Mika 1:7 - AHYERƐLƐ KRONGRON

⁷ Bɛkɔnyoko ye amoen nemɔ amukoraa pasapasa, ná bafa see bayera ye adwuma akatuaa amukoraa. Ngɔsɛkyesɛkye ye mmosoen amukoraa bɔkɔɔ, ofikyɛ gyanderafoɛ akatuaa yeɛ ɔfa onyane bɛ ɔ, na bekosa bɛkɔfa bɛkɔyɛ gyanderafoɛ akatuaa.

Mika 1:7 Iomraidhean Croise

2 Aberɛso Dwirɛ 31:1

Afei belili aluolue ne beyiele ne, Yisraelfoɛ bɔ né bayia berɛ ne amukoraa, bɛhɔle Yuda nguro nemɔ aso beebubuli mmosoen bonima nemɔ beguale, bɛpepɛle Asera dosii nemɔ beguale, na bɛsɛkyele asɔneyɛɛ nemɔ ne afɔleɛ bokyea nemɔ wɔ Yuda ne Benyamin ne Efraim ne Manase amukoraa, kɔpem kyɛ bɛsɛkyele bɛ mukoraa ɔ. Afei Yisraelfoɛ amukoraa besa bɛhɔle bɛ nguro nemɔ aso, na bɛ nu biala hɔle ye aseɛ so.

Yesaya 2:18

Amoen amukoraa bɛ boso komini.

Yesaya 23:17

Na ɔkɔwa kyɛ, sɛ afoɛ aburasoo ne dwu a, AWURADE kɔɔpasa Tiro nwo. Okosa kɔɔtoa ye dwaalilɛ ne aso, na ɔne ewiase ahennie amukoraa bɛkɔɔbɔ adwaman wɔ aseɛ so.

Yesaya 27:9

Yiti ɔnate ɛhe aso, okokyikyi Yakob amumuyɛɛ kofi berɛ, na ye bɔne bɔ baye bafi berɛ ne, so mmaa mukoraa bɔ okosu ɛhe: Okobubu afɔleɛ bokyea nyɔboɛ ne amukoraa, okofurofuro bɛ koti bɛ muhumuhu kyɛ nnɛterɛ, bɔ Asera dosii ne ɛyɛɛ bokyea biala ngogyinagyina berɛ ko ɔ.

Hesekiel 6:6

Kuro biala bɔ ɛmɔte so ne, ɔkɔkakyi kurofoen, ɛmɔ asɔneyɛɛ nemɔ kɔsɛkye kɔlela berɛ mbaen, na ɛmɔ afɔleɛ mmokyea nemɔ kodwiri kogua kɔsɛkye; ngobubu ɛmɔ mmosoen nemɔ ngogua ngɔsɛkye bɛ, ngobubu ɛmɔ amoen nemɔ ngogua, na ngɔsɛkye ɛmɔ sa noa adwuma nemɔ.

Hosea 2:12

Ngɔsɛkye ye bobe ne ye borɔdoma mmakaa nemɔ, bɔ wahã wafa bɛ nwo kyɛ, ‘M’akatuaa bɔ me kurofoɛ mɔ bafa bama me ne, ye ɛhe’ ne; ngɔkakyi bɛ ɛhɔayeɛ, na eburo ngaka koli.

Hosea 2:14

Yiti tie, ngɔma me hurolɛ kɔwa ye nu, ngɔfa ye ngɔhɔ ɛserɛ so, na ngɔhã ɛkorɔkorɔlɛ dwirɛ ngohyire ye.

Hosea 2:5

Ofikyɛ bɛ maame abɔ gyandera; bɔ ɔnwonzɛle bɛ ne wabɔ nyanzoen bra, ofikyɛ ɔnwa, ‘Me kurofoɛ mɔ bɔ bɛma me me noa aleɛ, me nzue, me boaen nwiaa ne me gyese, me ngoo ne me nzaa ne, ngogu bɛ so.’

Hosea 8:5

Ao Samaria, wapo wɔ nandwie ba ne, m’ahone ahu bɛ so; ɔkwaadwu kyinzu yeɛ bɛngɔbɔ anwotelɛ bra ɔ?

Hosea 8:6

Ofikyɛ ye koso ofi Yisrael: dwumvoɛ yeɛ ɔyɔle ɔ, yiti nna Nyameɛ ɔ. Samaria nandwie ba ne, bekobubu ye nu pasapasa.

Yoel 3:3

Bagua serewa bahyɛ me maen, bafa abɛɛmaa bale gyanderaniɛ, yeɛ batɔne abaayaa bale nzaa bano.

Lewitikɔso 26:30

Ngɔsɛkye ɛmɔ asɔneyɛɛ so nemɔ ná mabubu ɛmɔ ɛyɛɛ afɔleɛ bokyea nemɔ magua. Ngɔboaboa ɛmɔ fuin noa ngogua ɛmɔ mmosoen wuruwaa nemɔ aso. Na ngɔpɔ ɛmɔ.

Deuteronomi 23:18

Brasua bɔ adwaman nya sikaa, anaakyɛ kyea (bienzua adwamanbɔlɛniɛ) bɔ adwaman nya sikaa a, nnɛfa sikaa ne ba AWURADE wɔ Nyameɛ awuro batua bɔhyɛ biala, ofikyɛ bɛ munyɔ bayɛ bɛ nwo akyiwadeɛ bama AWURADE wɔ Nyameɛ.

Deuteronomi 9:21

Afei mvale nandwie ba ne, bɔ ɔte ɛmɔ bɔne bɔ ɛmɔyɔle ne. Mvale see nyerale ye, mmubuli nu, na ndini ye muhumuhu kyɛ mvuture, na ngyili ye mvuture ne nguale asue ba bɔ ɔtengyɛ fi bokaa ne aso ɔba ne anu.

Nyekyire 18:3

Ofikyɛ maen maen amukoraa bano ye adwamanbɔlɛ nzaa ne bie, na aseɛ so ahemvo mɔ bɛne ye babɔ adwaman, na aseɛ so dwadifoɛ bɛnate ye anwonya tam mmorosoɛ ne aso banya bɛ nwo.”

Nyekyire 18:9

Na aseɛ so ahemvo mɔ bɔ bɛne ye bɔle adwaman ná bɛne ye gyele bɛ nye anwonya nu ne, sɛ benwu nwosina bɔ ofi ye yeralɛ ne anu a, bɛkɔbɔ ye nwo awuye ná basu ye.

1 Samuel 5:4

Nakoso ye alehyeleɛ nu bieku, ngyerɛmɔ tutututu bɔ bedwɔsole ne, né Dagɔn amunu afi, bɔ ye nyunu butu ase wɔ AWURADE alaka ne nyunu ɔ. Né ebie abu Dagɔn ti ne ye sa nyɔ nemɔ wafi so bɔ bɛlela simbini ne aso ɔ. Né waha ye kundunzii ne angome.