Nehemia 2:10 - AHYERƐLƐ KRONGRON

¹⁰ Nakoso Horonniɛ Sanbalate ne Amonniɛ Tobia bɔ ɔte somvoɛ ne, bɛtele bɔ ɔkɔ so ne, ɔyɛle bɛ yea paa kyɛ ebie awa bɔ ɔbaapena Yisraelfoɛ bɛ yeeyɛlɛ ɔ.

Nehemia 2:10 Iomraidhean Croise

Nehemia 13:1

Sɔ kyẽa ne, bɛkengale Mose nwomaa ne anu dwirɛ behyirele maen ne. Na benwuni kyɛ bahyerɛ ye wɔ nu kyɛ onni kyɛ Amonniɛ anaa Moaboniɛ biala ɔkɔ Nyameɛ badwa nu le,

Nehemia 13:28

Ɔsɔfo panyi paa Eliasibo, ɔwa Yehoada, ye mma mmienzua nemɔ anu ko bɔ né ogya Horonniɛ Sanbalate ɔwa brasua ne, mvoane ye mvili me nyunu maa ɔhɔle.

Nehemia 13:4

Anzana ɛhe baasi ne, ɔsɔfo Eliasibo bɔ bɛyele ye kyɛ ɔnea Nyameɛ awuro sua bɔ bɛfa nningyein besie nu ne aso, bɔ ye nwoniɛ ole Tobia ne,

Nehemia 2:19

Nakoso Horonniɛ Sanbalate, Amonniɛ Tobia bɔ ɔte somvoɛ ne, yeɛ Araboniɛ Gesem bɛtele bɔ ɔkɔ so nen, bɛserele yɛ bɛgorole yɛ nwo kyɛ, “Na nzikyɛ yeɛ ɛmɔkyire ye? Ɛmɔyɛ Nana nwo lɔen anaa?”

Nehemia 4:7

Nakoso Sanbalate ne Tobia yeɛ Arabofoɛ, Amonfoɛ ne Asedɔdefoɛ bɛtele kyɛ Yerusalem fasue ne silɛ ɔkɔ so, ná yahyɛ ye bo yɛtuatua nu ndokuro nen, bɛfɛle yaa paa,

Nehemia 6:1

Na Sanbalate, Tobia, Araboniɛ Gesem ne pɔfoɛ ngaa nemɔ bɛtele kyɛ masi fasue ne mayie bɔ tokuro biala ɔnne ye neka fee ɔ (ɔwɔ nu kyɛ ɔbaadwu sɔ kyẽa nen, né nnya nduatuale pambim anoa nemɔ).

Nehemia 6:16

Na yɛ pɔfoɛ nemɔ amukoraa bɛtele nen, maen maen amukoraa bɔ bapɛ yɛ nwo bayia ne, esuronyi tɔle bɛ so, na bɛ nyunu guale ase paa. Ofikyɛ benwuni kyɛ yɛ Nyameɛ yeɛ waboka maa yayɔ sɔ adwuma he ɔ.

Ɛseta 10:3

Na Yudaniɛ Modekae ye dibea ne, sɛ né Nana Ahasuro nne berɛ a, ye yeɛ ɔwɔ berɛ ɔ. Onyane animnyam wɔ Yudafoɛ nyunu, na ye mmango Yudafoɛ hurole ye dwirɛ, ofikyɛ né ɔpena ye mmenia paa, na ɔfale ye boso ama bɛ yeeyɛlɛ nwo dwirɛ tole ye nwo so, na ɔhane asomdwee dwirɛ hyirele ye mmenia amukoraa.

Edwein 112:10

Bɔnefoɛ nwu ye, na ɔyɛ ye ahi; ɔkɔnwose ye gye ná waboto; bɔ bɔnefoɛ wafa wasie ye nye so ne, ɔngɔyɛ berɛ.

Anyandera 27:4

Ɛyaafɛlɛ ti anu yɛ se, yeɛ ahonehulɛ tra so, nakoso nwa yeɛ ɔkɔhora kogyina nungunɛ noa ɔ?

Anyandera 30:22

Kanganiɛ bɔ okoli hene ɔ, kwaseaa bɔ okodidi kɔma ye ko koyi ɔ,

Nworɛ Dwirɛhanɛniɛ 10:7

Manwu nganga bɔ bɛtete mbɔngɔ so ɔ, wɔ aberɛ bɔ nnehyeɛ bɛnate ase kyɛ nganga ɔ.

Yesaya 15:5

Medi Moabo nwo aworabɔlɛ, ye mmenia bɔ bɛnwati ne, banwati baadwu Soa, baadwu Eglate Selisiya. Ofikyɛ Luhite pambaa ne, bele esuɛ yeɛ bɛfo ɔ; na atee bɔ ɔkɔ Horonaim ne, awuye yeɛ bɛbɔ bɛfa so ɔ.

Yeremia 41:10

Yeɛ Yismael hyele ɛhemɔ nnure: mmenia ngaa bɔ baha Misepa ne amukoraa, ɛhene mma mmrasua, yeɛ mmenia ngaa amukoraa bɔ baha Misepa bɔ awɛmvoɛ nemɔ aso safohene Nebusaradan wafa bɛ wawura Ahikam awa Gedalia sa ne. Netania awa Yismael hyele bɛ nnure, na osili nu kyɛ ɔfa bɛ kɔ Amonfoɛ mɔ dɔ.

Yeremia 48:34

“Bɛteatea nu befi Hesebon bekodwu Eleale ne Yahase. Bɛteatea nu befi Soa bekodwu Horonaim ne Eglate Selisiya, ofikyɛ Nimrim nzue po wawewe.

Yeremia 48:5

Ofikyɛ Luhite pambaa ne, bele esuɛ yeɛ bɛkɔfo ɔ, na Horonaim nekaa bɔ bɛtorotoro ne, pɔfoɛ nemɔ ate awuyebɔlɛ serɛserɛ.

Asomafoɛ 4:2

Bɛfɛle ɛyaa paa, ofikyɛ né asomafoɛ nyɔ ne yɛ ngyerɛkyerɛ bekyire mmenia nemɔ kyɛ Yesu awu atingye, bɔ odi adanzeɛ koso kyɛ awufoɛ kotingye ɔ.

Asomafoɛ 5:24

Na mmerɛ bɔ asɔneyɛɛ sua nu safohene ne ne asɔfo mbanyi nemɔ tele sɔ dwirɛ nen, bɛyɛle basaa; né bɛngora benwu nikye horɛ bɔ wato asomafoɛ nemɔ ɔ, ɔne edwirɛ bɔ ɔkɔwa ye si ɔ.