Mateo 5:19 - AHYERƐLƐ KRONGRON

¹⁹ Yiti ebiala bɔ ɔkɔto mmeraa ne anu kaaba ko bɔ ɔwɔ nu po, ná okohyirehyire mmenia kyɛ bɛyɔ sɔ bie nen, bɛkɔfrɛ ye kwahweabaa wɔ nyameɛso ahennie ne anu. Nakoso sona bɔ okoli so, ná okohyirehyire mmenia maa bekoli so bie nen, ɔkɔyɛ titire wɔ nyameɛso ahennie ne anu.

Mateo 5:19 Iomraidhean Croise

Edwein 119:128

Yiti megyina wɔ dwirɛ so yeɛ mebɔ me bra ɔ; na mekyi ngondombo atee biala.

Edwein 119:6

Ɔba ye sɔ a, me nyunu ngogua ase, ofikyɛ me nye wɔ wɔ mmeraa dwirɛ ne amukoraa so.

Daniel 12:3

Bɛ bɔ bɛte mmadwemma ne, bɛkɔta kyɛbɔ ewienu ta ɔ; yeɛ bɛ bɔ behyirehyirele mmeni pee maa bɛfale tenenee atee so ne, bɛ wora bɛkɔta kyɛ nzramaa afebɔɔ.

Mateo 11:11

Nahorɛ nu, mekã mekyire ɛmɔ kyɛ, bɛ bɔ mmrasua awo bɛ amukoraa, bɛ nu biala oddwɔsole bɔ odi mu tra Asubɔlɛniɛ Yohane ɔ. Nakoso bɔ ɔte kãa koraa wɔ nyameɛso ahennie ne anu ne po odi mu tra ye.

Mateo 19:28

Na Yesu sele bɛ kyɛ, “Nahorɛ nu, mekã mekyire ɛmɔ kyɛ, ewiase foforɛ ne anu, mmerɛ bɔ Sona Awa ne kɔtena ye animnyam ahennie bia so ne, ɛmɔ bɔ ɛmɔaali me si ne, ɛmɔ koso ɛmɔkɔtena ahennie bia buru ne nyɔ so bekobua Yisrael mmusua kure buru ne nyɔ ne ndɛen.

Mateo 20:26

Nakoso ɛmɔ nu de, ɔnzɛ kyɛ ɔba ye sɔ ɔ. Na mmom ebiala bɔ ɔpena kyɛ ɔyɛ ɛmɔ so panyi nen, ɔsɛ kyɛ ɔyɛ ɛmɔ somvoɛ;

Mateo 28:20

ná ɛmɔhyirehyire bɛ maa beli nikyee biala bɔ mahyɛ ɛmɔ ne aso. Na ɛ́mɔtie, me ne ɛmɔ wɔ berɛ mmerɛ biala kodwu ewiase ayieleɛ.”

Luka 1:15

ofikyɛ ɔkɔyɛ sona titire wɔ Awurade nyunu, na ɔngɔno bobe nzaa anaa nzaa biala, na Sunzum Krongron koyi ye tɛkyɛ kofi oni akunu.

Luka 11:42

“Ɛmɔ Farasiifoɛ, ɛmɔ yaakɔ! Ofikyɛ, ɛmɔfa ɛmeɛ, ɛmanyire ne nyaanyaa biala buru nu ngyɛmuɛ ko bɛma, nakoso ɛmɔbu bɛ nye begua pɛpɛɛpɛyɛlɛ ne Nyameɛ nwo dɔ so. Na ɛhemɔ yeɛ ahaa odi kyɛ ɛmɔyɔ ɔ, bɔ ɛmɔnyakyi ye ngaa nemɔ koso yɔlɛ ɔ.

Luka 9:48

na osele bɛ kyɛ, “Ebiala bɔ okole akwadaa he kɔto nu me dumaa nu nen, né wale me wato nu; yeɛ ebiala bɔ okole me kɔto nu nen, né wale bɔ ɔsomane me ne wato nu. Ofikyɛ, bɔ ɔte kãa paa wɔ ɛmɔ amukoraa bɛ nu ne, ye yeɛ ɔte titire paa ɔ.”

Asomafoɛ 1:1

O Tiofilo, me nwomaa bɔ ngyerɛle bɔ oli moa ne anu ne, ngane nikyee biala bɔ Yesu yɔle, ná ohyirele fi mmerɛ bɔ ɔhyɛle ye adwuma bo

Romanfoɛ 3:8

Ebiemɔ to yɛ soen kyɛ yɛnwa, “Ɛ́mɔma yɛyɔ bɔne ná paa fi nu bra.” Na bekobua bɛ ye nwo ndɛen kyɛbɔ ɔfata ɔ.

Romanfoɛ 6:1

Afei yɛkã ye sɛ? Yiti yɛhɔ so yɛyɔ bɔne, amaa yanya Nyameɛ adom ne mmorosoɛ anaa?

Romanfoɛ 6:15

Afei nzikyɛ bieku? Ɔnate kyɛ yɛwwura mmeraa bo, na mmom yɛwura adom bo ne ati, yiti odi kyɛ yɛyɔ bɔne anaa? Dabida!

Deuteronomi 12:32

“Bɔ méhyehyɛ méma ɛmɔ biala, ɛ́mɔnea yé kyɛ ɛmɔkoli so ɔ. Nnɛfa bie boka so, yeɛ nnɛye bie fi nu.

Deuteronomi 27:26

“ ‘Musue tó sona biala bɔ onne mmeraa he anu dwirɛ ndo nu kyɛ okoli so ɔ.’ Na mmenia ne amukoraa kosuro so kyɛ, ‘Amen!’

1 Timoteo 6:11

Na wɔ, Nyameɛ sona, wɔ de, twe wɔ nwo fi ɛhemɔ anwo, ná fa tenenee, nyamesom paa, gyidie, ɔdɔ, animia ne anwobrɛaseɛ sie wɔ nye so.

Tito 3:8

Ɛhe te edwirɛ nahorɛ, na mekuro kyɛ esi edwirɛ hemɔ so paa, amaa ɔnate so bɛ bɔ bale Nyameɛ bali ne badwene kyɛbɔ bɛkɔbɔ nnwumaa paa nwo mmɔden ɔ. Sɔ nningyein nemɔ yeɛ ɔte paa ɔ, na mvasoɛ wɔ so ma sona.

1 Petro 5:4

Na sɛ Mmoaenneafoɛ panyi ne ɔye ye nwo ali a, ɛmɔkonya animnyam abotire bɔ ɔnzɛkye koraa ne.

1 Yohane 3:4

Ebiala bɔ ɔyɔ bɔne ne, ɔto mmeraa, ofikyɛ bɔne te mmeraatolɛ.

Nyekyire 2:20

Nakoso mebɔ wɔ kwaadu kãa, ofikyɛ ɛma braa Yesebɛl bɔ ɔfrɛ ye nwo ngɔmhyɛlɛniɛ ne ate, kyɛ ɔyɛ ngyerɛkyerɛ ná ɔlakalaka me ngoaa mɔ ma bɛbɔ adwaman ná beli bosoen so aleɛ.

1 Samuel 2:30

Yiti AWURADE Yisrael Nyameɛ nwa nyoo, ‘Nhyɛle bɔ kyɛ w’abusua ne wɔ nana abusua bekoli sɔfo bɛkɔso me daa.’ Nakoso kekesaala ye de, AWURADE nwa: ‘Mengɔma sɔ dwirɛ ne ngɔyɛ adwuma! Ofikyɛ bɛ bɔ bedi me ni ne, me koso ngoli bɛ ni, yeɛ bɛ bɔ betiatia me nyunu ne, me koso mengɔfa bɛ ngɔyɛ huu.