Numeri 11:17 - AHYERƐLƐ KRONGRON

¹⁷ Ngodwu ngɔwa me ne wɔ yɛkoodwudwo wɔ berɛ, na ngɔfa sunzum bɔ ɔwɔ wɔ nu ne bie ngowura bɛ nu. Ɛne bɛ ɛmɔkɔfa mmenia ne anwo fɛɛ bɛkɔto ɛmɔ nwo so, amaa wanna wɔ ngome wɔ so.

Numeri 11:17 Iomraidhean Croise

Gyenesise 11:5

AWURADE dwu wale ase ɔɔneane kuro ne abandenden bɔ né mmenia mmaa bési ne.

Gyenesise 17:22

Na Nyameɛ ne Abraham dwudwole yiele nen, Nyameɛ yakyili ye berɛ hɔle anwuro.

Gyenesise 17:3

Afei Abram fale ye nyunu butuli berɛ, na Nyameɛ sele ye kyɛ,

Gyenesise 18:33

Na AWURADE ne Abraham bedwudwole beyiele nen, ofili berɛ hɔle; na Abraham koso osa hɔle ye awuro.

2 Ahemvo 2:15

Ngɔmhyɛlɛfoɛ fekue bɔ né bɛwɔ Yeriko ne, benwuni Elisa wɔ dedeede ne, bɛteane nu kyɛ, “Elia sunzum ate ape Elisa so.” Beeyiale Elisa, na bɛbɔle bɛ nu ase wɔ ye nyunu.

2 Ahemvo 2:9

Bɛpɛle asue ne beyiele ne, Elia bisale Elisa kyɛ, “Nzikyɛ yeɛ nyɔ mma wɔ koraka né AWURADE afa me wafi wɔ nwo wahɔ ɔ?” Elisa buale kyɛ, “Mesrɛ wɔ, wɔ sunzum ne, maa ye mmɔhoɛ nyɔ ɔ́bra me so.”

Nehemia 9:20

Ɛfale wɔ Sunzum paa ne mane bɛ kyɛ ohyirehyire bɛ mmeraa ne. Na mana bɔ ɛfa maa belili ne, anyakyi bɛ ye manɛ, yeɛ nzuhɔen ku bɛ ne, ɛmane bɛ nzue maa bɛnone.

Ɛksadɔso 18:18

Ɛfɛɛ paa yeɛ ɛne mmenia bɔ bɛboka wɔ so ne bɛkɔfɛ ɔ; ofikyɛ adwuma ne ɔbo wɔ so, na wɔ ngome twe ɛngɔhora ye yɔ.

Ɛksadɔso 18:22

Maa besiesie mmenia nemɔ afia mmerɛ biala. Edwirɛ biala bɔ ɔbo bɛ so ne, maa bɛfa bɛbra wɔ gya so. Nakoso edwirɛ mmaa mmaa mɔ de, maa bɛ bɔbɔ beli. Ɛhe kɔte wɔ fɛɛ ne aso, ná bɛ wora baboka wɔ maa ayɔ sɔ adwuma ne.

Ɛksadɔso 19:11

ná bɛboaboa bɛ nwo besie ɛhema si, ofikyɛ AWURADE kodwu kɔwa Sinai bokaa ne aso ɛhema si, bɔ mmenia ne amukoraa bɛ nye tua ɔ.

Ɛksadɔso 19:20

Na AWURADE dwu wale Sinai bokaa ne aso, wɔ bokaa ne ti afia. AWURADE frɛle Mose kyɛ ɔbra bokaa ne ti afia, na Mose fo hɔle.

Ɛksadɔso 34:5

Na AWURADE dwu wale ase wɔ munungum nu oogyinane ye nwo berɛ, na ɔbɔle ye bɔbɔ ye dumaa YAHWE (AWURADE) ne.

Yesaya 44:3

Ofikyɛ ngohwie nzue ngogua aseɛ bɔ nzuhɔen ku ye ne aso, yeɛ ngɔma asue mmaa mmaa kɔwa aseɛ wosee ne aso; ngohwie me Sunzum ngogua wɔ boso ama so, ná mahwie me saleɛ magua wɔ mma so.

Yesaya 63:11

Na afei ɔkayele daa tete mmerɛ ne, Mose ne ye maen, na obisale kyɛ, Ye bɔ ɔyele bɛ fili ɛpo nu, bɔ ɔte ye mmoaen so neafoɛ ne, ɔwɔ nisua? Ye bɔ ɔfale ye Sunzum krongron ne ɔɔtenane bɛ nu ne, ɔwɔ nisua?

Yoel 2:28

Na ɛhe asi ne, ngohwie me Sunzum ngogua anwoɔnaen amukoraa so, na ɛmɔ mma mmienzua ne ɛmɔ mma mmrasua kɔhyehyɛ ngɔm; ɛmɔ mbanyi mɔ kɔhyehye laleɛ, na ɛmɔ mmerandeɛ konwu nyekyire;

Numeri 11:25

Yeɛ AWURADE nate munungum nu dwu wale ase, na ɔne Mose beedwudwole. AWURADE fale sunzum bɔ ɔwɔ Mose nu ne bie wurale mbanyi aburasoo nemɔ anu. Sunzum ne wale bɛ so ne, bɛhyɛle ngɔm. Nakoso ye si ye, banhyɛ ngɔm ko.

Numeri 12:5

AWURADE nate munungum ningɔnn nu dwu wale ase, na oogyinane ɛtena sua ne anoa nu berɛ. Ɔfrɛle Aarɔn ne Miriam, na bɛ munyɔ bɛwale anyunu.

Numeri 12:8

Ye de megyina ye nyunu me ne ye yɛdwudwo pefee; mendwudwo mengyire ye anyandera nu; na onwu kyɛbɔ AWURADE ye sue te ɔ. Nzu ati yeɛ ɛmɔanzuro kyɛ ɛmɔkodwudwo bekotia me somvoɛ Mose ɔ?”

Numeri 27:18

Na AWURADE buale Mose kyɛ, “Ye Nun awa Yosua, bɔ sunzum ne akanyane ye ne, ná fa wɔ sa gua ye so.

Numeri 7:89

Sɛ né Mose kɔ ɛtena sua ne anu kyɛ ɔne AWURADE bɛkwaadwudwo a, né ɔte komviɛ ne kyɛ odwudwo kyire ye fi Adanzeɛ alaka ne aso mbata bia bɔ ɔwɔ kɛrubim nyɔ ne b’afia ne, ye anwuro ɔ; né komviɛ ne ɔne Mose bedwudwo.

Yohane 3:13

Ebiala nne berɛ bɔ wafo wahɔ nyameɛso ɔ, sana bɔ ofi nyameɛso odwu wale ne, Sona Awa ne [bɔ ɔwɔ nyameɛso ne.]

Yohane 7:39

Na ɛhe de, ɔhã fale Sunzum ne nwo, bɔ mmenia bɔ bede ye bedi ne bɛbaanya ye ɔ; né Sunzum ne onnya ɔwwale, ofikyɛ né bennya bɛhhyɛle Yesu animnyam.

Romanfoɛ 8:9

Ɛmɔ de, ɛmɔnni anwoɔnaen nhyehyɛleɛ so, na mmom Sunzum nhyehyɛleɛ so, ofikyɛ Nyameɛ Sunzum te ɛmɔ nu. Na ebiala bɔ olle Kristo Sunzum ne, ɔtte Kristo deɛ.

1 Korintofoɛ 2:12

Nna ewiase wa sunzum yeɛ yanya ye ɔ, na mmom Sunzum bɔ ofi Nyameɛ berɛ yeɛ yanya ye ɔ; na ɛhe maa yɛte akyɛdeɛ bɔ Nyameɛ afa ama yɛ ne bo.

1 Tɛsalonikafoɛ 4:8

Yiti ebiala bɔ ɔpo ngyerɛkyerɛ he nen, nna kuro sona yeɛ ɔpo ye ɔ, na mmom Nyameɛ bɔ wafa ye Sunzum Krongron ne wama yɛ ne.

1 Petro 1:22

Asoɛmmerɛlɛ bɔ ɛmɔayɛ bama nahorɛ ne ne ati, wamaa ɛmɔate ɛmɔ kra nwo, na ɛhe amaa ɛmɔahurohuro ɛmɔ nwo dwirɛ wɔ nahorɛ nu, yiti ɔsɛ kyɛ ɛmɔfi ɛmɔ ahone nu bekurokuro ɛmɔ nwo dwirɛ.

Yuda 1:19

Bɛ yeɛ bɛfa mbakyembakyemuɛ bɛba ɔ, Sunzum ne ɔnne bɛ nu, na bɛte mmenia bɔ bedi anwoɔnaen si ɔ.

1 Samuel 10:6

Afei AWURADE Sunzum kɔte kɔpe wɔ so, ɛne bɛ kɔbɔ nu kɔhyɛ ngɔm, na ɔkɔmaa ɛkɔsesã kɔyɛ sona foforɛ.