Numeri 21:29 - AHYERƐLƐ KRONGRON

²⁹ Moabo, wɔ yaakɔ! Mmenia bɔ bɛso bosoen Kemose, ɛmɔ boso anua! Wama ye mma mmienzua ayɛ akobɔfoɛ, yeɛ wayakyi ye mma mmrasua mɔ wama Amori hene Sihon wahye bɛ nnure.

Numeri 21:29 Iomraidhean Croise

1 Ahemvo 11:33

Ofikyɛ Solomon apo me waasɔne Sidonfoɛ bosoen brasua Asetate ɔne Moabofoɛ bosoen Kemose, yeɛ Amonfoɛ bosoen Milkom, na wanni me dwirɛ so. Wanyɔ bɔ ɔtengyɛ wɔ me nye so ɔ, yeɛ wanni m’ahyɛdeɛ ne me nhyehyɛleɛ so kyɛbɔ ye baba Dawide de olili so ne.

1 Ahemvo 11:7

Afei Solomon sili asɔneyɛɛ mane Moabofoɛ bosoen Kemose bɔ ɔte akyiwadeɛ ne, ɔne Amonfoɛ bosoen Moleke bɔ ɔte akyiwadeɛ ne wɔ bokaa bɔ ɔwɔ Yerusalem eyia afiteleɛ ne aso.

2 Ahemvo 23:13

Asɔneyɛɛ nemɔ bɔ bɛwɔ Yerusalem eyia afiteleɛ so, wɔ Ewue Bokaa ne ngwaen, bɔ Yisrael hene Solomon osi mane Sidonfoɛ bosoen Asetate bɔ ɔte akyiwadeɛ, Moabofoɛ bosoen Kemose bɔ ɔte akyiwadeɛ ɔne Amonfoɛ bosoen Milkom bɔ ɔte akyiwadeɛ ne, Nana Yosia fale efiɛ hane bɛ.

Yesaya 15:5

Medi Moabo nwo aworabɔlɛ, ye mmenia bɔ bɛnwati ne, banwati baadwu Soa, baadwu Eglate Selisiya. Ofikyɛ Luhite pambaa ne, bele esuɛ yeɛ bɛfo ɔ; na atee bɔ ɔkɔ Horonaim ne, awuye yeɛ bɛbɔ bɛfa so ɔ.

Yesaya 16:2

Kyɛbɔ nnomaa mmaa bɔ bafoa bɛ bafi bɛ saen nu bɔ bekyinikyini ne bɛte ne, sɔ yeɛ Moabo mma mmrasua nemɔ bɛkɔyɛ wɔ Anɔn apɛleɛ ɔ.

Yeremia 48:13

Afei Kemose nwo kɔyɛ Moabo nya, kyɛbɔ Betel bɔ ɔte Yisrael awuro ama mɔ b’anyelasoɛ ne, ye nwo yɛle Yisrael awuro ama mɔ nya ne.

Yeremia 48:45

“Bɛ bɔ bɛnwatili ne, bɛɛbɔle bɛ nwo adwaa wɔ Hesebon fɔnwoo nu, ɔnate b’anwoserɛ bɔ wayie ne ati. Nakoso see kofi Hesebon kɔwa, na see bɔ ogye kofi Sihon kɔwa kɔɔyera Moabo ye nwoma so, ɔne basabasayɔlɛfoɛ bɛ ti afia.

Yeremia 48:46

Ao Moabo, wɔ yaakɔ! Kemose maen ne wabɔ, ofikyɛ bahye wɔ mma mmienzua mɔ nnure bahɔ, yeɛ bahye wɔ mma mmrasua mɔ nnure bahɔ.

Yeremia 48:7

Ofikyɛ, ɔnate kyɛ afa wɔ nwo ato wɔ nnwumaa ne wɔ anwonyadeɛ so ne ati, wɔ koso bɛkɔhye wɔ bɛkɔhɔ; na bɛkɔhye Kemose nnure bɛkɔhɔ, ɔne ye asɔfo mɔ ne ye atitire mɔ bɔ bɛboka ye so ɔ.

Numeri 24:17

Bɔ menwu ye mefa ye nwo ne, nna kekesaala ye yeɛ ɔkɔwa nu ɔ; bɔ me nye tua fa ye nwo ne, ongosi kekesaala ye. Nzramaa bie kofi Yakob nu kofite, na ɛhɔtɔ bie kofi Yisrael nu kodwɔso. Okoli Moabo mbanyi so ngonim, ná wabrɛ Sɛti boso ama amukoraa ase.

Maenbulɛfoɛ 11:24

Aso nna nikyee bɔ wɔ nyameɛ Kemose wafa wama wɔ ne yeɛ odi kyɛ ɛfa ɔ? Nikyee biala bɔ AWURADE yɛ Nyameɛ wali so ngonim wafa wama yɛ ne, aso nna yɛ yeɛ odi kyɛ yɛfa ɔ?