Nyekyire 9:20 - AHYERƐLƐ KRONGRON

²⁰ Nakoso adasa mmaa ngaa bɔ ɛhawo hemɔ wangukũ bɛ ne, banzakyera b’adwene bamvi bɛ sa noa nnwumaa nwo, banyakyi sunzummɔne mɔ sɔnenɛ, yeɛ banyakyi sikaa kɔkorɛ, ɛdwetɛ, kɔɔbere, nyɔboɛ ne bakaa amoen mɔ bɔ bɛngora bennwu nikye, anaa bɛnde dwirɛ, anaa bɛnnate ɔ sɔnenɛ;

Nyekyire 9:20 Iomraidhean Croise

2 Ahemvo 22:17

Ofikyɛ bapo me, bayera ɛyɛɛ bama nyameɛ foforɛ mɔ, na ɔnate so bafa bɛ sa noa adwuma amukoraa bahu m’ahone. Yiti mafɛ maen ye aso yaa, bɔ m’ahone ngodwo ɔ.

2 Aberɛso Dwirɛ 28:22

Mmerɛ bɔ sɔ Nana Ahase ye ala onwu amaneɛ ne po ne, obubuli mmakaa tuale ye so bɔ wandie AWURADE dwirɛ ɔ.

2 Aberɛso Dwirɛ 34:25

Ofikyɛ bapo me, bayera ɛyɛɛ bama nyameɛ foforɛ mɔ, na ɔnate so bafa bɛ sa noa adwuma mukoraa bawura me apue. Yiti mafɛ maen ye aso yaa piri paa, bɔ m’ahone ngɔtɔ nzue nu ɔ.

Edwein 106:37

Bɛfale bɛ mma mmienzua ne mmrasua bɛbɔle afɔleɛ bɛmane sunzummɔne mɔ.

Yesaya 2:8

Mmosoen ayi b’aseɛ ne aso tɛkyɛ; bɛsɔne bɛ sa noa adwuma, nningyein bɔ bafa bɛ bɔbɔ bɛ sa bayɔ ɔ.

Yesaya 41:7

Dwumvoɛ hyɛ sikaa kɔkorɛ dwumvoɛ nguraen, yeɛ bɔ ɔfa bɔsobaka tengyɛtengyɛ buralɛ ne koso, ɔhyɛ sona bɔ ɔbobɔ buralɛ so ne nguraen, na ɔkã kyɛ, “Mmuralɛ sosɔlɛ ne, ye mmerɛ ne adwu”, na bɛfa mberɛgoo bemiamia nu bɔ ondutu ɔ.

Yeremia 1:16

Na ɔnate b’amumuyɛɛ amukoraa bɔ bayɔ ne ati, ngobua bɛ ndɛen, ofikyɛ bapo me, bayera ɛyɛɛ bama mmosoen mɔ, na basɔne bɛ bɔbɔ bɛ sa noa nnwumaa.

Yeremia 25:6

Na onni kyɛ ɛmɔkodi nyameɛ foforɛ mɔ asi bɛso bɛ bɛsɔne bɛ; yeɛ nnɛma ɛmɔfa ɛmɔ sa noa adwuma behu m’ahone maa mefɛ yaa, amaa ɔnate so mambrapra amaneɛ mangua ɛmɔ so.’

Yeremia 44:8

Nzu ati yeɛ ɛmɔfa ɛmɔ sa noa nnwumaa bewura me apue, bɔ ɛmɔyera ɛyɛɛ bɛma nyameɛ foforɛ mɔ wɔ Misraim aseɛ bɔ ɛmɔatena so ne aso, bɔ ɔnate ye sɔ ati ɛmɔ boso kɔnnua, ná ɛmɔayɛ ɛnomalɛ nikye ne ngorohoɛ nikye wɔ aseɛ ye aso maen amukoraa nu ɔ?

Yeremia 5:3

Ao AWURADE, aso nna nahorɛ yeɛ wɔ nye pena kyɛ onwu ye ɔ? Ahwe bɛ so, nakoso wanyɛ bɛ yea; ahũhũ bɛ, nakoso bamva ɛhe bandu bɛ nwo foɛ, bɛ nyunu porɛ bɔ babɔ ɔ, ɔtra nyɔboɛ, na bayɛ b’adwene kyɛ bɛngɔsakyera.

Yeremia 51:17

Sona biala te kwaseaa bɔ olle nimdeɛ ɔ; esikaa kɔkorɛ dwumvoɛ biala, ye mmosoen yeɛ begua ye nyunu ase ɔ; ye amoen nemɔ te nnakannaka, na nwomeɛ biala ɔnne bɛ nu.

Daniel 5:23

na mmom adwɔso nyameɛso Mene ne so konguronn, baasesa ye awuro kulie nemɔ babrɛ wɔ, na wɔ, ɛne wɔ mbanyi mɔ, ɛye mɔ ne wɔ sómaa mɔ bano nu nzaa, na aye ɛdwetɛ, sikaa kɔkorɛ, kɔɔbere, buralɛ, bakaa ne nyɔboɛ nyameɛ mɔ bɔ bennwu nikye, bɛnde dwirɛ, anaa bɛnze huu ɔ ayɛ. Nakoso Nyameɛ bɔ otira wɔ ngoa nyamaa nu, bɔ w’atee amukoraa wɔ ye sa nu ne de, amva anidie amma ye.

Daniel 5:4

Bɛnone nzaa, na bɛyele sikaa kɔkorɛ, ɛdwetɛ, kɔɔbere, buralɛ, bakaa ne nyɔboɛ nyameɛ mɔ ayɛ.

Lewitikɔso 17:7

Ɔnate ɛhe aso bɛngɔhɔ so bɛngɔbɔ b’afɔleɛ mɔ bɛngɔma mmosoen mɔ bɔ besoma mbɔngye ne, mekyire mmosoen bɔ bafa bɛ nwo bawura bɛ sa ne. Ɛhe kɔyɛ ahyɛdeɛ afebɔɔ kɔma bɛ wɔ b’aworɛ ndoatoasoɛ mukoraati nu.’

Mika 5:13

Ngɔsɛkye w’amoen mɔ pasaa, yeɛ ngɔsɛkye w’amoen bɔ agyinagyina nemɔ koso ngofi wɔ nu, na ɛngɔsɔne wɔ sa noa adwuma ko.

Mateo 21:32

Ofikyɛ Yohane fale tenenee atee so yeɛ ɔwale ɛmɔ berɛ ɔ, na ɛmɔanne ye banni. Nakoso ɛtoɔdidelɛfoɛ ne adwamanbɔlɛfoɛ de, belele ye belili; na ɛmɔnwuni ye sɔ ne po, ye si ye ɛmɔanzesã ɛmɔ adwene banne ye banni.”

Asomafoɛ 17:29

Na ɔnate kyɛ yɛte Nyameɛ mma ne ati, ɔnzɛ kyɛ yɛdwene kyɛ Nyameɛ sue te kyɛ esikaa kɔkorɛ, anaa ɛdwetɛ, anaa nyɔboɛ bɔ kuro sona afa ye sa ne ye nworɛ wali adwii wayɔ ɔ.

Asomafoɛ 19:26

Na ɛmɔnwu ye, yeɛ ɛmɔte kyɛ sɔ Pɔɔlo ne nwa, nyameɛ mɔ bɔ kuro sona afa ye sa wayɔ ne de bɛtte nyameɛ mɔ koraa; na watu mmeni pee foɛ wasesã b’adwene: nna Ɛfeso wa angome ɔ, na mmom Asia mbɔtam amukoraa.

Asomafoɛ 7:41

Sɔ mmerɛ ne anu, bɛyɔle ohoni bie bɔ ye sue te kyɛ nandwie ba, na bɛfa bɛyɛle amoen bɛsɔle, na ɔnate bɛ sa noa adwii ne ati bɛtole poen bedidili bɛnone.

2 Korintofoɛ 12:21

Ebiaa meba bieku a, me Nyameɛ kɔbrɛ me ase wɔ ɛmɔ nyunu maa ngoli ɛmɔ nu pee nwo aworabɔlɛ wɔ mmenia somaa bɔ daa bayɔ bɔne, ná kekesaala ye bɛtɛyɔ ná banzakyera b’adwene wɔ brabɔlɛ fiɛ, adwamanbɔlɛ ne ahuhubra nwo ti.

Deuteronomi 31:29

Ofikyɛ, mese kyɛ me wue asi ne, edwirɛ tɛɛ ala yeɛ ɛmɔkoli ɔ, na mmeraa bɔ mahyɛ mama ɛmɔ ne, ɛmɔkobu so. Na musue kɔto ɛmɔ kyẽa bie, ofikyɛ ɛmɔkɔyɔ AWURADE nyunu bɔne, na ɛmɔ sa noa adwuma kɔma ye ahone kohu.”

Deuteronomi 32:17

Bɛbɔle afɔleɛ bɛmane mmosoen, bɔ nna Nyameɛ ahɔ ɔ, nyameɛ foforɛ biemɔ bɔ bɛnze bɛ ɔ, ɔne nyameɛ foforɛ biemɔ bɔ anomasi wa ala yeɛ bɛwale ɔ, bɔ ɛmɔ nana mɔ anzuro bɛ ɔ.

Deuteronomi 4:28

Na dɔ yeɛ ɛmɔkɔso nyameɛ foforɛ mɔ bɔ kuro sona afa ye sa ayɔ ɔ, nikyee bɔ bɛte mmakaa ne nyɔboɛ, bɔ bennwu nikye, bɛnde dwirɛ, bennidi, anaa bɛmvofa nikye ɔ.

1 Timoteo 4:1

Sunzum ne kã ye pefee kyɛ mmerɛ bɔ oli nziɛ ne anu, ebiemɔ koli makyebu bekofi gyidie ne anwo bekooli ngondombo sunzum mɔ ne sunzummɔne mɔ ngyerɛkyerɛ si,

Nyekyire 15:1

Afei nwuni sɛngyerɛnneɛ foforɛ bie bɔ ɔte pirikua ná ɔyɛ nwanwa ɔ wɔ nyameɛso: Abɔfo nzoo bɔ betiratira ɛhawo nzoo bɔ ɔpɛ ye bo ɔ, bɔ yeɛ ɔpɛ Nyameɛ ahonehulɛ ne abo ɔ.

Nyekyire 16:8

Na abɔfo bɔ ɔtɔ so nna ne hwiele bɔ ɔwɔ ye kulie ne anu guale eyia so; na bɛmane ye see tumi kyɛ ɔbɔ gyireingyirein ɔyera mmenia.

Nyekyire 9:19

Na mbɔngɔ nemɔ bɛ tumi wɔ bɛ noa ne bɛ dua nu, ofikyɛ bɛ dua te kyɛ ewoo, bɔ tire tua so bɔ bɛfa bepura ɔ.

Nyekyire 9:21

yeɛ banzakyera b’adwene bamvi b’awuelilɛ ne bɛ ngonyaayelɛ ne b’adwamanbɔlɛ ne b’awue nwo.