Malaki 3:7 - AHYERƐLƐ KRONGRON

⁷ Ofi ɛmɔ nana mɔ aberɛ so yeɛ ɛmɔali me nhyehyɛleɛ nwo makyebu bɔ ɛmɔanni so ɔ. Ɛ́mɔsa bɛbra me berɛ, na me koso ngosa ngɔwa ɛmɔ berɛ, Asafo AWURADE noa dwirɛ ɛne. Nakoso ɛmɔnwa: ‘Ɔkɔyɛ sɛɛ né yasa yawa?’

Malaki 3:7 Iomraidhean Croise

Nehemia 9:26

“Nakoso bɛyɛle asoserɛ, na bɛyɛle wɔ nwo lɔen, bɛfale wɔ mmeraa ne bɛtole ahameɛ, na wɔ ngɔmhyɛlɛfoɛ bɔ bɛbɔle bɛ kɔkɔ kyɛ besa beeli wɔ si ne, behuhuni bɛ maa ɔnate so bɛbɔle musue mbiri mbiri paa.

Yesaya 65:2

Ndrɛtrɛle me sa nu daa mukoraa mane maen bɔ wayɛ lɔen ne, bɔ bɛnate atee bɔ ɔtte mayee so, bɔ bedi bɛ bɔbɔ bɛ ti piri ne;

Yeremia 16:11

ye de se bɛ kyɛ, ‘Ɔnate kyɛ ɛmɔ nana mɔ apo me, AWURADE noa dwirɛ ɛne; baali nyameɛ foforɛ mɔ si baso bɛ basɔne bɛ, na bapo me, yeɛ banni me mmeraa so,

Yeremia 16:12

na ɔnate kyɛ ɛmɔayɔ bɔne batra ɛmɔ nana mɔ ne ati ɔ. Na afei ɛ́mɔtie, ɛmɔ amukoraati ɛmɔdi ɛmɔ ti piri bɔ ɛmɔndie me dwirɛ ɔ.

Yeremia 3:22

Ao mmaa asoserɛfoɛ, ɛ́mɔsa bɛbra, na ngɔsa ɛmɔ asoserɛ ne anwonyerɛ. Yɛsrɛ wɔ, yɛba wɔ berɛ, ofikyɛ wɔ yeɛ ɛte AWURADE yɛ Nyameɛ ɔ.

Yeremia 7:25

Ofi kyẽa bɔ ɛmɔ nana mɔ befili Misraim aseɛ so bɛwale bɔ ɔbaadwu ɛnɛ ɔ, mahɔ so masoma me somvoɛ ngɔmhyɛlɛfoɛ amukoraa dee wɔ ɛmɔ berɛ,

Yeremia 7:26

nakoso bandie me dwirɛ, yeɛ bandɛ me so, na mmom bɛsoale bɛ kɔme so kyeinn. Bɛyɔle bɔ ɔtte mayee bɛtrale bɛ nana mɔ.

Hesekiel 2:3

Osele me kyɛ, “Sona awa, mésoma wɔ wɔ Yisraelfoɛ berɛ, ɛlɔenyɛlɛ maen bɔ bayɛ me nwo lɔen ne berɛ; bɛ ne bɛ nana mɔ yeɛ batiatia me mmeraa so maa waadwu ɛnɛ ɔ.

Hesekiel 20:13

Nakoso Yisrael awuro ama yɛle me nwo lɔen wɔ ɛserɛ ne aso; banni m’ahyɛdeɛ so, na mmom bɛpole me mmeraa bɔ sɛ sona di so a onya ngoa ne; na beguale m’afofingyẽa nemɔ nwo fiɛ piri paa. “Yeɛ ngane kyɛ: Ngɔma m’ahone kohu bɛ so wɔ ɛserɛ ne aso, ná mahuhu bɛ.

Hesekiel 20:21

Nakoso mmaa nemɔ yɛle me nwo lɔen; banni m’ahyɛdeɛ so, yeɛ me mmeraa ne bɔ sona di so a onya ngoa ne, ye koso banni so; na m’afofingyẽa ne koso, beguale bɛ nwo fiɛ. Yiti ngane kyɛ: Ngɔma m’ahone kohu bɛ so, na ngɔma me yaafɛlɛ ne kɔyɔ bɛ nwo adwuma koyie wɔ ɛserɛ ne aso.

Hesekiel 20:28

Ofikyɛ, aseɛ bɔ ndale ye nwo ndaen kyɛ ngɔfa ngɔma bɛ ne, mvale bɛ mmale so nen, nekaa biala bɔ benwuni pambaa tendenn biala, anaa bakaa pusaa biala nen, bɛbɔle b’afɔleɛ wɔ berɛ, na bɛfale b’ayɛyɛdeɛ bɔ bɛfa bɛba ne behuli m’ahone. Berɛ yeɛ bɛbɔle ɛyɛɛ fonafona afɔleɛ, ná bɛbɔle bɛ nzaa afɔleɛ ɔ.

Hesekiel 20:8

Nakoso bɛyɛle me nwo lɔen, bɔ bandɛ me so ɔ. Bɛ nu biala wangyi akyiwadeɛ nningyein bɔ ye nye gye ye nwo ne wangua, yeɛ banyakyi Misraim mmosoen sɔnenɛ. Yiti ngane kyɛ ngɔma m’ahone kohu bɛ so, bɔ me yaafɛlɛ ne kɔyɔ bɛ nwo adwuma koyie ɔ, wɔ Misraim aseɛ so.

Hosea 14:1

Ao Yisrael, sa bra AWURADE wɔ Nyameɛ berɛ, ofikyɛ w’amumuyɛɛ amaa afi ase.

Sakaria 1:3

Yiti se bɛ kyɛ, Asafo AWURADE nwa nyoo: Ɛmɔsa bɛbra me berɛ, Asafo AWURADE noa dwirɛ ɛne, na me koso ngosa ngɔwa ɛmɔ berɛ, Asafo AWURADE noa dwirɛ ɛne.

Malaki 1:6

Baa di ɔse ni, yeɛ akoaa di ye mene ni. Na sɛ nde Seɛ de a, né nzaade m’anidie wɔ nisua? Na sɛ nde meneɛ de a, né nzaade esurolɛ bɔ besuro me ne ɔwɔ nisua? Ɛmɔ, asɔfo mɔ bɔ ɛmɔbu me dumaa animtia ɔ, bɔ Asafo AWURADE ose ɛmɔ hɔ ɛne. Nakoso ɛmɔbisa kyɛ, ‘Atee beni aso yeɛ yabu wɔ dumaa animtia ɔ?’

Malaki 3:13

“Ɛmɔkekã edwirɛ yeayea betia me, AWURADE noa dwirɛ ɛne. Nakoso ɛmɔbisa kyɛ, ‘Nzikyɛ dwirɛ yealɛ yeɛ yahã yatia wɔ ɔ?’

Mateo 23:27

“Ahyerɛlɛfoɛ ne Farasiifoɛ, ɛmɔ yaakɔ! Nyaatwomfoɛ! Ofikyɛ, ɛmɔte kyɛ asieleɛ bɔ bafa ewure bahura ye nwo ɔ, bɔ ye nwo bɔ enwu ye ne ɔyɛ nyemene, nakoso nu dɔ de, efuin mmowue ne efiɛ amukoraa ayi ye tɛkyɛ.

Luka 15:16

Na ye komvi wale so kyɛ onya aleɛ bɔ mbrako nemɔ bedi ne bie a ahaa okoli kɔma ye ko koyi; nakoso ebiala amma ye bie.

Romanfoɛ 10:21

Na ɔfa Yisrael nwo de, ɔhane kyɛ, “Alehyeleɛ biala, matrɛ me sa nu kyɛ ngole asoserɛfoɛ mmenia bɔ bayɛ me so lɔen ɔ.”

Romanfoɛ 10:3

Ofikyɛ bɛnze atee bɔ Nyameɛ fa so siesie ye ne mmenia b’afia ɔ, na mmom bɛyɛle kyɛ bɛkɔfa bɛ bɔbɔ bɛ tenenee atee so; yiti bammrɛ bɛ nwo ase bamma Nyameɛ atee bɔ ɔfa so yɛ kuro sona teneneeniɛ ne.

Romanfoɛ 7:9

Makwati mmeraa ne matena ase le; nakoso mmeraa ne wale nen, bɔne tingyele na nwuli.

Deuteronomi 31:20

Ofikyɛ, mefa bɛ mekodwu aseɛ bɔ nyɔfonesue ne woɛ tengyɛ wɔ so, bɔ ndale ndaen kyɛ ngɔfa ngɔma bɛ nana mɔ ne aso, ná bedidi ma bɛ ko yi, ná bɛyɛ mbiri mbiri a, bekooli nyameɛ foforɛ biemɔ si bɛkɔso bɛ, bɛkɔpo me, ná babu m’apam ne aso.

Yakobo 4:8

Ɛmɔhwe bepingye Nyameɛ, na ye koso ɔkɔhwe kopingye ɛmɔ. Ɛmɔ, bɔnefoɛ mɔ, ɛ́mɔnwunzi ɛmɔ sa, ná ɛ́mɔte ɛmɔ ahone nu, ɛmɔ bɔ ɛmɔ adwene yɛ ɛmɔ ndaa ndaa ɔ!