Malaki 3:5 - AHYERƐLƐ KRONGRON

⁵ “Na afei ngɔhwe ngopingye ɛmɔ ngobua ndɛen. Ngoli adanzeɛ ndɛndɛ so ngotia ngonyaayelɛfoɛ, agyaasɛkyelɛfoɛ, bɛ bɔ bɛta ngondombo ndaen, bɛ bɔ besisi paafoɛ wɔ b’akatuaa nwo, bɛ bɔ bedi kunafoɛ ne nyisiaa aminɛ, bɛ bɔ besisi ɛwɔfoɛ ná benzuro me ɔ, Asafo AWURADE noa dwirɛ ɛne.

Malaki 3:5 Iomraidhean Croise

Gyenesise 20:11

Na Abraham buale kyɛ, “Né menwa nzɛ ɛwa ama nzuro Nyameɛ koraa, na me ye ne ati bekohu me.

Gyenesise 42:18

Ɛlɛsa ne aso, Yosef sele bɛ kyɛ, “Ɛ́mɔyɔ ɛhe na ɛmɔanya bɛ ti badidi nu, ofikyɛ mesuro Nyameɛ:

Nehemia 5:15

Amrado mɔ bɔ belili me nyunu moa ne de, bɛfale anwokyere kandinga paa yeɛ bɛtole maen ne aso ɔ. Bedidele aleɛ ne nzaa befili mmenia ne berɛ, asora ɛdwetɛ sekel aburanna ne koso. Bɛ somvoɛ nemɔ po, bɛyɛle maen ne aso abakomasɛm. Nakoso me de, manyɔ sɔ, ofikyɛ mesuro Nyameɛ.

YOB NWOMAA NE 31:12

ofikyɛ ahaa ye de ɔte see bɔ ɔyera alaa kodwu Abadɔn ɔ, ahaa ɔkɔyera me fieso nningyein amukoraa kotu ye bo.

YOB NWOMAA NE 7:2

Ɔte kyɛ kanganiɛ bɔ ɔpena fɔnwoo nu tena ɔ, ɔte kyɛ paaniɛ bɔ ɔnwondɛ ye akatuaa ɔ.

Edwein 36:1

Amumuyɛɛ dwudwo kyire bɔnefoɛ wɔ ye ti anu; bɔnefoɛ nye so de, Nyameɛ nwo nyɛ suro.

Edwein 81:8

Me maen, ɛ́mɔtie maa ndu ɛmɔ foɛ. Ao Yisrael, sɛ ahaa ekotie me dwirɛ a!

Edwein 96:13

wɔ AWURADE nyunu, ofikyɛ ɔ́ba, ɔbaabua aseɛ so ama ndɛen. Ɔkɔfa tenenee yeɛ okobua wiase ndɛen ɔ, na ɔkɔfa ye nahorɛlilɛ yeɛ okobua maen maen mɔ ndɛen ɔ.

Edwein 98:9

wɔ AWURADE nyunu, ofikyɛ ɔ́ba, ɔbaabua aseɛ so ama ndɛen. Ɔkɔfa tenenee yeɛ okobua wiase ndɛen ɔ, yeɛ ɔkɔfa ye pɛpɛɛpɛyɛlɛ yeɛ okobua maen maen mɔ ndɛen ɔ.

Ɛksadɔso 1:17

Nakoso né mmrasua bɔ bede aworɛ ne suro Nyameɛ, yiti banyɔ bɔ Misraim hene hyɛle bɛ kyɛ bɛyɔ ne, na mmom bɛmane mmienzua nemɔ nyane bɛ ti didili nu.

Ɛksadɔso 18:21

Afei koso, neanea mmenia ne amukoraa nu, ná ye mmenia bɔ bɛfata, bɔ besuro Nyameɛ, bɔ bedi nahorɛ, bɔ bekyi fea-ase-ma, ná maa bɛlela mmenia apee apee, ɛyaa ɛyaa, aburannu aburannu ne buru buru noa.

Ɛksadɔso 20:7

“Nnɛbɔ AWURADE wɔ Nyameɛ dumaa mbaen mbaen; ofikyɛ ebiala bɔ ɔkɔbɔ AWURADE dumaa mbaen mbaen ne, ɔngɔma ɔngɔfa ye nwo ngoli tɔtorɔtɔɔ.

Ɛksadɔso 22:20

“Sona biala bɔ ɔkɔbɔ afɔleɛ kɔma bosoen, bɔ wammɔ wamma AWURADE ngome twe nen, ɔsɛ kyɛ beku ye korakorakorakora.

Anyandera 16:6

Bɛfa pɛpɛɛpɛyɛlɛ ne nahorɛlilɛ yeɛ bɛyɛ bɔne nwo mbata ɔ, na AWURADE surolɛ yeɛ ɔma sona twe ye nwo fi bɔne nwo ɔ.

Anyandera 8:13

Esuro AWURADE a, né ekyi bɔne: mekyi anwomasoɛ ne ahandaen, bɔne yɔleɛ ne ngondombopɛlɛ.

Yesaya 57:3

Nakoso ɛmɔ de, bayifoɛ brasua mma, ɛ́mɔpingye wa, agyaasɛkyelɛniɛ ne gyanderaniɛ bosofoɛ.

Yeremia 23:10

Ofikyɛ agyaasɛkyelɛfoɛ bayi aseɛ ne aso to; ɔnate ɛnomalɛ ne ati, aseɛ ne bɔ awuye, na ɛserɛ ne aso nekaa bɔ ngaka didi ne, berɛ ayɛ pralaa. B’atee te bɔne, na b’anwoserɛ ne ɔtte mayee.

Yeremia 27:10

Ofikyɛ ngɔndorɔ yeɛ bedi bekyire ɛmɔ ɔ, kyɛbɔ ɔkɔyɛ bɔ bekotu ɛmɔ bo bekofi ɛmɔ aseɛ so maa ɛmɔkɔhɔ dedeede ɔ; kyɛbɔ ɔkɔyɛ bɔ ngɔfoa ɛmɔ ngofi ɛwa maa ɛmɔkowuwu ɔ.

Yeremia 27:9

Yiti, nnɛma ɛmɔtie ɛmɔ ngɔmhyɛlɛfoɛ, ɛmɔ ahɔmeɛ, ɛmɔ mmenia bɔ bekyirekyire laleɛ bo, ɛmɔ ngonyaayelɛfoɛ, anaa ɛmɔ musueyelɛfoɛ bɔ bɛkekã bekyire ɛmɔ kyɛ, ‘Ɛmɔngɔso Babilɔn hene’ ne.

Yeremia 29:23

ofikyɛ bali ngwaseasɛm wɔ Yisrael, na bɛ ne bɛ mmango mɔ aye mɔ bala, na bafa me dumaa bahã ngondombo dwirɛ, bɔ mamva ye nwo ahyɛdeɛ mamma bɛ ɔ. Me yeɛ mese, ná nde adanzeniɛ ɔ, AWURADE noa dwirɛ ɛne.’ ”

Yeremia 42:5

Yeɛ besele Yeremia kyɛ, “AWURADE ɔ́yɛ y’afia danzeniɛ nahorɛniɛ turoloo, sɛ AWURADE wɔ Nyameɛ dwirɛ amukoraa bɔ wafa wasoma wɔ kyɛ ɛhã hyire yɛ ne, sɛ yanni so pɛpɛɛpɛ a.

Yeremia 5:2

Ɔwɔ nu kyɛ bɛta ndaen kyɛ, “Kyɛ AWURADE te ase ye” de, nakoso ngondombo ndaen yeɛ bɛta ɔ.

Yeremia 5:29

Aso onni kyɛ metwe bɛ so wɔ sɔ nningyein hemɔ nwo anaa? AWURADE noa dwirɛ ɛne. Na maen bɔ ɔte sɔaa, onni kyɛ metɔ bɛ so wereɛ anaa?”

Lewitikɔso 19:13

“Nnɛdi ebiɛngo ndurum, nnɛwua ye, yeɛ nnɛfa paaniɛ akatuaa wura wɔ nwo ma aleɛ kye so.

Lewitikɔso 20:10

“Sɛ bienzua bie ne obiɛngo aye bɛbɔ adwaman a, odi kyɛ beku bienzua ne ɔne brasua bɔ babɔ adwaman ne bɛ munyɔ.

Lewitikɔso 20:27

“Bienzua anaa brasua bɔ ɔte nzamangɔmhyɛlɛniɛ anaa kɔmeɛ ne, odi kyɛ beku ye ɔ; bɛ́boro bɛ nyɔboɛ béhu bɛ, na bɛ wue kɔbɔ bɛ ti so.”

Lewitikɔso 20:6

“Na ebiala bɔ ɔkɔhɔ nzamangɔmhyɛlɛfoɛ ne ahɔmeɛ so, ná okoli bɛ si ne, ngotu me nye ngosie sɔ sona ne aso, na ngɔpɛ ye asue ngofi ye maen nu.

Mika 1:2

Ɛ́mɔtie, maen maen mɔ amukoraa; ao aseɛ ne bɔ ɔwɔ so amukoraa, ɛ́mɔyɛ asoɛ bétie, mesrɛ kyɛ AWURADE Nyameɛ ooli adanzeɛ otia ɛmɔ; kyɛ AWURADE ófi ye asɔneyɛɛ sua krongron ne anu yeɛ ɔ́yɔ sɔ ɔ.

Habakuku 1:12

Ao, AWURADE me Nyameɛ, me Krongronniɛ, aso nna wɔ yeɛ ɛwɔ berɛ fi tetetete bɔ olle ahyɛaseɛ ɔ? Yɛngowu. Ao AWURADE, atu bɛ asie berɛ kyɛ bebua yɛ ndɛen; ao Nyɔbotaen, ama bɛ bo atimu kyɛ bɛhwe yɛ so.

Sakaria 11:12

Yeɛ nzele bɛ kyɛ, “Sɛ ɔte paa ma ɛmɔ a, ye de ɛ́mɔtua me kerɛ; nakoso sɛ ɔtte mayee mma ɛmɔ a, ye de ɛ́mɔyakyi.” Yiti bɛkarili ɛdwetɛ sekel aburasa bɛfa bɛyɛle m’akatuaa.

Malaki 1:6

Baa di ɔse ni, yeɛ akoaa di ye mene ni. Na sɛ nde Seɛ de a, né nzaade m’anidie wɔ nisua? Na sɛ nde meneɛ de a, né nzaade esurolɛ bɔ besuro me ne ɔwɔ nisua? Ɛmɔ, asɔfo mɔ bɔ ɛmɔbu me dumaa animtia ɔ, bɔ Asafo AWURADE ose ɛmɔ hɔ ɛne. Nakoso ɛmɔbisa kyɛ, ‘Atee beni aso yeɛ yabu wɔ dumaa animtia ɔ?’

Malaki 2:14

Na ɛmɔbisa kyɛ, “Nzu ati ɔ?” Hmmm, ofikyɛ, ɛne wɔ mmerandeɛ nu braa ɛmɔ agyaa ne, AWURADE te nu danzeniɛ. Nakoso anni nahorɛ amma ye, ɔwɔ nu kyɛ ɔte w’anwokaniɛ ne w’apam braa de.

Malaki 2:17

Ɛmɔfa ɛmɔ dwirɛ bedwane AWURADE so anu. Nakoso ɛmɔnwa, “Atee beni aso yeɛ yadwane ye so anu ɔ?” Bɔ ɛmɔkã ne, ye ɛhe: “Ebiala bɔ ɔyɔ bɔne ne, ɔte paa wɔ AWURADE nyunu, na ode ye to nu.” Yeɛ ɛmɔbisa kyɛ, “Nyameɛ bɔ obua ndɛen ne, ɔwɔ nisua?”

Luka 23:40

Nakoso ko ne buale ye hwili ye nyunu kyɛ, “Enzuro Nyameɛ hɔ ɔ, kyɛ foɛ komapɛ ne ala yeɛ bafa babua wɔ ɔ?

Romanfoɛ 3:8

Ebiemɔ to yɛ soen kyɛ yɛnwa, “Ɛ́mɔma yɛyɔ bɔne ná paa fi nu bra.” Na bekobua bɛ ye nwo ndɛen kyɛbɔ ɔfata ɔ.

Deuteronomi 15:13

Na sɛ ɛ́maa ɔfa ye nwo di tɔtorɔtɔɔ fi wɔ berɛ kɔ a, nnɛmaa ɔfa nzanza kɔ.

Deuteronomi 18:10

Ɔnzɛ kyɛ benwu ebiala wɔ wɔ nu bɔ ɔfa ɔwa bienzua anaa brasua ɔbɔ afɔleɛ wɔ see nu ɔ, anaa bɔ odi ahɔen, anaa ngonyaayelɛniɛ, anaa bayifoɛ, anaa musueyelɛniɛ,

Deuteronomi 24:17

“Nnɛbua ɛwɔfoɛ anaa awisianiɛ ndɛengyea; yeɛ nnɛde kunaniɛ tena fa si wɔ berɛ awowaa.

Deuteronomi 27:19

“ ‘Musue tó sona biala bɔ okobua ɛwɔfoɛ, awisianiɛ anaa kunaniɛ ndɛengyea ɔ.’ Na mmenia ne amukoraa kosuro so kyɛ, ‘Amen!’

Deuteronomi 5:11

Nnɛbɔ AWURADE wɔ Nyameɛ dumaa mbaen mbaen; ofikyɛ ebiala bɔ ɔkɔbɔ AWURADE dumaa mbaen mbaen ne, ɔngɔma ɔngɔfa ye nwo ngoli tɔtorɔtɔɔ.

1 Tɛsalonikafoɛ 4:6

Na ɔnzɛ kyɛ ebiala yɔ oliɛma tɛɛ anaa osisi ye wɔ ɛhe anwo, ofikyɛ yali moa yabɔ ɛmɔ kɔkɔ kitii kyɛ Awurade kɔtɔ ɛhemɔ amukoraa so wereɛ.

Hebrifoɛ 13:4

Odi kyɛ ebiala di agyaa ni, na nnɛma ebiala gua agyaa mba nwo fiɛ, ofikyɛ Nyameɛ kobua adwamanbɔlɛfoɛ ne agyaasɛkyelɛfoɛ ndɛen.

Yakobo 5:12

Aliɛmaa mɔ, ɛhe amukoraa asi ne, nnɛma ɛmɔta ndaen! Nnɛma ɛmɔfa nyameɛso anaa aseɛ anaa nikyee biala bɛta ndaen. Na mmom ɛ́mɔma ɛmɔ “Yoo” yɛ yoo, ná ɛmɔ “Daabi” yɛ daabi, ná bammua ɛmɔ foɛ.

Yakobo 5:4

Ɛ́mɔtie! Apaafoɛ bɔ bɛyɔle ɛmɔ fieso adwuma ne, b’akatuaa bɔ ɛmɔnate asisie so bɛfa besiele ne, ɔtea nu; na bɛ bɔ bɛtele ɛmɔ fieso nnɔbaeɛ ne, bɛ suɛ ne waadwu Asafo Awurade so anu.

Nyekyire 21:8

Na bɛ bɔ bɛte serɛ, bɛ bɔ benne benni, akyiwadeɛyɔlɛfoɛ, awudifoɛ, adwamanbɔlɛfoɛ, ngonyaayelɛfoɛ, bosoensolɛfoɛ ne ngondombofoɛ amukoraa de, abura bɔ see ne sɔfe begye wɔ nu ne anu yeɛ ɔkɔyɛ bɛ bue deɛ ɔ, na ewue bɔ ɔtɔ so nyɔ ne ɛhe.”

Nyekyire 22:15

Na kuro ne asi dɔ yeɛ ngyea, ngonyaayelɛfoɛ, adwamanbɔlɛfoɛ, awudifoɛ, bosoensolɛfoɛ ne bɛ bɔ bekuro ngondombopɛlɛ ná bɛpɛ ɔ bɛ mukoraa bɛwɔ ɔ.