Nehemia 13:5 - AHYERƐLƐ KRONGRON

⁵ né wasiesie sua piri ko wama Tobia. Sɔ sua ne, né bɛfa sɔ nningyein hemɔ besie nu: aburoo afɔleɛ, ɛyɛɛ, ngukue, aburoo ngyɛmuɛ buru nu ko, nzaa ngyɛmuɛ buru nu ko ne ngoo ngyɛmuɛ buru nu ko bɔ bahyɛ kyɛ bɛfa bɛma Lewifoɛ, edweintolɛfoɛ ɔne pambim awɛmvoɛ, yeɛ afei akyɛdeɛ bɔ bɛfa bɛma asɔfo nemɔ ne.

Nehemia 13:5 Iomraidhean Croise

2 Aberɛso Dwirɛ 31:11

Yeɛ Hesekia fale ahyɛdeɛ mane bɛ kyɛ besiesie sua bɔ bɛfa nningyein besie nu ɔ wɔ AWURADE awuro berɛ. Na besiesiele sua nemɔ.

2 Aberɛso Dwirɛ 34:11

Bɛfa bɛmane bakaa dwumvoɛ nemɔ ne suasilɛfoɛ nemɔ, kyɛ bɛ́fa bɛ́tɔ nyɔboɛ bɔ badwa ɔ, mmakaa bɔ bɛfa bɛbɔ sua so ɔ, ɔne sua mbuna bɔ Yuda ahemvo mɔ bamaa wasɛkye ne.

Nehemia 10:36

Afei koso, yɛkɔfa yɛ bamuɛbaa mmienzua mɔ ne yɛ nandwie mɔ, mmoaen mɔ ne abɔngye mɔ bɛ mma mɔ bɔ oli moa ne yɛkɔhɔ yɛ Nyameɛ awuro yɛkɔɔma asɔfo bɔ bɛyɔ Nyameɛ awuro berɛ ɛsɔnenɛ adwuma ne, kyɛbɔ bahyerɛ ye wɔ mmeraa ne anu ne.

Nehemia 10:37

Yɛkɔfa ɛhemɔ yɛkɔbrɛ asɔfo nemɔ maa bɛkɔfa bekogua Nyameɛ awuro berɛ pumbu nemɔ anu: yɛ mɔle nu paa paa ne, y’akyɛdeɛ mɔ, bakaa biala so mmaa, nzaa ne ngoo. Yɛ fieso aleɛ wora, yɛkɔfa buru nu ngyɛmuɛ ko yɛkɔbrɛ Lewifoɛ nemɔ, ofikyɛ Lewifoɛ yeɛ odi kyɛ bede buru nu ngyɛmuɛ ko ne befi yɛ nguraa nemɔ amukoraa nu ɔ.

Nehemia 10:38

Na ɔsɔfo ne, bɔ ɔte Aarɔn bosoniɛ ne, sɛ Lewifoɛ nemɔ bede buru nu ngyɛmuɛ ko ne a, odi kyɛ ɔboka bɛ so. Na buru nu ngyɛmuɛ ko ne, odi kyɛ Lewifoɛ nemɔ bɛfa nu buru nu ngyɛmuɛ ko bɛba yɛ Nyameɛ awuro berɛ pumbu mɔ bɔ bɛfa nningyein besie nu nemɔ anu.

Nehemia 12:44

Sɔ kyẽa ne, sua mɔ bɔ bɛfa akyɛdeɛ nemɔ, fieso aleɛ bɔ bekoli moa bɛkɔfa nemɔ, yeɛ buru nu ngyɛmuɛ ko nemɔ besie nu ne, bɛyele mmenia kyɛ bɛnea so. Mbɔtam berɛ nguro nemɔ, bɛ fieso nningyein kyɛfa bɔ mmeraa ne kyire kyɛ bɛfa bɛma asɔfo ne Lewifoɛ nemɔ ne, né odi kyɛ sɔ mmenia bɔ baye bɛ ne, bɛboaboa ye noa begua nu, ofikyɛ né Yudafoɛ bɛ nye gye asɔfo ne Lewifoɛ b’adwuma bɔ bɛyɔ ne anwo.

Nehemia 13:7

na nza mmale Yerusalem. Sɔ mmerɛ ne yeɛ nwuni dwirɛ tɛɛ bɔ ɔnate Tobia ti Eliasibo wali ɔ, ɔnate kyɛ né wasiesie sua wama Tobia wɔ Nyameɛ awuro ne akunu.

Hesekiel 40:38

Né pumbu bie wɔ berɛ bɔ ye anoa ne ɔwɔ anoa piri mbuna nemɔ anwo, wɔ nekaa bɔ benwunzi naen yeralɛ afɔleɛ nwo ne.