Nehemia 9:29 - AHYERƐLƐ KRONGRON

²⁹ Na ɛbɔle bɛ kɔkɔ bɔ ɔnate so bekosa bekooli wɔ mmeraa ne aso ɔ. Nakoso bɛyɛle anwomasoɛ, yeɛ banni wɔ mmeraa dwirɛ so, na mmom wɔ nhyehyɛleɛ bɔ sona di so a onya ngoa ne, bɛyɔle bɔne bebuli so. Bɛpemone b’awaen beguale wɔ so, bɛsoale bɛ kɔm so kyeinn, na bandie wɔ dwirɛ.

Nehemia 9:29 Iomraidhean Croise

2 Ahemvo 17:13

Né AWURADE nate ngɔmhyɛlɛfoɛ amukoraa ne ye mmenia bɔ bɛse ase amukoraa so wabɔ Yisrael ne Yuda kɔkɔ kyɛ, “Ɛmɔhwe ɛmɔ nwo béfi ɛmɔ bɔne nwo, ná ɛmɔli me mmeraa dwirɛ ne m’ahyɛdeɛ so, kyɛbɔ mmeraa bɔ nhyehyɛle mane ɛmɔ nana mɔ, bɔ nnate me somvoɛ ngɔmhyɛlɛfoɛ so mva mmrɛle ɛmɔ ne, ɔte ne ala.”

2 Ahemvo 17:14

Nakoso bandie, na mmom bɛyɛle asoserɛ kyɛbɔ bɛ nana mɔ bɔ banne AWURADE bɛ Nyameɛ banni ne, bɛyɛle ne ala.

2 Aberɛso Dwirɛ 24:19

Nakoso AWURADE somane ngɔmhyɛlɛfoɛ maa besele bɛ kyɛ besa bɛbra ye berɛ. Bɛbɔle Yudafoɛ kɔkɔ, nakoso bandɛ so.

2 Aberɛso Dwirɛ 33:10

AWURADE bɔle Manase ne ye maen kɔkɔ, nakoso bandie ye dwirɛ.

2 Aberɛso Dwirɛ 36:15

AWURADE bɛ nana mɔ Nyameɛ ne, ɔsomane ye ɛbɔfoɛ mɔ mmerɛ pee maa bɛɛbɔle bɛ kɔkɔ, ofikyɛ né ye ahone la ye maen ne ye atenaleɛ ne anwo.

Nehemia 13:15

Sɔ mmerɛ ne, nwuni ye wɔ Yuda kyɛ mmenia betwi nzaa, yeɛ afei bɛsoa aburoo bɛteta afunum mɔ si afofikyẽa. Sɔ ala yeɛ né bɛfa nzaa, bobe, borɔdoma ne nningyein ahoroɔ bɛsoa ngaka nemɔ bɛba Yerusalem afofikyẽa ɔ, na mmɔle bɛ kɔkɔ kyɛ nnɛmaa bɛtɔne nningyein afofikyẽa.

Nehemia 9:10

Ɛyɔle nzɛngyerɛnneɛ ne anwanwadeɛ tiale Faro ne ye mbanyi amukoraa ne ye aseɛ ne aso ama mukoraa, ofikyɛ enwuni kyɛ bɛyɔle aniammɔwoho betiale yɛ nana mɔ. Elele dumaa, na sɔ dumaa ne watena berɛ maa waadwu ɛnɛ ye.

Nehemia 9:16

“Nakoso bɛ ne yɛ nana mɔ bɛyɛle anwomasoɛ ne asoserɛ, na banni wɔ mmeraa dwirɛ ne aso.

Nehemia 9:26

“Nakoso bɛyɛle asoserɛ, na bɛyɛle wɔ nwo lɔen, bɛfale wɔ mmeraa ne bɛtole ahameɛ, na wɔ ngɔmhyɛlɛfoɛ bɔ bɛbɔle bɛ kɔkɔ kyɛ besa beeli wɔ si ne, behuhuni bɛ maa ɔnate so bɛbɔle musue mbiri mbiri paa.

Nehemia 9:30

Afoɛ pee yeɛ enyane bɛ nwo aboterɛ ɔ, na ɛnate wɔ Sunzum so fale wɔ ngɔmhyɛlɛfoɛ so bɔle bɛ kɔkɔ; nakoso bandie. Yiti ɛfale bɛ wurale aseɛ nemɔ aso ama bɛ sa.

Ɛksadɔso 10:3

Yiti Mose ne Aarɔn bɛhɔle Faro berɛ beesele ye kyɛ, “AWURADE, Hebrifoɛ Nyameɛ ne nwa nyoo, ‘Ɛkɔpo kyɛ ɛkɔbrɛ wɔ nwo ase wɔ me nyunu maa okoodwu kyinzu? Ma me mmenia nemɔ ate ma bɛhɔ, ná bɛɛsɔne me.

Yeremia 17:23

Nakoso bandie, yeɛ banyɛ asoɛ bamma me; bɛsoale bɛ kɔme so, kyɛbɔ ɔkɔyɛ bɔ bengotie anaa bengole foɛtulɛ bɛngɔto nu ɔ.

Yeremia 19:15

“Bɔ Asafo AWURADE Yisrael Nyameɛ kã ɛhe: Tie, musue bɔ ngane kyɛ ngɔprapra ngogua kuro ye ne ye nwo nguro amukoraa so ne, ngɔmaa ɔkɔwa bɛ so, ɔnate kyɛ basoa bɛ kɔme so kyeinn bɔ bandie me dwirɛ ɔ.”

Yeremia 42:19

Ɛmɔ, Yudafoɛ bɔ ɛmɔaha ɔ, AWURADE ahã ahyire ɛmɔ kyɛ, ‘Nnɛma ɛmɔkɔ Misraim!’ Ɛ́mɔkaye kyɛ ɛnɛ kyẽa ye, mabɔ ɛmɔ kɔkɔ.

Yeremia 43:2

Hosaya awa Asaria ne Karea awa Yohanan ne mmienzua anwomasoɛfoɛ nemɔ amukoraa besele Yeremia kyɛ, “Ɛlaka, AWURADE yɛ Nyameɛ wanzoma wɔ kyɛ ɛɛhã kyɛ, ‘Nnɛma ɛmɔkɔ Misraim bɛkɔtena dɔ.’

Yeremia 44:10

Bammrɛ bɛ nwo ase maa waadwu ɛnɛ ye, banzuro me, yeɛ banni me mmeraa ne m’ahyɛdeɛ bɔ mva mane ɛmɔ ne ɛmɔ nana mɔ ne aso.

Yeremia 7:26

nakoso bandie me dwirɛ, yeɛ bandɛ me so, na mmom bɛsoale bɛ kɔme so kyeinn. Bɛyɔle bɔ ɔtte mayee bɛtrale bɛ nana mɔ.

Hesekiel 20:11

Yeɛ mvale m’ahyɛdeɛ mane bɛ, na ngyirele bɛ me mmeraa bɔ sɛ sona di so a onya ngoa ne.

Daniel 5:20

Nakoso mmerɛ bɔ ahandaen wurale ye nu, ná anwomasoɛ maa ɔyɛle dwɛɛ nen, betuli ye befili ye bia so, na belele ye animnyam ne befili ye sa nu.

Hosea 6:5

Yiti nnate me ngɔmhyɛlɛfoɛ so mapɛ bɛ magua, mafa me noa nu dwirɛ mahũhũ bɛ, na me ndɛenbualɛ te kyɛ kanea bɔ ɔ́ta ɔ.

Lewitikɔso 18:5

Yiti ɛ́mɔli m’ahyɛdeɛ ne me nhyehyɛleɛ so, na sona bɔ okoli so ne, okonya ngoa: Me ole AWURADE.

Mateo 19:17

Na Yesu buale ye kyɛ, “Nzu ati yeɛ ebisa me paa nwo dwirɛ ɔ? Nyameɛ ngome twe yeɛ ɔte paa ɔ. Sɛ ɛpena kyɛ ɛkɔ daa ngoa nu a, di mmeraa dwirɛ ne aso.”

Luka 10:28

Na Yesu sele ye kyɛ, “Ama mmuayɛɛ yé; yɔ sɔ, na ekonya ngoa.”

Romanfoɛ 10:5

Mose hyerɛle fale tenenee bɔ ebie di mmeraa ne aso a ɔyɛ ne nwo kyɛ, “Sona bɔ odi mmeraa n’ahyɛdeɛ so ne, ɔkɔfa so konya nu ngoa.”

Galatiafoɛ 3:12

Na mmeraa ne de, oggyi gyidie so; nakoso ebiala bɔ odi so ne okonya nu ngoa.”

Deuteronomi 31:21

Na sɛ musue ne amaneɛ pee toto bɛ a, sɔ dwein he koli adanzeɛ kotia bɛ, ofikyɛ ongofi bɛ bosofoɛ ti anu. Na aseɛ bɔ ndale ndaen kyɛ ngɔfa ngɔma bɛ ne, anzana ngɔfa bɛ ngoodwu so ne po, mese porɛ horɛ bɔ kekesaala ye babɔ ye bɛ ti anu ɔ.”

Deuteronomi 31:27

Ofikyɛ mese wɔ nye bɔ ɔnzɔ nikye ɔne w’asoserɛ. Me ne ɛmɔ yɛte ase ye po yeɛ ɛmɔahwi bafa AWURADE dwirɛ so sɔa ye, na me wue asi koso ɛ!

Deuteronomi 4:26

ye de méfrɛ anwuro ne aseɛ maa bedi adanzeɛ betia ɛmɔ ɛnɛ kyẽa ye, kyɛ ɔngɔhyɛ biala ɛmɔ boso konua bɔkɔɔ wɔ aseɛ bɔ ɛmɔkwaapɛ asue Yɔɔdan bɛkɔfa ne aso. Ɛmɔngɔtena so bɛngɔhyɛ, na ɛmɔ boso konua bɔkɔɔ.

Maenbulɛfoɛ 6:10

Na nga ngyirele ɛmɔ kyɛ, ‘Me ole AWURADE ɛmɔ Nyameɛ; Amorifoɛ bɔ ɛmɔte b’aseɛ so ne, nnɛma ɛmɔsɔne bɛ nyameɛ mɔ.’ Nakoso ɛmɔandie me dwirɛ.”