Nehemia 6:14 - AHYERƐLƐ KRONGRON

¹⁴ Ao me Nyameɛ, kaye Tobia ne Sanbalate kyɛbɔ bɛ yɔleɛ si te ɔ. Afei koso, kaye ngɔmhyɛlɛniɛ brasua Noadia ne ngɔmhyɛlɛfoɛ ngaa nemɔ bɔ bɛpena kyɛ ɛserɛ kã mene.

Nehemia 6:14 Iomraidhean Croise

Nehemia 13:29

Ao me Nyameɛ, kaye bɛ ná ɛne bɛ li, ofikyɛ sɔfolilɛ adwuma ne, yeɛ sɔfolilɛ ne Lewifoɛ apam ne, bagua ye nwo fiɛ.

Nehemia 5:19

Ao me Nyameɛ, kaye paa amukoraa bɔ mayɔ mama maen he ɔ.

Edwein 137:7

Ao AWURADE, kaye bɔ Edomfoɛ bɛyɔle ye kyẽa bɔ Yerusalem bɔle ne, na tua bɛ so kerɛ; kyɛbɔ bɛhane kyɛ, Ɛ́mɔbubu ye bégua ase! ɛ́mɔbubu ye bégua ase! Ɛ́mɔbubu ye bégua ase maa ɔɔhã ye fapem!” ne.

Edwein 22:1

Me Nyameɛ, me Nyameɛ, nzu ati yeɛ apo me ye? Nzu ati yeɛ mepene mepena mmokalɛ, nakoso aye wɔ nye afi me so ye?

Edwein 63:1

Ao Nyameɛ, wɔ yeɛ ɛte me Nyameɛ ɔ, mepena wɔ serɛserɛ; me kra wora adɔ wɔ, me nwonaen ayɛ hodwoo ɔpena wɔ kyɛ aseɛ wosee katerepee bɔ ɔpena nzue ɔ.

Ɛksadɔso 15:20

Afei ngɔmhyɛlɛniɛ Miriam bɔ ɔte Aarɔn aliɛma brasua ne, ɔfale akasaa tirale, na mmrasua ne amukoraa bɛwosole akasaa begole abilie befitele belili ye si.

Yeremia 14:15

Yiti bɔ AWURADE kã fa sɔ ngɔmhyɛlɛfoɛ nemɔ nwo ɛhe: Bɛ yeɛ bɛfa me dumaa bɛhyɛ ngɔm, bɔ nna me yeɛ nzomane bɛ ɔ. Nakoso bɛnwa, ‘Koɛ ne ɛhɔen ngɔwa aseɛ he aso.’ Sɔ ngɔmhyɛlɛfoɛ nemɔ, ngrandɛ ne ɛhɔen yeɛ okohũhũ bɛ ɔ.

Yeremia 14:18

Sɛ mekɔ buro a, yieee, bɛ bɔ batotɔ ngrandɛ noa ɛhe! Yeɛ sɛ mewura kuro ne anu a, yieee, bɛ bɔ ɛhɔen ama babɔ anwonyerɛ ɛhe! Ofikyɛ ngɔmhyɛlɛniɛ ne ɔsɔfo po, bekyinikyini wɔ aseɛ bɔ bɛnze so ɔ so.’ ”

Yeremia 28:1

Sɔ afoɛ ne anu ala, wɔ Yuda hene Sedekia ahennie n’ahyɛaseɛ ne anu, bosome bɔ ɔtɔ so nnu wɔ afoɛ bɔ ɔtɔ so nna ne anu, Hanania bɔ ye baba ole ngɔmhyɛlɛniɛ Asure bɔ ofi Gibeon ne, osele me wɔ AWURADE awuro berɛ wɔ asɔfo nemɔ ne maen ne amukoraa bɛ nyunu kyɛ,

Yeremia 28:10

Yeɛ ngɔmhyɛlɛniɛ Hanania, ɔyele kɔnnua ne fili ngɔmhyɛlɛniɛ Yeremia kɔme anu, na obubuli nu.

Yeremia 28:15

Na ngɔmhyɛlɛniɛ Yeremia sele ngɔmhyɛlɛniɛ Hanania kyɛ, “Hanania, tie, nna AWURADE yeɛ wasoma wɔ ɔ, nakoso ama maen he bale ngondombo bali.

Mateo 24:11

Na ngɔmhyɛlɛfoɛ ngondombofoɛ pee bekodwɔso, ná balakalaka mmenia pee.

Mateo 24:24

Ɔnate kyɛ, kristo ngondombofoɛ ne ngɔmhyɛlɛfoɛ ngondombofoɛ kodwɔso, na bɛkɔyɔ nzɛngyerɛnneɛ ne anwanwadeɛ mbiri mbiri, bɔ ɔkɔhora kɔwa kyɛ, bɛkɔlakalaka bɛ bɔ Nyameɛ aneanea nu waye bɛ ne po.

Mateo 7:15

“Ɛ́mɔnea ɛmɔ nwo yé wɔ ngondombo ngɔmhyɛlɛfoɛ nwo; bɛfa boaen nwomaa bedwira bɛ nwo bɛba ɛmɔ berɛ, nakoso bɛ nu de, bɛte pataku adifuufoɛ.

2 Timoteo 3:8

Na kyɛbɔ Yane ne Yambrɛ bedwɔso betiale Mose nen, sɔ ala yeɛ sɔ mmenia nemɔ koso bɛko betia nahorɛ ne ɔ. Bɛte mmenia bɔ b’adwene ali naakye, ná babɔ ase wɔ gyidie nu ɔ.

1 Yohane 5:16

Sɛ ebie nwu oliɛma kyɛ ɔyɔ bɔne bɔ ɔmva ye ngɔ ewue nu a, maa ɔbɔ mbaeɛ ɔma ye, na Nyameɛ kɔfa ye mbaeɛ ne aso kɔma ye ngoa. Mekyire bɛ bɔ bɛyɔ bɔne bɔ ɔmva bɛ ngɔ ewue nu ɔ. Nakoso bɔne bie wɔ berɛ bɔ ɔfa sona kɔ ewue nu ɔ, na ɛhe de mengyire kyɛ ɔbɔ ye nwo mbaeɛ.

Nyekyire 19:20

Na bɛhyele kaka ne, ɔne ngɔmhyɛlɛniɛ ngondomboniɛ ne koso bɔ ɔyɔle nzɛngyerɛnneɛ wɔ ye nyunu, bɔ ɔfa lakalakale bɛ bɔ bale kaka ne nzorɛhyɛlɛ ne, ɔne bɛ bɔ bɛkotole ye honi ne. Na befindini bɛ munyɔ anyekaenn so beguale see abura bɔ sɔfe ogye wɔ nu ne anu.