Nworɛ Dwirɛhanɛniɛ 12:13 - AHYERƐLƐ KRONGRON

¹³ Edwirɛ amukoraa bɔ yate ne, sɔa yeɛ yɛbɔ ye porɛ ɔ: Suro Nyameɛ ná di ye mmeraa dwirɛ so, ofikyɛ bɔ odi kyɛ kuro sona biala ɔyɔ hɔ ɛne.

Nworɛ Dwirɛhanɛniɛ 12:13 Iomraidhean Croise

Gyenesise 22:12

Na ɔhane kyɛ, “Nnɛfa wɔ sa ka akwadaa ne, yeɛ nnɛyɔ ye hwee, ofikyɛ afei de manwu kyɛ esuro Nyameɛ, na amva ɛwa komapɛ twe ne ammɔ me aheɛ.”

1 Ahemvo 2:3

ná di bɔ AWURADE wɔ Nyameɛ wahyɛ wɔ kyɛ ɛyɔ ne aso. Tie ye dwirɛ, ná di ye ahyɛdeɛ, ye mmeraa dwirɛ, ye nhyehyɛleɛ ne ye noa dwirɛ so, kyɛbɔ bahyerɛ ye wɔ Mose mmeraa ne anu ne, amaa wayie wɔ yé wɔ nikyee biala bɔ ɛkɔyɔ ɔ nu, ɔne nekaa biala bɔ ɛkɔhɔ ɔ.

YOB NWOMAA NE 28:28

Na osele kuro sona kyɛ, ‘Tie, nworɛ ole kyɛ ekosuro AWURADE ɔ, yeɛ nimdeɛ ole kyɛ ɛkɔhwe wɔ nwo kofi bɔne nwo ɔ.’ ”

Edwein 111:10

AWURADE surolɛ te nworɛnwunɛ ye bohyɛlɛ; bɛ bɔ bɛyɔ sɔ ne, benya nimdeɛ paa. Odi kyɛ bɛye ye ayɛ afebɔɔ.

Edwein 145:19

Ɔyɔ bɛ bɔ besuro ye ɔ b’apɛdeɛ ma bɛ; afei koso otie bɛ sufrɛ, na ɔpepɛ de bɛ.

Edwein 147:11

na mmom AWURADE nye gye bɛ bɔ besuro ye ɔ nwo, bɛ bɔ bɛfa bɛ nwo bɛto ye ɔdɔ bɔ onni ngasi ne aso ne.

Anyandera 1:7

AWURADE surolɛ yeɛ ɔte nimdeɛnyanɛ ye bohyɛlɛ ɔ, na ngwaseafoɛ de, bɛmva nworɛ ne ngyerɛkyerɛ bɛnyɛ huu.

Anyandera 19:23

AWURADE surolɛ ma sona nya ngoa, enya ye a, ɛkɔtena asomdwee nu, na edwirɛ biala ngɔto wɔ.

Anyandera 23:17

Nnɛma wɔ nye boro bɔnefoɛ, na mmom suro AWURADE daa biala.

Nworɛ Dwirɛhanɛniɛ 2:3

Mvale adwene kyɛ ngɔfa nzaa ngɔgye me nye, wɔ aberɛ bɔ mepena nworɛ si atee ɔ, yeɛ afei kyɛ ngɔyɔ ngwaseade ɔ, kɔpem kyɛ ngonwu bɔ ɔte paa ma adasa kyɛ bɛkɔyɔ ye wɔ ewiase, wɔ bɛ ngoa tikaape ye anu ɔ.

Nworɛ Dwirɛhanɛniɛ 3:14

Mese kyɛ nikyee biala bɔ Nyameɛ yɔ ne, ɔkɔtena berɛ daa. Ɛngɔhora ngɔfa bie ngɔboka so, yeɛ ɛngɔhora ngɔye bie ngofi nu. Nyameɛ yɔ ye sɔ, amaa ɔnate so sona biala asuro ye.

Nworɛ Dwirɛhanɛniɛ 5:7

Ɛkye laleɛ pee a, né wɔ dwudwolɛ mbaen mbaen asone pee, nakoso suro Nyameɛ.

Nworɛ Dwirɛhanɛniɛ 6:12

Kuro sona ngoa tikaape bɔ ɔte mbaen, bɔ ɔsẽ kɔ kyɛ wawoɛ ne, nwa yeɛ ɔse bɔ ɔte paa ma kuro sona wɔ nu ɔ? Bɔ okosi sona ye wue asi wɔ wiase ne, nwa yeɛ ɔkɔhora kɔla ye ali kohyire ye ɔ?

Nworɛ Dwirɛhanɛniɛ 7:18

Ɔte paa kyɛ ɛkɔsɔ foɛtulɛ bɔ oli moa ne anu, bɔ ɛngɔyakyi bɔ ɔtɔ so nyɔ ne koso anu ɔ. Ofikyɛ sona bɔ osuro Nyameɛ ne, ɔkɔhwe ye nwo kofi ye mukoraa nwo.

Nworɛ Dwirɛhanɛniɛ 8:12

Ɔwɔ nu kyɛ bɔnefoɛ ɔyɔ bɔne yɔleɛ sɔ alaa ɛyaa, ná onya ngoa tendenn de; nakoso nahorɛ nu, me de mese kyɛ bɛ bɔ besuro Nyameɛ ná bebu ye ne yeɛ okoyie bɛ yé ɔ.

Nworɛ Dwirɛhanɛniɛ 8:5

Sona biala bɔ odi mmeraa so ne, edwirɛ ndo ye, amba, nworɛniɛ adwene ɔse mmerɛ ne ne ndɛenbualɛ ne.

Mika 6:8

Ao kuro sona, wala bɔ ɔte paa ɔ ali wahyire wɔ, nzikyɛ yeɛ AWURADE pena fi wɔ berɛ ɔ? Bɔ ɔpena ala ole kyɛ ɛkɔyɔ bɔ ɔtengyɛ, ekonwu anwumvoin, ɔne kyɛ ɛne wɔ Nyameɛ bɛkɔnate anwobrɛaseɛ nu ɔ.

Luka 1:50

Na ye anwumvoinnwunɛ ne, ɔwɔ bɛ bɔ besuro ye ɔ so, wɔ aworɛ ndoatoasoɛ amukoraa nu.

Deuteronomi 10:12

“Yiti afei, Yisrael, nzikyɛ yeɛ AWURADE wɔ Nyameɛ pena fi wɔ berɛ ɔ? Bɔ ɔpena ole kyɛ ekosuro AWURADE wɔ Nyameɛ, ná ɛkɔfa ye atee mukoraa so, ná ekohuro ye dwirɛ, ná ɛkɔfa w’ahone mukoraati ne wɔ kra mukoraati ɛkɔso AWURADE wɔ Nyameɛ ɔ,

Deuteronomi 10:20

AWURADE wɔ Nyameɛ yeɛ ɔsɛ kyɛ esuro ye ɔ; ye ngome twe yeɛ sɔne ye ɔ; ye yeɛ fa wɔ nwo bɔ ye ɔ, na ye dumaa yeɛ fa ta ndaen ɔ.

Deuteronomi 4:10

kyɛbɔ daa bie ɛmɔgyinane AWURADE ɛmɔ Nyameɛ nyunu wɔ Horebo, bɔ AWURADE sele me kyɛ, ‘Boaboa mmenia ne noa ma me, ná nga me noa nu dwirɛ ngyire bɛ, amaa ɔnate so basua kyɛ bekosuro me wɔ mmerɛ biala bɔ bɛte ase ɔ, ná bafa bahyirehyire bɛ mma mɔ.’

Deuteronomi 4:2

Mmeraa bɔ méfa méma ɛmɔ ne, nnɛma ɛmɔfa bie bɛboka so, yeɛ nnɛma ɛmɔye bie befi nu, na mmom ɛ́mɔli AWURADE ɛmɔ Nyameɛ mmeraa dwirɛ bɔ méhyehyɛ méma ɛmɔ ne aso.

Deuteronomi 6:2

amaa ɔnate so ɛne wɔ mma ne wɔ nnomaa ɛmɔasuro AWURADE wɔ Nyameɛ, wɔ w’asetena mukoraati nu, ná ali ye ahyɛdeɛ ne ye mmeraa dwirɛ mukoraati bɔ méhyɛ wɔ ne aso, ná anya ngoa tendenn.

1 Petro 2:17

Ɛ́mɔfa anidie bɛ́ma mmenia amukoraa! Ɛ́mɔhurohuro aliɛmaa mɔ agyidifoɛ dwirɛ! Ɛ́mɔsuro Nyameɛ! Ɛ́mɔfa anidie bɛ́ma ɛhene ne!

Nyekyire 19:5

Na komviɛ bie fili ahennie bia ne anu teane nu kyɛ, “Ɛ́mɔye yɛ Nyameɛ ayɛ, ɛmɔ bɔ ɛmɔte ye ngoaa ne ɛmɔ bɔ ɛmɔsuro ye amukoraa, kwahweabaa mɔ ne atitire!”

1 Samuel 12:24

Ɛ́mɔnea nningyein mbiri mbiri bɔ wayɔ wama ɛmɔ ɔ. Esurolɛ mmom yeɛ ɔsɛ kyɛ ɛmɔsuro AWURADE, ná ɛmɔfa ɛmɔ ahone amukoraa bɛso ye nahorɛ nu ɔ.