Numeri 20:12 - AHYERƐLƐ KRONGRON

¹² Nakoso AWURADE sele Mose ne Aarɔn kyɛ, “Ɔnate kyɛ ɛmɔanne me banni, ná ɛmɔamma wanna ali wɔ Yisraelfoɛ nyunu kyɛ nde krongron ne ati, ɛmɔngɔfa mmenia hemɔ bengodwu aseɛ bɔ mafa mama bɛ ne aso.”

Numeri 20:12 Iomraidhean Croise

2 Aberɛso Dwirɛ 20:20

Koɛhonɛfoɛ nemɔ dwɔsole ngyerɛmɔ tutuutu bɛhɔle Tekoa ɛserɛ ne aso. Bɛkɔ ne, Yehosafate dwɔsole sele kyɛ, “Yuda ne Yerusalemfoɛ, ɛ́mɔtie me! Ɛ́mɔle AWURADE ɛmɔ Nyameɛ ne beli, na okoyie ɛmɔ yé. Ɛ́mɔle ye ngɔmhyɛlɛfoɛ ne beli.”

Edwein 106:32

Behuli AWURADE ahone wɔ Meriba nzue ne anwo, na ɔnate bɛ ti Mose nyane edwirɛ.

Edwein 99:8

Ao AWURADE yɛ Nyameɛ, ebuale bɛ; ɛyɛle bɛ Nyameɛ bɔ ɛfa bɔne kyɛ ɔ, nakoso ɛyɛle bɛ bɔne so wereɛtɔlɛniɛ.

Yesaya 7:9

Efraim ahenguro ole Samaria, yeɛ Remalia awa ne yeɛ ɔla Samaria noa ɔ. Na sɛ ɛmɔanne banni a, nahorɛ nu, ɛmɔngɔhora ɛmɔ gya nu gyina.”

Yesaya 8:13

Asafo AWURADE ngome yeɛ odi kyɛ ɛmɔbu ye kyɛ ɔte krongron ɔ. Ye yeɛ odi kyɛ ɛmɔsuro ye, ye yeɛ odi kyɛ ɛmɔma ye nwo suronyi tɔ ɛmɔ so ɔ.

Hesekiel 20:41

Ngole ɛmɔ ngɔto nu kyɛ ɛyɛɛ fonafona, mmerɛ bɔ ngɔye ɛmɔ ngofi maen maen mɔ so, bɔ ngɔboaboa ɛmɔ noa ngofi aseɛ mɔ bɔ mabɔ ɛmɔ masande maagua so ne aso ne. Na ɔnate ɛmɔ so, me krongronyɛlɛ kɔla ali wɔ maen maen nemɔ bɛ nyunu.

Hesekiel 36:23

Na me dumaa piri bɔ ɛmɔagua ye nwo fiɛ wɔ maen maen mɔ nu, bɔ ɛmɔagua ye nwo fiɛ wɔ bɛ nu ne, ngɔyɛ ye krongron. Na sɛ meyɛ me dumaa ne krongron wɔ ɛmɔ nu, bɔ bɛ nye tua a, afei maen maen mɔ konwu kyɛ me ole AWURADE, AWURADE Nyameɛ noa dwirɛ ɛne.

Hesekiel 38:10

“AWURADE Nyameɛ nwa nyoo: Sɔ kyẽa ne, adwene biemɔ kɔwa wɔ ti anu, ɛkɔbɔ porɛ,

Lewitikɔso 10:3

Na Mose sele Aarɔn kyɛ, “Bɔ AWURADE aha hɔ ɛhe: ‘Ɔnate bɛ bɔ bepingye me ne aso, ngɔmaa bekonwu me kyɛ nde krongron, na bɛkɔhyɛ me animnyam wɔ mmenia ne amukoraati nyunu.’ ” Na Aarɔn yɛle konn.

Numeri 11:15

Sɛ sɔ yeɛ ɛfa di me de a, ye de ku me pɛen ko. Nakoso sɛ anya alo me de a, nnɛma aworabɔlɛ to me.”

Numeri 20:24

“Aarɔn kowu kɔɔtoa ye mbanyi mɔ. Ye gya baa ngotia aseɛ bɔ mafa mama Yisraelfoɛ ne aso, ofikyɛ ɛmɔyɛle m’ahyɛdeɛ nwo asoserɛ wɔ Meriba asue nwo.

Numeri 27:14

Ofikyɛ mmerɛ bɔ maen ne dwɔso tiale me wɔ Sen ɛserɛ ne aso ne, ɛmɔyɛle me mmeraa dwirɛ nwo asoserɛ. Ɛmɔamma wanna ali wɔ Yisraelfoɛ nyunu kyɛ nde krongron, wɔ nekaa bɔ nzue wale ne.” (Ɛhe ole Meribate Kadese asue bɔ ɔwɔ Sen ɛserɛ ne aso ne.)

Mateo 17:17

Na Yesu buale kyɛ, “O ɛnɛmmafoɛ asoserɛfoɛ bɔ ɛmɔlle gyidie ɔ! Me ne ɛmɔ yɛtena maa odwu kyinzu? Nya ɛmɔ nwo aboterɛ maa odwu kyinzu? Ɛ́mɔfa ye bɛbrɛ me wa!”

Mateo 17:20

Na obuale bɛ kyɛ, “Ɛmɔ gyidie te kãa ti ɔ. Nahorɛ nu, mekã mekyire ɛmɔ kyɛ, sɛ ɛmɔle gyidie bɔ ye piri te kyɛ sinapi baa ko a, ahaa ɛmɔkɔhã bekohyire bokaa he kyɛ, ‘Tutu fi wa kɔ dɔ,’ na ye bo kotutu; na ahaa nikyee biala ngɔyɛ se ngɔma ɛmɔ.” [

Luka 1:20

Na tie, anne me dwirɛ bɔ ɔkɔwa nu wɔ ye mmerɛ nu ne anni, yiti ɛkɔtɔ mumu, ɛngɔhora dwudwo maa okodwu kyẽa bɔ ɛhemɔ kɔwa nu ɔ.”

Luka 1:45

Na saleɛ te bɔ wale wali ɔ deɛ, ofikyɛ edwirɛ mɔ bɔ Awurade amaa baahã bahyire ye ne, ɔkɔwa nu.”

Yohane 1:17

Mmeraa ne de, bɛnate Mose so yeɛ bɛfa bɛmane ɔ; na adom ne nahorɛ ne de, ɔnate Yesu Kristo so yeɛ bɛwale ɔ.

Romanfoɛ 4:20

Wanzu aporowaa wamma ye adwene anyɛ ye naa wɔ Nyameɛ bɔhyɛ ne anwo, na mmom ogyinane pindinn wɔ gyidie nu ɔhyɛle Nyameɛ animnyam.

Deuteronomi 1:37

Ɔnate ɛmɔ ti, me koso AWURADE ahone huli me so, na osele kyɛ, ‘Wɔ koso, wɔ gya baa ngotia berɛ.

Deuteronomi 34:4

Na AWURADE sele ye kyɛ, “Aseɛ he yeɛ ndale ye nwo ndaen ngyirele Abraham, Yisake ne Yakob kyɛ, ‘Wɔ bosofoɛ yeɛ ngɔfa ngɔma bɛ ɔ.’ Mama wɔ nye anwu ye, nakoso dɔ de, wɔ gya baa ngotia dɔ.”

Deuteronomi 4:21

“Ɔnate ɛmɔ ti AWURADE fɛle me so yaa, na ɔtale ndaen kyɛ mengɔpɛ asue Yɔɔdan, yeɛ me gya baa koso ngotia aseɛ paa bɔ AWURADE wɔ Nyameɛ ɔ́fa ma wɔ maa ɔyɛ wɔ deɛ ne aso.

Yosua 1:2

“Me somvoɛ Mose wawu. Yiti boaboa wɔ nwo kɔpɛ asue Yɔɔdan, ɛne Yisraelfoɛ hemɔ amukoraati, ná ɛmɔhɔ aseɛ bɔ méfa méma bɛ ne aso.

1 Petro 3:15

na mmom ɛ́mɔma Awurade Kristo ɔyɛ krongron wɔ ɛmɔ ahone nu. Na mmerɛ biala, ɛ́mɔboaboa ɛmɔ nwo bésie, amaa sɛ ebie bisa ɛmɔ dwirɛ fa anyelasoɛ bɔ ɔwɔ ɛmɔ nu ne nwo a, ɛmɔahora baye ye noa bahyire ye wɔ anwobrɛaseɛ ne anidie nu.