bɔ ɔboro aburoo ne monomono. Ɔkɔboaboa ye aburoo ne noa kogua pata so, nakoso afafu ne de, ɔkɔfa see bɔ onnua le ɔ yeɛ ɔkɔyera ye ɔ.”

Yohane 10:15

kyɛbɔ Baba ne se me, ná me koso mese Baba ne nen; na mefa me ngoa meto berɛ mema mmoaen ne.

Yohane 6:51

Me ole ngoa paanoo bɔ ofi nyameɛso wale ase ne; na sɛ ebie di paanoo he bie a, ɔkɔtena ase daa; na paanoo bɔ ngɔfa ngɔma wiase ngoa ne, ye ole me nwonaen.”

Asomafoɛ 15:14

Simɔn aha kyɛbɔ osi yɛle bɔ Nyameɛ ɔɔneaneane Amaenmaensofoɛ nu yele mmenia bie fili bɛ nu kyɛ bɛyɛ ye deɛ bɔkɔɔ ɔ.

Asomafoɛ 15:9

Wangyire kyɛ nzonzoleɛ biala wɔ yɛ ne bɛ nu, na mmom ɔnate (bɛ) gyidie so fale bɛ bɔne hyɛle bɛ.

Asomafoɛ 20:28

Yiti ɛ́mɔnea ɛmɔ nwo ne mmoaen amukoraa bɔ Sunzum Krongron afa bɛ awura ɛmɔ sa ne aso yé. Ɛ́mɔyɛ Nyameɛ asɔre ne bɔ ɔnate ye bɔbɔ Ɔwa ne mogya so nyane ye ne neafoɛ.

Asomafoɛ 9:36

Né gyidiniɛ braa bie bɔ bɛfrɛ ye Tabita wɔ Yopa. (Hela dwudwolɛ nu, Tabita bo kyire Dɔkase, bɔ ye koso ye bo kyire wanzane). Braa he fale paayɛlɛ ne ehiafoɛ adɔeɛyɛlɛ yɛle ye adwuma.

Galatiafoɛ 1:4

Ye yeɛ ɔfale ye ngoa tole berɛ mane yɛ bɔne ɔ, amaa ɔnate so waye yɛ wafi kekesaala ye bɔne wiase ye anu, kyɛbɔ yɛ Baba Nyameɛ apɛdeɛ te ne.

Galatiafoɛ 2:20

Babɔ me ne Kristo mmeamudua nu; yiti nna me yeɛ nde ase ko ɔ, na mmom Kristo yeɛ ɔte ase wɔ me nu ɔ. Na m’ase bɔ nde ye kekesaala ye wɔ anwoɔnaen nu ye de, ɔnate gyidie wɔ Nyameɛ Awa, bɔ okuro me dwirɛ na ɔfale ye ngoa tole berɛ mane me ne anu yeɛ nde ase ɔ.

Galatiafoɛ 3:13

Kristo ɔɔyɛle abusudeɛ mane yɛ, na ɔnate so wapɔ yɛ wafi mmeraa musue nu; ofikyɛ bahyerɛ kyɛ, “Banoma sona biala bɔ basinze ye wɔ bakaa so ɔ.”

Ɛfesofoɛ 1:11

Na ye bɔ ɔyɔ ye nikyee biala kyɛbɔ ye nhyehyɛleɛ ne ye pɛ osi te ne, wafa Kristo so waneanea nu waye yɛ kyɛ yɛyɛ ye deɛ;

Ɛfesofoɛ 2:10

Ofikyɛ yɛte ye adwiililɛ bɔ wali ɔ, bɔ ɔbɔle yɛ Kristo Yesu nu mane nnwumaa paa bɔ Nyameɛ asiesie ato berɛ kyɛ yɛfa yɛbɔ yɛ bra ɔ.

Ɛfesofoɛ 5:2

Ɛ́mɔfa ɔdɔ bɛbɔ ɛmɔ bra, kyɛbɔ Kristo koso hurole yɛ dwirɛ ná ɔfale ye ngoa tole berɛ mane yɛ kyɛ ayɛyɛdeɛ ne afɔleɛ fonafona mane Nyameɛ ne.

Deuteronomi 14:2

Ofikyɛ ɛte maen krongron ma AWURADE wɔ Nyameɛ, na AWURADE aneanea nu waye wɔ wafi aseɛ so mmenia mukoraati nu kyɛ ɛyɛ ye bɔbɔ ye maen.

Deuteronomi 26:18

Ɛnɛ kyẽa ye, AWURADE aha afa wɔ nwo kyɛ, ɛkɔyɛ ye bɔbɔ ye maen, kyɛbɔ ɔhyɛle wɔ bɔ ne, yiti ɔsɛ kyɛ edi ye mmeraa dwirɛ mukoraati so.

Deuteronomi 4:20

Nakoso ɛmɔ de, AWURADE afa ɛmɔ, na waye ɛmɔ wafi buralɛ afaa hyerɛhyerɛ nu, mekyire Misraim, kyɛ ɛmɔɔyɛ ye bɔbɔ deinn ye deɛ, kyɛbɔ kekesaala ye ɛmɔte ye.

Deuteronomi 7:6

“Ofikyɛ ɛmɔte mmenia krongron bɛma AWURADE ɛmɔ Nyameɛ; na ɛmɔ yeɛ AWURADE ɛmɔ Nyameɛ waneanea aseɛ ye aso mmenia mukoraati nu waye ɛmɔ ɔ, kyɛ ɛ́mɔyɛ ye bɔbɔ ye mmenia bɔ ye ahone la bɛ nwo ɔ.

1 Timoteo 1:15

Ɛhe te nahorɛ dwirɛ bɔ ɔsɛ kyɛ bede bɛto nu bɔkɔɔ ɔ, kyɛ Kristo Yesu wale wiase oolele bɔnefoɛ bɔ nde bɛ hene ne ngoa.

1 Timoteo 2:10

na mmom nnwumaa paa bɔ ɔfata mmrasua bɔ bɛda nyamesom ali ɔ.

1 Timoteo 2:6

bɔ ɔfa yɛle mbata mane mmenia amukoraati, adanzeɛ bɔ ɔwale nu wɔ mmerɛ bɔ bahyɛ bato berɛ ne anu ne.

1 Timoteo 6:18

Bɔ bɛ kɔkɔ kyɛ bɛ́yɔ bɔ ɔte paa ɔ, kyɛ bɛyɛ sikafoɛ wɔ nnwumaa paa nu, ná bɛye bɛ kunu bɛyɛ adɔeɛ,

Tito 2:7

Na nningyein mukoraa nu, tu wɔ nwo sie berɛ yɛ yɔleɛ paa nwo nhwɛsoɛ: Wɔ ngyerɛkyerɛ nu, da nahorɛlilɛ ne ahoneserɛ ali,

Tito 3:8

Ɛhe te edwirɛ nahorɛ, na mekuro kyɛ esi edwirɛ hemɔ so paa, amaa ɔnate so bɛ bɔ bale Nyameɛ bali ne badwene kyɛbɔ bɛkɔbɔ nnwumaa paa nwo mmɔden ɔ. Sɔ nningyein nemɔ yeɛ ɔte paa ɔ, na mvasoɛ wɔ so ma sona.

Hebrifoɛ 1:3

Ye yeɛ ɔte Nyameɛ animnyam hyireinn ne, ɔne ye sue kaenn, na ole ye tumi dwirɛ ne yeɛ otira nningyein mukoraa nu ɔ. Na ɔtele yɛ nwo fili yɛ bɔne nwo yiele nen, ɔɔtenane Tuminiɛ Nyameɛ sa famaa so wɔ nyameɛso.

Hebrifoɛ 10:24

Ɛ́mɔma yɛpena atee bɔ yɛkɔfa so yɛkɔbokaboka yɛ nwo bɔ ɔkɔmaa yɛkohyire ɔdɔ ná yayɔ nnwumaa paa ɔ.

Hebrifoɛ 9:14

nzaade Kristo bɔ ɔnate Sunzum bɔ ɔwɔ berɛ afebɔɔ ne aso fale ye nwo bɔle afɔleɛ bɔ ngekalewa biala nne ye nwo mane Nyameɛ nen, ɔkɔyɛ sɛɛ bɔ ye mogya ngɔte yɛ tiboa nwo ngofi yɔleɛ mbaen mbaen nwo ma yɛngɔso Nyameɛ teasefoɛ ne ɔ?

Yakobo 4:8

Ɛmɔhwe bepingye Nyameɛ, na ye koso ɔkɔhwe kopingye ɛmɔ. Ɛmɔ, bɔnefoɛ mɔ, ɛ́mɔnwunzi ɛmɔ sa, ná ɛ́mɔte ɛmɔ ahone nu, ɛmɔ bɔ ɛmɔ adwene yɛ ɛmɔ ndaa ndaa ɔ!

1 Petro 1:18

Ofikyɛ ɛmɔse kyɛ, bra fiɛ bɔ ɛmɔ nana mɔ fa yakyili ɛmɔ ne, nna nningyein bɔ bɛporɔ te kyɛ ɛdwetɛ anaa sikaa kɔkorɛ yeɛ bɛfa bɛyɛle ɛmɔ ti nyɔboɛ bɛpɔle ɛmɔ befili nu ɔ,

1 Petro 1:22

Asoɛmmerɛlɛ bɔ ɛmɔayɛ bama nahorɛ ne ne ati, wamaa ɛmɔate ɛmɔ kra nwo, na ɛhe amaa ɛmɔahurohuro ɛmɔ nwo dwirɛ wɔ nahorɛ nu, yiti ɔsɛ kyɛ ɛmɔfi ɛmɔ ahone nu bekurokuro ɛmɔ nwo dwirɛ.

1 Petro 2:12

Ɔwɔ nu kyɛ Amaenmaensofoɛ nemɔ bɛkekã ɛmɔ nwo dwirɛ kyɛ ɛmɔte bɔnefoɛ de, nakoso ɛ́mɔma ɛmɔ bra yɛ sannwuu wɔ bɛ nu, amaa banwu ɛmɔ bra paa ne, ná bahyɛ Nyameɛ animnyam wɔ kyẽa bɔ ɔkɔwa ne.

1 Petro 2:9

Nakoso ɛmɔ de, ɛmɔte mmenia bɔ baneanea nu baye ɛmɔ ɔ, nnehyeɛ asɔfokure, maen krongron, maen bɔ wafa ye wayɛ ye deɛ ɔ, kyɛ ɛmɔɔbɔ bɔ ɔfrɛle ɛmɔ fili awosii nu wale ye kanea bɔ ɔyɛ nwanwa ne anu ne, ye ayɛyelɛ ne dawure.

1 Petro 3:18

Ofikyɛ Kristo koso nwuni bɔne nwo amaneɛ pɛenko; ye bɔ ɔtengyɛ ne, onwuni amaneɛ mane bɛ bɔ bɛndengyɛ ɔ, amaa ɔnate so wafa yɛ wahɔ Nyameɛ berɛ. Behuni ye wɔ anwoɔnaen nu, nakoso bɛfale ye bɛwale ngoa nu wɔ Sunzum nu,

1 Yohane 1:7

Nakoso sɛ yɛnate kanea nu, kyɛbɔ ye koso ɔwɔ kanea nu ne a, né yɛ ne yɛ nwo yɛ nwo yatira abiɛngoɛ, na Ɔwa Yesu Kristo mogya ne te yɛ nwo fi bɔne mukoraa nu.

1 Yohane 1:9

Nakoso ɔnate kyɛ odi nahorɛ ná ɔtengyɛ ne ati, sɛ yɛkã yɛ bɔne yɛkyire ye a, ɔkɔfa kɔhyɛ yɛ ná wate yɛ nwo wafi bɔ ɔndengyɛ mukoraa nwo.

1 Yohane 3:2

Aliɛmaa mɔ, kekesaala ye yɛte Nyameɛ mma, na kyɛbɔ kyẽa bie yɛkosi yɛkɔyɛ ne de, onnya ɔllale ali. Nakoso yɛse kyɛ sɛ ɔye ye nwo ali a, yɛkɔyɛ kyɛ ye ala, ofikyɛ yɛkonwu ye kyɛbɔ ɔte ɔ.

Nyekyire 1:5

ɔne bɔ ofi Yesu Kristo bɔ ɔte danzeniɛ nahorɛniɛ ne, awufoɛ nu bamuɛbaa ne aseɛ so ahemvo mɔ bɛ hene ne berɛ ne, ɔbra ɛmɔ so. Ye bɔ okuro yɛ dwirɛ, ná wafa ye mogya wanwunzi yɛ nwo wafi yɛ bɔne nu,

Nyekyire 5:9

Na bɛtole dwein foforɛ bie kyɛ, “Ɛfata kyɛ ede nwomaa bɔ babobɔ ne ná ebukye ye nzɔanoɛ nemɔ ɔ; ofikyɛ behuni wɔ, na afa wɔ mogya atɔ adasa mmaa ama Nyameɛ afi mmusua kure ne edwudwolɛ ne mmenia ne maen biala nu,