Mateo 5:6 - AHYERƐLƐ KRONGRON

⁶ “Bɛ bɔ tenenee nwo hɔen ne nzuhɔen ku bɛ ne banya saleɛ, ofikyɛ bɛ yeɛ Nyameɛ kɔma bɛ ko koyi ɔ.

Mateo 5:6 Iomraidhean Croise

Edwein 107:9

Ofikyɛ ɔma sona kra bɔ nzuhɔen ku ye ɔ nzue, na ɔfa aleɛ paa ma sona kra bɔ ɛhɔen ku ye ɔ ma ye ko yi.

Edwein 145:19

Ɔyɔ bɛ bɔ besuro ye ɔ b’apɛdeɛ ma bɛ; afei koso otie bɛ sufrɛ, na ɔpepɛ de bɛ.

Edwein 17:15

Na me de, ɔnate kyɛ metengyɛ ne ati, ngonwu wɔ nyunu; sɛ medafe metingye a, m’ahone kɔtɔ me kunu, kyɛ manwu wɔ nyunu ɔ.

Edwein 63:5

Me kra ko koyi kyɛ ama ye aleɛ bɔ ɔyɛ fɛ ne bɔ naen bɔ walɔ ɔ, na ngɔfa me noa ngɔto ahurusi dwein ngɔye wɔ ayɛ.

Edwein 65:4

Bɛ bɔ ɛneanea nu ɛtwe bɛ bata wɔ nwo, kyɛ bɛɛtena w’abrannaa nu ne, benya saleɛ. W’awuro bɔ yeɛ ole w’asɔneyɛɛ sua krongron ne, nu nningyein paa ne, ɔma yɛ nwo tɔ yɛ.

Edwein 84:2

Amba, me kra tena a ɔndena, na ye wora dɔ AWURADE awuro aluo berɛ ne; m’ahone ne me nwonaen bɛto Nyameɛ teasefoɛ ne anwo anigye dwein.

Anyandera 10:24

Bɔ bɔnefoɛ suro ne yeɛ ɔkɔto ye ɔ, nakoso teneneefoɛ de, bɛkɔyɔ bɔ bɛpena ɔ bɛkɔma bɛ.

Anyandera 21:21

Ebiala bɔ ɔfa tenenee bra ne paayɛlɛ osie ye nye so ne, okonya ngoa, tenenee ne animnyam.

Edwein Nu Dwein 5:1

Nniɛma brasua, m’atɔmvorɛ braa, mawa me turo ne anu, méboaboa me korobo ne m’ayirefona ne noa, médi me woɛ bɔ ɔwɔ ye nzasameɛ nu ɔne me woɛ ne, méno me nzaa ne me nyɔfonesue ne. Me mmango mɔ, ɛ́mɔdidi ná ɛ́mɔno, adɔfo mɔ, ɛ́mɔno ma ɛmɔ ko yi.

Yesaya 25:6

Bokaa he aso yeɛ Asafo AWURADE kɔto poen kɔma maen amukoraa ɔ: Ɔkɔma bɛ aleɛ paa, nzaa paa, naen bɔ bowue nu fonyi wɔ nu, yeɛ nzaa bɔ basongyi so ɔ.

Yesaya 41:17

Sɛ ehiafoɛ ne bɛ bɔ bɛyɛ anwumvo ɔ bɛpena nzue, ná ebie nne berɛ, bɔ nzuhɔen ama bɛ komvi awo ne, me AWURADE, ngotie bɛ sufrɛ, me, Yisrael Nyameɛ, mengɔpo bɛ.

Yesaya 44:3

Ofikyɛ ngohwie nzue ngogua aseɛ bɔ nzuhɔen ku ye ne aso, yeɛ ngɔma asue mmaa mmaa kɔwa aseɛ wosee ne aso; ngohwie me Sunzum ngogua wɔ boso ama so, ná mahwie me saleɛ magua wɔ mma so.

Yesaya 65:13

Yiti AWURADE nwa nyoo: “Ɛ́mɔtie, me somvoɛ mɔ bekodidi, nakoso ɛmɔ de, ɛhɔen kohũ ɛmɔ; ɛ́mɔtie, me somvoɛ mɔ bɛkɔno, nakoso ɛmɔ de, nzuhɔen kohũ ɛmɔ; ɛ́mɔtie, me somvoɛ mɔ bekoli ahurusi, nakoso ɛmɔ de, ɛmɔ nyunu kogua ase.

Yesaya 66:11

amaa ɔnate so ye aworakyekyerɛ nyɔfonesue ne, ɛmɔano bie bama bɛ ko ayi; amaa ɔnate so ye animnyam mmorosoɛ ne, ɛmɔafa anigye bano maa wate ɛmɔ.”

Yeremia 31:25

Ofikyɛ ɛkra bɔ wayɛ hodwoo ne, ngɔmaa okole ye nwome, yeɛ ɛkra bɔ ye wora abɔ ne, ngɔmaa ye ko koyi.”

Luka 1:53

Wama bɛ bɔ ɛhɔen ku bɛ ɔ bali aleɛ paa ma bɛ ko ayi, yeɛ wama esikafoɛ bafa nzanza bahɔ.

Luka 6:21

“Ɛmɔ bɔ ɛhɔen ku ɛmɔ kekesaala ye ɔ, ɛmɔanya saleɛ, ofikyɛ bɛkɔma ɛmɔ ko koyi. “Ɛmɔ bɔ ɛmɔsu kekesaala ye ɔ, ɛmɔanya saleɛ, ofikyɛ ɛmɔkɔsere.

Luka 6:25

“Ɛmɔ bɔ ɛmɔ ko ayi kekesaala ye ɔ, ɛmɔ yaakɔ! Ofikyɛ ɛhɔen kohũ ɛmɔ. “Ɛmɔ bɔ ɛmɔsere kekesaala ye ɔ, ɛmɔ yaakɔ! Ofikyɛ ɛmɔkosu, ná ɛmɔabɔ awuye!

Yohane 4:14

Nakoso ebiala bɔ ɔkɔno nzue bɔ ngɔma ye bie ne de, nzuhɔen ngohũ ye le. Na nzue bɔ ngɔfa ngɔma ye ne, ɔkɔyɛ nzue abura wɔ ye nu bɔ opu kɔ daa ngoa nu ɔ.”

Yohane 6:27

Nnɛma ɛmɔyɔ aleɛ bɔ ɔsɛkye ɔ nwo adwuma, na mmom ɛ́mɔyɔ aleɛ bɔ ɔtena berɛ kɔ daa ngoa nu, bɔ Sona Awa ne kɔfa kɔma ɛmɔ ne nwo adwuma; ofikyɛ ye yeɛ Baba Nyameɛ wale ye wato nu wama ye tumi ɔ.”

Yohane 7:37

Na kyẽa bɔ ɔpɛ ye bo, bɔ ɔte aluolue ne anu kyẽa piri ne, Yesu dwɔso gyinane, na ɔteane nu hane kyɛ, “Sɛ nzuhɔen ku ebie a, ɔbra me berɛ ɔɔno nzue oo.

Nyekyire 7:16

Ɛhɔen ngohũ bɛ ko, yeɛ nzuhɔen ngohũ bɛ ko, eyia ngɔyera bɛ, yeɛ ahuhuro biala ngohũ bɛ.