Nyekyire 4:7 - AHYERƐLƐ KRONGRON

⁷ Abɔdeɛ teasefoɛ bɔ oli moa ne te kyɛ gyata, bɔ ɔtɔ so nyɔ ne te kyɛ nandwie ba, bɔ ɔtɔ so nza ne nyunu soma kuro sona, yeɛ bɔ ɔtɔ so nna ne te kyɛ kɔleɛ bɔ otu ɔ.

Nyekyire 4:7 Iomraidhean Croise

Gyenesise 49:9

Yuda te gyata akrɔngrɔma, bɔ eku ngaka di ná esa bada wɔ boso ɔ. Okunduni, na obutuli berɛ kyɛ gyata, ɔte kyɛ gyata beleɛ; nwa yeɛ onzuro bɔ okotingye ye ɔ?

2 Samuel 1:23

“Sɔɔlo ne Yonatan, anwonyemenefoɛ bɔ mmenia kuro bɛ dwirɛ ɔ! Bɛ ngoa nu oo, bɛ wue nu oo, b’afia andete. Né bɛ nwo yɛ nyera tra kɔleɛ, bɛ nwo yɛ se tra gyata.

Anyandera 28:2

Sɛ mmeraatolɛ wɔ maen nu a, nu maenbulɛfoɛ bɛyɛ pee; nakoso sɛ onya maenbulɛniɛ nimdeɛniɛ bɔ ɔte badwemma a, nu dwo fɔnwoo maa ogyina ye gya so.

Yesaya 40:31

nakoso bɛ bɔ bɛnwondɛ AWURADE ne de, bekonya anwoserɛ foforɛ; bɛkɔfa ndaa bekotu kyɛ kɔleɛ, bekotu amirika, na bɛngɔfɛ, bɛkɔnate, na bɛ nwo ngɔyɛ bɛ bɛtɛɛ.

Hesekiel 1:10

Sɔaa yeɛ bɛ nyunu ne osoma ɔ: Bɛ mmɛnna ne, ebiala le sona nyunu; ebiala le gyata nyunu wɔ ye famaa so; bɛ mmɛnna ne, ebiala le nandwie nyunu wɔ ye bɛen so, na ebiala le kɔleɛ nyunu [wɔ ye si].

Hesekiel 1:8

Na bɛ bue nna ne, wɔ bɛ ndaa nemɔ abo, né sona sa mɔ betuatua berɛ. Yiti abɔdeɛ nna ne, né bele bɛ nyunu mɔ ne bɛ ndaa mɔ.

Hesekiel 10:14

Né ko biala ye nyunu te nna: bɔ oli moa ne te kɛrubo nyunu, bɔ ɔtɔ so nyɔ ne te sona nyunu, bɔ ɔtɔ so nza ne te gyata nyunu, yeɛ bɔ ɔtɔ so nna ne te kɔleɛ nyunu.

Hesekiel 10:21

Ko biala ye nyunu te nna, yeɛ ebiala ye ndaa te nna, na sona sa ye sɛso wɔ bɛ ndaa nemɔ abo.

Daniel 7:4

Né bɔ oli moa ne te kyɛ gyata, na né ole kɔleɛ ndaa. Na ngu so bɔ menea ne, betutuli ye ndaa nemɔ, bɛmane ye so befili aseɛnwo, bɛmaa ogyinane agyirɛ nyɔ so kyɛ sona, na bɛmane ye sona adwene.

Obadia 1:4

Sɛ etu kɔ anwuro kyɛ kɔleɛ po, ná ɛkyekye wɔ saen wɔ nzramaa mɔ anu po a, berɛ yeɛ ngɔhwe wɔ ngofi ngɔto ase ɔ, AWURADE noa dwirɛ ɛne.

Numeri 23:24

Tie, Yisrael te maen bɔ odwɔso kyɛ gyata beleɛ, na ɔpagya ye nwo kyɛ gyata nyii! Ommutu berɛ, sana wali naen bɔ wahye ye ɔ, sana wano kaka bɔ wahũ ye ɔ, ye mogya.”

Numeri 24:9

Okunduni, na obutu berɛ kyɛ gyata, ɔte kyɛ gyata beleɛ; nwa yeɛ okotingye ye ɔ? Ebiala bɔ okoyira wɔ ne, Nyameɛ koyira ye, yeɛ ebiala bɔ ɔkɔnoma wɔ ne, Nyameɛ kɔnoma ye.”

1 Korintofoɛ 14:20

Aliɛmaa mɔ, nnɛma ɛmɔdwene kyɛ ngwadaa, bɔne nu de, ɛ́mɔyɛ kyɛ nnɔma na mmom adwene nu ɛ́mɔyɛ mbanyi.

Deuteronomi 28:49

AWURADE kɔma maen bie bɔ ɔwɔ dedeede, bɔ ofi aseɛ noa dɔ ɔ, ɔkɔɔto kɔhye wɔ kyɛ kɔleɛ. Ɔkɔyɛ maen bɔ ɛnde ye dwudwolɛ ɔ,

Nyekyire 4:6

Né nikyee bie bɔ ɔte kyɛ neanu po, bɔ ye nye te kaenn kyɛ neanu ɔ ɔwɔ ahennie bia ne anyunu berɛ. Yeɛ né abɔdeɛ ateasefoɛ nna bɔ anyeɛ tuatua bɛ nyunu ne bɛ si ɔ bɛwɔ ahennie bia ne anwo wɔ ye afia berɛ.

Nyekyire 6:3

Na ɔtele nzɔanoɛ bɔ ɔtɔ so nyɔ ne noa nen, ndele kyɛ abɔdeɛ teasefoɛ bɔ ɔtɔ so nyɔ ne ɔkã kyɛ, “Baanea!”

Nyekyire 6:5

Na ɔtele nzɔanoɛ bɔ ɔtɔ so nza ne noa nen, ndele kyɛ abɔdeɛ teasefoɛ bɔ ɔtɔ so nza ne ɔkã kyɛ, “Baanea!” Nneane, yieee, pɔngɔ bire bie, na né bɔ ɔte ye so ne otira tonyi.

Nyekyire 6:7

Na ɔtele nzɔanoɛ bɔ ɔtɔ so nna ne noa nen, ndele kyɛ abɔdeɛ teasefoɛ bɔ ɔtɔ so nna ne ɔkã kyɛ, “Baanea!”