Nehemia 9:10 - AHYERƐLƐ KRONGRON

¹⁰ Ɛyɔle nzɛngyerɛnneɛ ne anwanwadeɛ tiale Faro ne ye mbanyi amukoraa ne ye aseɛ ne aso ama mukoraa, ofikyɛ enwuni kyɛ bɛyɔle aniammɔwoho betiale yɛ nana mɔ. Elele dumaa, na sɔ dumaa ne watena berɛ maa waadwu ɛnɛ ye.

Nehemia 9:10 Iomraidhean Croise

Nehemia 9:16

“Nakoso bɛ ne yɛ nana mɔ bɛyɛle anwomasoɛ ne asoserɛ, na banni wɔ mmeraa dwirɛ ne aso.

Nehemia 9:29

Na ɛbɔle bɛ kɔkɔ bɔ ɔnate so bekosa bekooli wɔ mmeraa ne aso ɔ. Nakoso bɛyɛle anwomasoɛ, yeɛ banni wɔ mmeraa dwirɛ so, na mmom wɔ nhyehyɛleɛ bɔ sona di so a onya ngoa ne, bɛyɔle bɔne bebuli so. Bɛpemone b’awaen beguale wɔ so, bɛsoale bɛ kɔm so kyeinn, na bandie wɔ dwirɛ.

Edwein 83:18

Maa benwu kyɛ wɔ bɔ wɔ ngome yeɛ wɔ dumaa ole AWURADE ne, wɔ yeɛ ɛte Anwuro Anwuro hene bɔ edi aseɛ amukoraa so ɔ.

Ɛksadɔso 18:11

Na afei de, manwu ye kyɛ AWURADE te piri tra bosoen biala, ofikyɛ olele mmenia ne fili Misraimfoɛ sa nu, mmerɛ bɔ né bɛ́hyɛ bɛ anyeborolɛ ne.”

Ɛksadɔso 3:20

Yiti ngɔtengyɛ me sa ngɔfa anwanwadeɛ mukoraati bɔ ngɔyɔ ye Misraim ne ngotia Misraim, na ɛhe asi ne, ɔkɔma ɛmɔ kɔhɔ.

Ɛksadɔso 5:2

Nakoso Faro buale kyɛ, “AWURADE ne ole nwa bɔ ɔsɛ kyɛ metie ye ná mema Yisraelfoɛ bɛkɔ ɔ? Menze sɔ AWURADE ne, yeɛ Yisraelfoɛ koso mengɔma bɛngɔhɔ!”

Ɛksadɔso 7:1

Na AWURADE sele Mose kyɛ, “Tie, mayɛ wɔ kyɛ Nyameɛ wɔ Faro nye so, na eliɛma Aarɔn kɔyɛ wɔ ngɔmhyɛlɛniɛ.

Ɛksadɔso 9:16

Nakoso mamaa anya wɔ ti adidi nu, kyɛ ngɔye me tumi ali ngohyire wɔ ɔ, amaa ɔnate so me dumaa atrɛ ahɔ aseɛ ye aso amukoraa.

Yesaya 42:20

Anwu nningyein pee, nakoso ɛmvete wɔ nye nnea, wɔ so tokuro ne, nu la berɛ, nakoso ɛnde dwirɛ.

Yesaya 63:12

Ye bɔ ɔmane ye animnyam asaa ne oolili Mose famaa so, ná ɔne ye bɛnatele ne, ye bɔ ɔpakyele nzue ne anu wɔ bɛ nyunu ɔfa nyane dumaa afebɔɔ mane ye nwo ne;

Yesaya 63:14

Na AWURADE Sunzum ne maa belele bɛ nwome kyɛ nandwie mɔ bɔ bɛtorotoro bɛkɔ bɔnza nu ɔ. Sɔ yeɛ ehyirele wɔ maen atee ɛfa nyane animnyam dumaa mane wɔ nwo ɔ.

Yeremia 32:20

wɔ bɔ ɛyɔle nzɛngyerɛnneɛ ne anwanwadeɛ wɔ Misraim aseɛ so, ná ɛkɔso yɔ ye wɔ Yisrael ne adasa amukoraa nu maa waadwu ɛnɛ ɔ, ná afa ale dumaa maa waadwu ɛnɛ ɔ.

Hesekiel 20:9

Nakoso ɔnate me dumaa ti, ndwe nzale, amaa ɔnate so me dumaa nwo angua fiɛ wɔ maen maen bɔ bɛte so nemɔ anyunu; maen maen bɔ so ama bɛ nye tua kyɛbɔ nyele me nwo ali ngyirele bɛ, ná nyele bɛ mvili Misraim aseɛ so ne.

Daniel 4:37

Na afei de, me Nebukadenesa, mefa ayɛyelɛ, ɛkamvolɛ ne anidie mema nyameɛso Hene ne, ofikyɛ bɔ ɔyɔ amukoraa te turoloo, na ye atee tengyɛ, na bɛ bɔ bɛbɔ anwomasoɛ bra ne, ɔkora brɛ bɛ ase.

Daniel 5:23

na mmom adwɔso nyameɛso Mene ne so konguronn, baasesa ye awuro kulie nemɔ babrɛ wɔ, na wɔ, ɛne wɔ mbanyi mɔ, ɛye mɔ ne wɔ sómaa mɔ bano nu nzaa, na aye ɛdwetɛ, sikaa kɔkorɛ, kɔɔbere, buralɛ, bakaa ne nyɔboɛ nyameɛ mɔ bɔ bennwu nikye, bɛnde dwirɛ, anaa bɛnze huu ɔ ayɛ. Nakoso Nyameɛ bɔ otira wɔ ngoa nyamaa nu, bɔ w’atee amukoraa wɔ ye sa nu ne de, amva anidie amma ye.

Daniel 9:15

Na afei, AWURADE yɛ Nyameɛ bɔ ɛnate wɔ tumi piri so ɛyele wɔ maen fili Misraim aseɛ so wale, bɔ ale dumaa maa waadwu ɛnɛ ɔ, yayɔ bɔne, yayɔ bɔ bɛnyɔ ɔ.

Asomafoɛ 7:36

Mose yeɛ ɔyele Yisraelfoɛ fili Misraim ɔ, na ɔyɔle nzɛngyerɛnneɛ ne anwanwadeɛ wɔ Misraim aseɛ so, Ɛpo Kɔkorɛ ne aso ne ɛserɛ so afoɛ aburanna.

Romanfoɛ 9:17

Na ɛhe ati yeɛ Ahyerɛlɛ ne sele Faro kyɛ, “Mapagya wɔ, kyɛbɔ ngɔfa wɔ so ngɔma me tumi kɔla ali wɔ wɔ nu, ná babɔ me dumaa wɔ aseɛ so amukoraa ɔ.”

Deuteronomi 4:34

Anaakyɛ nyameɛ bie wɔ berɛ bɔ wasi ye ahone le kyɛ ɔkwaaye maen bie fi maen foforɛ so ɔfa yɛ ye deɛ, bɔ nzɔhwɛ, nzɛngyerɛnneɛ ne anwanwadeɛ, koɛ, tumi nnwumaa, ɔne tumi asaa, yeɛ ɔfa yɔle sɔ ɔ, kyɛbɔ AWURADE ɛmɔ Nyameɛ yɔ mane ɛmɔ wɔ Misraim maa enwuni ye ne?

Deuteronomi 7:19

nzɔhwɛ mbiri mbiri bɔ ɛfale wɔ nye nwuni ye, nzɛngyerɛnneɛ, anwanwadeɛ, tumi piri ne tumi asaa bɔ AWURADE wɔ Nyameɛ fa yele wɔ fili berɛ ɔ. Na sɔ yeɛ AWURADE wɔ Nyameɛ kɔfa kɔyɔ mmenia bɔ esuro bɛ ne amukoraa ɔ.

1 Petro 5:5

Sɔ ala yeɛ ɛmɔ bɔ ɛmɔte mmabunu ne koso, ɔsɛ kyɛ ɛmɔbrɛ ɛmɔ nwo ase bewura mbanyi mɔ bo ɔ. Ɛmɔ amukoraa, ɛ́mɔfa anwobrɛaseɛ bɛ́hera, ná ɛ́mɔfa bɛ́so ɛmɔ nwo ngoko ngoko, ofikyɛ Nyameɛ nye sa anwomasoɛfoɛ, na ɔdo anwobrɛaseɛfoɛ.