Mateo 23:37 - AHYERƐLƐ KRONGRON

³⁷ “O, Yerusalem, Yerusalem, wɔ bɔ eku ngɔmhyɛlɛfoɛ ná ɛboro bɛ bɔ basoma bɛ wɔ berɛ nyɔboɛ ɔ! Mmerɛ pee yeɛ mbenane kyɛ ahaa meboaboa wɔ mma noa, kyɛbɔ akɔtaen boaboa ye mma noa wura ye ndaa bo ɔ, nakoso ɛmɔambene so!

Mateo 23:37 Iomraidhean Croise

Nehemia 9:26

“Nakoso bɛyɛle asoserɛ, na bɛyɛle wɔ nwo lɔen, bɛfale wɔ mmeraa ne bɛtole ahameɛ, na wɔ ngɔmhyɛlɛfoɛ bɔ bɛbɔle bɛ kɔkɔ kyɛ besa beeli wɔ si ne, behuhuni bɛ maa ɔnate so bɛbɔle musue mbiri mbiri paa.

Edwein 17:8

Bɔ me nwo waen kyɛ sona nye kyiremvua; fa me fea wɔ ndaa ne abo fɔnwoo ne anu.

Edwein 36:7

Ao Nyameɛ, wɔ ɔdɔ bɔ onni ngasi ne, kyɛbɔ ye nwo osi le mvasoɛ ɔ! Na adasa mmaa bɛnwati bɛbafea wɔ ndaa ne abo fɔnwoo ne anu.

Edwein 57:1

Nwu me anwumvoin, ao Nyameɛ, nwu me anwumvoin, ofikyɛ wɔ nu yeɛ me kra nwati bafea ɔ; wɔ ndaa ne abo fɔnwoo ne anu yeɛ menwati mebafea ɔ, kɔpem kyɛ asetena nu mvrama piri ne abo kɔpɛ nu kɔhɔ ɔ.

Edwein 63:7

ofikyɛ wɔ yeɛ ɛte me bokafoɛ ɔ, na wɔ ndaa ne abo fɔnwoo ne anu yeɛ medi ahurusi ɔ.

Edwein 91:4

Ɔkɔfa ye ndɛkra kɔkata wɔ so, na ye ndaa ne abo yeɛ ekonya afealeɛ ɔ; ye nahorɛlilɛ ne te akokyɛm ne buralɛ ataadeɛ.

Yesaya 5:4

Nzikyɛ bieku yeɛ ahaa odi kyɛ meyɔ ye me bobe boo ne anu bɔ manyɔ ɔ? Mvale me nye ndole so kyɛ okosu mmaa paa, nzu ati yeɛ wasu mmaa bisii ɔ?

Yesaya 50:2

Mmale ne, nzu ati yeɛ né sona biala nne berɛ ɔ? Mvrɛle ne, aso né sona biala nne berɛ bɔ okosuro ɔ? Aso me sa te tikaape bɔ ɔngɔhora ngɔpepɛ ngole ɛmɔ ɔ? Anaakyɛ, nnne tumi bɔ mefa mepepɛ mede ɛmɔ anaa? Ɛ́mɔtie, metwi ɛpo nyunu maa ɔwewe, mema asue mɔ bɛkakyi aseɛ pralaa, na ɔnate kyɛ bɛ nu naen bennya nzue ti, nzuhɔen ku bɛ maa bewu bɛporɔ.

Yeremia 2:30

Ɛhwenɛ bɔ mahwe ɛmɔ mma mɔ bɛ so ne, wayɛ mbaen, bande fo. Ɛmɔ bɔbɔ ɛmɔ ngrandɛ yeɛ wahũ ɛmɔ ngɔmhyɛlɛfoɛ kyɛ gyata bɔ ye nye aboro ɔ.

Yeremia 26:23

na bɛɛhyele Yuria befili Misraim bɛfale ye bɛbrɛle Nana Yehoakim. Ɔfale ngrande huni Yuria, na ogyili ye fuin ne tole maen asieleɛ so.

Yeremia 32:31

Ofikyɛ, ofi kyẽa bɔ bɛkyekyele kuro he toonn bɔ ɔbaadwu ɛnɛ ɔ, me yaafɛlɛ ne m’ahonehulɛ alaa yeɛ kuro he amaa wadwɔso ɔ. Ye sɔ ne ati, ngɔsɛkye ye ngofi me nye so,

Yeremia 35:15

Mahɔ so masoma me somvoɛ ngɔmhyɛlɛfoɛ amukoraa wɔ ɛmɔ berɛ dee kyɛ, ‘Odi kyɛ ɛmɔ anu biala sakyera ye adwene wɔ ye bɔne atee nwo, ná ɔbɔ bra paa; na nnɛma ɛmɔkodi nyameɛ foforɛ mɔ si bɛso bɛ, amaa ɔnate so ɛmɔatena aseɛ bɔ mva mane ɛmɔ ne ɛmɔ nana mɔ ne aso. Nakoso ɛmɔanyɛ asoɛ bandie me dwirɛ.

Yeremia 36:26

Yeɛ ɛhene ne fale ahyɛdeɛ mane ɔwa bienzua Yerameel ne Seraya bɔ ye baba ole Asriɛl ne Selemia bɔ ye baba ole Abideel ne kyɛ bɛɛhye ahyerɛlɛniɛ Baruku ne ngɔmhyɛlɛniɛ Yeremia bɛbra, nakoso AWURADE fale bɛ feale.

Yeremia 4:14

Ao Yerusalem, nwunzi w’ahone nwo fi bɔne nu, amaa ɔnate so anya wɔ ti adidi nu. Ɔkwaadwu kyinzu yeɛ ɛkɔhɔ so kɔdwene bɔne adwene ɔ?

Yeremia 44:4

Nakoso ndoale so nzomane me somvoɛ ngɔmhyɛlɛfoɛ amukoraa wɔ ɛmɔ berɛ kyɛ beese ɛmɔ kyɛ, ‘Ao, nnɛma ɛ́mɔyɔ musue nikye he bɔ mekyi ne!’

Yeremia 6:8

Ao Yerusalem, fa ɛhe tu wɔ nwo foɛ, wanyɛ sɔ a, me kra kɔhwe ye nwo kofi wɔ nwo, na ngɔmaa ɛkɔkakyi kurofoen, aseɛ bɔ sona biala ɔtte so ɔ.

Hosea 11:2

Na ngu so bɔ mefrɛ bɛ ne, né me nwo ala yeɛ befi bɛkɔ ɔ. Bɛbobɔle afɔleɛ mɔ bɛmane Baal mɔ, na bɛyerale ɛyɛɛ bɛmane amoen mɔ.

Hosea 11:7

Me maen asi bɛ hue kyɛ bɛtwe bɛ nwo befi me nwo, ɔwɔ nu kyɛ bɛfrɛle bɛ kyɛ bɛhã bɛhɔ Anwuro Anwuroniɛ ne anwo, nakoso bɛ nu biala wangamvo ye.

Hosea 7:13

Bɛ yaakɔ oo! Ofikyɛ banwati bafi me nwo bahɔ. Amaneɛ ato bɛ, ofikyɛ bayɛ me nwo lɔen. Ahaa mekuro kyɛ mepepɛ mede bɛ, nakoso bɛpepɛ me nwo ngondombo.

Sakaria 1:4

Nnɛma ɛmɔyɛ kyɛ ɛmɔ nana mɔ, bɔ ngɔmhyɛlɛfoɛ bɔ belili moa nemɔ bɔle edwirɛ ne dawure behyirele bɛ kyɛ, ‘Asafo AWURADE nwa nyoo: Ɛmɔhwe ɛmɔ nwo befi ɛmɔ bɔne atee ne ɛmɔ bɔne yɔleɛ nwo,’ ne. Nakoso bandie, yeɛ bandɛ me so, AWURADE noa dwirɛ ɛne.

Mateo 22:3

Na ɔsomane ye somvoɛ mɔ kyɛ bɛɛfrɛfrɛ bɛ bɔ wato ye sa wafrɛ bɛ kyɛ bɛbra atɔmvorɛ ne abo ne, nakoso bambene so kyɛ bɛkɔwa ɔ.

Mateo 22:6

yeɛ bɛ ngaa ne wora bɛhyele ye somvoɛ nemɔ beguale bɛ nyunu ase, na behuni bɛ.

Mateo 23:30

na ɛmɔkã kyɛ, ‘Sɛ né yɛte ase yɛ mbanyi mɔ aberɛ so a, ahaa yɛngɔboka bɛ so ma bengohwie ngɔmhyɛlɛfoɛ mɔ bɛ mogya bengogua.’

Mateo 23:31

Yiti ɛmɔdi adanzeɛ betia ɛmɔ nwo, kyɛ ɛmɔte bɛ bɔ behuhuni ngɔmhyɛlɛfoɛ nemɔ ne bɛ bosofoɛ.

Mateo 5:12

Ɛ́mɔma ɛmɔ nye gye ná ɛ́mɔli ahurusi, ofikyɛ ɛmɔ akatuaa sone wɔ nyameɛso. Ofikyɛ sɔ ala yeɛ bɛtanene ngɔmhyɛlɛfoɛ bɔ belili ɛmɔ nyunu moa nemɔ nye ɔ.

Luka 15:28

“Nakoso ɔfɛle yaa, na wanguro kyɛ ɔkɔhɔ awuro berɛ ɔ. Yiti ye baba fite wale ɔɔkorɔkorɔle ye kyɛ ɔbra awuro.

1 Tɛsalonikafoɛ 2:15

Bɛ yeɛ behuni Awurade Yesu ne bɛ bɔbɔ bɛ ngɔmhyɛlɛfoɛ nemɔ ɔ, ná bɛtanene yɛ nye maa yɛnwatili ɔ. Bɛnzɔ Nyameɛ nye, yeɛ bɛko betia mmenia amukoraa.

Nyekyire 17:6

Na nwuni kyɛ anwoteefoɛ mogya ne Yesu adanzefoɛ mogya wabo braa ne; na nwuni ye nen, ɔyɛle me nwanwa paa.

Rutu 2:12

Bɔ ayɔ ye, mesrɛ kyɛ AWURADE ɔma wɔ ye nwo akatuaa. AWURADE Yisrael Nyameɛ, bɔ aabɔ wɔ nwo adwaa wɔ ye ndaa bo ne, mesrɛ kyɛ ɔma wɔ akatuaa mmorosoɛ.”