Nehemia 12:25 - AHYERƐLƐ KRONGRON

²⁵ Né Matania, Bakebukia, Obadia, Mesulam, Talmon ne Akubo bɛte pambim awɛmvoɛ bɔ bɛwɛne sua bɔ bɛfa nningyein besie nu nemɔ ɔ.

Nehemia 12:25 Iomraidhean Croise

2 Ahemvo 7:10

Yiti bɛɛfrɛfrɛle kuro berɛ pambim awɛmvoɛ nemɔ bɛbɔle bɛ amaneɛ kyɛ, “Yɛhɔle Siriafoɛ asikyeleɛ ne anu, nakoso yannwu sona fee, yeɛ yande sona fee nga wɔ dɔ. Bɔ yɛnwuni ala yeɛ ole mbɔngɔ ne afunum mɔ bɔ bamendamenda bɛ ɔ, ɔne b’ɛtena sua mɔ kyɛbɔ bɛyakyili bɛ berɛ bɛhɔle ne ala.”

1 Aberɛso Dwirɛ 23:32

Yiti odi kyɛ bɛnea ɛtena sua atenaleɛ ne ɔne nekaa krongron ne aso. Afei koso, Aarɔn boso ama bɔ yeɛ bɛte bɛ koso bɛ nwo ama ne, odi kyɛ bɛboka bɛ maa bɛyɔ AWURADE awuro berɛ ɛsɔnenɛ adwuma ne.”

1 Aberɛso Dwirɛ 26:12

Pambim awɛmvoɛ nemɔ, bɛhyehyɛle bɛ nu kure kure, kyɛbɔ bɛ mmusua mmusua te ɔ, na bɛfale AWURADE awuro ne anu adwuma bewurale bɛ sa kyɛ b’eliɛma mɔ Lewifoɛ ngaa nemɔ ala.

1 Aberɛso Dwirɛ 26:15

Serewagualɛ ne yele ngwaen dɔ pambim ne mane Obɛde Edom, na bɛfale nekaa bɔ besie nningyein ne bewurale ye mma mmienzua nemɔ sa.

1 Aberɛso Dwirɛ 26:17

Eyia afiteleɛ bue nu dɔ ne, daa biala né Lewifoɛ nzia yeɛ bɛwɛne berɛ ɔ; nna wɛne sorɔ dɔ daa biala, nna wɛne ngwaen dɔ daa biala, yeɛ nyɔ ahoroɔ nyɔ wɛne nekaa bɔ besie nningyein ne.

2 Aberɛso Dwirɛ 8:14

Solomon gyinane ye baba Dawide nhyehyɛleɛ so fale asɔfo kure kure nemɔ b’adwuma wurale bɛ sa. Afei ɔfa wurale Lewifoɛ nemɔ sa kyɛ beli maen ne nyunu maa bɛto dwein bɛye AWURADE ayɛ, ná bɛboka asɔfo nemɔ wɔ bɛ daa daa ɛsɔnenɛ adwumayɔlɛ nu. Afei koso, pambim awɛmvoɛ nemɔ, ɔfale kure biala ye pambim deɛ wurale ye sa, kyɛbɔ Nyameɛ sona Dawide hyɛle ne.

Yesaya 21:8

Na wɛmvoɛ ne teane nu kyɛ gyata, kyɛ, “O AWURADE, ngyi fasue ye aso mewɛne daa biala, alehyeleɛ biala, ngyi nekaa bɔ megyina mewɛne ne.