Sefania 1:3 - AHYERƐLƐ KRONGRON

³ “Ngonua mmenia ne ngaka boso; ngonua ewienu nnomaa ne ɛpo nu naen boso, bɛ ne sundidua mɔ ne bɔnefoɛ mɔ. Ngonua kuro sona boso ngofi aseɛ so,” AWURADE noa dwirɛ ɛne.

Sefania 1:3 Iomraidhean Croise

Gyenesise 6:7

Yiti AWURADE hane kyɛ, “Ngonua kuro sona bɔ mabɔ ye ne boso ngofi aseɛ ye aso: mmenia ne ngaka mbiri ne ngaka bɔ bɛtwe bɛ nwo ase ne ewienu nnomaa, ofikyɛ manu me nwo kyɛ nyɔle bɛ ɔ.”

Yesaya 27:9

Yiti ɔnate ɛhe aso, okokyikyi Yakob amumuyɛɛ kofi berɛ, na ye bɔne bɔ baye bafi berɛ ne, so mmaa mukoraa bɔ okosu ɛhe: Okobubu afɔleɛ bokyea nyɔboɛ ne amukoraa, okofurofuro bɛ koti bɛ muhumuhu kyɛ nnɛterɛ, bɔ Asera dosii ne ɛyɛɛ bokyea biala ngogyinagyina berɛ ko ɔ.

Yesaya 6:11

Yeɛ mmisale kyɛ, “O AWURADE, ɛhe kɔhɔ so alaa maa okoodwu kyinzu?” Na obuale kyɛ, “Kɔpem kyɛ nguro kɔkakyi kurofoen bɔ sona nne so ɔ, ɔne kyɛ awuro mɔ kɔkakyi dandue bɔ sona nne nu ɔ, ɔne kyɛ aseɛ ne kɔsɛkye bɔkɔɔ kɔla berɛ mbaen ɔ,

Yesaya 6:12

kɔpem kyɛ AWURADE kɔpɛ mmenia ne asue kɔhɔ dedeede maa kurofoen nemɔ kɔyɛ pee wɔ aseɛ ne aso ɔ.

Yeremia 12:4

Aseɛ ne kɔbɔ awuye koodwu kyinzu, na eboo biala so ndire kɔkese maa okoodwu kyinzu? Ofikyɛ aseɛ ne aso ama, b’amumuyɛɛ ti, ngaka ne nnomaa batu bamini, ofikyɛ mmenia nwa, “Ongonwu y’ayieleɛ.”

Yeremia 50:3

“Ofikyɛ maen bie kofi sorɔ dɔ kɔfa koɛ kɔɔteta ye, na ɔkɔma ye maen ne kɔbɔ. Sona ne kaka biala ngɔtena nu, bekotu bekofi berɛ bɛkɔhɔ.

Yeremia 7:20

Yiti bɔ AWURADE Nyameɛ kã hɔ ɛhe: Tie, m’ahonehulɛ ne me yaa piri ne, ngohwie ngogua ɛwa, kuro sona ne ngaka so, eburo mmakaa ne aseɛ so mmakaammaa so; ɔkɔyera bɔ ongonua ɔ.

Yeremia 9:10

Mmokaa nemɔ ati, ngosu ngɔbɔ abubue, yeɛ ɛserɛ so nekaa bɔ ngaka didi ne ati, ngɔbɔ awuye, ofikyɛ bayera bɛ bɔ ebiala ngora mbɛ nu berɛ ɔ, na bɛnde nyɛmmoa suɛ; ewienu nnomaa yeɛ eburo ngaka koso, banwati bahɔ.

Hesekiel 44:12

Na ɔnate kyɛ bɛyɔle ɛsɔnenɛ adwuma bɛmane Yisraelfoɛ wɔ bɛ mmosoen nemɔ anyunu maa ɔnate so ɔyɛle amumuyɛɛ sundidua mane Yisrael awuro ama ne ati, mafɛ bɛ so yaa kyɛ, bɛ sa kɔhã b’amumuyɛɛ nwo asohwenɛ, AWURADE Nyameɛ noa dwirɛ ɛne.

Hesekiel 7:19

Bekogyi b’ɛdwetɛ bekogua mmorɔnoɛ so, bekobu bɛ sikaa kɔkorɛ kyɛ ye nwo agua fiɛ. Na b’ɛdwetɛ ne bɛ sikaa kɔkorɛ ne, ɔngɔhora ngɔpepɛ ngole bɛ wɔ AWURADE ahonehulɛ kyẽa ne. Bɛngɔhora ngɔma bɛ kra ko ngoyi, anaa ɔngɔma bɛ ko ngoyi; ofikyɛ ɔte amumuyɛɛ bɔ ɔto bɛ sundidua ɔ.

Hosea 14:3

Asiria ngɔpepɛ ngole yɛ, yɛngɔtenatena mbɔngɔ so, yeɛ yɛngɔhã ngohyire yɛ sa noa nnwumaa ko kyɛ, ‘Ɛmɔte yɛ nyameɛ mɔ’, ofikyɛ wɔ nu yeɛ ayisiaaniɛ onya anwumvoinnwunɛ ɔ.

Hosea 14:8

Ao Efraim, nzikyɛ yeɛ me ne mmosoen yɛle ye yɛyɔ bieku ɔ? Me yeɛ mema ye mmuayɛɛ, ná menea ye so ɔ; nde kyɛ ɛframmire monɛ bɔ ye nyaa mboro ɔ, na me so yeɛ enya wɔ mmakaammaa ɔ.

Hosea 4:3

Yiti aseɛ ne di aworabɔlɛ, na bɔ ɔwɔ so amukoraa ayɛ hodwoo: eburo ngaka, ewienu nnomaa, yeɛ ɛpo nu naen po bekoyie.

Sakaria 13:2

“Sɔ kyẽa ne, ngonunu mmosoen dumaa boso ngofi aseɛ ne aso, bɔ ɔnate so bɛngɔkaye bɛ ko ɔ; yeɛ ngotu ngɔmhyɛlɛfoɛ ne sunzum tɛɛ bo ngofi aseɛ ne aso, Asafo AWURADE noa dwirɛ ɛne.

Mateo 13:41

Sona Awa ne kɔsoma ye abɔfo mɔ, na bɛkɔboaboa bɔ ɔte sundidua amukoraa ne bɔnefoɛ amukoraa bekofi ye ahennie ne anu;

Mateo 23:39

Na mekã mekyire ɛmɔ kyɛ, ofi ɛnɛ bɔ ɔkɔ ɔ, ɛmɔgonwu me ko kodwu kyɛ ɛmɔkɔhã kyɛ, ‘Saleɛ ole bɔ ɔnate Awurade dumaa nu ɔ́ba ye!’ ”

Nyekyire 2:14

Nakoso mebɔ wɔ kwaadu kãa, ofikyɛ ele mmenia biemɔ wɔ wɔ berɛ bɔ basɔ Balaam ngyerɛkyerɛ nu ɔ, ye bɔ ohyirele Balake kyɛ ɔto Yisraelfoɛ sundidua ma beli bosoen so aleɛ, ná bɛbɔ adwaman ɔ.