Nyekyire 3:12 - AHYERƐLƐ KRONGRON

¹² Na bɔ odi ngonim ne, ngɔyɛ ye bonima wɔ me Nyameɛ asɔneyɛɛ sua ne anu; na ongofi nu ngofite ko. Na me Nyameɛ dumaa, ɔne me Nyameɛ kuro dumaa, bɔ ɔte Yerusalem foforɛ ne, bɔ ofi nyameɛso ɔba ase fi me Nyameɛ berɛ, ɔne me dumaa foforɛ ne, ngɔhyerɛ ngogua ye nwo.

Nyekyire 3:12 Iomraidhean Croise

1 Ahemvo 7:21

Hiram gyinagyinane bonima nemɔ wɔ asɔneyɛɛ sua abrannaa ne aso. Ogyinane bonima ne ko wɔ ngwaen, na ɔtole ye dumaa Yakin; ogyinane ko wɔ sorɔ, na ɔtole ye dumaa Boase.

Edwein 46:4

Asue bie wɔ berɛ bɔ ye sa mɔ fa anigye bɛba Nyameɛ kuro ɔ, Anwuro Anwuroniɛ ne, ye atenaleɛ krongron berɛ.

Edwein 48:8

Kyɛbɔ yate ne, sɔ ala yeɛ yanwu ye, wɔ Asafo AWURADE ye kuro, yɛ Nyameɛ ye kuro, kuro bɔ Nyameɛ wafa watimu berɛ afebɔɔ ne aso ɔ. Sela

Edwein 87:3

Ao, Nyameɛ kuro, animnyam dwirɛ yeɛ bɛkã bɛfa wɔ nwo ɔ. Sela

Yesaya 62:2

Maen maen mɔ konwu wɔ bebualɛ ne, yeɛ ahemvo amukoraa bekonwu w’animnyam; bɛkɔfa dumaa foforɛ yeɛ bɛkɔfrɛ wɔ ɔ, bɔ ɔte dumaa bɔ okofi AWURADE noa nu kɔwa ɔ.

Yesaya 65:15

Na me mmenia bɔ mapa nu maye bɛ ne, ɛmɔ dumaa bɔ ɛmɔkɔyakyi ye berɛ ne, ɔkɔyɛ b’amonwaa dwirɛ, na AWURADE Nyameɛ kohũhũ ɛmɔ; nakoso ye somvoɛ mɔ de, ɔkɔto bɛ dumaa foforɛ;

Yeremia 1:18

Tie, ɛnɛ kyẽa ye, mafa wɔ mayɛ kuro bɔ babɔ ye nwo waen ɔ, buralɛ bonima ne kɔɔbere fasue matia maen ne amukoraa: Yuda ahemvo, ye atitire mɔ, ye asɔfo mɔ ne aseɛ ne aso ama.

Hesekiel 40:49

Abrannaa ne tendenn nu, ɔte agyirɛ aburanyɔ, ye tɛtrɛtɛɛ nu te agyirɛ buru ne ko. Ɔfale me fale atweleɛ ndiasoɛ bɔ bɛfa bɛfo bɛkɔ so ne aso. Né bonima mɔ gyigyi mbuna nemɔ anwo berɛ, ko wɔ ye bue faen, yeɛ ko wora wɔ ye bue dɔ.

Hesekiel 48:35

Ɛpɛ kuro ne anwo kango bra yia a, ɔte agyirɛ apee buru ne mmɔtwɛ. Na ofi sɔ kyẽa ne bɔ ɔkɔ ɔ, kuro ne dumaa li: “AWURADE wɔ berɛ.”

Marko 12:16

Bɛfale ko bɛbrɛle ye, na obisale bɛ kyɛ, “Nwa mvonini ne dumaa yeɛ ɔwɔ so ye?” Na bebuale ye kyɛ, “Kaesare deɛ ɔ.”

Galatiafoɛ 2:9

Na Yakobo, Kefa ne Yohane bɔ agyidifoɛ ne bu bɛ kyɛ bɛte bonima ma asɔre ne nwuni adom bɔ manya ye nen, besomane me ne Banaba sa nu bɛfa behyirele kyɛ bale yɛ bato nu: kyɛ yɛɛha nzɛmba ne yɛhyire Amaenmaensofoɛ, na bɛ wora bɛɛhã ye bienzuapɛlɛfoɛ nemɔ dɔ.

Ɛfesofoɛ 3:15

bɔ ye nu yeɛ abusua biala bɔ ɔwɔ nyameɛso ne aseɛ so onya ye dumaa fi ne,

Hebrifoɛ 12:22

Na mmom ɛmɔawa Sion bokaa ne anwo, ɔne Nyameɛ teasefoɛ ne kuro, bɔ ɔte nyameɛso Yerusalem ne anu, yeɛ abɔfo kure kure bɔ bɛka a bennwu bɛ noa, bɔ bɛyɛ anigye nyianu ɔ bɛ berɛ.

Hebrifoɛ 13:14

Ɔnate kyɛ, kuro biala nne aseɛ ye aso bɔ ɔwɔ berɛ afebɔɔ ma yɛ ɔ, na kuro bɔ ɔbaawa ne mmom yeɛ yɛpena ye si atee ɔ.

1 Yohane 4:4

Me ngwadaa mɔ, ɛmɔ de ɛmɔte Nyameɛ deɛ na ɛmɔali bɛ so ngonim; ofikyɛ bɔ ɔte ɛmɔ nu ne, ɔte piri tra bɔ ɔwɔ wiase ne.

Nyekyire 14:1

Afei ndole me nye, na yieee, né Boaen Ba ne gyi Sion bokaa ne aso. Na bɛ bɔ bɛboka ye so ne bɛte apee sɔ alaa ɛyaa ko ne aburanna ne nna, bɔ bahyerɛ ye dumaa ne ye Baba dumaa wɔ bɛ nwoma so ɔ.

Nyekyire 17:14

Bɛkɔfa koɛ bɛkɔteta Boaen Ba ne, na Boaen Ba ne koli bɛ so ngonim; ofikyɛ ɔte meneɛ mɔ nu Meneɛ ne ahemvo mɔ nu Hene; na bɛ bɔ bɛboka ye so ne, wafrɛ bɛ, waneanea nu waye bɛ, na bedi nahorɛ.”

Nyekyire 2:11

Bɔ ole asoɛ ne, maa otie bɔ Sunzum ne kã kyire asɔre nemɔ ne: Bɔ odi ngonim ne, ewue bɔ ɔtɔ so nyɔ ne ngɔwa ye so.’

Nyekyire 2:17

Bɔ ole asoɛ ne, maa otie bɔ Sunzum ne kã kyire asɔre nemɔ ne: Bɔ odi ngonim ne, ngɔma ye mvealeɛ nu mana ne bie maa okoli, na ngɔma ye nyɔboɛ fufue, na nyɔboɛ ne aso yeɛ bahyerɛ dumaa foforɛ bɔ ebiala nze bagua ɔ, sana sona bɔ onya ye ne angome.’

Nyekyire 2:7

Bɔ ole asoɛ ne, maa otie bɔ Sunzum ne kã kyire asɔre nemɔ ne: Bɔ odi ngonim ne, ngɔma ye ngoa bakaa bɔ ogyi Nyameɛ Paradise ne anu mma maa okoli.

Nyekyire 21:2

Na nwuni kuro krongron ne, Yerusalem foforɛ ne, kyɛ ofi Nyameɛ berɛ wɔ nyameɛso odwu ba ɔ, bɔ basiesie ye kyɛ atɔmvorɛ braa bɔ basiesie ye nwo bama ohu ɔ.

Nyekyire 22:4

Bekonwu ye nyunu, na ye dumaa kɔbobɔ bɛ nwoma so.

Nyekyire 3:5

Na bɔ odi ngonim ne, bɛkɔfa ataadeɛ fufue sɔ bekowura ye, na mengokyikyi ye dumaa mengofi ngoa nwomaa ne anu; na mmom ngɔbɔ ye dumaa wɔ me Baba ne ye abɔfo mɔ nyunu.