Mateo 23:8 - AHYERƐLƐ KRONGRON

⁸ Nakoso ɛmɔ de, onni kyɛ bɛfrɛ ɛmɔ: ‘kyerɛkyerɛniɛ’ ɔ, ofikyɛ ɛmɔ Kyerɛkyerɛniɛ te komapɛ, na ɛmɔ amukoraa bɛte aliɛmaa.

Mateo 23:8 Iomraidhean Croise

Mateo 10:25

Yiti sɛ suaniɛ yɛ kyɛ ye kyerɛkyerɛniɛ a, odi kyɛ ɔma ye nye sɔ; yeɛ akoaa koso sɛ ɔyɛ kyɛ ye mene a, odi kyɛ ɔma ye nye sɔ. Na sɛ bafrɛ awuro mene ne Beɛsebul de a, nzaade ɔkɔyɛ sɛɛ bɔ bɛngɔfa dumaa tɛɛ pee bɛngɔfrɛ ye awuro ama ɔ?

Mateo 17:5

Ogu so odwudwo ne ala, yieee, munungum hyɛnhyɛnn bie ɔɔkatale bɛ so, na edwudwolɛ bie fili munungum ne anu hane kyɛ, “Mma bɔ ɔla m’ahone nwo ná me nye gye ye nwo paa ne ɛhe; ɛ́mɔtie ye!”

Mateo 23:10

Afei koso, nnɛmɔma bɛfrɛ ɛmɔ ‘meneɛ mɔ,’ ɔnate kyɛ ɛmɔ Mene te komapɛ, bɔ ye ole Kristo ne.

Mateo 23:7

ɔne kyɛ mmenia kobisa bɛ ahye wɔ dwaaso ɔ, ɔne kyɛ mmenia kɔfrɛ bɛ ‘kyerɛkyerɛniɛ’ ɔ.

Mateo 26:25

Yeɛ Yudase bɔ ɔyele ye mane ne, obisale kyɛ, “Kyerɛkyerɛniɛ, me ahɔ anaa?” Na obuale ye kyɛ, “Ye ala yeɛ ahã ne.”

Mateo 26:49

Na berɛ ne ala, ɔwale Yesu nwo berɛ, na ɔhane kyɛ, “Rabi, asomdwee ha wɔ oo!” Na ɔfele ye noa.

Marko 10:51

Na Yesu bisale ye kyɛ, “Nzu yeɛ ɛpena kyɛ meyɔ mema wɔ ɔ?” Na anyesiniwaaniɛ ne buale ye kyɛ, “Kyerɛkyerɛniɛ, mepena kyɛ menwu nikye.”

Marko 11:21

Na Petro kayele, na osele Yesu kyɛ, “Rabi, nea! Borɔdoma bakaa bɔ ɛpayele ye ne, wawu.”

Marko 14:45

Na ɔwale ne, ɔhɔle Yesu nwo berɛ ndɛndɛ so, na osele kyɛ, “Rabi”, na ɔfele ye noa.

Marko 9:5

Na Petro sele Yesu kyɛ, “Yɛ mene, ɔte paa kyɛ yɛtena wa ɔ. Maa yɛbɔ asese nza, wɔ deɛ ko, Mose deɛ ko, yeɛ Elia deɛ ko.”

Luka 22:32

Nakoso mabɔ mbaeɛ mama wɔ, kyɛbɔ wɔ gyidie ngɔtɔ ase ɔ, amaa sɛ esa gyina wɔ gya so a, ahyɛ eliɛma mɔ nguraen.”

Yohane 1:38

Yesu kakyili ye nwo, na onwuni kyɛ beli ye si nen, obisale bɛ kyɛ, “Ɛmɔpena nzu?” Na bebuale ye kyɛ, “Rabi” (ye bo kyire Kyerɛkyerɛniɛ), “nisua yeɛ ɛte ɔ?”

Yohane 1:49

Nataneɛl buale kyɛ, “Rabi, wɔ ole Nyameɛ Awa ne! Wɔ ole Yisrael Hene ne!”

Yohane 11:8

Na asuafoɛ nemɔ sele ye kyɛ, “Rabi, anomasi wa ala yeɛ Yudafoɛ bɛyɛle kyɛ bɛkɔboro wɔ nyɔboɛ ɔ, na esa kɔ dɔ bieku anaa?”

Yohane 20:16

Na Yesu sele ye kyɛ, “Maria!” Na ɔkakyili ye nwo sele ye wɔ Hebri dwudwolɛ nu kyɛ, “Raboni!” (ye bo kyire Kyerɛkyerɛniɛ.)

Yohane 3:2

Sɔ biaa ne wale Yesu berɛ kɔngɔen oosele ye kyɛ, “Rabi, yɛse kyɛ ɛte kyerɛkyerɛniɛ bɔ efi Nyameɛ berɛ ɔ; ofikyɛ ebiala ngɔhora ngɔyɔ nzɛngyerɛnneɛ hemɔ bɔ ɛyɔ ye, sana Nyameɛ boka ye so.”

Yohane 3:26

Na bɛwale Yohane berɛ beesele ye kyɛ, “Rabi, biaa bɔ né ɛne ye bɛwɔ asue Yɔɔdan si dɔ, bɔ elili ye nwo adanzeɛ nen, tie, ye koso ɔ́bɔ asu, na mmenia mukoraa bébiri bɛ́kɔ ye berɛ.”

Yohane 4:31

Na sɔ mmerɛ ne anu, asuafoɛ nemɔ srɛle ye kyɛ, “Rabi, didi.”

Yohane 6:25

Na beenwuni ye wɔ ɛpo ne asi dɔ nen, bebisale ye kyɛ, “Rabi, mmerɛ beni yeɛ ɛwale wa ɔ?”

Yohane 9:2

Na ye asuafoɛ nemɔ bisale ye kyɛ, “Rabi, nwa yeɛ ɔyɔle bɔne ɔ, biaa he anaa ye awofoɛ, bɔ ɔmaa ɔnate so bɛwole ye anyesiniwaaniɛ ye?”

2 Korintofoɛ 1:24

Nna kyɛ yɛhyɛ ɛmɔ so wɔ ɛmɔ gyidie nwo ɔ, na mmom kyɛbɔ ɛmɔ nye kɔha ti yeɛ yɛ ne ɛmɔ yɔ adwuma yɛbɔ nu ɔ, ofikyɛ ɛmɔ gyidie gyi berɛ pindinn.

2 Korintofoɛ 4:5

Nna yɛ bɔbɔ yɛ nwo dawure yeɛ yɛbɔ ɔ, na mmom Kristo Yesu bɔ ɔte Awurade ne, ye nwo dawure yɛbɔ ɔ, na yɛsa yɛbɔ dawure kyɛ ɔnate Yesu ti yayɛ ɛmɔ ngoaa.

Ɛfesofoɛ 3:15

bɔ ye nu yeɛ abusua biala bɔ ɔwɔ nyameɛso ne aseɛ so onya ye dumaa fi ne,

Filemɔn 1:16

bɔ nna kyɛ kanganiɛ ko, na mmom ye dibea bo kanganiɛ so, kyɛ aliɛmaa bɔ ɔla m’ahone nwo paa ɔ, na wɔ de, ɔte sɔ ma wɔ tra so koraa, wɔ anwoɔnaen ne Awurade nu.

Yakobo 3:1

Aliɛmaa mɔ, nnɛmɔma ɛmɔ nu somaa yɛ akyerɛkyerɛfoɛ, na ɛmɔse kyɛ bekobua yɛ foɛ piri mmom.

1 Petro 5:3

bɔ ɔnzɛ kyɛ ɛmɔhyɛ bɛ bɔ bewura ɛmɔ sa ne aso, na mmom kyɛ ɛ́mɔyɛ nhwɛsoɛ bɛ́ma mmoaen kure ne ɔ.

Nyekyire 1:9

Me, Yohane, bɔ nde ɛmɔ aliɛma ne ɛmɔ abiɛngoɛ wɔ Yesu Kristo amaneɛnwunɛ ne ahennie ne animia nu ɔ, ɔnate Nyameɛ dwirɛ ne ne Yesu Kristo adanzeɛ ne ati, né nwɔ Supɔ bɔ bɛfrɛ ye Patemo so.

Nyekyire 19:10

Yeɛ mvale me nyunu mmutuli ase wɔ ye gya bo kyɛ mesɔne ye, nakoso osele me kyɛ, “Nea, nnɛyɔ sɔ! Ofikyɛ me koso nde ebiɛngo akoaa, wɔ ne eliɛma mɔ bɔ betira Yesu adanzeɛ ne anu ne. Sɔne Nyameɛ! Ofikyɛ Yesu adanzeɛ ne, ye ole ngɔmhyɛlɛ sunzum ne.”

Nyekyire 22:9

Na osele me kyɛ, “Nea, nnɛyɔ sɔ! Ofikyɛ me koso nde ebiɛngo akoaa, wɔ ne eliɛma mɔ ngɔmhyɛlɛfoɛ, yeɛ bɛ bɔ betira nwomaa he anu dwirɛ nu ne. Sɔne Nyameɛ!”