Mateo 4:4 - AHYERƐLƐ KRONGRON

⁴ Nakoso obuale kyɛ, “Bahyerɛ kyɛ, ‘Nna paanoo ngome so yeɛ sona nate nya ngoa ɔ, na mmom ɔnate edwirɛ biala bɔ ofi Nyameɛ noa ba ɔ so.’ ”

Mateo 4:4 Iomraidhean Croise

Ɛksadɔso 16:15

Na Yisraelfoɛ nwuni ye sɔ nen, bebisabisale bɛ nwo ngoko ngoko kyɛ, “Nzikyɛ nikyee ɛhe?” Ofikyɛ né bɛnze nikye horɛ. Na Mose sele bɛ kyɛ, “Aleɛ bɔ AWURADE afa ama ɛmɔ kyɛ ɛmɔli hɔ ɛne.

Ɛksadɔso 16:35

Yisraelfoɛ lili mana afoɛ aburanna, maa oodwuli kyɛ bedwuli aseɛ bɔ mmenia tete so ɔ so; na belili mana toonn kɔpem kyɛ bedwuli Kanaan aseɛ so ɔ.

Ɛksadɔso 16:8

Na Mose sele kyɛ, “Nɔsoa biala, AWURADE kɔma ɛmɔ naen ma ɛmɔkoli, na ngyerɛmɔ koso, ɔkɔma ɛmɔ aleɛ ma ɛmɔ ko koyi; ofikyɛ AWURADE ate kyɛ ɛmɔpenepene bɛ komvi begua ye so. Na yɛ de, yɛ ole nwa? Nna yɛ yeɛ ɛmɔpenepene bɛ komvi begua yɛ so ɔ, na mmom AWURADE.”

Ɛksadɔso 23:15

“Di Paanoo Kabrɛdi aluolue ne. Fa ɛlɛsoo di paanoo kabrɛdi, wɔ mmerɛ bɔ mahyɛ ne, wɔ bosome Abibo nu, kyɛbɔ mahyɛ wɔ ne ala. Ofikyɛ sɔ bosome ne anu yeɛ etuli wɔ bo fili Misraim ɔ. Nnɛma ebiala fa ye sa mbaen ba me nyunu.

Mateo 15:11

“Nna bɔ ɔkɔ sona noa nu yeɛ ogua ye nwo fiɛ ɔ, na mmom bɔ ofi sona noa nu ba ne yeɛ ogua ye nwo fiɛ ɔ.”

Mateo 4:10

Yeɛ Yesu buale ye kyɛ, “Dwɔso berɛ kɔ dɔ, Satan! Ofikyɛ Bahyerɛ kyɛ, ‘Sɔne Awurade wɔ Nyameɛ, na ye ngome twe yeɛ so ye ɔ!’ ”

Mateo 4:7

Yesu buale ye kyɛ, “Bahyerɛ ye bieku kyɛ, ‘Nneso Awurade wɔ Nyameɛ nea!’ ”

Marko 7:20

Na ɔtoale so hane kyɛ, “Bɔ ofi sona nu ba ne, ye yeɛ ogua ye nwo fiɛ ɔ.

Luka 4:12

Na Yesu buale ye kyɛ, “Bahã kyɛ, ‘Nneso Awurade wɔ Nyameɛ nea.’ ”

Luka 4:4

Na Yesu buale ye kyɛ, “Bahyerɛ kyɛ, ‘Nna paanoo ngome so yeɛ sona nate nya ngoa ɔ.’ ”

Luka 4:8

Na Yesu buale ye kyɛ, “[Dwɔso berɛ kɔ dɔ, Satan!] ofikyɛ bahyerɛ kyɛ, Sɔne Awurade wɔ Nyameɛ, na ye ngome twe yeɛ so ye ɔ!’ ”

Yohane 15:26

“Na Aworakyekyerɛniɛ ne, nahorɛ Sunzum bɔ ofi Baba ne berɛ, bɔ ngɔsoma ye ngɔbrɛ ɛmɔ ngofi Baba ne berɛ ne, sɛ ɔba a, ye yeɛ okoli me nwo adanzeɛ ɔ;

Yohane 6:63

Sunzum ne yeɛ ɔma ngoa ɔ; na anwoɔnaen ne de, ɔtte huu. Edwirɛ bɔ mahã mahyire ɛmɔ ne, ɔte sunzum ne ngoa.

Romanfoɛ 15:4

Na nikyee biala bɔ bɛhyerɛ bɛtole berɛ tetetete ne, bɛhyerɛle maa ɔyɛle ngyerɛkyerɛ mane yɛ, kyɛ yɛfa aboterɛ ne Ahyerɛlɛ ne anu aworakyekyerɛ so yɛnya anyelasoɛ.

Ɛfesofoɛ 6:17

Ɛ́mɔfa ngoalelɛ buralɛ kyerɛ, ɔne Sunzum ngrandɛ ne, bɔ ye ole Nyameɛ dwirɛ ne.

Deuteronomi 8:3

Ɔmane ɛhɔen huni wɔ fa brɛle wɔ ase, na mana bɔ né ɛnze nikye horɛ, bɔ wɔ nana mɔ koso bɛnze nikye horɛ ne, ɔmane wɔ bie maa elili. Ɔyɔle sɔ, kyɛbɔ ɔkɔmaa ekonwu ye kyɛ, nna aleɛ ngome yeɛ ɔma sona nya ngoa ɔ, na mmom AWURADE noa nu dwirɛ biala yeɛ ɔma sona nya ngoa ɔ.