Sakaria 14:21 - AHYERƐLƐ KRONGRON

²¹ Nahorɛ nu, kukue biala bɔ ɔwɔ Yerusalem ne Yuda ne, ɔkɔyɛ krongron kɔma Asafo AWURADE, na sona biala bɔ ɔbɔ afɔleɛ nen, ɔkɔɔfa nu bie kɔtõ afɔleɛ naen ne wɔ nu; na sɔ kyẽa ne, Kanaanniɛ ngɔtena Asafo AWURADE awuro berɛ ko.

Sakaria 14:21 Iomraidhean Croise

Nehemia 8:10

Yeɛ osele bɛ kyɛ, “Ɛmɔhɔ beeli naen bɔ walɔ ɔ, ná ɛmɔno nzaa bɔ ɔyɛ fɛɛ ɔ. Bɛ bɔ belle bie ne, ɛmɔɔma bɛ bie, ofikyɛ ɛnɛ kyẽa ye, ɔte krongron ma y’AWURADE. Nnɛmɔma ɛmɔ wora bɔ, ofikyɛ AWURADE nu anigye yeɛ ɔte ɛmɔ anwoserɛ ɔ.”

Yesaya 35:8

Atimbire kɔɔla berɛ, na bɛkɔto ye dumaa Atee Krongron. Sona bɔ ye nwo nde ne, ɔngɔfa so bie, atee ne kɔyɛ Nyameɛ mmenia bɛ deɛ, na ngwaseafoɛ po bengomini wɔ atee ne aso.

Yesaya 4:3

Na ɔkɔwa kyɛ, bɛ bɔ bayakyi bɛ berɛ wɔ Sion bɔ baha Yerusalem ne, ebiala bɔ baha ye baboka ateasefoɛ so wɔ Yerusalem ne, bɛkɔfrɛ ye krongron,

Yesaya 52:1

O Sion, kanyane wɔ nwo, kanyane wɔ nwo! kyire w’anwoserɛ e! O Yerusalem, kuro krongron, fa w’animnyam tena ne kera, ofikyɛ, ofi ɛnɛ bɔ ɔkɔ ɔ, bɛmbɛ-bɛ-bienzuafoɛ ne bɛ bɔ bɛ nwo nde ne, bengowura wɔ nu ko.

Hesekiel 44:9

“Yiti AWURADE Nyameɛ nwa nyoo: Amanvoraniɛ biala, bɔ ɔmbɛ ye bienzua wɔ ahone nu ne anwoɔnaen nu, amanvrafoɛ amukoraa bɔ baafra Yisraelfoɛ nu ne, onni kyɛ bewura me nekaa krongron ne anu.

Hesekiel 45:1

Na sɛ ɛmɔfa serewagualɛ so bɛkyɛ aseɛ ne maa ɔyɛ agyapadeɛ a, odi kyɛ ɛmɔpɛ aseɛ ne bie betu besie berɛ maa ɔyɛ krongron ma AWURADE. Ye tendenn nu kɔyɛ agyirɛ apee aburanyɔ ne nnu, yeɛ ye tɛtrɛtɛɛ nu kɔyɛ agyirɛ apee buru; na sɔ aseɛ ne kɔyɛ krongron wɔ ye nekaa biala.

Hosea 12:7

Kanaan tira ngondombo tonyi, na okuro aminɛlilɛ.

Yoel 3:17

“Ɔnate so ɛmɔkonwu kyɛ me ole AWURADE ɛmɔ Nyameɛ, bɔ nde Sion, me bokaa krongron ne aso ne. Afei, Yerusalem kɔyɛ nekaa krongron, na ɛwɔfoɛ mɔ ngɔpɛ nu berɛ ko.

Sefania 1:11

Ɛ́mɔbɔ awuye, ɛmɔ bɔ ɛmɔtete nekaa bɔ bɛfrɛ berɛ Mɔɔta ɔ, ofikyɛ banua dwadifoɛ nemɔ amukoraa bɛ boso, banua bɛ bɔ bɛkari ɛdwetɛ ne amukoraa bɛ boso.

Sakaria 14:20

Sɔ kyẽa ne, adɔma mɔ bɔ bɛlela mbɔngɔ kɔme ne, bɛkɔhyerɛ so kyɛ, “ƆTE KRONGRON MA AWURADE.” Na AWURADE awuro berɛ ngukue nemɔ bɛkɔyɛ kyɛ afɔleɛ bokyea ne anyunu berɛ ndalie nemɔ.

Sakaria 7:6

Na sɛ ɛmɔdidi ná ɛmɔno koso a, aso nna ɛmɔ bɔbɔ yeɛ ɛmɔdidi bɛno bɛma bɛ nwo ɔ?

1 Korintofoɛ 10:31

Yiti sɛ ɛmɔdidi oo, sɛ ɛmɔno oo, nikyee biala bɔ ɛmɔyɛ ne, ɛ́mɔyɔ ye mukoraa bɛfa bɛhyɛ Nyameɛ animnyam.

Deuteronomi 12:12

Na ɛmɔkoli ahurusi wɔ AWURADE ɛmɔ Nyameɛ nyunu, ɛmɔ ne ɛmɔ mma mmienzua ne mmrasua, ɛmɔ ngoaa ne afaneɛ mɔ, ɔne Lewifoɛ bɔ bɛte ɛmɔ kuro, ofikyɛ bɛ de belle kyɛfa anaa agyapadeɛ biala kyɛbɔ ɛmɔ de ɛmɔanya ye ne.

Deuteronomi 12:7

Ɛmɔ ne ɛmɔ awuro ama bekodidi berɛ wɔ AWURADE ɛmɔ Nyameɛ nyunu, na ɔnate ɛmɔ adwuma mukoraati bɔ AWURADE ɛmɔ Nyameɛ wayira ɛmɔ ye nwo ne ati, ɛmɔkoli ahurusi.

1 Timoteo 3:15

amaa sɛ ɔba kyɛ mekyɛ ná mmmale a, anwu kyɛbɔ ɔsɛ kyɛ ɛbɔ wɔ bra wɔ Nyameɛ awuro, bɔ ɔte Nyameɛ teasefoɛ n’asɔre, nahorɛ nyinasoɛ ne fapem ne anu.

Hebrifoɛ 3:6

Nakoso Kristo de, odi Nyameɛ awuro so kyɛ Baa. Yiti yɛ ole ye awuro ne, nakoso sana yɛsɔ yɛ gyidie ne yɛ anwohoahoa bɔ ɔwɔ yɛ anyelasoɛ nu yé kodwu ayieleɛ.

1 Petro 4:17

Ofikyɛ mmerɛ ne adwu kyɛ ndɛenbualɛ hyɛ ye bo wɔ Nyameɛ awuro ɔ. Na sɛ bɛfa yɛ bɛhyɛ ye bo a, nzaade bɛ bɔ bɛyɛ Nyameɛ nzɛmba ne nwo asoserɛ ne de, okoyie bɛ sɛ?

Nyekyire 21:27

Nakoso nikyee biala bɔ ye nwo nde, yeɛ bɔ ɔbɔ akyiwadeɛ bra, anaa bɔ ɔpɛ ngondombo ɔ de, ongowura nu; sana bɛ bɔ bahyerɛ bɛ dumaa wɔ Boaen Ba ne ngoa nwomaa ne anu angome.

Nyekyire 22:15

Na kuro ne asi dɔ yeɛ ngyea, ngonyaayelɛfoɛ, adwamanbɔlɛfoɛ, awudifoɛ, bosoensolɛfoɛ ne bɛ bɔ bekuro ngondombopɛlɛ ná bɛpɛ ɔ bɛ mukoraa bɛwɔ ɔ.