Maenbulɛfoɛ 8:10 - AHYERƐLƐ KRONGRON

¹⁰ Né Seba ne Samuna, bɛ ne bɛ koɛhonɛfoɛ kɔyɛ apee buru ne nnu bɛwɔ Kakɔɔ. Eyia afiteleɛfoɛ koɛhonɛfoɛ ne, bɛ ngaa bɔ né baha hɔ ɛne, ofikyɛ né bɛ nu koɛhonɛfoɛ apee ɛyaa ko ne aburanyɔ yeɛ batotɔ ɔ.

Maenbulɛfoɛ 8:10 Iomraidhean Croise

2 Ahemvo 3:26

Moabo hene nwuni kyɛ ɔpena di ngoguo ne, ɔfale koɛhonɛfoɛ ɛyaa nzoo bɔ betiratira ngrandɛ, kyɛ bɛkwaatutu bɛfa Edom hene ndendeneɛ so dɔ bɛnwati bɛkɔ, nakoso bangora.

2 Aberɛso Dwirɛ 13:17

Abiya ne ye koɛhonɛfoɛ nemɔ behuhuni bɛ pasaa, na Yisraelfoɛ bɔ bɛse koɛ ko paa ne, bɛ nu apee ɛyaa nnu totɔle.

2 Aberɛso Dwirɛ 28:6

Remalia awa Peka huhuni mmenia apee ɛyaa ko aburanyɔ, bɔ bɛ mukoraa bɛte koɛhonɛfoɛ ahoneserɛfoɛ ɔ, wɔ Yuda ɛlɛhomapɛ, ofikyɛ né bapo AWURADE bɛ nana mɔ Nyameɛ ne.

2 Aberɛso Dwirɛ 28:8

Yisraelfoɛ bɛhyele b’eliɛma mɔ Yudafoɛ apee ɛyaa nyɔ nnure, bɛ ne bɛ mmrasua, bɛ mma mmienzua ne bɛ mma mmrasua. Besa belele koɛ nu nzesadeɛ pee befili bɛ berɛ bɛfa bɛhɔle Samaria.

Yesaya 37:36

Na AWURADE abɔfo hɔle Asiria asikyeleɛ ne anu oohuhuni koɛhonɛfoɛ apee ɛyaa ko aburawɔtwɛ ne nnu. Na bedwɔsole ngyerɛmɔ tutututu ne, yieee, né efuin ngome yeɛ begua berɛ ɔ.

Yesaya 9:4

Ofikyɛ b’adesoa bɔ ɔso bɛ ne, bakaa bɔ ɔla bɛ kɔme anwo ne, yeɛ mmenia bɔ bɛhyɛ bɛ so nemɔ b’abopura ne, abubu nu kyɛ kyẽa bɔ elili Midian so ngonim ne.

Maenbulɛfoɛ 20:15

Sɔ kyẽa ne, Benyaminfoɛ boaboale koɛhonɛfoɛ apee aburanyɔ ne nzia bɔ betiratira akodeɛ noa befili bɛ nguro nemɔ aso, asora koɛhonɛfoɛ ahoneserɛfoɛ ɛyaa nzoo bɔ befi Gibea ne.

Maenbulɛfoɛ 20:17

Na Yisraelfoɛ, sɛ ɛye Benyaminfoɛ fi nu a, bɛboaboale mmenia apee ɛyaa nna noa, bɔ bɛ mukoraa bɛte koɛhonɛfoɛ ɔ.

Maenbulɛfoɛ 20:2

Na Yisrael mbanyi amukoraa, mbanyi bɔ bɛlela mmusua kure ne amukoraa noa, beegyinane nekaa bɔ Nyameɛ mmenia babɔ dwaa ne. Koɛhonɛfoɛ bɔ betiratira akodeɛ bɔ babɔ dwaa ne, né bɛ somaa te apee ɛyaa nna.

Maenbulɛfoɛ 20:25

Sɔ elenyɔ ne aso, Benyaminfoɛ fili Gibea bɛɛfale koɛ bɛtetale Yisraelfoɛ, na besa behuhuni Yisraelfoɛ bɔ bɛ mukoraa betiratira akodeɛ ɔ apee buru ne mmɔtwɛ.

Maenbulɛfoɛ 20:35

Na AWURADE lili Benyamin so ngonim mane Yisrael. Sɔ kyẽa ne, Yisraelfoɛ huhuni Benyaminfoɛ bɔ bɛ mukoraa betiratira akodeɛ ɔ apee aburanyɔ ne nnu ɔne ɛyaa ko.

Maenbulɛfoɛ 20:46

Yiti Benyamin koɛhonɛfoɛ amukoraa bɔ betiratira akodeɛ, bɔ bɛtotɔle sɔ kyẽa nen, bɛ somaa te apee aburanyɔ ne nnu; bɛ mukoraati bɛte koɛhonɛfoɛ ahoneserɛfoɛ.

Maenbulɛfoɛ 6:5

Ofikyɛ Midianfoɛ ne bɛ nyɛmmoa mɔ bagua berɛ mitimiti kyɛ ngyein, na bɛfa b’ɛtena sua mɔ po bɛboka so bɛba. Bɛ ne b’afupɔngɔ mɔ, sɛ ɛka bɛ po a, ennwu bɛ noa. Yiti bɛba a, bɛsɛkye aseɛ ne aso nningyein amukoraa.

Maenbulɛfoɛ 7:12

Né Midianfoɛ, Amalɛkefoɛ ɔne eyia afiteleɛfoɛ nemɔ bayɛ bɔnza ne anu mitimiti kyɛ ngyein. B’afupɔngɔ mɔ de, bɛka a bennwu ye noa; ne bɛ somaa te kyɛ mboanoa anweaa.

Maenbulɛfoɛ 7:13

Gideon oodwuli berɛ ne, né biaa bie ɔka ye laleɛ nu dwirɛ kyire obiɛngo kyɛ, “Ngyene laleɛ, nwuni kyɛ ayuo paanoo mumua ko amunu waatɔ Midian asikyeleɛ ne anu. Na oodwuli ɛtena sua ne anwo ne, ɔpemone ye maa otu tɔle; ɛtena sua ne gya tuatuale anwuro na ɔsɛkyele bɔkɔɔ.”

Maenbulɛfoɛ 7:22

Behuli totorobɛndo ɛyaa nza nemɔ nen, AWURADE mane Midian koɛhonɛfoɛ nemɔ bɔbɔ bɛpɛle bɛ nwo bɛfale ngrandɛ behuhuni bɛ nwo. Na bɛnwatili toonn beedwuli Bete Sita. Bɛfale bɛ nye behyirele Serera beedwuli Abel Melola wɛen so, bɔ opingye Tabate ne.

Maenbulɛfoɛ 8:11

Yiti Gideon fale teaseɛnam atee bɔ ɔla Noba ne Yobeha eyia afiteleɛ so ne aso, na oofuni koɛhonɛfoɛ nemɔ anu fale koɛ tetale bɛ.