Sakaria 6:6 - AHYERƐLƐ KRONGRON

⁶ Teaseɛnam bɔ mbɔngɔ bire bɛsosɔ ye ne, befi berɛ bɛkɔ sorɔ dɔ maen ne anu; yeɛ fufue nemɔ koso befi berɛ bedi bɛ si, yeɛ bɛ bɔ bɛ nwo te kyerekyerɛɛ ne koso bɛkɔ ngwaen dɔ maen ne anu.”

Sakaria 6:6 Iomraidhean Croise

Yesaya 30:6

Ngwaen dɔ aseɛ ne aso ngaka nwo nyekyire ɛhe: Bɛfa amaneɛ ne yealɛ aseɛ so, aseɛ bɔ gyata beleɛ ne gyata nyii wɔ so ɔ, bɔ ɛbɔnaa ne ewoo bɔ otu ɔ wɔ so ɔ, bɛfa b’anwonyadeɛ bɛsoa afunum mɔ, yeɛ bɛfa b’agyapadeɛ bɛteta afupɔngɔ mɔ si akyakya ne aso, kyɛ bɛkwaafa bɛma maen bɔ bengonya ye so mvasoɛ biala ɔ.

Yesaya 43:6

Ngɔhã ngohyire sorɔ dɔ kyɛ, ‘Ma bɛ ate!’ Yeɛ ngɔhã ngohyire ngwaen dɔ kyɛ, ‘Nnɛsi bɛ ate!’ Fa me mma mmienzua mɔ fi dededede bra, ná fa me mma mmrasua mɔ fi aseɛ noa dɔ paa bra;

Yeremia 25:9

yiti ɛ́mɔtie, ngɔsoma maa bɛkɔɔfa sorɔ dɔ mmusua amukoraa ne me somvoɛ Babilɔn hene Nebukadenesa bɛkɔwa, AWURADE noa dwirɛ ɛne, na ngɔfa bɛ ngɔwa maa bɛkɔho bekotia maen he, ɔne so ama, ɔne maen hemɔ amukoraa bɔ bapɛ ye nwo bayia ɔ. Ngohũhũ bɛ pasaa, ná mamaa bayɛ anwodwiri nikye, maen bɔ mmenia sobi bɛ noa gua bɛ so ɔ, ɔne kurofoen afebɔɔ.

Yeremia 4:6

Ɛ́mɔfa frangaa bɛ́pena berɛ ma ye nye hyire Sion. Ɛ́mɔnwati bɛɛbɔ ɛmɔ nwo adwaa, nnɛma ɛmɔgyina berɛ, ofikyɛ mebaafa musue ne amaneɛ kandinga paa mefi sorɔ dɔ meba.

Yeremia 46:10

Sɔ kyẽa ne te AWURADE Asafo Nyameɛ ye kyẽa, ɔte wereɛtɔlɛ kyẽa bɔ ɔkɔtɔ ye pɔfoɛ mɔ so wereɛ ɔ. Ngrandɛ ne kohũhũ kɔma ye ko koyi, ná wano bɛ mogya wabo. Ofikyɛ AWURADE Asafo Nyameɛ asiesie afɔleɛ wɔ sorɔ dɔ maen ne anu, wɔ asue Yufreti noa.

Yeremia 51:48

Yeɛ anwuro ne aseɛ, ɔne bɛ nu nningyein amukoraa, bɛkɔtea nu bekɔbɔ Babilɔn nwo ese, ofikyɛ sɛkyefoɛ mɔ kofi sorɔ dɔ bɛkɔfa koɛ bɛkɔɔteta ye, AWURADE noa dwirɛ ɛne.

Yeremia 6:1

Ao Benyaminfoɛ, ɛ́mɔnwati béfi Yerusalem bɛɛbɔ ɛmɔ nwo adwaa! Ɛ́mɔhu totorobɛndo ne wɔ Tekoa, na ɛ́mɔma nwosina frangaa otu hɔ anwuro wɔ Bete Hakerem, ofikyɛ musue ne amaneɛ piri bie waye ye ti wafi sorɔ dɔ.

Hesekiel 1:4

Ndole me nye nneane, na yieee, mvrama piri bie tu fili sorɔ dɔ, munungum pirikua bie bɔ kanea hyireinn apɛ ye nwo ayia ɔ, bɔ ogye see ɔ, bɔ see n’afia ne ɔte kyɛ kɔɔbere bɔ ogye monyerɛnmonyerɛn ɔ.

Daniel 11:40

“Na ayieleɛ mmerɛ ne dwu a, ngwaen dɔ hene ne kɔfa koɛ kɔɔteta ye. Nakoso sorɔ dɔ hene ne kɔfa teaseɛnam mɔ ne pɔngɔhanɛfoɛ ne ɛlɛen pee kɔhɔ ye so kyɛ mvrama bɔ ɔpɛ ye nwo ɔ, na ɔkɔfa koɛ kɔteta maen maen pee kohwi kɔfa bɛ so kyɛ asue bɔ wayi ɔ.

Daniel 11:9

Yiti ɔkɔhɔ ngwaen dɔ hene n’ahennie ne anu, na afei okosa kɔhɔ ye bɔbɔ ye aseɛ so.

Nyekyire 6:5

Na ɔtele nzɔanoɛ bɔ ɔtɔ so nza ne noa nen, ndele kyɛ abɔdeɛ teasefoɛ bɔ ɔtɔ so nza ne ɔkã kyɛ, “Baanea!” Nneane, yieee, pɔngɔ bire bie, na né bɔ ɔte ye so ne otira tonyi.