Numeri 1:3 - AHYERƐLƐ KRONGRON

³ ebiala bɔ ɔwɔ Yisrael, bɔ wali ofi afoɛ aburanyɔ bɔ ɔkɔ ɔ, bɔ ɔkora kɔ koɛ ne. Odi kyɛ ɛne Aarɔn yeɛ ɛmɔka bɛ koɛhonɛfoɛ kure kure ɔ.

Numeri 1:3 Iomraidhean Croise

2 Samuel 24:9

Mmenia bɔ bɛhale bɛ ne, Yoabo fale bɛ somaa nwo amaneɛ bɔle Nana Dawide: Yisrael ɛlɔen bɔ bɛkɔhora bɛkɔhɔ koɛ ne, bɛte apee sɔ alaa ɛyaa mmɔtwɛ, yeɛ Yuda deɛ wora bɛte apee sɔ alaa ɛyaa nnu.

1 Aberɛso Dwirɛ 5:18

Rubenfoɛ, Gadefoɛ, yeɛ Manase abusua kure ne bue, né bele koɛhonɛfoɛ ahoneserɛfoɛ apee aburanna ne nna, ɛyaa nzoo ne aburasia bɔ bele buralɛ ataadeɛ ne ngrandɛ, betira agyaen, bɛse ko, bɔ basiesie bɛ nwo kyɛ koɛ ba a, bɛkɔhɔ ɔ.

2 Aberɛso Dwirɛ 25:5

Amasia mane Yudafoɛ bɛbɔle dwaa, na ɔboaboale bɛ noa kure kure kyɛbɔ bɛ nana mɔ sasofoɛ te ɔ. Ɔfale safohene mɔ tuatuale Yudafoɛ ne Benyaminfoɛ amukoraa bɛ noa maa bɛlale mmenia apee apee ne ɛyaa ɛyaa bɛ noa. Bɛ bɔ bali ofi afoɛ aburanyɔ bɔ ɔkɔ ne, ɔhale bɛ, na onwuni kyɛ bɛ somaa te koɛhonɛfoɛ apee ɛyaa nza, bɔ baneanea nu baye bɛ bɔ bɛkora bɛkɔ koɛ ɔ, bɔ bɛse pealɛɛ ne akokyɛm nu sɔ ɔ.

Ɛksadɔso 12:17

Ɔsɛ kyɛ ɛmɔdi Paanoo Kabrɛdi aluolue ne, ofikyɛ sɔ kyẽa ne yeɛ nyele ɛmɔ amukoraati mvili Misraim aseɛ so ɔ. Yiti ɛ́mɔtu sɔ kyẽa ne besie berɛ beli sɔ aluolue ne afebɔɔ wɔ ɛmɔ aworɛ ndoatoasoɛ mukoraa nu.

Ɛksadɔso 30:14

Ebiala bɔ wali afoɛ aburanyɔ bɔ ɔkɔ ne, bɔ bɛkɔha ye wɔ mmeniahalɛ ne anu ne, ɔkɔfa ye afɔleɛbɔlɛ nikyee kɔbrɛ AWURADE.

Ɛksadɔso 38:26

Sona horɛ biala tuale bika ko (bika ko te kilo ko nu ngyɛmuɛ ɛyaa nyɔ, kyɛbɔ nekaa krongron berɛ kilo nonɛ te ɔ). Bɛhale mmienzua mukoraa bɔ bali afoɛ aburanyɔ bɔ ɔkɔ ne, na né bɛte apee ɛyaa nzia ne nza ɔne ɛyaa nnu ne aburannu.

Numeri 14:29

Ɛserɛ ye aso yeɛ ɛmɔkowu bekogua ɔ, na ɛmɔ amukoraa bɔ bɛhale ɛmɔ ne, ebiala bɔ wali ofi afoɛ aburanyɔ bɔ ɔkɔ, bɔ wapenepene ye komvi wagua me so ne,

Numeri 26:2

“Ɛ́mɔha Yisraelfoɛ amukoraa: Yisraelniɛ biala bɔ wali ofi afoɛ aburanyɔ bɔ ɔkɔ ɔ, bɔ ɔkora kɔ koɛ ɔ, kyɛbɔ bɛ nana mɔ sasofoɛ te ɔ.”

Numeri 3:15

“Ka Lewifoɛ mɔ. Nea bɛ nana mɔ saso ɔne mmusua mmusua ná fa ka bɛ. Bienzua biala bɔ wali ofi bosome ko bɔ ɔkɔ ne, ka ye bie.”

Numeri 32:11

‘Nahorɛ nu, bɛ bɔ befili Misraim bɛwale ne, bɛ nu biala bɔ wali ofi afoɛ aburanyɔ bɔ ɔkɔ ne, ongonwu aseɛ bɔ ndale ndaen kyɛ ngɔfa ngɔma Abraham, Yisake ɔne Yakob ne, ofikyɛ banni nahorɛ bamma me.

Numeri 33:1

Yisraelfoɛ tuli bɛ bo koɛhonɛfoɛ kure kure fili Misraim aseɛ so, bɔ né Mose ne Aarɔn la bɛ noa ne, nekaa ahoroɔ bɔ bɛkyekyele asikyeleɛ mɔ ɛhe.

Numeri 4:3

Ɛ́mɔha ebiala bɔ wali ofi afoɛ aburasa bɔ ɔkwaadwu aburannu, bɔ waso kyɛ ɔyɔ ɛtena sua atenaleɛ ne anu adwuma ɔ.

Deuteronomi 24:5

“Sɛ bienzua gya braa, ná ɔhhyɛle a, ɔnzɛ kyɛ ɔkɔ koɛ, yeɛ ɔnzɛ kyɛ bɛfa maen adwuma biala begua ye so. Ole atee kyɛ ɔtena awuro afoɛ ko, ná ɔne ɔye bɔ wagya ye ne bɛgye bɛ nye.

Deuteronomi 3:18

“Sɔ mmerɛ ne, nhyɛle ɛmɔ kyɛ, ‘Ɔwɔ nu kyɛ AWURADE ɛmɔ Nyameɛ afa aseɛ he wama ɛmɔ kyɛ ɛmɔfa bɛtena so de, nakoso ɔsɛ kyɛ ɛmɔ koɛhonɛfoɛ ne amukoraa bɛfa akodeɛ bɛse bedi ɛmɔ aliɛma mɔ Yisraelfoɛ nyunu.