Nyekyire 13:15 - AHYERƐLƐ KRONGRON

¹⁵ Na bɛmane ye tumi kyɛ ɔma kaka ne honi ne sunzum, ná kaka ne honi ne po odwudwo, ná ɔma behũ mmenia wora bɔ bɛngoto kaka ne honi ne.

Nyekyire 13:15 Iomraidhean Croise

Gyenesise 2:7

Na AWURADE Nyameɛ fale aseɛnwo nnɛterɛ nwone kuro sona, na olele ngoa nwomeɛ guale ye bonyi anu, na kuro sona ɔɔyɛle teasefoɛ.

Edwein 115:5

Bele noa, nakoso bɛngora dwudwo, bele anyeɛ, nakoso bennwu nikye.

Yeremia 10:14

Ebiala te kwaseaa, na olle nimdeɛ; esikaa kɔkorɛ dwumvoɛ biala ye mmosoen mɔ gua ye nyunu ase, ofikyɛ ye mmosoen mɔ te nnakannaka, na nwomeɛ biala nne bɛ nu.

Yeremia 10:5

Bɛ mmosoen nemɔ, bɛte kyɛ kakaammotobi bɔ bɛfa benwunanwuna fieso nnomaa ɔ; bendwudwo; odi kyɛ bɛsoa bɛ, ofikyɛ bɛngora nate. Nnɛma ɛmɔsuro bɛ, ofikyɛ bɛngɔhora bɛngɔyɔ ɛmɔ bɔne biala, yeɛ bɛngora bɛnyɔ nikye paa biala.”

Yeremia 51:17

Sona biala te kwaseaa bɔ olle nimdeɛ ɔ; esikaa kɔkorɛ dwumvoɛ biala, ye mmosoen yeɛ begua ye nyunu ase ɔ; ye amoen nemɔ te nnakannaka, na nwomeɛ biala ɔnne bɛ nu.

Daniel 7:20

Yeɛ ye ti so mmɛen buru nemɔ, mmɛen ko ne bɔ ofifili, bɔ bɛ nu nza bo tutuli maa ootuale berɛ, sɔ mmɛen ne bɔ ole anyeɛ ne noa bɔ ɔkekã edwirɛ mbiri mbiri, bɔ ye piri tra mmɛen ngaa nemɔ ne, né mepena kyɛ menwu kyɛbɔ ye bo kyire ɔ.

Daniel 7:25

Okodwudwo kotia Anwuro Anwuroniɛ ne, ɔkɔmaa Anwuro Anwuroniɛ n’anwoteefoɛ nemɔ bekoli amia, na ɔkɔyɛ ye adwene kyɛ ɔkɔsesã mmerɛ ne mmeraa, na bɛkɔfa anwoteefoɛ nemɔ bekowura ye sa afoɛ ko, afoɛ nyɔ ne bosome nzia.

Habakuku 2:19

Sona bɔ ɔkã kyire bakaa kyɛ, “Tingye”, ná ɔkã kyire nyɔboɛ mumu kyɛ, “Dwɔso! Ɔbaahyirehyire” ne, ye yaakɔ! Tie, bafa esikaa kɔkorɛ ne dwetɛ baboro ye nwo, nakoso nwomeɛ biala ɔnne ye nu.

Yakobo 2:26

Na kyɛbɔ nipadua bɔ sunzum nne nu ne ɔte wuruwaa nen, sɔ ala yeɛ gyidie bɔ nnwumaa nne nu ne ɔte wuruwaa ɔ.

Nyekyire 13:1

Na nwuni kaka bie bɔ ole tire nzoo, ɔne mmɛen buru kyɛ ofi ɛpo nu ofite ɔ. Né ahennie abotire buru bobɔ ye mmɛen nemɔ, na musue abodin mɔ wɔ ye ti nemɔ anwo.

Nyekyire 13:12

Na ɔfa kaka bɔ oli moa n’anwoserɛ amukoraa yɔ ye nnwumaa, na ɔma aseɛ ne bɛ bɔ bɛte so ɔ bɛkoto kaka bɔ oli moa bɔ ye puralɛ kena ahɔ ne.

Nyekyire 13:14

Na nzɛngyerɛnneɛ bɔ wanya ye nwo tumi kyɛ ɔyɔ ye wɔ kaka ne nyunu ne, ɔfa so lakalaka bɛ bɔ bɛte aseɛ so ɔ; na ose bɛ bɔ bɛte aseɛ so ɔ kyɛ, bɛ́yɔ ohoni bɛma kaka bɔ ngrandɛ apura ye, nakoso ɔtɛ te ase ne.

Nyekyire 14:11

Na nwosina bɔ ofi bɛ teeteelɛ nu ne, ɔkɔ anwuro afebɔɔ. Na bɛ bɔ bɛkoto kaka ne ne ye honi ne, yeɛ ebiala bɔ ode ye nzorɛhyɛlɛ dumaa nen, bengonya bɛ nwome biala bengole wɔ alehyeleɛ nu ne alesaleɛ nu.

Nyekyire 14:9

Na abɔfo bɔ ɔtɔ so nza lili bɛ si, na ɔteane nu sele kyɛ, “Sɛ ebie koto kaka ne ne ye honi ne, ná ode ye nzorɛhyɛlɛ ne wɔ ye nwoma so, anaa ye sa nwo a,

Nyekyire 16:2

Yiti abɔfo bɔ oli moa ne hɔle oohwiele bɔ ɔwɔ ye kulie ne anu guale aseɛ so, na kena bɔ ɔbo mvamva ná otutu ɔ tutuli mmenia bɔ bele kaka ne nzorɛhyɛlɛ ne, ɔne bɛ bɔ bɛkotole ye honi ne.

Nyekyire 16:5

Na ndele kyɛ nzue mɔ so abɔfo ne ɔkã kyɛ, “O Krongronniɛ, wɔ bɔ ɛwɔ berɛ, ná ɛwɔ berɛ fi tetetete ɔ, ɛtengyɛ, ofikyɛ sɔ yeɛ abua ndɛen ɔ.

Nyekyire 17:14

Bɛkɔfa koɛ bɛkɔteta Boaen Ba ne, na Boaen Ba ne koli bɛ so ngonim; ofikyɛ ɔte meneɛ mɔ nu Meneɛ ne ahemvo mɔ nu Hene; na bɛ bɔ bɛboka ye so ne, wafrɛ bɛ, waneanea nu waye bɛ, na bedi nahorɛ.”

Nyekyire 17:17

Ofikyɛ Nyameɛ amaa banya adwene ko kyɛ bɛ́ma ye nhyehyɛleɛ bra nu, kyɛ bénya adwene ko, ná bɛfa b’ahennie ne bɛma kaka ne, kɔpem kyɛ Nyameɛ noa dwirɛ ne kɔwa nu ɔ.

Nyekyire 17:6

Na nwuni kyɛ anwoteefoɛ mogya ne Yesu adanzefoɛ mogya wabo braa ne; na nwuni ye nen, ɔyɛle me nwanwa paa.

Nyekyire 18:20

O, nyameɛso ne anwoteefoɛ ne asomafoɛ ne ngɔmhyɛlɛfoɛ, ɛ́mɔli ye nwo ahurusi, ofikyɛ Nyameɛ atɔ ye so wereɛ wama ɛmɔ!”

Nyekyire 18:24

Na ye nu yeɛ benwuni ngɔmhyɛlɛfoɛ ne anwoteefoɛ ne mmenia amukoraa bɔ bahũ bɛ wɔ aseɛ so ɔ bɛ mogya ɔ.”

Nyekyire 19:20

Na bɛhyele kaka ne, ɔne ngɔmhyɛlɛniɛ ngondomboniɛ ne koso bɔ ɔyɔle nzɛngyerɛnneɛ wɔ ye nyunu, bɔ ɔfa lakalakale bɛ bɔ bale kaka ne nzorɛhyɛlɛ ne, ɔne bɛ bɔ bɛkotole ye honi ne. Na befindini bɛ munyɔ anyekaenn so beguale see abura bɔ sɔfe ogye wɔ nu ne anu.

Nyekyire 20:4

Afei nwuni ahennie bia mɔ, na bɛmane bɛ bɔ bɛtete so nemɔ tumi kyɛ bebua ndɛen. Na bɛ bɔ ɔnate Kristo adanzeɛ ne Nyameɛ dwirɛ ne ati bɛpepɛle bɛ ti ne, nwuni bɛ kra mɔ. Bɛ de, banzɔne kaka ne anaa ye honi ne, yeɛ banne ye nzorɛhyɛlɛ ne wɔ bɛ nwoma so, anaa bɛ sa nwo. Benyane ngoa bieku, na bɛne Kristo belili hene afoɛ apee ko.