Mateo 5:3 - AHYERƐLƐ KRONGRON

³ “Sunzum nu ehiafoɛ banya saleɛ, ofikyɛ bɛ yeɛ nyameɛso ahennie ne te bɛ deɛ ɔ.

Mateo 5:3 Iomraidhean Croise

2 Aberɛso Dwirɛ 33:12

Na mmerɛ bɔ ɔwɔ amaneɛ nu ne, ɔsrɛle AWURADE ye Nyameɛ kyɛ onwu ye anwumvoin, na ɔbrɛle ye nwo ase paa wɔ ye nana mɔ bɛ Nyameɛ nyunu.

2 Aberɛso Dwirɛ 33:19

Ye mbaeɛ bɔ ɔbɔle, kyɛbɔ Nyameɛ tiele ye sufrɛ, ye bɔne amukoraa, ye nahorɛlilɛ, nekaa bɔ osisili asɔneyɛɛ mɔ gyinagyinane Asera dosii mɔ ne amoen mɔ, koraka yeɛ ɔsakyera ne, bahyerɛ ye wɔ mmenia bɔ bɛse ase ne b’abakɔsɛm nwomaa ne anu.

2 Aberɛso Dwirɛ 33:23

Wammrɛ ye nwo ase wamma AWURADE kyɛbɔ ye baba Manase de ɔbrɛle ye nwo ase ne, na mmom Amon yɔle bɔne pee.

2 Aberɛso Dwirɛ 34:27

mmerɛ bɔ ɛtele ye dwirɛ bɔ ɔhã fale maen he ɔne nu ama nwo ne, ɔnate kyɛ enuni wɔ nwo ná ɛbrɛle wɔ nwo ase wɔ Nyameɛ nyunu, ná abrɛ wɔ nwo ase wɔ me nyunu, asunzua wɔ ndaadeɛ nu, ná asu wɔ me nyunu ne ati, me koso mate bɔ ahã ne; AWURADE noa dwirɛ ɛne.

2 Aberɛso Dwirɛ 7:14

ná me maen bɔ me dumaa la bɛ so ɔ, bɛbrɛ bɛ nwo ase, bɛbɔ mbaeɛ, bɛpena me si atee, ná bɛsakyera b’adwene befi brabɔlɛ tɛɛ ne anwo a, ye de ngotie bɛ sufrɛ wɔ nyameɛso, ngɔfa bɛ bɔne ngɔhyɛ bɛ, ná masa b’aseɛ ne anwonyerɛ.

YOB NWOMAA NE 42:6

Yiti manu me nwo, na me nwo yɛ me nya, na mafa mvuture ne nzoen magua me nwo.”

Edwein 1:1

Sona bɔ ondie amumuyɛɛfoɛ foɛtulɛ, ná ɔmva bɔnefoɛ atee so, ná ɔne mmenia bɔ bɛgoro Nyameɛ nwo ne bendu nu ne, onya saleɛ.

Edwein 112:1

Ɛ́mɔye AWURADE ayɛ! Sona bɔ osuro AWURADE, ná ye nye gye ye mmeraa dwirɛ nwo paa ne, onya saleɛ.

Edwein 128:1

Ebiala bɔ osuro AWURADE, ná ɔnate ye atee so ne, onya saleɛ.

Edwein 146:5

Sona bɔ ye bokafoɛ ole Yakob Nyameɛ, bɔ ye wora wura AWURADE ye Nyameɛ nu ne, onya saleɛ.

Edwein 2:12

Ɛmɔbrɛ ɛmɔ nwo ase bɛma Baa ne, ná wamvɛ yaa ama ɛmɔanwuwu atunu, ofikyɛ ye ahone kohu ndɛndɛ. Bɛ bɔ bɛfa bɛ wora bewura AWURADE nu ne, bɛ mukoraa benya saleɛ.

Edwein 34:18

AWURADE pingye bɛ bɔ bɛ wora abɔ ɔ, na ɔpepɛ de bɛ bɔ bɛ kra aboto ɔ.

Edwein 41:1

Sona bɔ ɔdwene anwumvoinniɛ nwo ne, onya saleɛ. AWURADE pepɛ de ye wɔ ye amaneɛnwunɛ mmerɛ nu.

Edwein 51:17

Afɔleɛ bɔ Nyameɛ nye gye ye nwo ole ahone bɔ wabrɛ ye nwo ase ɔ; ao Nyameɛ, ahone bɔ wabrɛ ye nwo ase, ná ye wora abɔ de, ɛngɔpo.

Edwein 84:12

Ao Asafo AWURADE, ebiala bɔ ye wora wura wɔ nu ne, onya saleɛ.

Anyandera 16:19

Ɔte paa kyɛ ɛkɔbrɛ wɔ nwo ase ɛkɔboka bɛ bɔ bɛyɛ anwumvo ɔ so, tra kyɛ ɛne anwomasoɛfoɛ bɛkɔhyɛ koɛ nu nzesadeɛ ɔ.

Anyandera 29:23

Sona ye anwomasoɛ brɛ ye ase, nakoso bɔ ɔte sunzum nu awiɛmvoɛ ne de, okonya animnyam.

Anyandera 8:32

“Afei, me mma mɔ, ɛ́mɔtie me e, bɛ bɔ bɛnate m’atee so ne, benya saleɛ.

Yesaya 30:18

Ye sɔ ne ati, AWURADE ɔnwondɛ kyɛ ɔkɔlo ɛmɔ ɔ, na waboaboa ye nwo kyɛ okonwu ɛmɔ anwumvoin ɔ, ofikyɛ AWURADE te pɛpɛɛpɛyɛlɛ Nyameɛ, na ebiala bɔ ɔfa ye wora wura ye nu ne, onya saleɛ.

Yesaya 57:15

Ofikyɛ Anwuro Anwuroniɛ ne, bɔ ɔwɔ berɛ afebɔɔ, bɔ ye dumaa ole Krongron ne, ɔnwa nyoo: “Anwuro ne nekaa krongron berɛ yeɛ nde ɔ, na sona bɔ wanya nnuhoɛ ne anwobrɛaseɛ ne, me ne ye yeɛ yɛte ɔ, amaa ɔnate so mama anwobrɛaseɛfoɛ bɛ sunzum anya ngoa, ná mama bɛ bɔ banya nnuhoɛ ne b’ahone anya ngoa.

Yesaya 61:1

AWURADE Nyameɛ Sunzum wɔ me so, ɔnate kyɛ AWURADE apopa me ngoo kyɛ nga nzɛmba ngyire bɛ bɔ bɛyɛ anwumvo ɔ; wasoma me kyɛ mmangyekye bɛ bɔ bɛ wora abɔ ɔ bɛ wora, kyɛ nga ngyire bɛ bɔ bahye bɛ nnure ɔ kyɛ banya fawɔnwodi, ɔne bɛ bɔ babɔ bɛ panwu ɔ kyɛ bayakyi bɛ;

Yesaya 66:2

Ɛhemɔ amukoraa mafa me sa yeɛ mayɔ ɔ, yiti ɛhemɔ amukoraa bɛte me deɛ, AWURADE noa dwirɛ ɛne. Nakoso sona bɔ ɔte sɔaa yeɛ mepena ɔ: bɔ ɔbrɛ ye nwo ase ná onya sunzum nu anwobrɛaseɛ ɔ, ɔne bɔ ɔfa anidie ma me dwirɛ ɔ.

Mika 6:8

Ao kuro sona, wala bɔ ɔte paa ɔ ali wahyire wɔ, nzikyɛ yeɛ AWURADE pena fi wɔ berɛ ɔ? Bɔ ɔpena ala ole kyɛ ɛkɔyɔ bɔ ɔtengyɛ, ekonwu anwumvoin, ɔne kyɛ ɛne wɔ Nyameɛ bɛkɔnate anwobrɛaseɛ nu ɔ.

Mateo 11:25

Sɔ mmerɛ ne anu, Yesu hane kyɛ, “Baba, anwuro ne aseɛ Mene, meda wɔ ase kyɛ afa edwirɛ hemɔ afea nworɛfoɛ ne nimdeɛfoɛ, ná aye ahyire ngokwaammaa ɔ.

Mateo 11:6

Na sona bɔ nnde sundidua mma ye ne, wanya saleɛ.”

Mateo 13:16

“Nakoso ɛmɔ de, ɛmɔ nye anya saleɛ kyɛ benwu nikye ɔ, ɔne ɛmɔ so koso kyɛ bɛte dwirɛ ɔ.

Mateo 19:14

Nakoso Yesu sele kyɛ, “Ɛ́mɔma ngwadaa nemɔ ate ma bɛbra me berɛ, na nnɛma ɛmɔsi bɛ ate; ofikyɛ ɛhemɔ sɔa ye yeɛ nyameɛso ahennie ne ɔte bɛ deɛ ɔ.”

Mateo 24:46

Akoaa bɔ ye mene ba banwu ye kyɛ sɔ ala yeɛ ogu so ɔyɔ ne, onya saleɛ.

Mateo 25:34

Na afei Ɛhene ne kose bɛ bɔ bɛwɔ ye famaa so ne kyɛ, ‘Ɛmɔ bɔ me Baba ayira ɛmɔ ɔ, ɛmɔbra bɛɛfa ahennie bɔ basiesie bama ɛmɔ fi ewiase ahyɛaseɛ ne bɛyɛ ɛmɔ deɛ.

Mateo 3:2

Ɔnwa, “Ɛ́mɔsakyera ɛmɔ adwene, ofikyɛ nyameɛso ahennie ne apingye!”

Mateo 8:11

Na mekã mekyire ɛmɔ kyɛ, mmenia pee kofi eyia afiteleɛ ne eyia atɔleɛ bɛkɔwa, na bɛ ne Abraham ne Yisake ne Yakob bɛkɔtena bekodidi wɔ nyameɛso ahennie ne anu.

Marko 10:14

Na Yesu nwuni ye sɔ nen, wanyɛ ye fɛ, na osele bɛ kyɛ, “Ɛ́mɔma ngwadaa nemɔ ate ma bɛbra me berɛ, na nnɛma ɛmɔsi bɛ ate; ofikyɛ ɛhemɔ sɔa ye yeɛ Nyameɛ ahennie ne ɔte bɛ deɛ ɔ.

Luka 11:28

Nakoso osele kyɛ, “Bɛ bɔ bɛte Nyameɛ dwirɛ ne ná bedi so ne mmom yeɛ banya saleɛ ɔ!”

Luka 18:14

Na Mekã mekyire ɛmɔ kyɛ, sɔ sona he mmom yeɛ Nyameɛ buale be maa ɔhɔle ye awuro ɔ, na nna ko ne ɔ; ofikyɛ ebiala bɔ ɔma ye nwo so ne, bɛkɔbrɛ ye ase, nakoso bɔ ɔbrɛ ye nwo ase ne de, bɛkɔma ye so.”

Luka 22:29

na kyɛbɔ me Baba afa ahennie ne wama me ne, sɔ ala yeɛ me koso mefa mema ɛmɔ ɔ,

Luka 22:30

amaa ɔnate so ɛmɔadidi ná ɛmɔano wɔ me poen so wɔ m’ahennie nu, ná ɛmɔatenatena ahennie bia so babua Yisrael mmusua kure buru ne nyɔ ne ndɛen.”

Luka 4:18

“Awurade Sunzum wɔ me so, ɔnate kyɛ wapopa me ngoo kyɛ nga nzɛmba ne ngyire ehiafoɛ. Wasoma me kyɛ mmɔ fawɔnwodi nwo dawure ngyire bɛ bɔ bahye bɛ nnure ɔ, ɔne nikyee nwunɛ nwo dawure ngyire anyesiniwaafoɛ, kyɛ mma bɛ bɔ bɛwɔ nhyɛsoɛ nu ɔ bɛfa bɛ nwo beli,

Yohane 20:29

Na Yesu sele ye kyɛ, “Tɔmase, anwu me ne ati yeɛ afei ale ali ɔ? Bɛ bɔ bennwuni ye, ná bale bali ne, ɔte saleɛ ma bɛ!”

Deuteronomi 8:2

Kaye atee amukoraa bɔ AWURADE wɔ Nyameɛ maa ɛfale so wɔ ɛserɛ so sɔ afoɛ aburanna ye anu, kyɛ ɔbrɛ wɔ ase, ná oso wɔ nea onwu w’ahone nu dwirɛ, sɛ aso ekoli ye mmeraa dwirɛ so anaakyɛ engoli so.

Yakobo 1:10

yeɛ sikaniɛ koso, wɔ ase bɔ babrɛ ye ne anu, ofikyɛ ɔkɔpɛ nu kɔhɔ kyɛ eburo ndire nyerɛen.

Yakobo 1:12

Sona bɔ omia ye nye fa nzɔhwɛ nu ne, onya saleɛ; ofikyɛ sɛ ɔkora gyina nzɔhwɛ ne noa a, okonya ngoa abotire bɔ Awurade afa ahyɛ bɛ bɔ bekuro ye dwirɛ bɔ ne.

Yakobo 2:5

Nniɛma mɔ bɔ ɛmɔla m’ahone nwo ɔ, ɛ́mɔtie! Aso Nyameɛ ɔnneneane nu ɔyyele wiase ahiafoɛ kyɛ bɛyɛ gyidie nu anwonyafoɛ, ná benya agyapadeɛ wɔ ahennie ne anu, ahennie bɔ wafa wahyɛ bɛ bɔ bekuro ye dwirɛ ne bɔ ne?

Nyekyire 19:9

Na osele me kyɛ. “Kyerɛ ɛhe: Bɛ bɔ bato bɛ sa bafrɛ bɛ kyɛ bɛbra Boaen Ba n’atɔmvorɛ poentolɛ bo ne, banya saleɛ.” Na osele me kyɛ, “Ɛhemɔ te Nyameɛ noa dwirɛ bɔ ɔte nahorɛ ɔ.”

Nyekyire 22:14

Bɛ bɔ bɛpo bɛ ndaadeɛ ne, banya saleɛ, kyɛbɔ bekonya ngoa bakaa ne nwo atee, ná bafa anoa ne anu bahɔ kuro ne anu ɔ.

Nyekyire 3:17

Ofikyɛ ɛnwa, ‘Manya me nwo, nne agyapadeɛ, na menhia nikyee fee.’ Nakoso ɛnze kyɛ ɛyɛ anwumvo, wɔ nwo yɛ aworabɔ, wahia wɔ, wɔ nye asi, ná wɔ nwo la so ɔ.