Numeri 18:5 - AHYERƐLƐ KRONGRON

⁵ Odi kyɛ ɛmɔ bɔbɔ ɛmɔyɔ nekaa krongron berɛ adwuma ne ɔne afɔleɛ bokyea ne anwo adwuma, amaa ɛyaafɛlɛ piri amma Yisraelfoɛ so ko le.

Numeri 18:5 Iomraidhean Croise

1 Aberɛso Dwirɛ 23:24

Lewi boso ama mɔ ɛne, kyɛbɔ bɛ nana mɔ sasofoɛ te ɔ. Bɛ bɔ bɛlela bɛ mmusua mmusua nemɔ noa ɔ, bɛ bɔ bali ofi afoɛ aburanyɔ bɔ ɔkɔ ɔ, bɔ odi kyɛ bɛyɔ AWURADE awuro nu berɛ ɛsɔnenɛ adwuma ne, bɛhyerɛle bɛ dumaa ngoko ngoko ne, bɛ ɛne.

1 Aberɛso Dwirɛ 23:32

Yiti odi kyɛ bɛnea ɛtena sua atenaleɛ ne ɔne nekaa krongron ne aso. Afei koso, Aarɔn boso ama bɔ yeɛ bɛte bɛ koso bɛ nwo ama ne, odi kyɛ bɛboka bɛ maa bɛyɔ AWURADE awuro berɛ ɛsɔnenɛ adwuma ne.”

1 Aberɛso Dwirɛ 24:5

Bɛfale serewagualɛ so yeɛ bɛhyɛle adwuma ne pɛpɛɛpɛ bɛmane bɛ ɔ, ofikyɛ Eleasa ne Yitama boso ama nemɔ, né bɛ mukoraa bele mbanyi mɔ bɔ bɛfata kyɛ bɛyɔ Nyameɛ adwuma wɔ nekaa krongron berɛ ɔ.

1 Aberɛso Dwirɛ 9:19

Salum bɔ ye baba ole Kore, bɔ ye baba ole Ebiasafe, bɔ ye baba ole Kora ne, yeɛ ye nwo ama Korafoɛ bɔ befi ye nana mɔ sasofoɛ nu ne, bɛ yeɛ né bɛyɔ ɛsɔnenɛ adwuma bɛwɛne nekaa krongron berɛ anoa ne, kyɛbɔ bɛ nana mɔ né bɛwɛne AWURADE asikyeleɛ anoa nen.

1 Aberɛso Dwirɛ 9:23

Yiti AWURADE awuro bɔ yeɛ ɔte ɛtena sua ne, ye anoa nemɔ, bɛ ne bɛ boso ama mɔ yeɛ né bɛte ye nwo awɛmvoɛ ɔ.

1 Aberɛso Dwirɛ 9:33

Lewifoɛ bɔ bɛlela bɛ nana mɔ sasofoɛ noa bɔ ne bɛte edweintolɛfoɛ ne, né bɛtete asɔneyɛɛ sua pumbu nemɔ anu. Né bɛmma bɛnyɔ adwuma biala, ofikyɛ né bɛyɔ sɔ adwuma ne eyia ne kɔngɔen.

Ɛksadɔso 27:21

Ɛtena sua atenaleɛ berɛ, bɔ ɔwɔ mbɛmuɛ tena bɔ onwi Adanzeɛ ne nyunu ne, Aarɔn ne ye mma mmienzua mɔ yeɛ bɛkɔnea kyɛ kanea nemɔ asosɔ wɔ AWURADE nyunu ɔ, ofi nɔsoa bɔ ɔkwaadwu ngyerɛmɔ. Na sɔ ahyɛdeɛ ne kɔla berɛ daa kɔma Yisraelfoɛ wɔ b’aworɛ ndoatoasoɛ amukoraati nu.

Yeremia 23:15

Yiti bɔ Asafo AWURADE kã fa ngɔmhyɛlɛfoɛ nemɔ nwo ɛhe, “Tie, abɔwee yeɛ ngɔfa ngɔma bɛ maa bekoli ɔ; na ngɔma bɛ nzue bɔ ɛborɔ wɔ nu ɔ maa bɛkɔno, ofikyɛ Yerusalem ngɔmhyɛlɛfoɛ nemɔ, bɛ bra fiɛ ne, wato wapete aseɛ ne aso amukoraa.”

Hesekiel 44:15

“Nakoso Lewifoɛ bɔ bɛte asɔfo, bɔ bɛte Sadoke boso ama, bɔ bɛyɔle me nekaa krongron ne anu adwuma, mmerɛ bɔ Yisraelfoɛ belili makyebu befili me nwo ne, bɛ de, bekopingye me bɛkɔso me, na bekogyina me nyunu bɛkɔfa ɛloe ne mogya bɛkɔbrɛ me, AWURADE Nyameɛ noa dwirɛ ɛne.

Hesekiel 44:16

Bɛ yeɛ bɛkɔwa me nekaa krongron ne anu ɔ, na bɛ yeɛ bekopingye me poen nwo bɛkɔso me ɔ, na bɛkɔyɔ me ɛsɔnenɛ adwuma ne.

Lewitikɔso 10:6

Na Mose sele Aarɔn, ɔne Aarɔn mma mmienzua Eleasa ne Yitama kyɛ, “Nnɛmɔma ɛmɔ ti nwiaa fu gua ye nwo fusaa, yeɛ nnɛma ɛmɔsunzua ɛmɔ ndaadeɛ nu. Sɛ ɔba ye sɔ a, ɛmɔkowu, na AWURADE ɛyaafɛlɛ piri kɔwa maen ne amukoraa so. Nakoso ɛmɔ aliɛma mɔ, Yisrael awuro ama mukoraa de, bɛkɔhora bekosu bɛ bɔ AWURADE afa see wayera bɛ ne.

Lewitikɔso 24:3

Odi kyɛ Aarɔn fa kanea ne sie ɛtena sua atenaleɛ ne anu wɔ Adanzeɛ mbɛmuɛ tena ne asi, maa ɔta fi nɔsoa kodwu ngyerɛmɔ wɔ AWURADE nyunu daa. Ɔkɔyɛ ahyɛdeɛ afebɔɔ kɔma ɛmɔ wɔ aworɛ ndoatoasoɛ mukoraa nu.

Sakaria 10:3

“M’ahone ahu mmoaenneafoɛ nemɔ so, na ngɔhwe mbɔngye nemɔ so; ofikyɛ Asafo AWURADE kɔɔpasa ye mmoaen kure bɔ ye ole Yuda awuro ama ne anwo, na ɔkɔfa bɛ kɔyɛ kyɛ ye anidie pɔngɔ wɔ koɛ nu.

Numeri 1:50

Na mmom, adanzeɛ ɛtena sua ne, nu nningyein amukoraa, ɔne ye nwo nikyee biala, odi kyɛ ɛye Lewifoɛ maa bɛnea so. Odi kyɛ bɛsoa nyianu sua ne, ɔne nu nningyein amukoraa, ná bɛ́nea so, ná bɛkyekye b’asikyeleɛ bɛ́pɛ ye nwo bɛbra beyia.

Numeri 1:53

nakoso Lewifoɛ mɔ de, odi kyɛ besi b’asikyeleɛ maa ɔbra adanzeɛ ɛtena sua ne anwo yia, amaa ɔnate so AWURADE yaafɛlɛ piri ne wamma Yisraelfoɛ so. Odi kyɛ Lewifoɛ mɔ bɛbɔ adanzeɛ ɛtena sua ne anwo waen.”

Numeri 16:46

Yeɛ Mose sele Aarɔn kyɛ, “Fa wɔ see kulie ne, fa afɔleɛ bokyea ne anu see ne bie gua nu, fa ɛyɛɛ gua nu, ná fa kɔ maen ne berɛ ndɛndɛ kɔpata ma bɛ. Ofikyɛ AWURADE afɛ ɛyaa hahii; amaneɛ piri ne ahyɛ ye bo.”

Numeri 18:4

Odi kyɛ bɛboka wɔ so bɛyɔ ɛtena sua atenaleɛ ne anu adwuma, ná bɛ́yɔ adwuma biala bɔ ɔfa ɛtena sua ne anwo ɔ. Nnɛmaa ebiala bɔ nna Lewiniɛ ahɔ ɔ opingye ɛmɔ.

Numeri 4:18

“Kohatefoɛ mmusua mmusua ne, ɛ́mɔnea yé kyɛ bɛ boso ngonua wɔ Lewifoɛ nu ɔ.

Numeri 8:19

Afei koso, maye Lewifoɛ masie ahameɛ mafi Yisraelfoɛ nu, na mafa bɛ mayɛ akyɛdeɛ mama Aarɔn ne ye mma mmienzua mɔ, kyɛ bɛyɔ ɛsɔnenɛ adwuma bɛma Yisraelfoɛ wɔ ɛtena sua atenaleɛ ne anu, ná bɛpata bɛma Yisraelfoɛ, amaa sɛ Yisraelfoɛ bepingye nekaa krongron ne a, amaneɛ biala ando bɛ.”

Numeri 8:2

“Ka kyire Aarɔn kyɛ, Sɛ ɛ́fa nganea nemɔ siesie kanea bakaa ne aso a, odi kyɛ ɛfa nganea nzoo nemɔ siesie so maa bɛta kanea bakaa ne nyunu berɛ.”

1 Timoteo 1:18

Mma Timoteo, ahyɛdeɛ he yeɛ mefa mewura wɔ sa ɔ, kyɛbɔ ngɔm dwirɛ bɔ mmerɛ bie bɛhã bɛfale wɔ nwo ne ɔte ne, kyɛ ɔ́hyɛ wɔ nguraen, ná fa ko koɛ paa ne,

1 Timoteo 3:15

amaa sɛ ɔba kyɛ mekyɛ ná mmmale a, anwu kyɛbɔ ɔsɛ kyɛ ɛbɔ wɔ bra wɔ Nyameɛ awuro, bɔ ɔte Nyameɛ teasefoɛ n’asɔre, nahorɛ nyinasoɛ ne fapem ne anu.

1 Timoteo 5:21

Ngyi Nyameɛ ne Awurade Kristo Yesu ne abɔfo bɔ baneanea nu baye bɛ ne anyunu mehyɛ wɔ kyɛ, di nhyehyɛleɛ hemɔ so, bɔ ɛnnea sona nyunu anaa ɛnyɛ nyeyemuɛ ɔ.

1 Timoteo 6:20

O Timoteo, nea bɔ bafa bawura wɔ sa ne aso yé. Twe wɔ nwo fi edwudwolɛ fiɛ ne aporowaasulɛ mbaen mbaen bɔ bɛyɛ mvomsoɛ bebu ye kyɛ ɔte nimdeɛ ne nwo.