Numeri 13:28 - AHYERƐLƐ KRONGRON

²⁸ Nakoso mmenia bɔ bɛtete aseɛ ne aso ne, bɛ nwo yɛ se. Bato ɛwaen bafa bɛ nguro nemɔ anwo, na nguro nemɔ te mbiri. Asa koso, yɛnwuni Anake bosofoɛ nemɔ wɔ berɛ.

Numeri 13:28 Iomraidhean Croise

2 Samuel 21:16

Na Filisti kwabranoa nemɔ, bɛ bosoniɛ ko bie bɔ oli Yisibi Benobo ne, ɔbɔle mmɔden kyɛ okohu Dawide. Né ye pealɛɛ ne anu nonɛ te kilo nza ne bue, na né ye akodeɛ nemɔ te monɛ.

Numeri 13:33

Yɛnwuni Nefilifoɛ wɔ berɛ (Anakefoɛ te Nefilifoɛ mɔ bosofoɛ); na yɛnea yɛ nwo a, né yɛte kyɛ torɔka mɔ, na sɔ ala yeɛ bɛ koso benwu yɛ ɔ.”

Deuteronomi 1:28

Nisua paa yeɛ yɛkɔ ye? Y’eliɛma mɔ amaneɛ bɔ bɛɛbɔle ne ama y’ahone atu. Bɛnwa: ‘Mmenia nemɔ mbiri ne bɛ ndendenn tra yɛ; nguro nemɔ te mbiri, na bale bɛ nwo waen bahɔ anwuro anwuro paa. Yɛnwuni Anake ye bosofoɛ po wɔ berɛ!’ ”

Deuteronomi 2:21

Ɔte maen pirikua, bɛsone, na bɛwoware kyɛ Anakefoɛ ne ala. Nakoso AWURADE huhuni bɛ fili Amonfoɛ nyunu. Amonfoɛ tuli bɛ fili berɛ, na bɛtenane b’aseɛ ne aso.

Deuteronomi 3:5

Né bato fasue tendetende bafa sɔ nguro nemɔ amukoraa nwo bayia, na né bafa mmuralɛ babeabea bɛ pambim nyɔ nemɔ asi. Né namue pee koso bɔ fasue nne bɛ nwo ɔ wɔ berɛ.

Yosua 11:22

Banyakyi Anakeniɛ ko po wɔ Yisraelfoɛ aseɛ so; sana Gasa ne Gate ne Asedɔde ngome yeɛ ebiemɔ hale ɔ.

Yosua 14:12

Yiti, mmokaa aseɛ he bɔ AWURADE hane ye nwo dwirɛ sɔ kyẽa nen, fa ma me. Sɔ kyẽa ne, ɛtele kyɛ né Anakefoɛ ne nguro mbiri bɔ bato bɛ nwo fasue mɔ wɔ berɛ. Nakoso ebiaa AWURADE kogyina me si maa ngɔfoa bɛ ngofi berɛ, kyɛbɔ AWURADE hane ne.”

Yosua 15:14

Kalebo foane Anake bosofoɛ nza nemɔ fili berɛ. Bɛ ole Sesayi, Ahiman ne Talmae.

Maenbulɛfoɛ 1:20

Yisraelfoɛ fale Hebron bɛmane Kalebo, kyɛbɔ Mose hyɛle ne; na Kalebo tuli Anake mma mmienzua nza nemɔ fili berɛ.