Malaki 1:10 - AHYERƐLƐ KRONGRON

¹⁰ O, ɛmɔ nu nwa yeɛ ɔkɔɔtoto anoa nemɔ anu ɔ, amaa ɔnate so ɛmɔangɔ anzɔ m’afɔleɛ bokyea ne aso see mbaen. Me kunu ndwo wɔ ɛmɔ nwo, yeɛ mengole ɛmɔ sa nu afɔleɛ ne, Asafo AWURADE noa dwirɛ ɛne.

Malaki 1:10 Iomraidhean Croise

2 Ahemvo 12:6

Nakoso Yehoase lili hene ne, ye afoɛ aburanyɔ ne nza ne anu, né asɔfo nemɔ bennya bɛyyɔle awuro ne nekaa biala yé.

Anyandera 15:8

Bɔnefoɛ afɔleɛ te AWURADE akyiwadeɛ, nakoso teneneefoɛ mbaeɛ de, ɔte ye nikyee bɔ ye nye gye ye nwo ɔ.

Yeremia 14:10

Bɔ AWURADE kã kyire sɔ maen ye ɛhe, “Ɔyɛ bɛ fɛ kyɛ bekyinikyini ɔ, bɛnhyɛ bɛ nwo so wɔ bɛ hyininɛ nu. Yiti AWURADE nne bɛ ndo nu, afei ɔkɔkaye b’amumuyɛɛ, ná wahwe bɛ so wɔ bɛ bɔne nwo.”

Yeremia 14:12

Sɛ bɛyɔ akɔngyere a, mengotie bɛ sufrɛ. Yeɛ sɛ bɛbɔ naen yeralɛ afɔleɛ ne aburoo afɔleɛ po a, mengole bɛ mengɔto nu. Na mmom ngɔfa ngrandɛ, ɛhɔen ne ewue anwonyerɛ ngohũhũ bɛ pasapasa.”

Yeremia 6:13

Ofikyɛ ofi bɛ nu kwahweabaa mɔ so bɔ ɔkwaadwu bɛ nu titire paa mɔ so ɔ, apoobɔlɛ ali ebiala ti; ofi ngɔmhyɛlɛniɛ so bɔ ɔkwaadwu ɔsɔfo so po, ebiala nga nahorɛ.

Yeremia 6:20

Ɛyɛɛ bɔ bɛ ne ye fi Hyeba bɛba, yeɛ ayirefona bɔ bɛ ne ye fi dedeede maen bie aso bɛba ne, aso bɛ nwo le mvasoɛ ma me? Me nye ngye ɛmɔ ɛyeralɛ afɔleɛ nemɔ anwo, yeɛ ɛmɔ afɔleɛ mɔ koso bɛnzɔ me nye.

Yeremia 8:10

Yiti ngɔfa bɛ ye mɔ ngɔma mmenia foforɛ, ná mafa bɛ boo mɔ mama bɛ pɔfoɛ mɔ, ofikyɛ ofi kwahweabaa so bɔ ɔkwaadwu atitire paa so, bɛ mukoraa bedi aminɛ; ofi ngɔmhyɛlɛniɛ so bɔ ɔkwaadwu ɔsɔfo so, ebiala nate ngondombo atee so.

Hosea 5:6

Bɛkɔfa bɛ mmoaen kure ne bɛ nandwie kure bɛkɔhɔ kyɛ bɛkwaapena AWURADE. Nakoso bengonwu ye; wahwe ye nwo wafea bɛ.

Mika 3:11

Bɛ nu mbanyi mɔ bede fea-ase-ma bebua ndɛengyea, nu asɔfo mɔ koso bɛyɛ ngyerɛkyerɛ bede paa, yeɛ nu ngɔmhyɛlɛfoɛ nemɔ, bɛhyɛ ngɔm bede sikaa’. Nakoso bɛfa bɛ nwo bɛto AWURADE so bɛkã kyɛ, “Aso AWURADE oggyi yɛ si? Musue biala ngɔto yɛ.”

Malaki 1:13

Ɛmɔsa bɛkã kyɛ, Eh, nzikyɛ ɛfɛɛ ɛhe? Na ɛmɔsobi bɛ noa begua so, Asafo AWURADE noa dwirɛ ɛne. Kaka bɔ ɛmɔali aminɛ banya ye, anaa kaka bɔ wabubu, anaa bɔ ɔnde apɔ ɔ yeɛ ɛmɔfa bɛbabɔ afɔleɛ ɔ. Aso odi kyɛ mede ɛhe mefi ɛmɔ berɛ anaa? Asafo AWURADE noa dwirɛ ɛne.

Malaki 2:12

Na bienzua biala bɔ ɔyɔ sɔ, kyɛ okyirekyire oo, anaa osua oo, AWURADE konua ye boso ama mukoraa bɛ bo kofi Yakob ɛtena sua nu, bɔ ebiala ngɔha bɔ ɔkɔfa afɔleɛ kɔbrɛ Asafo AWURADE ɔ.

Malaki 2:13

Nikyee bieku bɔ ɛmɔsa bɛyɔ ɛhe: ɛmɔfa ɛmoenporolɛ, esuɛ ne awuyebɔlɛ bɛkata AWURADE afɔleɛ bokyea ne aso; ofikyɛ onne afɔleɛ ne ndo nu ko, yeɛ ye nye nzɔ bɔ ofi ɛmɔ berɛ ne ko.

Yohane 10:12

Nakoso paaniɛ bɔ nna ye ole mmoaenneafoɛ ne, bɔ mmoaen ne bɛtte ye deɛ nen, sɛ onwu kyɛ pataku ba a, ɔyakyi mmoaen ne berɛ nwati; na pataku ne bakye bɛ, na ɔbɔ bɛ sande.

1 Korintofoɛ 9:13

Aso ɛmɔnze, kyɛ bɛ bɔ bɛyɔ nningyein krongron nemɔ nwo adwuma ne, benya bɛ noa aleɛ befi asɔneyɛɛ sua ne anu ɔ? Yeɛ bɛ bɔ bɛso wɔ afɔleɛ bokyea ne anwo ne, benya afɔleɛbɔlɛ nningyein ne bie ɔ?

Filipifoɛ 2:21

Bɛ mukoraa bɛpena bɛ bɔbɔ bɛ deɛ, na mmom nna bɔ ɔte Yesu Kristo deɛ ɔ.

Hebrifoɛ 10:38

Na teneneeniɛ de, ɔnate ye gyidie so yeɛ okonya ngoa ɔ; nakoso sɛ osa ye si de a, me kra nye ngɔgye ye nwo.”

1 Petro 5:2

ɛ́mɔnea Nyameɛ mmoaen kure bɔ owura ɛmɔ sa ne aso, bɔ nna nhyɛsoɛ so ɔ, na mmom kyɛ ɛmɔkofia ɛmɔ kunu bɛkɔnea bɛ so kyɛbɔ Nyameɛ pena ɔ; bɔ nna adifuu ti ɔ, na mmom kyɛ ofi ɛmɔ ahone nu ti ɔ;