Nehemia 8:10 - AHYERƐLƐ KRONGRON

¹⁰ Yeɛ osele bɛ kyɛ, “Ɛmɔhɔ beeli naen bɔ walɔ ɔ, ná ɛmɔno nzaa bɔ ɔyɛ fɛɛ ɔ. Bɛ bɔ belle bie ne, ɛmɔɔma bɛ bie, ofikyɛ ɛnɛ kyẽa ye, ɔte krongron ma y’AWURADE. Nnɛmɔma ɛmɔ wora bɔ, ofikyɛ AWURADE nu anigye yeɛ ɔte ɛmɔ anwoserɛ ɔ.”

Nehemia 8:10 Iomraidhean Croise

1 Ahemvo 8:66

Ye ɛlɛbɔtwɛ ne aso, Solomon tuli mmenia ne apo maa ebiala hɔle. Bɛlale Solomon ase, na ebiala hɔle ye awuro. Bele anigye ne aworakyekyerɛ yeɛ bɛhɔle ɔ, ɔnate paa bɔ AWURADE ayɔ ama ye akoaa Dawide ɔne ye maen Yisrael ne ati.

1 Aberɛso Dwirɛ 16:27

Anidie ne animnyam apɛ ye nwo ayia, tumi ne anigye wɔ ye asɔneyɛɛ sua nu.

Nehemia 8:11

Yiti Lewifoɛ nemɔ hane sɔ dwirɛ he mane mmenia ne b’ahone tɔle bɛ kunu, “Ɛ́mɔyɛ konn, ofikyɛ ɛnɛ kyẽa ye te krongron: nnɛmɔma ɛmɔ wora bɔ.”

Nehemia 8:12

Yeɛ mmenia ne amukoraa bɛhɔle beedidili bɛnone, na bɛfale bie bɛhyehyɛle. Bɛgyele bɛ nye paa, ofikyɛ edwirɛ bɔ bɛkengale behyirele bɛ ne, bɛtele ye bo.

Ɛseta 9:19

Ye sɔ ne ati, Yudafoɛ bɔ bɛwɔ namue nemɔ anu, bɔ fasue nne bɛ nguro nemɔ anwo ne, batu bosome Ada, ye kyẽa bɔ ɔtɔ so buru ne nna ne basie berɛ kyɛ ɔte anigye ne ɛpoentolɛ kyẽa, na ɔte nwomelelɛ kyẽa bɔ bɛkyekyɛ bɛ nwo bɛ nwo aleɛ ɔ.

Ɛseta 9:22

kyɛ bɛte ngyẽa bɔ Yudafoɛ bɛperele benyane asomdwee befili bɛ pɔfoɛ mɔ sa nu ɔ, kyɛ ɔte bosome bɔ b’aworabɔlɛ kakyili anigye, bɔ b’esuɛ kakyili nwomelelɛ ɔ. Ɔnwa, odi kyɛ betu besie berɛ bɛfa bɛyɛ ɛpoentolɛ ne anigye ngyẽa, ngyẽa bɔ bɛkɔhyehyɛ bɛ nwo bɛ nwo aleɛ, ná bahyɛ ehiafoɛ mɔ koso nningyein ɔ.

Edwein 149:2

Odi kyɛ Yisrael nye gye, ɔnate (Nyameɛ) bɔ yeɛ ɔbɔle ye ne ati, odi kyɛ Sion mma bɛ nye gye, ɔnate bɛ Hene ne ati.

Edwein 89:17

Wɔ yeɛ ɛte b’anwoserɛ animnyam ɔ, na w’adom yeɛ ɔmaa yɛdi ngonim ɔ.

Anyandera 17:22

Sona nye gye a, ɔte ayire paa, nakoso aworabɔlɛ de, ɔkweekwee mmowue nu.

Nworɛ Dwirɛhanɛniɛ 11:2

Kyekyɛ nu ma nzoo anaa mmɔtwɛ po, ofikyɛ ɛnze edwirɛ tɛɛ bɔ ebiaa ɔbaasi aseɛ ye aso ɔ.

Nworɛ Dwirɛhanɛniɛ 2:24

Nikye paa biala nne berɛ mma sona ndra kyɛ okodidi, ɔkɔno ná ɔkɔfa bɔ wafɛ wanya ye ɔ ɔkɔgye ye nye ɔ. Na ɛhe koso, nwuni kyɛ Nyameɛ yeɛ ɔfa ma ɔ;

Nworɛ Dwirɛhanɛniɛ 3:13

Asa koso, sɛ sona biala didi, ɔno, ná ɔfa bɔ wafɛ wanya ye ɔ ɔgye ye nye a, né Nyameɛ akyɛdeɛ ɛne.

Nworɛ Dwirɛhanɛniɛ 5:18

Tie, bɔ manwu ye kyɛ ɔte paa ɛhe: Ngoa tikaape bɔ Nyameɛ afa ama sona ne, ɔte paa kyɛ sona kodidi, ɔkɔno, ná ɔkɔfa bɔ wafɛ wanya ye amukoraa wɔ wiase ɔkɔgye ye nye ɔ, ofikyɛ ye bue nu deɛ ɛne.

Nworɛ Dwirɛhanɛniɛ 9:7

Yiti kɔ so, di w’aleɛ wɔ anigye nu, ná fa anwosɛpɛ no wɔ nzaa, ofikyɛ bɔ ɛyɔ ne, Nyameɛ ale ato nu dadadada.

Edwein Nu Dwein 5:1

Nniɛma brasua, m’atɔmvorɛ braa, mawa me turo ne anu, méboaboa me korobo ne m’ayirefona ne noa, médi me woɛ bɔ ɔwɔ ye nzasameɛ nu ɔne me woɛ ne, méno me nzaa ne me nyɔfonesue ne. Me mmango mɔ, ɛ́mɔdidi ná ɛ́mɔno, adɔfo mɔ, ɛ́mɔno ma ɛmɔ ko yi.

Yesaya 49:5

Na afei AWURADE adwudwo, ye bɔ ɔnwone me wɔ me ni akunu kyɛ mmanyɛ ye somvoɛ, kyɛ nza mva Yakob mmrɛ ye, amaa ɔnate so Yisrael noa waboa wɔ ye nyunu, ofikyɛ manya AWURADE nyunu animnyam, yeɛ me Nyameɛ te m’anwoserɛ.

Yesaya 61:10

Ngoli ahurusi piri paa wɔ AWURADE nu, me Nyameɛ nu yeɛ me kra di ahurusi ɔ; ofikyɛ wafa ngoalelɛ ataadeɛ wawura me, wafa tenenee tena wahera me, kyɛbɔ atɔmvorɛ biaa fa abotire siesie ye nwo ɔ, kyɛbɔ atɔmvorɛ braa fa ye mbembenanneɛ siesie ye nwo ɔ.

Yoel 2:23

Ɛmɔ, Sion mma mɔ, ɛ́mɔma ɛmɔ nye gye, ná ɛmɔli AWURADE ɛmɔ Nyameɛ nu ahurusi, ofikyɛ wama asuso atikye wama ɛmɔ wɔ mmerɛ bɔ ɔsɛ ɔ nu, na wama bamborɔ watɔ wama ɛmɔ, asuso ɔne bamborɔ kyɛ daa ne ala.

Sakaria 14:21

Nahorɛ nu, kukue biala bɔ ɔwɔ Yerusalem ne Yuda ne, ɔkɔyɛ krongron kɔma Asafo AWURADE, na sona biala bɔ ɔbɔ afɔleɛ nen, ɔkɔɔfa nu bie kɔtõ afɔleɛ naen ne wɔ nu; na sɔ kyẽa ne, Kanaanniɛ ngɔtena Asafo AWURADE awuro berɛ ko.

Luka 11:41

Odi kyɛ ɛmɔfa bɔ ɔwɔ nu ne bɛyɛ adɔeɛ, na tie, nikyee biala nwo kɔte kɔma ɛmɔ.

2 Korintofoɛ 8:2

B’anwokyere ne nzɔhwɛ kandinga ne asi, benyane anika mmorosoɛ wɔ bɛ hiaa ne anu maa bɛyele bɛ kunu bɛyɔle adɔeɛ kandinga paa.

Filipifoɛ 3:4

Ɔwɔ nu kyɛ me bɔbɔ koso, ahaa nne anwoɔnaen nu nikyee bie bɔ mefa me nwo meto so ɔ. Na sɛ ebie dwene kyɛ ole anwoɔnaen nu nikyee bie bɔ ɔfa ye nwo to so a, me deɛ de ɔtra so.

Nyekyire 11:10

Na bɛ bɔ bɛte aseɛ so ɔ bekoli bɛ nwo ahurusi, na bɛ nye kɔgye ná bamanemane bɛ nwo akyɛdeɛ; ofikyɛ sɔ ngɔmhyɛlɛfoɛ nyɔ nemɔ bɛfale ɛhawo bɛtole bɛ bɔ bɛte aseɛ so ɔ so.

1 Samuel 25:8

Wɔ de, bisa wɔ mmerandeɛ nemɔ, na bɛkɔhã bekohyire wɔ. Yiti de me mmerandeɛ nemɔ nyemene so, ofikyɛ ɛnɛ bɔ yawa ye, ɔte anigye kyẽa. Yɛsrɛ wɔ ala, nikyee biala bɔ wɔ sa kɔsõ so ne, fa ma wɔ ngoaa ne ɛwa Dawide.’ ”