Mika 5:8 - AHYERƐLƐ KRONGRON

⁸ Na Yakob boso ama ngaa ne, bɛkɔtena amaenmaensofoɛ nu wɔ maen maen pee bɛ nu, kyɛ gyata bɔ ɔwɔ ɛhɔayeɛ nu ngaka mɔ nu ɔ, kyɛ gyata ba bɔ ɔwɔ mmoaen kure mɔ nu ɔ, bɔ sɛ ɔbaasẽ kɔ a, otiatia bɛ so, ná ɔtete bɛ nu pasapasa bɔ ebiala nne berɛ bɔ ɔkɔpepɛ kole bɛ ɔ.

Mika 5:8 Iomraidhean Croise

Gyenesise 49:9

Yuda te gyata akrɔngrɔma, bɔ eku ngaka di ná esa bada wɔ boso ɔ. Okunduni, na obutuli berɛ kyɛ gyata, ɔte kyɛ gyata beleɛ; nwa yeɛ onzuro bɔ okotingye ye ɔ?

Edwein 104:20

Ɛma awosii ba, na aleɛ sa, na sɔ mmerɛ ne yeɛ ɛhɔayeɛ nu ngaka amukoraa befitefite ɔ.

Edwein 44:5

Wɔ tumi yeɛ yɛfa yɛdi yɛ pɔfoɛ mɔ so ngonim ɔ, na wɔ dumaa nu yeɛ yɛtiatia bɛ bɔ bedwɔso betia yɛ ɔ so ɔ.

Edwein 50:22

“Ɛmɔ bɔ ɛmɔ wora ofi Nyameɛ ne, ɛ́mɔdwene ɛhe anwo, ná mandete ɛmɔ nu pasapasa bɔ ɛmɔngonya defoɛ ɔ.

Anyandera 30:30

Gyata, bɔ ye nwo yɛ se tra ngaka amukoraati, bɔ ɔnnwati mvi ebiala nyunu ɔ,

Yesaya 5:29

Kyɛbɔ besi bɛbobɔ nu ne, ɔte kyɛ gyata deɛ, na bepo kyɛ gyata akrɔngrɔma mɔ, bɛyɛ bɛ komvi hooo bɛkye bɛ naen, na bɛfa bɛkɔ bɔ ebiala ngora nnne mvi bɛ sa nu ɔ.

Hesekiel 39:10

Na ɔnate sɔ ati, bɛngɔpena eyein wɔ eburo, yeɛ bengobubu ebie wɔ ɛhɔayeɛ nemɔ anu, ofikyɛ akodeɛ nemɔ yeɛ bɛkɔfa bɛkɔsɔ see ɔ. Na bɛ bɔ bɛfene bɛ nningyein ne, bɛ koso bɛkɔfẽ bɛ deɛ bie; yeɛ bɛ bɔ bɛbɔle bɛ so apaa ne, bɛ koso bɛkɔbɔ bɛ so apaa bie, AWURADE Nyameɛ noa dwirɛ ɛne.

Hosea 5:14

Ofikyɛ ngɔyɛ kyɛ gyata ngɔma Efraim, yeɛ ngɔyɛ kyɛ gyata ba ngɔma Yuda awuro ama. Me, me yeɛ ngɔtete bɛ nu pasapasa ngɔhɔ ɔ; ngɔfa ngɔhɔ, na ebiala ngɔpepɛ ngole ye.

Mika 2:12

Ao, Yakob, ngɔboa ɛmɔ amukoraa ɛmɔ noa amba, amba, ngɔboa Yisrael ngaa ne bɛ noa; ngɔhã bɛ ngɔbɔ nu kyɛ Bosra mmoaen, kyɛ mmoaen kure bɔ begua bɛ tuin nu ɔ, na bɛkɔyɛ dede pee, ɔnate kyɛ bɛte mmenia bɔ bɛsone ne ati.

Mika 4:13

Ao Sion awa brasua, dwɔso ná boro, ofikyɛ wɔ mmɛen ne, ngɔyɛ ye buralɛ, yeɛ ngɔyɛ wɔ gya mmaboa ne koso kɔɔbere, na ɛkɔfa kɔsɛkye maen pee pasapasa. Ngotu b’anwonyadeɛ ngosie berɛ ngɔma AWURADE, yeɛ ngotu b’agyapadeɛ ngosie berɛ ngɔma aseɛ amukoraa Mene ne.

Mika 4:7

Na ngɔma mmubuafoɛ nemɔ kɔyɛ mmenia bɔ baha ɔ, yeɛ bɛ bɔ bapɛ bɛ asue ne, ngɔmaa bɛkɔyɛ anwoserɛ maen; na AWURADE koli bɛ so hene wɔ Sion bokaa so kekesaala ye ne afebɔɔ.

Mika 5:3

Yiti ɔkɔyakyi bɛ nu kɔɔpem mmerɛ bɔ braa bɔ wafo aworɛ so ne kɔwo ɔ. Na afei oliɛma ngaa nemɔ, bekosa bɛkɔɔboka Yisrael mma nemɔ aso.

Mika 7:18

Nwa yeɛ ɔte Nyameɛ kyɛ wɔ, bɔ ɔfa amumuyɛɛ kyɛ, bɔ obu ye nye gua ye agyapadeɛ ngaa bɛ mmeraatolɛ so ɔ? Ɔmma ye yaafɛlɛ ndena berɛ afebɔɔ, ofikyɛ ye nye gye anwumvoinnwunɛ nwo.

Sakaria 10:5

Na bɛkɔyɛ kyɛ katakyie mɔ bɔ betiatia bɛ pɔfoɛ mɔ so wɔ mmorɔnoɛ so nnɛterɛ nu wɔ koɛ nu ɔ. Bɛkɔho koɛ, ofikyɛ AWURADE gyi bɛ si, na pɔngɔhanɛfoɛ bɔ bɛtete pɔngɔ so ɔ bɛ nyunu kogua ase.

Sakaria 11:6

Ofikyɛ mengonwu aseɛ ne aso ama anwumvoin ko, AWURADE noa dwirɛ ɛne. Tie, ngɔma mmenia kɔtotɔ, bɔ ebiala kɔtɔ wɔ obiɛngo sa nu, ɔne ye hene sa nu ɔ. Bɛkɔyɛ aseɛ ne pasaa, na mengɔpepɛ mengole bɛ nngofi bɛ sa nu.”

Sakaria 12:3

Na sɔ kyẽa ne, ngɔfa Yerusalem ngɔyɛ nyɔboɛ nonɛnonɛ ngɔma maen maen amukoraa, ebiala bɔ ɔkɔpagya ye ne, okopura piri paa, ɔwɔ nu kyɛ aseɛ so maen maen amukoraa bɛkɔboa bɛ noa bekodwɔso bekotia ye de.

Sakaria 14:18

Na sɛ Misraim abusua wammanzɔne a, ye de ɔngɔtɔ ngɔma bɛ; na maen maen bɔ bɛmma nni Asese aluolue nen, ɛhawo bɔ AWURADE kɔprapra kogua bɛ so nen, sɔ hawo ne ala yeɛ ɔkɔto bɛ ɔ.

Sakaria 9:15

Asafo AWURADE kɔbɔ bɛ nwo waen, bekoli ngonim, bekohwi bɛkɔfa taya nyɔboɛ so, bɛkɔno, na bɛkɔbɔ ese kyɛ ebiaa babobo ne, bɛ ko koyi kyɛ talie, kyɛ afɔleɛ bokyea ndweasoɛ nemɔ.

Malaki 4:3

Na ɛmɔkotiatia bɔnefoɛ mɔ so; ofikyɛ kyẽa bɔ ngɔyɔ sɔ ne, bɛkɔyɛ nzoen wɔ ɛmɔ gya bo, Asafo AWURADE noa dwirɛ ɛne.

Numeri 24:9

Okunduni, na obutu berɛ kyɛ gyata, ɔte kyɛ gyata beleɛ; nwa yeɛ okotingye ye ɔ? Ebiala bɔ okoyira wɔ ne, Nyameɛ koyira ye, yeɛ ebiala bɔ ɔkɔnoma wɔ ne, Nyameɛ kɔnoma ye.”

Mateo 10:14

Na sɛ ebiala ngole ɛmɔ anaa ongotie ɛmɔ dwirɛ a, ye de sɛ ɛmɔfi awuro anaa kuro ne aso bɛ́kɔ a, ɛ́mɔporoporo ɛmɔ gya bo mvuture bégua berɛ.

Asomafoɛ 18:6

Na sɛ né Yudafoɛ nemɔ bedwɔso betia ye, ná bɛkã musue dwirɛ betia ye a, ye koso ɔporoporo ye ataadeɛ nu kã kyire bɛ kyɛ, “Ɛmɔ bɔbɔ ɛmɔ mogya bɔ ɛmɔ ti so, ofikyɛ me de, menni ye nwo fɔ. Na ofi ɛnɛ bɔ ɔkɔ ɔ, ngɔhɔ Amaenmaensofoɛ mɔ dɔ.”

Hebrifoɛ 12:25

Ɛ́mɔnea yé na ɛmɔambo bɔ odwudwo ne dwirɛ. Na sɛ bɛ bɔ bɛpole kyɛ bekotie bɔ odwudwole wɔ aseɛ ye aso ne, benyane ye nwo asohwenɛ de a, nzaade ɔkɔyɛ sɛɛ bɔ sɛ yɛpo bɔ odwudwo kyire yɛ fi nyameɛso ne dwirɛ a, yɛngonya ye nwo asohwenɛ ɔ?

Hebrifoɛ 2:3

nzaade sɛ yɛpo ngoalelɛ piri bɔ ɔte sɔa de a, yɛkɔyɛ sɛɛ ná yafa yɛ nwo yali? Awurade lili moa bɔle ngoalelɛ he nwo dawure, na bɛ bɔ bɛtele ne koso lili ye nwo adanzeɛ maa yɛnwuni kyɛ ɔte nahorɛ.