Sakaria 3:7 - AHYERƐLƐ KRONGRON

⁷ “Asafo AWURADE nwa nyoo: Sɛ ɛfa m’atee so ná edi m’ahyɛdeɛ so a, ye de ngɔfa m’awuro ne ngowura wɔ sa, na ɛkɔnea m’aluo berɛ so, na ngɔmaa ekonya atee ɛkɔboka bɛ bɔ begyigyi ɛwa nemɔ aso.

Sakaria 3:7 Iomraidhean Croise

Gyenesise 26:5

ofikyɛ Abraham tiele me dwirɛ, olili me dwirɛ so, me mmeraa dwirɛ so, m’ahyɛdeɛ ne me mmeraa so.”

1 Ahemvo 2:3

ná di bɔ AWURADE wɔ Nyameɛ wahyɛ wɔ kyɛ ɛyɔ ne aso. Tie ye dwirɛ, ná di ye ahyɛdeɛ, ye mmeraa dwirɛ, ye nhyehyɛleɛ ne ye noa dwirɛ so, kyɛbɔ bahyerɛ ye wɔ Mose mmeraa ne anu ne, amaa wayie wɔ yé wɔ nikyee biala bɔ ɛkɔyɔ ɔ nu, ɔne nekaa biala bɔ ɛkɔhɔ ɔ.

1 Ahemvo 3:14

Na sɛ ɛkɔnate m’atee so, ná ali me ahyɛdeɛ ne me mmeraa dwirɛ so, kyɛbɔ wɔ baba Dawide yɔle ne a, ye de ngɔmaa ekonyi kɔhyɛ.”

1 Aberɛso Dwirɛ 23:32

Yiti odi kyɛ bɛnea ɛtena sua atenaleɛ ne ɔne nekaa krongron ne aso. Afei koso, Aarɔn boso ama bɔ yeɛ bɛte bɛ koso bɛ nwo ama ne, odi kyɛ bɛboka bɛ maa bɛyɔ AWURADE awuro berɛ ɛsɔnenɛ adwuma ne.”

Yesaya 62:9

Na mmom bɛ bɔ bɛboaboa ye noa ne, bɛ yeɛ bekoli ná baye AWURADE ayɛ ɔ; bɛ bɔ bɛboaboa bobe mmaa ne noa ne, bɛ yeɛ bɛkɔno ye wɔ me nekaa krongron n’aluo berɛ ɔ.”

Hesekiel 44:8

Me nningyein krongron nemɔ, ɛmɔanyɔ bɛ nwo adwuma ne, na mmom mmeni foforɛ yeɛ ɛmɔafa bɛ kyɛ bɛyɔ me nekaa krongron berɛ adwuma ne ɔ.

Hesekiel 48:11

Sɔ aseɛ ne kɔyɛ asɔfo mɔ bɔ basie bɛ nwo krongron ne bɛ deɛ, bɔ bɛ ole Sadoke boso ama nemɔ, bɔ bali me dwirɛ nwo nahorɛ, bɔ banni ye nwo makyebu wɔ mmerɛ bɔ Yisraelfoɛ belili ye nwo makyebu, kyɛbɔ Lewifoɛ belili ye nwo makyebu ne.

Lewitikɔso 10:3

Na Mose sele Aarɔn kyɛ, “Bɔ AWURADE aha hɔ ɛhe: ‘Ɔnate bɛ bɔ bepingye me ne aso, ngɔmaa bekonwu me kyɛ nde krongron, na bɛkɔhyɛ me animnyam wɔ mmenia ne amukoraati nyunu.’ ” Na Aarɔn yɛle konn.

Lewitikɔso 8:35

Ɛ́mɔtena ɛtena sua atenaleɛ anoa nu berɛ eyia ne kɔngɔen ɛlɛsoo, ná ɛ́mɔyɔ bɔ AWURADE ahyɛ ne, amaa ɛmɔanwu ofikyɛ sɔ yeɛ AWURADE hyɛle me ɔ.”

Sakaria 3:6

Na AWURADE abɔfo ne fa tole Yosua nyunu kyɛ,

Sakaria 4:14

Afei osele kyɛ, “Ɛhemɔ ole abɔdeɛ nyɔ bɔ bapopa bɛ ngoo bɔ begyigyi aseɛ amukoraa Mene ne nwo berɛ ne.”

Sakaria 6:15

“Na bɛ bɔ bɛwɔ nziɛ nziɛ ne, bɛkɔwa bɛkɔɔboka wɔ AWURADE asɔneyɛɛ sua ne silɛ nu, na afei ɛmɔkonwu kyɛ Asafo AWURADE yeɛ wasoma me ɛmɔ berɛ ɔ. Na sɛ ɛmɔyɛ AWURADE ɛmɔ Nyameɛ dwirɛ nwo sotie bɔkɔɔ a, sɔ dwirɛ ne kɔwa nu.”

Sakaria 6:5

Na abɔfo ne buale me kyɛ, “Ɛhemɔ ole nyameɛso sunzum nna ne, bɔ begyinagyina aseɛ amukoraa Mene ye nyunu berɛ beyie a befi berɛ bɛkɔ ne.

Mateo 19:28

Na Yesu sele bɛ kyɛ, “Nahorɛ nu, mekã mekyire ɛmɔ kyɛ, ewiase foforɛ ne anu, mmerɛ bɔ Sona Awa ne kɔtena ye animnyam ahennie bia so ne, ɛmɔ bɔ ɛmɔaali me si ne, ɛmɔ koso ɛmɔkɔtena ahennie bia buru ne nyɔ so bekobua Yisrael mmusua kure buru ne nyɔ ne ndɛen.

Luka 22:30

amaa ɔnate so ɛmɔadidi ná ɛmɔano wɔ me poen so wɔ m’ahennie nu, ná ɛmɔatenatena ahennie bia so babua Yisrael mmusua kure buru ne nyɔ ne ndɛen.”

Yohane 14:2

Atenaleɛ pee wɔ me Baba awuro; na sɛ nna sɔ yeɛ ɔte hɔ a, aso ahaa mahã mahyire ɛmɔ kyɛ mekɔ mekosiesie nekaa mema ɛmɔ?

Nyekyire 3:21

Na bɔ odi ngonim ne, ngɔmaa ɔne me kɔtena m’ahennie bia so, kyɛbɔ me koso mali ngonim ná me ne me Baba yatena ye ahennie bia so ne.